Ustoz Mahmud Sa’diy vafot etdi

054 Ўзбекистон Республикасида хизмат кўрсатган журналист, беназир инсон, устоз ва муаллим Маҳмуд Саъдий бугун, 23 ноябрь куни оламдан ўтди. Ўзбек журналистикаси ривожига катта ҳисса қўшган ижодкор ўзининг тўғрисўзлиги ва ҳалоллиги билан ажралиб турарди.
«Хуршид Даврон кутубхонаси» веб-саҳифаси устознинг оила аъзолари ва шогирдларига чуқур ҳамдардлик билдиради.

    Маҳмуд Саъдий 1939 йил Самарқанд вилоятининг Нарпай туманида туғилган. Мактабни тамомлаганидан кейин ҳозирги Ўзбекистон Миллий университети филология факультетининг журналистика бўлимида таҳсил олди.

“Шарқ юлдузи” журналида адабий ходим, бўлим мудири, “Гулистон” журналида катта адабий ходим, бўлим мудири, “Ўзбекистон адабиёти ва санъати” газетасида бўлим мудири, “Маърифат” газетасида махсус мухбир, шарҳловчи, бўлим муҳаррири вазифаларида фаолият кўрсатди. Сўнгги вақтларда у “Маърифат” газетасида ишлаш билан бирга Ўзбекистон Давлат жаҳон тиллари университетида ёшларга дарс берган эди.

Маҳмуд Саъдий ўзига хос муҳаррирлик мактаби яратган тажрибали ижодкор, иқтидорли мунаққид ва кўзга кўринган таржимон эди. Ўзбек адабиётининг энг долзарб муаммолари таҳлилига бағишланган кўплаб мақола ва тадқиқотлари орасида унинг адабий-танқидий мақолалар ва суҳбатларни ўз ичига олган “Теран томирлар” китоби алоҳида ажралиб туради. У Ўзбекистон давлат жаҳон тиллари университети халқаро журналистика факультети талабалари учун “Таҳрир санъати” ўқув дастурини яратди.

   “Фидокорона хизматлари учун” ордени, “Ўзбекистон Республикасида хизмат кўрсатган журналист”  унвони ҳамда “Ўзбекистон Республикаси Мустақиллигига 15 йил” кўкрак нишони билан мукофотланган.

«Хуршид Даврон кутубхонаси»да Маҳмуд Саъдий билан боғлиқ саҳифалар: http://kh-davron.uz/tag/mahmud-sadiy

O’zbekiston Respublikasida xizmat ko’rsatgan jurnalist, benazir inson, ustoz va muallim Mahmud Sa’diy bugun, 23 noyabr kuni olamdan o’tdi. O’zbek jurnalistikasi rivojiga katta hissa qo’shgan ijodkor o’zining to’g’riso’zligi va halolligi bilan ajralib turardi. «Xurshid Davron kutubxonasi» veb-sahifasi ustozning oila a’zolari va shogirdlariga chuqur hamdardlik bildiradi.

Mahmud Sa’diy 1939-yil Samarqand viloyatining Narpay tumanida tug‘ilgan. Maktabni tamomlaganidan keyin hozirgi O‘zbekiston Milliy universiteti filologiya fakultetining jurnalistika bo‘limida o‘qigan.

“Sharq yulduzi” jurnalida adabiy xodim, bo‘lim mudiri, “Guliston” jurnalida katta adabiy xodim, bo‘lim mudiri, “O‘zbekiston adabiyoti va san’ati” gazetasida bo‘lim mudiri, “Ma’rifat” gazetasida maxsus muxbir, sharhlovchi, bo‘lim muharriri vazifalarida ishlagan. So‘nggi vaqtlarda “Ma’rifat” gazetasida ishlash bilan birga Jahon tillari universitetida yoshlarga dars bergan.

Mahmud Sa’diy O‘zbekiston davlat jahon tillari universiteti xalqaro jurnalistika fakulteti talabalari uchun “Tahrir san’ati” o‘quv dasturini yaratgan.

“O‘zbekiston Respublikasida xizmat ko‘rsatgan jurnalist” unvoni hamda “O‘zbekiston Respublikasi mustaqilligiga 15 yil” ko‘krak nishoni bilan mukofotlangan. 2019-yilda esa “Fidokorona xizmatlari uchun” ordeni bilan taqdirlangan.

«Xurshid Davron kutubxonasi»da Mahmud Sa’diy bilan bog’liq sahifalar: http://kh-davron.uz/tag/mahmud-sadiy

066

(Tashriflar: umumiy 219, bugungi 1)

2 izoh

Izoh qoldiring