Xurshid Davron. Baroko’h tog’iga chirmashib chiqdim.

gitara

Шавкат Раҳмон билан унинг туғилган юрти — Ўшга уч-тўрт марта борганман.Жўрамнинг ҳовлиси шаҳар четида,Катта Помир тракти бошланадиган йўлнинг устида эди.Ҳозир ҳам кўзимни юмсам,ўша ҳовли шундоқ тасаввуримда пайдо бўлади. Шавкатнинг онаси Офтобхон ая билан суҳбатлашганман,укасини укам деганман. Тошкентдан то Ўшга етгунча Шавкатнинг қизлари Нодира билан Шоира шеър айтиб боришарди.Бир марта устоз Эркин Воҳидов оиласи,Шавкат Раҳмон билан бирга бориб,бутун водийни айланган эдик. Ўшда,Андижонда,Фарғона-ю Наманганда мушоираларда қатнашган эдик.Ўшда Турсунбой Адашбоев,Андижонда ёш шоирлар (ўша пайтда ёш) Қамчибек Кенжа,Исмоил Тўлак,Наманганда Ҳабиб Саъдулла,Фарғонада Йўлдош Сулаймон бизга пешвоз чиқиб,шаҳарма-шаҳар,қишлоқма-қишлоқ айлантиришарди.Андижонда Қорадарё бўйида қўзиқорин терганимиз,Чимёнда юксак бир адир устида жойлашган шийпонда туриб водийни томоша қилганимиз ҳамон ёдимда.
Ўшга борган дастлабки сафар пайтида Шавкат мени Сулаймон (Барокўҳ) тоғига олиб чиққан эди.Сизга ҳавола этаётган шеърим ҳам айни ўша сафар пайтида ёзилган.

Хуршид Даврон

gitara

Хуршид Даврон
БАРОКЎҲ ТОҒИГА ТИРМАШИБ ЧИҚДИМ…
Шавкат Раҳмонга

Барокўҳ тоғига тирмашиб чиқдим,
Ҳарсиллаб,ўрмалаб ёпишдим тошга.
Барокўҳ тоғига тирмашиб чиқдим,
Яқинроқ турай деб қадим қуёшга.

Пастда қолсин дедим дилдаги йиғим,
Пастда қолсин дедим маъюс ўйларим.
Барокўҳ тоғига тирмашиб чиқдим,
Юксакни туйсин деб содда куйларим.

Дедилар:»Шошилма,Бобур уйи йўқ,
Бузганлар кечаси,бузганлар пинҳон».
Дедилар:»Шошилма,Бобур уйи йўқ,
Фақат пойдевори қолгандир омон».

Дедим:»Уйни кўрмоқ асло шарт эмас!».
Дедим дўстларимга тикилиб мағрур:
«Унинг пойдевори омон бўлса,бас,
Уйни бўлса ўзим қилгум тасаввур!».

Уйни бузганлари дилни эзса-да,
Юракни қисса-да чеки йўқ бир ғам.
Кўксим бўғзимдаги тошни сезса-да,
Барокўҳ устида янграр қаҳқаҳам.

Пойдевор омондир,демак,уй омон,
У яна тикланар,токи бор фироқ.
Токи бор бошимда бу қадим осмон,
Токи бор боболар қон тўккан тупроқ.

1985
Ўш шаҳри

gitara

Shavkat Rahmon bilan uning tug’ilgan yurti — O’shga uch-to’rt marta borganman.Jo’ramning hovlisi shahar chetida,Katta Pomir trakti boshlanadigan yo’lning ustida edi.Hozir ham ko’zimni yumsam,o’sha hovli shundoq tasavvurimda paydo bo’ladi. Shavkatning onasi Oftobxon aya bilan suhbatlashganman,ukasini ukam
deganman.Toshkentdan to O’shga yetguncha Shavkatning qizlari Nodira bilan Shoira she’r aytib borishardi. Bir marta ustoz Erkin Vohidov oilasi,Shavkat Rahmon bilan birga borib,butun vodiyni aylangan edik. O’shda,Andijonda,Farg’ona-yu Namanganda mushoiralarda qatnashgan edik.O’shda Tursunboy Adashboev,Andijonda yosh shoirlar (o’sha paytda yosh) Qamchibek Kenja,Ismoil To’lak,Namanganda Habib Sa’dulla,Farg’onada Yo’ldosh Sulaymon bizga peshvoz chiqib,shaharma-shahar,qishloqma-qishloq aylantirishardi.Andijonda Qoradaryo bo’yida qo’ziqorin terganimiz,Chimyonda yuksak bir adir ustida joylashgan shiyponda turib vodiyni tomosha qilganimiz hamon yodimda.
O’shga borgan dastlabki safar paytida Shavkat meni Sulaymon (Baroko’h) tog’iga olib chiqqan edi.Sizga havola etayotgan she’rim ham ayni o’sha safar paytida yozilgan.

gitara

Xurshid Davron
BAROKO’H TOG’IGA TIRMASHIB CHIQDIM…
Shavkat Rahmonga

Baroko’h tog’iga tirmashib chiqdim,
Harsillab,o’rmalab yopishdim toshga.
Baroko’h tog’iga tirmashib chiqdim,
Yaqinroq turay deb qadim quyoshga.

Pastda qolsin dedim dildagi yig’im,
Pastda qolsin dedim ma’yus o’ylarim.
Baroko’h tog’iga tirmashib chiqdim,
Yuksakni tuysin deb sodda kuylarim.

Dedilar:»Shoshilma,Bobur uyi yo’q,
Buzganlar kechasi,buzganlar pinhon».
Dedilar:»Shoshilma,Bobur uyi yo’q,
Faqat poydevori qolgandir omon».

Dedim:»Uyni ko’rmoq aslo shart emas!».
Dedim do’stlarimga tikilib mag’rur:
«Uning poydevori omon bo’lsa,bas,
Uyni bo’lsa o’zim qilgum tasavvur!».

Uyni buzganlari dilni ezsa-da,
Yurakni qissa-da cheki yo’q bir g’am.
Ko’ksim bo’g’zimdagi toshni sezsa-da,
Baroko’h ustida yangrar qahqaham.

Poydevor omondir,demak,uy omon,
U yana tiklanar,toki bor firoq.
Toki bor boshimda bu qadim osmon,
Toki bor bobolar qon to’kkan tuproq.

1985
O’sh shahri

(Tashriflar: umumiy 39, bugungi 1)

Izoh qoldiring