O’nta qisqa hikoya

Ashampoo_Snap_2016.05.01_00h29m32s_004_.png     Уч киши тўқсонинчи қаватга зинапоядан кўтарила бошлашди. Лифт душанбагача ишламас экан, дам олиш кунлари Сэмга у-бу ҳужжатлари керак бўлиб қолганди. Қаватма-қават кўтарилишаркан, вақтни ўлдириш ҳамда зерикиб қолмаслик учун галма-гал турли-туман – қувноқ ва қайғули ҳикояларни айтиб беришга келишиб олишди. Ниҳоят, тўқсонинчи қаватга чиқишганда, энг қайғули ҳикояни Сэм айтиб берди.

ҚИСҚА ҲИКОЯЛАР
Саиджалол Саидмуродов таржималари
002

Том Оденкранс
Ажал

Қоронғиликда ўзимни ноқулай сезаман. Совқотяпман.

Бир неча соат олдин тунги қисқагина ишим менга бирваракайига нақд беш минг доллар келтириши керак эди.
Пако ҳам келди, аммо нимадир чаппасига кетди.

Сиреналарнинг чироғи юзимга нур сочади. Оқ халатли одам оёғимнинг бармоғига ёпиштирилган ёрлиқдаги исм-фамилиямни ўқийди. Мен унга жавоб қайтаролмайман.

Дэвид В. Майерс
Севишганлар ва жин

Севишганлар кимсасиз соҳилда сайр қилиб юриб, Оловуддиннинг сеҳрли чироғини топиб олишди.
– Мени озод қилишларинг эвазига, – деди жин, – ҳар бирингнинг биттадан тилагингни бажо келтираман.

Қиз йигитга кўз ташлаб қўйиб деди:
– Истайманки, биз бир-бирмизни қиёматгача севайлик.

Денгизга тикилганча йигит:
– Мен эса ўша қиёмат ҳозироқ келишини истайман, – деди.

Норман ва Бен Лир
Энг қайғули ҳикоя

Уч киши тўқсонинчи қаватга зинапоядан кўтарила бошлашди. Лифт душанбагача ишламас экан, дам олиш кунлари Сэмга у-бу ҳужжатлари керак бўлиб қолганди. Қаватма-қават кўтарилишаркан, вақтни ўлдириш ҳамда зерикиб қолмаслик учун галма-гал турли-туман – қувноқ ва қайғули ҳикояларни айтиб беришга келишиб олишди. Ниҳоят, тўқсонинчи қаватга чиқишганда, энг қайғули ҳикояни Сэм айтиб берди.

– Пастда калитни унутиб қолдирибман, – деди-ю, беҳуш бўлиб йиқилди.

Дэвид Хофман
Синфдош дугоналар учрашуви

Мактабда улар ораларидан қил ўтмас дугона эдилар.

– Қўнғироқ қилиб тур, унутиб юборма, – деди у дугонасига битирув оқшомида.
– Албатта, сен ҳам.

Мактабни битирганларига эллик йил тўлиши муносабати билан уюштирилган синфдошлар учрашувида улар шу пайт давомида биринчи марта гаплашишди.

– Сени кўрганимдан хурсандман.
– Мен ҳам.

– Қўнғироқ қилиб тур, унутиб юборма.
– Албатта, сен ҳам.

Хоуп Эй Торрес
Гул ва муҳаббат

Тина боғда турар экан, унинг ўзи томон чопиб келаётганини кўрди.
– Тина! Менинг гулим! Ҳаётим!

Ниҳоят шу гапни айтди-я!

– О, Том!
– Тина, о, гулим!
– О, Том, мен ҳам сени севаман!

Том Тинага яқин келди-да, уни нари итариб, энгашди.
– Менинг гулим! Севимли атиргулимни босиб олдинг!

Жошуа Хейнс
Орзулар амалга ошганда

Боб истаганларининг барчасига эришди. Унда фақат битта тилак тилаш қолганди.

– Сўнгги тилакни сал кейинроқ тиласам бўладими? – сўради у.
– Сен хожасан. Мен эса оддий жинман.
– Жуда соз.

Уйга қайтаркан, Боб ўзини шунчалар бахтли ҳис этардики, биргина димоғни чоғ қиладиган қўшиқ етишмасди, холос. У эски бир итальян қўшиғини эслаб қолди.

– Эҳ, қанийди, италиялик балиқчига айланиб қолсам…

Дик Скин
Миллион долларлик базм

Чарли охирги чақасига лотерея чиптасини сотиб олди ва ўн миллион доллар ютуқ эгасига айланди. Кўча-кўйдаги ошна-оғайнилари билан ютуқни нақ икки ҳафта “ювди” ва алал-оқибат ортиқча еб қўйганидан бўкиб ўлди.

Ҳукумат унинг миллионларини мерос қилиб олди, аммо одамлар унинг исмини ҳамиша ёдларида сақлашади – у инсоният тарихида энг катта базм уюштирди, ахир.

Ҳа, дарвоқе, унинг фамилияси нимайди?

Шири Пелемье
Дублёр

– Спектаклни қолдиролмаймиз. Шоу давом этиши керак, – деди режиссёр пьесанинг биринчи пардаси бошланишидан бир лаҳза олдин машҳур актёр беҳуш бўлиб йиқилганда. – Бугун у юлдуз, ҳар ҳолда, шунчаки ўликнинг ролини ўйнамайди-ку.

Дублёр барчанинг кўз ўнгида юксалди. Унинг ижроси илҳомбахш чиқди. Янги юлдуз якунловчи саҳнада ролини қойиллатди.

Дублёр чўнтагидаги шприцни бармоқлари билан силаб-сийпаб, олқишлар остида таъзим бажо этди.

Долорес Руп
Сўнгги насиба

Уйларга тушишга одатланган ўғри Билли ўз ишининг бетакрор лаҳзаларини ёқтирарди.

Бу тонг у девор ошиб, бинога кирди. Барча қимматбаҳо тақинчоқларни йиғиштириб олиб, машинасига элтди.

Бу пайт қорни жудаям очганди. Ойнаи жаҳон қаршисида тамадди қилиш учун уйга охирги марта кирди. Овқатланиб бўлгач, тарракдай қотди. Хонадон соҳиблари каламушларни заҳарламоқчи эди.

Том Форд
Жумбоқ

– Бугун жуда мамнун кўринасиз, Ватсон.
– Кечирасиз-у, Холмс, бу сафар жиноятни икки дунёда ҳам фош қилолмайсиз.

Холмс ўрнидан туриб, трубкасини жўшқинлик билан силкита бошлади.

– Яна хато қиляпсиз, деб қўрқаман, Ватсон. Миссис Ворсингтонни ким ўлдирганини биламан.

– Жуда қизиқ! На гувоҳлар, на далил-исбот бор! Хўш, ким қилибди бу ишни?
– Мен, Ватсон!

____________.jpgQISQA HIKOYALAR
Saidjalol Saidmurodov tarjimalari
002

Tom Odenkrans
Ajal

Qorong’ilikda o’zimni noqulay sezaman. Sovqotyapman.

Bir necha soat oldin tungi qisqagina ishim menga birvarakayiga naqd besh ming dollar keltirishi kerak edi.
Pako ham keldi, ammo nimadir chappasiga ketdi.

Sirenalarning chirog’i yuzimga nur sochadi. Oq xalatli odam oyog’imning barmog’iga yopishtirilgan yorliqdagi ism-familiyamni o’qiydi. Men unga javob qaytarolmayman.

Devid V. Mayers
Sevishganlar va jin

Sevishganlar kimsasiz sohilda sayr qilib yurib, Olovuddinning sehrli chirog’ini topib olishdi.
– Meni ozod qilishlaring evaziga, – dedi jin, – har biringning bittadan tilagingni bajo keltiraman.

Qiz yigitga ko’z tashlab qo’yib dedi:
– Istaymanki, biz bir-birmizni qiyomatgacha sevaylik.

Dengizga tikilgancha yigit:
– Men esa o’sha qiyomat hoziroq kelishini istayman, – dedi.

Norman va Ben Lir
Eng qayg’uli hikoya

Uch kishi to’qsoninchi qavatga zinapoyadan ko’tarila boshlashdi. Lift dushanbagacha ishlamas ekan, dam olish kunlari Semga u-bu hujjatlari kerak bo’lib qolgandi. Qavatma-qavat ko’tarilisharkan, vaqtni o’ldirish hamda zerikib qolmaslik uchun galma-gal turli-tuman – quvnoq va qayg’uli hikoyalarni aytib berishga kelishib olishdi. Nihoyat, to’qsoninchi qavatga chiqishganda, eng qayg’uli hikoyani Sem aytib berdi.

– Pastda kalitni unutib qoldiribman, – dedi-yu, behush bo’lib yiqildi.

Devid Xofman
Sinfdosh dugonalar uchrashuvi

Maktabda ular oralaridan qil o’tmas dugona edilar.

– Qo’ng’iroq qilib tur, unutib yuborma, – dedi u dugonasiga bitiruv oqshomida.
– Albatta, sen ham.

Maktabni bitirganlariga ellik yil to’lishi munosabati bilan uyushtirilgan sinfdoshlar uchrashuvida ular shu payt davomida birinchi marta gaplashishdi.

– Seni ko’rganimdan xursandman.
– Men ham.

– Qo’ng’iroq qilib tur, unutib yuborma.
– Albatta, sen ham.

Xoup Ey Torres
Gul va muhabbat

Tina bog’da turar ekan, uning o’zi tomon chopib kelayotganini ko’rdi.
– Tina! Mening gulim! Hayotim!

Nihoyat shu gapni aytdi-ya!

– O, Tom!
– Tina, o, gulim!
– O, Tom, men ham seni sevaman!

Tom Tinaga yaqin keldi-da, uni nari itarib, engashdi.
– Mening gulim! Sevimli atirgulimni bosib olding!

Joshua Xeyns
Orzular amalga oshganda

Bob istaganlarining barchasiga erishdi. Unda faqat bitta tilak tilash qolgandi.

– So’nggi tilakni sal keyinroq tilasam bo’ladimi? – so’radi u.
– Sen xojasan. Men esa oddiy jinman.
– Juda soz.

Uyga qaytarkan, Bob o’zini shunchalar baxtli his etardiki, birgina dimog’ni chog’ qiladigan qo’shiq yetishmasdi, xolos. U eski bir ital`yan qo’shig’ini eslab qoldi.

– Eh, qaniydi, italiyalik baliqchiga aylanib qolsam…

Dik Skin
Million dollarlik bazm

Charli oxirgi chaqasiga lotereya chiptasini sotib oldi va o’n million dollar yutuq egasiga aylandi. Ko’cha-ko’ydagi oshna-og’aynilari bilan yutuqni naq ikki hafta “yuvdi” va alal-oqibat ortiqcha yeb qo’yganidan bo’kib o’ldi.

Hukumat uning millionlarini meros qilib oldi, ammo odamlar uning ismini hamisha yodlarida saqlashadi – u insoniyat tarixida eng katta bazm uyushtirdi, axir.

Ha, darvoqe, uning familiyasi nimaydi?

Shiri Pelem`e
Dublyor

– Spektaklni qoldirolmaymiz. Shou davom etishi kerak, – dedi rejissyor p`esaning birinchi pardasi boshlanishidan bir lahza oldin mashhur aktyor behush bo’lib yiqilganda. – Bugun u yulduz, har holda, shunchaki o’likning rolini o’ynamaydi-ku.

Dublyor barchaning ko’z o’ngida yuksaldi. Uning ijrosi ilhombaxsh chiqdi. Yangi yulduz yakunlovchi sahnada rolini qoyillatdi.

Dublyor cho’ntagidagi shpritsni barmoqlari bilan silab-siypab, olqishlar ostida ta’zim bajo etdi.

Dolores Rup
So’nggi nasiba

Uylarga tushishga odatlangan o’g’ri Billi o’z ishining betakror lahzalarini yoqtirardi.

Bu tong u devor oshib, binoga kirdi. Barcha qimmatbaho taqinchoqlarni yig’ishtirib olib, mashinasiga eltdi.

Bu payt qorni judayam ochgandi. Oynai jahon qarshisida tamaddi qilish uchun uyga oxirgi marta kirdi. Ovqatlanib bo’lgach, tarrakday qotdi. Xonadon sohiblari kalamushlarni zaharlamoqchi edi.

Tom Ford
Jumboq

– Bugun juda mamnun ko’rinasiz, Vatson.
– Kechirasiz-u, Xolms, bu safar jinoyatni ikki dunyoda ham fosh qilolmaysiz.

Xolms o’rnidan turib, trubkasini jo’shqinlik bilan silkita boshladi.

– Yana xato qilyapsiz, deb qo’rqaman, Vatson. Missis Vorsingtonni kim o’ldirganini bilaman.

– Juda qiziq! Na guvohlar, na dalil-isbot bor! Xo’sh, kim qilibdi bu ishni?
– Men, Vatson!

06

(Tashriflar: umumiy 38 462, bugungi 63)

21 izoh

  1. Zõr ekan ichidan man «sinifdosh dugonalar uchrashuvi»degan fantastik asarni yozib oldim rahmat chiqarganlaring uchun sizlardan oilamaiz bilan juda mamnunmiz .Oilamaiz nomidan ham tashakkur

Izoh qoldiring