Gulchehra Murodaliyeva. Izlarim qolgudek nurli kunlarda

002   Гулчеҳра Муродалиева ўз қалбида кечган, кечаётган туйғуларга эргашиб ижод қилади. Шоира шеърларининг фақатгина уларга мос топилган оҳанги ва ранги бор. Бугун шоиранинг яна бир туркум шеърларини тақдим этишдан мамнунмиз.

Гулчеҳра МУРОДАЛИЕВА
“ИЗЛАРИМ ҚОЛГУДЕК НУРЛИ КУНЛАРДА…”
07


* * *

054

На уммеду на ҳасрату на шондир, –
Бу дунёнинг надир нозу гудози?
Ҳама келди. Ҳама кетди. Ҳама зор…
На-ки, умр чангнинг битта садоси?!

Қуёш куйди. Ёмғир қуйди. Замин – хор… –
Йўқ, айтмадим: недин кўнгил адоси.
Тун йиғлади. Кун тиғлади: ки кимнинг
мен гадоси, оҳ! – гадоси?..
…Гадоси!

30.01.1989.

ҲАСРАТ

“Ғамларингни суйдим, маликам…”
Тун чайқалар аста, саболи…
“Мен Сени-да унутаюрман! –
Фақат… киминг бўлай, жафолим?..”

“Ёмғиргинам, – мангу сафолим,
Бу кўнгил-ла басирман. – Ҳақман!..”
“Бас қил!.. –
Умрим кўкка соврилди. –
…Ёлғизгинам менинг,
Вафолим…”

04.09.1990.

* * *

Рост Ҳаёт! – Ёлғон Ҳаёт! –
Ортимда қолғон Ҳаёт!..
Кулдуриб ҳам куйдуриб
Домиға олғон Ҳаёт!

Шаън Ҳаёт! – Шабнам Ҳаёт! –
Ҳам Умид, ҳам Ғам Ҳаёт!
Дил ишқида қонмаса,
Бир умр мотам Ҳаёт!..

Қон Ҳаёт! – Қондош Ҳаёт! –
Жонимга жондош Ҳаёт!
Ўлим қолса ғафлатда,
Эҳ!.. – унга ёндош Ҳаёт!..

Баттол Ҳаёт! – Қаттол Ҳаёт! –
Ёлғиз, – қадди дол Ҳаёт!
Минг бор жоним тилгунча,
Ол, – жонимда қол, Ҳаёт!..

30.08.1988.

* * *

Балки ҳали ўлдира олмас
Муҳаббатнинг заҳарли кучи. –
Вужудимда кезади бўрон,
Юрагимда ҳаётнинг ўчи!..

Саҳар шудринг кечиб кетётган
Сўқмоқдаги йўловчи мисол
Кетаяпман.
Юзларимда нам,
Қучоғимда ёлғизлик, – малол.

Гуллар нега бошини эгар,
Йўллар чопар ортимдан ҳориб?..
Мен барчани, ахир, кечирдим,
Кетдим – танҳо кўнглимни олиб.

Балки…
Ҳали ўлдира олмас
Муҳаббатнинг заҳарли кучи? –
Кузатади нимранггина ой,
Тебранади дарахтлар учи…

11.08.1988.

* * *

Пешонангни босади ғамчил
суйилмаган кунларнинг шўри.
Юрагингдан кетмайди титроқ –
Топган каби одамнинг ғўрин…

Бу – менмасман, дейсан қалтираб,
рўпарангдан чиқиб қолса Бахт.
…Нега мени бунчалар суйдинг,
қийноқлардан ўсаётган Тахт?..

13.05.1988.

* * *

Изларим қолгудек нурли кунларда…
Олма гулларига лабни босгудек, –
Лабим ҳасратида қолган чумоли
Шу туни анбарга ўзин осгудек…
Аллоҳимдан ўзга асл ЁР йўқ, деб
Саҳрода қақраган бир дарвиш янглиғ…
Дарахтдан узилган энг сўнгги япроқ
Додлагани каби зорлиғ ва мунглиғ…
Дафъатан, димиққан бандалар узра
Шаррос қуйганидек ёмғир – олий нур,
Бу сир синоати бизга аён, деб
Қабрлар устида кулганидек гул…
…Шаббодалар эсса ҳушни олгудек,
Майсалар чайқалса мангу қолгудек,
Осмонда кўринган ҳар битта қанот
Ортидан адашсанг:
“Ол!” деб,
“Обкет!..” деб…

…Азизим,
На қадар севаман Сени?..

1993

* * *

Кишанларми оёғимга парчинланган,
Қанотларми, қўлларимдай қайрилганим?..
Йўлларимда музлар унди, хорлар унди
Сизни десам, –
ўлмай туриб айрилганим!..

Сизни дедим, – тилларим ҳам занжирланди,
Кўзларимни босиб кетди Оғриқларим!..
Ичим ёнди, жоним ёнди,
Ханжарландим, –
бир дийдорни қиёматга қолдирганим…

Кишанларми оёғимга парчинланган?..

07.09.2005.

* * *

Эй менинг ғанимдан ғанимроқ Дўстим,
эй менинг Осмондай яқиним!..
Шам каби
Умримнинг харитасини
ўз меҳрим оташида ёққаним!

Билмадинг:
Чашминг гавҳарида томир отдим мен –
ҳар бир ҳужайрангда гулладим!..
Соғинчим армонлар чангалзорида
тузалмас дард янглиғ йиллади. –
Дилим пора қилди ҳасрат итлари, –
Тунлари юлқиниб увлади!..

Ишқмиди? –
Кўксимда бодраб ўсдию
Илдизин кўзгача йўллади!

Аслида
Умримни берганим, кўзимни берганим
Ким эди
Не эди
Билмадим!..

02.02.2006.

ОНАМНИНГ ҚЎШИҒИ

Сўзлари дур қизим,
Юзи ҳур қизим.
Танҳолик чоҳида
Кўнгли нур қизим…

Қишнинг аёзида унган бинафшам,
Умрим зулматини ёндирган гулшан.
… Ишқнинг тўфонида куйганим, болам! –
Ғаюрлар қўлида қолган девонам…

Менинг тупроқ қизим,
Қалби тоғ қизим.
Сўзи урвоқ қизим,
Изи хор қизим…

Меҳрим қондирганим менинг, – офтобим.
Кўкда анбар боғим, ерда гул боғим!..
…Соғинчдан юраги эзилган болам, –
Йўлимда дур каби тизилган болам…

Кўнгли ўксик қизим, –
Бағри қон лолам.
Бахти кемтик болам,
Кўкдаги нолам…

Менинг Офтоб қизим –
Ёлғиз – Шоҳ қизим!..

06.03.2013.

* * *

Кўнглим маним, кўнглим маним,
кўнглим маним пойингдадир.
Шамс Табризий

Эй менинг жоним ҳам таним,
Ўздан Ўзимга етганим…
Кимман-ки, васлингни сўрай?! –
Қилсам хатолар, – кечганим!..

Эй гулу райҳоним бўйи,
Қалбимнинг ифори, Рўйи.
Тунимнинг – умримнинг Нури, –
Қилсам тугунлар, – ечганим!

Кўксимнинг сўнмас оташи,
Дунёмнинг ичи ҳам таши…
Вужудим ёнди шавқингда,
Ишқингда кул бўлсам қани!

Боди равоним – маҳзаним,
Кўнглимнинг шоҳи – гавҳарим.
Дўлу тўфоним, – кавсарим,
Кўйингда сел бўлсам қани!

Эй менинг бахтиму ганжим, –
Ситамим, озорим, ранжим,
Ул кун Нигоҳинг тафтидан
Жон олиб,
жон берсам қани!..

02.08.2015.

ОНАМНИ СОҒИНИБ…

Жизғанак саҳрода кезиб ташналаб
қурайинми қумлардан чодир?..
Ё бағримни босиб моғораларга
кўмайинми ўзимни хоксиз?!

Кўксимни ёрайми?..
Кўзга мил тортиб
Гадо бўлайинми?
Девона бўлайми?!
Дунё гуноҳларин елкамга ортиб
дўзахингда минг йил ёнайми?..

…Айт,
нима қилайин
бир дийдор учун?!

07.03.2016.

Элегия. Гулчеҳра Муродалиева сўзи, Дилором Омонуллаева мусиқаси, Сарвар ижро этади

Gulchehra MURODALIEVA
“IZLARIM QOLGUDEK NURLI KUNLARDA…”
07

011
* * *

Na ummedu na hasratu na shondir, –
Bu dunyoning nadir nozu gudozi?
Hama keldi. Hama ketdi. Hama zor…
Na-ki, umr changning bitta sadosi?!

Quyosh kuydi. Yomg’ir quydi. Zamin – xor… –
Yo’q, aytmadim: nedin ko’ngil adosi.
Tun yig’ladi. Kun tig’ladi: ki kimning
men gadosi, oh! – gadosi?..
…Gadosi!

30.01.1989.

HASRAT

“G’amlaringni suydim, malikam…”
Tun chayqalar asta, saboli…
“Men Seni-da unutayurman! –
Faqat… kiming bo’lay, jafolim?..”

“Yomg’irginam, – mangu safolim,
Bu ko’ngil-la basirman. – Haqman!..”
“Bas qil!.. –
Umrim ko’kka sovrildi. –
…Yolg’izginam mening,
Vafolim…”

04.09.1990.

* * *

Rost Hayot! – Yolg’on Hayot! –
Ortimda qolg’on Hayot!..
Kuldurib ham kuydurib
Domig’a olg’on Hayot!

Sha’n Hayot! – Shabnam Hayot! –
Ham Umid, ham G’am Hayot!
Dil ishqida qonmasa,
Bir umr motam Hayot!..

Qon Hayot! – Qondosh Hayot! –
Jonimga jondosh Hayot!
O’lim qolsa g’aflatda,
Eh!.. – unga yondosh Hayot!..

Battol Hayot! – Qattol Hayot! –
Yolg’iz, – qaddi dol Hayot!
Ming bor jonim tilguncha,
Ol, – jonimda qol, Hayot!..

30.08.1988.

* * *

Balki hali o’ldira olmas
Muhabbatning zaharli kuchi. –
Vujudimda kezadi bo’ron,
Yuragimda hayotning o’chi!..

Sahar shudring kechib ketyotgan
So’qmoqdagi yo’lovchi misol
Ketayapman.
Yuzlarimda nam,
Quchog’imda yolg’izlik, – malol.

Gullar nega boshini egar,
Yo’llar chopar ortimdan horib?..
Men barchani, axir, kechirdim,
Ketdim – tanho ko’nglimni olib.

Balki…
Hali o’ldira olmas
Muhabbatning zaharli kuchi? –
Kuzatadi nimranggina oy,
Tebranadi daraxtlar uchi…

11.08.1988.

* * *

Peshonangni bosadi g’amchil
suyilmagan kunlarning sho’ri.
Yuragingdan ketmaydi titroq –
Topgan kabi odamning g’o’rin…

Bu – menmasman, deysan qaltirab,
ro’parangdan chiqib qolsa Baxt.
…Nega meni bunchalar suyding,
qiynoqlardan o’sayotgan Taxt?..

13.05.1988.

* * *

Izlarim qolgudek nurli kunlarda…
Olma gullariga labni bosgudek, –
Labim hasratida qolgan chumoli
Shu tuni anbarga o’zin osgudek…
Allohimdan o’zga asl YOR yo’q, deb
Sahroda qaqragan bir darvish yanglig’…
Daraxtdan uzilgan eng so’nggi yaproq
Dodlagani kabi zorlig’ va munglig’…
Daf’atan, dimiqqan bandalar uzra
Sharros quyganidek yomg’ir – oliy nur,
Bu sir sinoati bizga ayon, deb
Qabrlar ustida kulganidek gul…
…Shabbodalar essa hushni olgudek,
Maysalar chayqalsa mangu qolgudek,
Osmonda ko’ringan har bitta qanot
Ortidan adashsang:
“Ol!” deb,
“Obket!..” deb…

…Azizim,
Na qadar sevaman Seni?..

1993

* * *

Kishanlarmi oyog’imga parchinlangan,
Qanotlarmi, qo’llarimday qayrilganim?..
Yo’llarimda muzlar undi, xorlar undi
Sizni desam, –
o’lmay turib ayrilganim!..

Sizni dedim, – tillarim ham zanjirlandi,
Ko’zlarimni bosib ketdi Og’riqlarim!..
Ichim yondi, jonim yondi,
Xanjarlandim, –
bir diydorni qiyomatga qoldirganim…

Kishanlarmi oyog’imga parchinlangan?..

07.09.2005.

* * *

Ey mening g’animdan g’animroq Do’stim,
ey mening Osmonday yaqinim!..
Sham kabi
Umrimning xaritasini
o’z mehrim otashida yoqqanim!

Bilmading:
Chashming gavharida tomir otdim men –
har bir hujayrangda gulladim!..
Sog’inchim armonlar changalzorida
tuzalmas dard yanglig’ yilladi. –
Dilim pora qildi hasrat itlari, –
Tunlari yulqinib uvladi!..

Ishqmidi? –
Ko’ksimda bodrab o’sdiyu
Ildizin ko’zgacha yo’lladi!

Aslida
Umrimni berganim, ko’zimni berganim
Kim edi
Ne edi
Bilmadim!..

02.02.2006.

ONAMNING QO’SHIG’I

So’zlari dur qizim,
Yuzi hur qizim.
Tanholik chohida
Ko’ngli nur qizim…

Qishning ayozida ungan binafsham,
Umrim zulmatini yondirgan gulshan.
… Ishqning to’fonida kuyganim, bolam! –
G’ayurlar qo’lida qolgan devonam…

Mening tuproq qizim,
Qalbi tog’ qizim.
So’zi urvoq qizim,
Izi xor qizim…

Mehrim qondirganim mening, – oftobim.
Ko’kda anbar bog’im, yerda gul bog’im!..
…Sog’inchdan yuragi ezilgan bolam, –
Yo’limda dur kabi tizilgan bolam…

Ko’ngli o’ksik qizim, –
Bag’ri qon lolam.
Baxti kemtik bolam,
Ko’kdagi nolam…

Mening Oftob qizim –
Yolg’iz – Shoh qizim!..

06.03.2013.

* * *

Ko’nglim manim, ko’nglim manim,
ko’nglim manim poyingdadir.
Shams Tabriziy

Ey mening jonim ham tanim,
O’zdan O’zimga yetganim…
Kimman-ki, vaslingni so’ray?! –
Qilsam xatolar, – kechganim!..

Ey gulu rayhonim bo’yi,
Qalbimning ifori, Ro’yi.
Tunimning – umrimning Nuri, –
Qilsam tugunlar, – yechganim!

Ko’ksimning so’nmas otashi,
Dunyomning ichi ham tashi…
Vujudim yondi shavqingda,
Ishqingda kul bo’lsam qani!

Bodi ravonim – mahzanim,
Ko’nglimning shohi – gavharim.
Do’lu to’fonim, – kavsarim,
Ko’yingda sel bo’lsam qani!

Ey mening baxtimu ganjim, –
Sitamim, ozorim, ranjim,
Ul kun Nigohing taftidan
Jon olib,
jon bersam qani!..

02.08.2015.

ONAMNI SOG’INIB…

Jizg’anak sahroda kezib tashnalab
qurayinmi qumlardan chodir?..
YO bag’rimni bosib mog’oralarga
ko’mayinmi o’zimni xoksiz?!

Ko’ksimni yoraymi?..
Ko’zga mil tortib
Gado bo’layinmi?
Devona bo’laymi?!
Dunyo gunohlarin yelkamga ortib
do’zaxingda ming yil yonaymi?..

…Ayt,
nima qilayin
bir diydor uchun?!

07.03.2016.

04

(Tashriflar: umumiy 114, bugungi 1)

Izoh qoldiring