Usmon Azim. «Xamsa»ga tatabbu

02

Таниқли шоир ижодида туркий шеърият султони Ҳазрат Мир Алишер Навоийга бўлган эътиқод салмоқли ўрин тутади. Бу унинг нафақат шоирга ёки унинг асарларига бағишланган шеърларида, балки бошқа жанрдаги асарларида, хусусан драматик асарларида, кўп қисмли телевизион фильм учун ёзилган сценарийсида ҳам намоён бўлганини кўрамиз. Бугун шоирнинг «Хамса»га татаббу» шеърий туркумини эътиборингизга тақдим этамиз.

003
Усмон Азим
«ХАМСА»ГА ТАТАББУ
066

1. ҲАЙРАТ-УЛ АБРОР

Ҳикматни кўп кўрдим бу дайри дунда —
Кулгили бўлмасми бир сирни очсам.
Қуёш томон юрсам — соям ортимда,
Соям олдиндадир қуёшдан қочсам.

2. ФАРҲОД ВА ШИРИН

— Мен ёмон
Сен чинни суйдим…
— Мен ҳам ёмон,
Сен ҳам ёмон.

— Мен ғулом,
Сен ҳурни суйдим…
— Мен ҳам ғулом,
Сен ҳам ғулом.

— Мен тобон,
Сен кунни суйдим…
— Мен ҳам тобон,
Сен ҳам тобон.

— Мен замон,
Сен тунни суйдим…
— Мен ҳам замон,
Сен ҳам замон.

— Мен тўзон,
Сен қулни суйдим…
— Мен ҳам тўзон,
Сен ҳам тўзон.

— Мен хазон,
Сен гулни суйдим…
— Мен ҳам хазон,
Сен ҳам хазон.

— Сен билан
Тўлди дилим,
Мамот ичинда
Ҳаёт — сен…

— Мамотдан улуғ
Мен — Ширин,
Ҳаётдан улуғ
Фарҳод — сен…

3. ЛАЙЛИ ВА МАЖНУН

— Ҳижрон даштида хормиз.
— Лайлию Мажнунлик шу.

— Висолга зору зормиз.
— Лайлию Мажнунлик шу.

— Қисмати мушкул кормиз.
— Лайлию Мажнунлик шу.

— Ҳасратга мудом ёрмиз.
— Лайлию Мажнунлик шу.

-Ёз куни ёққан қормиз.
— Лайлию Мажнунлик шу.

— Бир-биримизга дормиз.
— Лайлию Мажнунлик шу.

4. САБЪАИ САЙЁР

Бир сайёҳ айтдиким,
Дунёни кўрдим —
Ноласи йўқ эрур
Қўшиқдан ўзга.

Иккинчиси айтди:
— Дунёни кўрдим —
Асл жамолини
Яширган кўздан.

Учинчиси айтди:
— Дунёни кўрдим —
Қадами жонларнинг
Фароғатидир.

Тўртинчиси айтди:
— Дунёни кўрдим —
Мағзи — дўстга дўстнинг
Рақобатидир.

Бешинчиси айтди:
— Дунёни кўрдим —
Кафтимда қум каби
Оқиб кетди у.

Олтинчиси айтди:
— Дунёни кўрдим —
Бир малак суратда
Боқиб кетди у.

Еттинчи айтди:
— Дунёни кўрдим —
Ичида одамзот
Чала иморат…

Ғойиб нидо айтди:
— Яхшилаб қаранг…
Ҳаёту Мамотдан
Дунё иборат.

5. ДЕВОР ЁХУД САДДИЙ ИСКАНДАРИЙ

Қор ёмғирдан қўрқади.
Ёмғир қуёшдан қўрқади.
Қуёш булутдан қўрқади.
Булут шамолдан қўрқади.
Шамол сукутдан қўрқади.
Сукут сурондан қўрқади.
Сурон ўлимдан қўрқади…

Ўлим кимдан қўрқади?
Ўлим кимдан қўрқади?
Тангрим, нега жим турибсан
Айт, ўлим кимдан қўрқади?

022

003
Usmon Azim
«XAMSA»GA TATABBU
066

1. HAYRAT-UL ABROR

Hikmatni ko’p ko’rdim bu dayri dunda —
Kulgili bo’lmasmi bir sirni ochsam.
Quyosh tomon yursam — soyam ortimda,
Soyam oldindadir quyoshdan qochsam.

2. FARHOD VA SHIRIN

— Men yomon
Sen chinni suydim…
— Men ham yomon,
Sen ham yomon.

— Men g’ulom,
Sen hurni suydim…
— Men ham g’ulom,
Sen ham g’ulom.

— Men tobon,
Sen kunni suydim…
— Men ham tobon,
Sen ham tobon.

— Men zamon,
Sen tunni suydim…
— Men ham zamon,
Sen ham zamon.

— Men to’zon,
Sen qulni suydim…
— Men ham to’zon,
Sen ham to’zon.

— Men xazon,
Sen gulni suydim…
— Men ham xazon,
Sen ham xazon.

— Sen bilan
To’ldi dilim,
Mamot ichinda
Hayot — sen…

— Mamotdan ulug’
Men — Shirin,
Hayotdan ulug’
Farhod — sen…

3. LAYLI VA MAJNUN

— Hijron dashtida xormiz.
— Layliyu Majnunlik shu.

— Visolga zoru zormiz.
— Layliyu Majnunlik shu.

— Qismati mushkul kormiz.
— Layliyu Majnunlik shu.

— Hasratga mudom yormiz.
— Layliyu Majnunlik shu.

-Yoz kuni yoqqan qormiz.
— Layliyu Majnunlik shu.

— Bir-birimizga dormiz.
— Layliyu Majnunlik shu.

4. SAB’AI SAYYOR

Bir sayyoh aytdikim,
Dunyoni ko’rdim —
Nolasi yo’q erur
Qo’shiqdan o’zga.

Ikkinchisi aytdi:
— Dunyoni ko’rdim —
Asl jamolini
Yashirgan ko’zdan.

Uchinchisi aytdi:
— Dunyoni ko’rdim —
Qadami jonlarning
Farog’atidir.

To’rtinchisi aytdi:
— Dunyoni ko’rdim —
Mag’zi — do’stga do’stning
Raqobatidir.

Beshinchisi aytdi:
— Dunyoni ko’rdim —
Kaftimda qum kabi
Oqib ketdi u.

Oltinchisi aytdi:
— Dunyoni ko’rdim —
Bir malak suratda
Boqib ketdi u.

Yettinchi aytdi:
— Dunyoni ko’rdim —
Ichida odamzot
Chala imorat…

G’oyib nido aytdi:
— Yaxshilab qarang…
Hayotu Mamotdan
Dunyo iborat.

5. DEVOR YOXUD SADDIY ISKANDARIY

Qor yomg’irdan qo’rqadi.
Yomg’ir quyoshdan qo’rqadi.
Quyosh bulutdan qo’rqadi.
Bulut shamoldan qo’rqadi.
Shamol sukutdan qo’rqadi.
Sukut surondan qo’rqadi.
Suron o’limdan qo’rqadi…

O’lim kimdan qo’rqadi?
O’lim kimdan qo’rqadi?
Tangrim, nega jim turibsan
Ayt, o’lim kimdan qo’rqadi?

022

(Tashriflar: umumiy 114, bugungi 1)

Izoh qoldiring