Gulchehra Murodaliyeva. Atirgullar oqar havoda…She’r daftarlaridan

021      Истеъдодли шоираларимиздан бири сифатида танилган Гулчеҳра Муродалиеванинг бир туркум шеърларини тақдим этамиз.

Гулчеҳра МУРОДАЛИЕВА
АТИРГУЛЛАР ОҚАР ҲАВОДА…
09

* * *
003
Атиргуллар оқар ҳавода…
Намгин саҳар Сени этдим ёд.
Бу – кўзлари денгиз маъвода
Соғинчлардан ўлмаслик – гуноҳ.
Намгин саҳар Сени этдим ёд.

Ёмғирларнинг бўйлари кезган
Дилгинамнинг куйи жаранглар!
Мен – ёмғирдай, ишқдан тўкилсам –
Бағрингизга олинг, дарахтлар…
Дилгинамнинг куйи жаранглар.

Оёғимга осилар барглар –
Заминий бахт. Ташлаб кетолмам…
Мен умримнинг бор бўйи билан
Тонглар, сизни суйиб улгурдим!..
Заминий бахт, сенсиз кетолмам.

…Соғинчлардан ўлмаслик – гуноҳ.
Намгин саҳар Сени этдим ёд.
Яна кўксим остида ларзон
Астагина куйлай бошлар ой.

Атиргуллар оқар ҳавода…

* * *

Бетайин дард руҳимда изғир.
Вужудимни кемирар ғолиб…
Бир оғриқ бор – соғинчга ўхшар,
Бир соғинчки – қайғунинг ўзи…
Бу бағирда армонлар яшар
Аммо сиз йўқ,
Сиз йўқсиз, нетай?

…Мен ёнмоқни истадим яна.
Бир ёнмоқки – мангу ёндирмоқ. –
Асрий қаҳр, у ҳам ўт олди,
Музлаб қолган дарахтлар ёнди!..
Бу аланга ичида, узр…
Энди Сиз йўқ.
Сиз – йўқсиз,
Нетай?!

* * *

Сенгами сўзладим кўнглимни очиб,
Сенгами йиғладим – юмиб юзимни.
Фасллар туғ бўлди бошимда,
Мен эса севмадим ўзимни…

Олар нафасимга чўт урар Ҳакам, –
Ундан кечиб бўлмас. Бўлмайди қочиб!.. –
Мен кимга йиғлайин юмиб юзимни,
Мен кимга сўзлайин кўнглимни очиб?..

* * *

Хаёлимнинг излари йўқдир.
Армонимнинг йўқдир кўзлари…
Умр бор-у, яшамоқ йўқдир –
Охири йўқ Ўлимнинг ҳали.
Мен Сени кўришим керак!..

– Ҳаёт азиз. Я ш а ш улуғдир! –
Шивирлайман, эшитмайдилар.
Шунда, Сендан – уларга қўшиб
Мен кечардим. К е ч а р д и м!
Аммо…
Аммо ортиқ умр ҳам йўқдир.

Мен Сени кўришим керак.

* * *

Чигиртка чалади сибизға…
Келар Субҳ, йўлингга боқмадим!..
Юракда ларзондир бир туйғу –
Энг сўнгги япроқдай,
Қоқмадим…

Бинафша қўллари кўнглимнинг
Титрайди майин ва ифорли.
Олддаги туманли йўлимнинг
Тунлари шакар ва саҳарли!

Сўрама.
У илиқ кунларнинг
Ёдида оқмадим. Оқмадим!
…Чигиртка чалади сибизға.
Кетар Субҳ, ортингдан боқмадим!..

* * *

Кимгаки ишондим –
Бир куни тондим.
Кимгаки зор эдим –
Кутмадим бир кун.

Менинг қон кўксимни ҳар кундуз ёрди. –
Менинг гуноҳимни кечирди ҳар тун.

Сени кутмагандим,
Ишонмагандим.
Сен!.. –
Нега Сен менга заҳар ичирдинг?..

* * *

… Бу сўзлар мени қийнади.
Сен-да, уларни менга раво кўрдинг.
Улар жуда совуқ! –
Бағримга босолмадим:
Қўлларим қирқилган.
Босолмадим…
Оёқларим қирқилган!
Мен уларни зўрға тутиб турибман –
Тишларим… зирқирайди!
Чарчадим… улар мени қийнади.
Уларга суяниб бўлмади!
Ол. Бу сўзларингни ол…
Иссиқроқ сўзлар
Таянч сўзлар
Бер
Бер…

* * *

Ҳеч нарса бўлмади.
Айтарли ҳеч гап…
Осмон ҳам турибди –
Қулагани йўқ.
Ўз ўқидан Ер ҳам чиқиб кетмади!
Ҳеч нарса бўлмади демак,
Бўлмади!..

Мен ҳам ўлганим йўқ –
Қаршингиздаман.
(Ва лекин ёлғизлик қилмоқда адо…)
Фақат… бу юракка нимадир бўлди.
Фақат бу юракда
Нимадир
Ўлди…

ҚАҲР

Мени ҳимоянгга ол энди,
шодликлардан кўр бўлган қаҳрим!..
Бу оламда сертўфон баҳр, –
мудом кўнгли оч – менинг бағрим.

Магар, алдоқлари пинҳона
суюнчлар ҳам жонимга етмас?!
Муҳаббатим – дийдаси ғамли,
сен, мағрурни, мен олиб кетмам!..

* * *

Хайр, Қуёш.
Хайр, оппоқ Тонг!..
Мен кетяпман. Соврилди тоқат.
Мен-чун ҳеч ким кўзёш тўкмайди,
Ва эсламоқ… бўлмагандай шарт!

Менинг билан орзум – қайтмайди –
Йўқолади кўзи тирик Ғам…
Қоронғулик асло қўрқмайди –
Бошин суқар у хонамга ҳам.

Фақат
Ҳар тун йиғлайди узоқ,
Шифтга ўзин уриб парвона.
Бир ҳовуч нур излаб тун бўйи
Мени эслар. Мени…
девона…

* * *

Сенингсиз ҳам ўйларим – дордир!..
Энди бошлаб кетмас кунларим…
Сизга сокин ҳасратим бордир, –
Содиқ қолинг бугун, тунларим.
Менинг сокин ҳасратим бордир.

Сенингсиз ҳам ўйларим – дордир!..
Юрак истар ўқилмоқликни.
Бу кўнгилда соғинчлари бор
Бир тонг қордай тўкилмоқликнинг.
Юрак истар ўқилмоқликни.

Сенингсиз ҳам ўйларим – дордир!..
Йўқ. Қолмадим сиздай – ўлгани.
Мен келганман мовий тунларнинг
Кўйларида қурбон бўлгани!
Йўқ!
Келмадим сиздай – ўлгани…

* * *

Оҳ, Кўнгил вайронадурким, сиз уни ҳеч истаманг,
Умри ўтди ғамда денгу, субҳу на кеч истаманг.

Ишқи Комилға топинди, ўтди денг бебахту шон,
Ўзни истаб ҳар кўнгилдин, топмади денг, интиқом…

Даҳраро оввораю-сарсона денгиз сиз мени,
Меҳрни номеҳрибонга тутган ғофил денг, истаманг.

Ишқ ўтидин куйдию, отди ўзини чоҳга денг,
На фиғони Кўкни тутди, на дуди денг, – мисли жон…

У фано аҳлидин юз бурдию “воҳ!”лаб кетди денг,
Додини дорларга осган Девона денгу, истаманг!..

15Iste’dodli shoiralarimizdan biri sifatida tanilgan Gulchehra Murodalievaning bir turkum she’rlarini taqdim etamiz.

Gulchehra MURODALIEVA
ATIRGULLAR OQAR HAVODA…

11

* * *

Atirgullar oqar havoda…
Namgin sahar Seni etdim yod.
Bu – ko’zlari dengiz ma’voda
Sog’inchlardan o’lmaslik – gunoh.
Namgin sahar Seni etdim yod.

Yomg’irlarning bo’ylari kezgan
Dilginamning kuyi jaranglar!
Men – yomg’irday, ishqdan to’kilsam –
Bag’ringizga oling, daraxtlar…
Dilginamning kuyi jaranglar.

Oyog’imga osilar barglar –
Zaminiy baxt. Tashlab ketolmam…
Men umrimning bor bo’yi bilan
Tonglar, sizni suyib ulgurdim!..
Zaminiy baxt, sensiz ketolmam.

…Sog’inchlardan o’lmaslik – gunoh.
Namgin sahar Seni etdim yod.
Yana ko’ksim ostida larzon
Astagina kuylay boshlar oy.

Atirgullar oqar havoda…

* * *

Betayin dard ruhimda izg’ir.
Vujudimni kemirar g’olib…
Bir og’riq bor – sog’inchga o’xshar,
Bir sog’inchki – qayg’uning o’zi…
Bu bag’irda armonlar yashar
Ammo siz yo’q,
Siz yo’qsiz, netay?

…Men yonmoqni istadim yana.
Bir yonmoqki – mangu yondirmoq. –
Asriy qahr, u ham o’t oldi,
Muzlab qolgan daraxtlar yondi!..
Bu alanga ichida, uzr…
Endi Siz yo’q.
Siz – yo’qsiz,
Netay?!

* * *

Sengami so’zladim ko’nglimni ochib,
Sengami yig’ladim – yumib yuzimni.
Fasllar tug’ bo’ldi boshimda,
Men esa sevmadim o’zimni…

Olar nafasimga cho’t urar Hakam, –
Undan kechib bo’lmas. Bo’lmaydi qochib!.. –
Men kimga yig’layin yumib yuzimni,
Men kimga so’zlayin ko’nglimni ochib?..

* * *

Xayolimning izlari yo’qdir.
Armonimning yo’qdir ko’zlari…
Umr bor-u, yashamoq yo’qdir –
Oxiri yo’q O’limning hali.
Men Seni ko’rishim kerak!..

– Hayot aziz. Ya sh a sh ulug’dir! –
Shivirlayman, eshitmaydilar.
Shunda, Sendan – ularga qo’shib
Men kechardim. K ye ch a r d i m!
Ammo…
Ammo ortiq umr ham yo’qdir.

Men Seni ko’rishim kerak.

* * *

Chigirtka chaladi sibizg’a…
Kelar Subh, yo’lingga boqmadim!..
Yurakda larzondir bir tuyg’u –
Eng so’nggi yaproqday,
Qoqmadim…

Binafsha qo’llari ko’nglimning
Titraydi mayin va iforli.
Olddagi tumanli yo’limning
Tunlari shakar va saharli!

So’rama.
U iliq kunlarning
Yodida oqmadim. Oqmadim!
…Chigirtka chaladi sibizg’a.
Ketar Subh, ortingdan boqmadim!..

* * *

Kimgaki ishondim –
Bir kuni tondim.
Kimgaki zor edim –
Kutmadim bir kun.

Mening qon ko’ksimni har kunduz yordi. –
Mening gunohimni kechirdi har tun.

Seni kutmagandim,
Ishonmagandim.
Sen!.. –
Nega Sen menga zahar ichirding?..

* * *

… Bu so’zlar meni qiynadi.
Sen-da, ularni menga ravo ko’rding.
Ular juda sovuq! –
Bag’rimga bosolmadim:
Qo’llarim qirqilgan.
Bosolmadim…
Oyoqlarim qirqilgan!
Men ularni zo’rg’a tutib turibman –
Tishlarim… zirqiraydi!
Charchadim… ular meni qiynadi.
Ularga suyanib bo’lmadi!
Ol. Bu so’zlaringni ol…
Issiqroq so’zlar
Tayanch so’zlar
Ber
Ber…

* * *

Hech narsa bo’lmadi.
Aytarli hech gap…
Osmon ham turibdi –
Qulagani yo’q.
O’z o’qidan Yer ham chiqib ketmadi!
Hech narsa bo’lmadi demak,
Bo’lmadi!..

Men ham o’lganim yo’q –
Qarshingizdaman.
(Va lekin yolg’izlik qilmoqda ado…)
Faqat… bu yurakka nimadir bo’ldi.
Faqat bu yurakda
Nimadir
O’ldi…

QAHR

Meni himoyangga ol endi,
shodliklardan ko’r bo’lgan qahrim!..
Bu olamda serto’fon bahr, –
mudom ko’ngli och – mening bag’rim.

Magar, aldoqlari pinhona
suyunchlar ham jonimga yetmas?!
Muhabbatim – diydasi g’amli,
sen, mag’rurni, men olib ketmam!..

* * *

Xayr, Quyosh.
Xayr, oppoq Tong!..
Men ketyapman. Sovrildi toqat.
Men-chun hech kim ko’zyosh to’kmaydi,
Va eslamoq… bo’lmaganday shart!

Mening bilan orzum – qaytmaydi –
Yo’qoladi ko’zi tirik G’am…
Qorong’ulik aslo qo’rqmaydi –
Boshin suqar u xonamga ham.

Faqat
Har tun yig’laydi uzoq,
Shiftga o’zin urib parvona.
Bir hovuch nur izlab tun bo’yi
Meni eslar. Meni…
devona…

* * *

Seningsiz ham o’ylarim – dordir!..
Endi boshlab ketmas kunlarim…
Sizga sokin hasratim bordir, –
Sodiq qoling bugun, tunlarim.
Mening sokin hasratim bordir.

Seningsiz ham o’ylarim – dordir!..
Yurak istar o’qilmoqlikni.
Bu ko’ngilda sog’inchlari bor
Bir tong qorday to’kilmoqlikning.
Yurak istar o’qilmoqlikni.

Seningsiz ham o’ylarim – dordir!..
Yo’q. Qolmadim sizday – o’lgani.
Men kelganman moviy tunlarning
Ko’ylarida qurbon bo’lgani!
Yo’q!
Kelmadim sizday – o’lgani…

* * *

Oh, Ko’ngil vayronadurkim, siz uni hech istamang,
Umri o’tdi g’amda dengu, subhu na kech istamang.

Ishqi Komilg’a topindi, o’tdi deng bebaxtu shon,
O’zni istab har ko’ngildin, topmadi deng, intiqom…

Dahraro ovvorayu-sarsona dengiz siz meni,
Mehrni nomehribonga tutgan g’ofil deng, istamang.

Ishq o’tidin kuydiyu, otdi o’zini chohga deng,
Na fig’oni Ko’kni tutdi, na dudi deng, – misli jon…

U fano ahlidin yuz burdiyu “voh!”lab ketdi deng,
Dodini dorlarga osgan Devona dengu, istamang!..

22

(Tashriflar: umumiy 106, bugungi 1)

Izoh qoldiring