Guljamol Asqarova. She’rlar.

0_1ba604_259cfad8_orig.png    Шоир қачон шеър ёзади? Шу саволни кўп таҳлил этаман. Назаримда, шеър туғилиши учун шоир руҳини ларзага соладиган куч керак. Дард, изтироб, ёруғ туйғулар лозим. Шеър изтироб бўғзингга тиқилганида ёзилади, қувонч руҳни кўкка парвоз эттирганида, завқу шавқ­қа тўлдирганида ёзилади (Гулжамол Асқарова билан суҳбатдан. Суҳбатни мана бу саҳифада ўқинг).

Гулжамол Асқарова
ШЕЪРЛАР
06

8f6ac575660e09bf6c20708fe4d1c30b.pngИстеъдодли шоира Гулжамол Асқарова 1978 йил 5 март куни Самарқанд вилояти, Каттақўрғон тумани, Бешдарғат қишлоғида туғилган. Ўзбекистон Миллий Университетининг журналистика факултетини тамомлаган. Ўзбекистон Ёзувчилар уюшмасининг аъзоси. 2001 йилда Зулфия номидаги Давлат мукофоти билан тақдирланган. «Дил фасли», «Рўшнолик», «Бедор қўнғироқ»,»Бахт дастхати» номли шеърий китоблари нашр этилган.

06

Таскин

Қўй йиғлама, оғрийди бошинг…
Шавкат Раҳмон

Қўй, йиғлама, руҳимга қўшил,
Юракларинг урсин мен билан.
Бу дунёда неки бор мушкул,
Боғлайверма қаро тун билан.

Кўп ёзғирма, бу тақдир, насиб,
Айблама, тонма, ранжима.
Қаро тунлар яралган асли,
Оппоқ туйғуларнинг мавжидан.

Кел, келақол, Сен ахир нурсан,
Борлиқ сени айлар тўтиё.
Мен тоабад сенга интиқман,
Нурга мангу зордек бу дунё.

Нур

Изтиробдан зерикдингизми?
Чарчатдими кўзим ёшлари.
Ўз қисматим олдида яна
Жим эгилиб қолди бошларим.

Бироқ сизни севаман қаттиқ,
Бахш этдингиз олов туйғулар.
Тортиқ этмиш қалбингиз менга,
Ёруғ ғамлар, нурли қайғулар.

Бу нурлардан қамашди кўзим,
Нурга чайдим юзларимни мен.
Кўрай десам Сизни яхшироқ,
Очолмаяпман… кўзларимни мен…

Асраб қол

Бегонаман дема, жоним оғрийди,
Бегонасан дема, йиғлайди руҳим.
Кўнглимнинг бағрига яшриниб олиб,
Йиғлаяпман сокин, йиғлаяпман жим.

Мен фақат шу кунлар жуда ожизман,
Фақат шу кунларда йўқман ўзимда.
Мен қанча ҳайдамай, қанча кет демай,
Қайғулар кетмайин қолди кўзимдан.

Қачондир бахтлар ҳам қайтар-ку ахир,
Қачондир кўксингга қайтар-ку ҳислар.
Илтимос, баҳорим бўлиб асраб қол,
Токи ўлдирмасдан бу совуқ кунлар…

* * *

Раҳмат, қўлларимдан тутганинг учун,
Ташаккур! Қорларда кутганинг учун.
Минг раҳмат кўксимни нурларга кўмиб,
Тақдирим йўлидан ўтганинг учун.

Ва минг бор тақдирга таъзим, азизим,
Яхши-ёмонимда ёрлигинг учун.
Пешонамда исминг ёзилгани ва
Кафтим чизиғида борлигинг учун…

Менсиз ҳам

Балки фаришта ҳам асрамас мени,
Ёмонман-ку, балки урмас мени жин.
Лекин, илтимосим, ҳеч қачон айтма,
Менсиз ҳам ҳаётинг чиройлилигин.

Менсиз ҳам бахтиёр, шод яна хуррам,
Кўзингда қувончлар билан яшасанг.
Менсиз ҳам хотиринг бўлса агар жам,
Боғингда гулласа гуллар турфа ранг.

Менсиз ҳам ҳар кунинг ўтса осуда,
Менсиз ҳам бахтдан шод ва мамнун кулсанг.
Агарки сен мени соғинсанг жуда,
Жаннат чорласа ҳам бормасман билсанг.

Севмай қолдим дема, бу сўздан қайтгил,
Биламан бу тақдир азаллигини.
Фақат қандоқ қилиб тушунай айтгил,
Менсиз ҳам ҳаётинг гўзаллигини.

Нома

Қоғозлар ичига кўмилиб қолдим,
Оғир куй чалмоқда бўғзимдаги най.
Мана ўтирибман бенаво, бедил,
Хавотир олсам ҳам хабар ололмай.

Ҳолинг нечук ўзи дўсту ҳамроҳим,
Не учун кўксингда кечмоқда жанглар?
Кетдими кўзингдан қайғулар расми,
Қолдими кўксингда илоҳий ранглар?

Кел, мени қутқаргил, жоним, азизим,
Бу ҳижрон дастидан чарчадим, толдим.
Мен нега ҳисларинг тўлқинидамас,
Қоғозлар ичида кўмилиб қолдим?!

Хавотир

Мени унуттирар иш қоғозларинг,
Узоқлаштиради қалам, дафтарлар.
“Ёдларингдан ўчиб бораётирман”,
Юрагимда шундай хавфу хатарлар.

Лазиз туйғулардан айирса агар,
Унутилиб кетса ишқ овозлари.
Бори ташвишларга қирон келсину,
Ёниб кетсин барча иш қоғозлари…

Қисқа қўнғироқлар… салом-аликлар,
Совуқ суҳбатларда умр ўтса гар.
Сочдан тирноқ қадар музлаб ўтарман,
Илоҳий ҳислар-ла севмасанг агар…

Азизим, муқаддас ришталар ҳаққи,
Уйғот юрагингни ғафлат хобидан.
Илтимос, севгинг-ла қутқаргил мени,
Унутилиб кетиш изтиробидан!

* * *

Бунчалар ҳам ёруғдир исминг,
Бунча ҳаётбахшсан, азизим.
Бу дунёда сен каби мени
Жондан ортиқ севмади ҳеч ким.

Севилмадим… узоқ йиғладим,
Тангрим сени айлади тортиқ.
Бу дунёда ҳеч ким сен каби
Севолмади жонидан ортиқ.

Нафасларинг уйғотди ҳар тонг,
Тушларимда кўрдим тунлари.
Сенинг севгинг билан уйғундир,
Бахтиёру бахтсиз кунларим.

Минг ташаккур ҳаммаси учун,
Яхшиямки топганман сени.
Юрагимдек яқин кел менга,
Олислардан чорлаб тур мени…

Меҳр нима?

Олис йўллар юриб толиқдим жуда,
Меҳр сувларини ичирдингиз Сиз.
Ҳатто кечирмадим ўзимни ўзим,
Бори айбларимни кечирдингиз Сиз!

Меҳр деганлари нима аслида,
Меҳр – қалбимизнинг оппоқ елкани.
Ўзини ўзи ҳам севолмаганни,
Бағрингга жим босиб севмоқ дегани!

Сенинг исминг

Сени севдим, сени унутдим,
Ва йўқотдим дунёнинг рангин.
Сенинг исминг айтилган жойда,
Менинг бошим эгилмиш мангу.

Сўрар экан мендан одамлар:
“Қани сенинг жону жаҳонинг?”
Мен бошимни эгиб айтарман:
“Куйиб кетмиш менинг жаҳоним!”

Бу ҳақорат ва бу таҳқирлар
аро маъюс борарканман мен.
Ўз-ўзингга маҳлиё бўлиб,
Бошинг мағрур юраркансан Cен!

Бўлди энди тугат савдони!
Бас қил энди, бу ўйин тамом.
Бу алдовлар, бу хиёнатлар
Мени таъқиб айламиш мудом.

Энди йўлим бормас сен томон,
Энди сендан бегона ёдим.
Ахир ишқнинг ҳадсиз бағрига
Тўлиб кетмиш менинг фарёдим!

Кўк бағрига тўлса-да ҳар тун,
Васл излаб юлдузлар, ойлар.
Кетаяпман… чорлади мени
Сенинг исминг айтилмас жойлар…

Узоқ йўллар

Мен узоқ йўлларни яхши кўраман,
Чунки узоқ юрдим узоқ йўлларда.
Ва ҳар бир қадамда ўйлаб юраман:
Нечун пойингизда хорман гуллардай…

Мен узоқ йўлларни яхши кўраман
Гарчи етказмади сизга бу йўллар.
Қирларнинг бағридан жимгина ўтсам,
Мени эслармикан қизғалдоқгуллар?..

Мен узоқ йўлларни яхши кўраман
Гарчи бу йўлларда тўкилди қоним.
Туманли йўлларда кўп узоқ юриб,
Сизни узоқ кутдим… султоним!

Мен узоқ йўллардан умид қиламан:
Гарчи кўп доғ бўлди бу йўлда диллар.
Сизни юрагимга яқинлаштирар,
Мени Сизга элтар бу узоқ йўллар…

Савол

Фалак!
Эшикларинг қаерда сенинг?
Қайғу!
Бешикларинг қаерда сенинг?
Эй дил!
Қўшиқларинг қаерда сенинг?

* * *

Ўз йўлини ўзи топган одам
Мен ўз йўлимни топиб олдим…
Ўзим топган йўлда юрибман
Адашиб ўзим…

Умр

Худойим!
Баъзан яратганингга шукр деймиз.
Баъзан нега яратдинг деймиз.
Шундоқ ўтяпти
Умримиз.

Мен

Ибодатим чала,
Тоатим чала,
Чала менинг
Ёзган шеърларим…
Чала иморатдек
Битмадим сира…

Манба: “Китоб дунёси” газетаси, 2013 йил 5(152)-сон

05

Guljamol Asqarova
SHE’RLAR
06

077Iste’dodli shoira Guljamol Asqarova 1978 yil 5 mart kuni Samarqand viloyati, Kattaqo’rg’on tumani, Beshdarg’at qishlog’ida tug’ilgan. O’zbekiston Milliy Universitetining jurnalistika fakultetini tamomlagan. O’zbekiston Yozuvchilar uyushmasining a’zosi. 2001 yilda Zulfiya nomidagi Davlat mukofoti bilan taqdirlangan. «Dil fasli», «Ro’shnolik», «Bedor qo’ng’iroq»,»Baxt dastxati» nomli she’riy kitoblari nashr etilgan.

067

Taskin

“Qo’y yig’lama, og’riydi boshing”
Shavkat Rahmon

Qo’y, yig’lama, ruhimga qo’shil,
Yuraklaring ursin men bilan.
Bu dunyoda neki bor mushkul,
Bog’layverma qaro tun bilan.

Ko’p yozg’irma, bu taqdir, nasib,
Ayblama, tonma, ranjima.
Qaro tunlar yaralgan asli,
Oppoq tuyg’ularning mavjidan.

Kel, kelaqol, Sen axir nursan,
Borliq seni aylar to’tiyo.
Men toabad senga intiqman,
Nurga mangu zordek bu dunyo.

Nur

Iztirobdan zerikdingizmi?
Charchatdimi ko’zim yoshlari.
O’z qismatim oldida yana
Jim egilib qoldi boshlarim.

Biroq sizni sevaman qattiq,
Baxsh etdingiz olov tuyg’ular.
Tortiq etmish qalbingiz menga,
Yorug’ g’amlar, nurli qayg’ular.

Bu nurlardan qamashdi ko’zim,
Nurga chaydim yuzlarimni men.
Ko’ray desam Sizni yaxshiroq,
Ocholmayapman… ko’zlarimni men…

Asrab qol

Begonaman dema, jonim og’riydi,
Begonasan dema, yig’laydi ruhim.
Ko’nglimning bag’riga yashrinib olib,
Yig’layapman sokin, yig’layapman jim.

Men faqat shu kunlar juda ojizman,
Faqat shu kunlarda yo’qman o’zimda.
Men qancha haydamay, qancha ket demay,
Qayg’ular ketmayin qoldi ko’zimdan.

Qachondir baxtlar ham qaytar-ku axir,
Qachondir ko’ksingga qaytar-ku hislar.
Iltimos, bahorim bo’lib asrab qol,
Toki o’ldirmasdan bu sovuq kunlar…

* * *

Rahmat, qo’llarimdan tutganing uchun,
Tashakkur! Qorlarda kutganing uchun.
Ming rahmat ko’ksimni nurlarga ko’mib,
Taqdirim yo’lidan o’tganing uchun.

Va ming bor taqdirga ta’zim, azizim,
Yaxshi-yomonimda yorliging uchun.
Peshonamda isming yozilgani va
Kaftim chizig’ida borliging uchun…

Mensiz ham

Balki farishta ham asramas meni,
Yomonman-ku, balki urmas meni jin.
Lekin, iltimosim, hech qachon aytma,
Mensiz ham hayoting chiroyliligin.

Mensiz ham baxtiyor, shod yana xurram,
Ko’zingda quvonchlar bilan yashasang.
Mensiz ham xotiring bo’lsa agar jam,
Bog’ingda gullasa gullar turfa rang.

Mensiz ham har kuning o’tsa osuda,
Mensiz ham baxtdan shod va mamnun kulsang.
Agarki sen meni sog’insang juda,
Jannat chorlasa ham bormasman bilsang.

Sevmay qoldim dema, bu so’zdan qaytgil,
Bilaman bu taqdir azalligini.
Faqat qandoq qilib tushunay aytgil,
Mensiz ham hayoting go’zalligini.

Noma

Qog’ozlar ichiga ko’milib qoldim,
Og’ir kuy chalmoqda bo’g’zimdagi nay.
Mana o’tiribman benavo, bedil,
Xavotir olsam ham xabar ololmay.

Holing nechuk o’zi do’stu hamrohim,
Ne uchun ko’ksingda kechmoqda janglar?
Ketdimi ko’zingdan qayg’ular rasmi,
Qoldimi ko’ksingda ilohiy ranglar?

Kel, meni qutqargil, jonim, azizim,
Bu hijron dastidan charchadim, toldim.
Men nega hislaring to’lqinidamas,
Qog’ozlar ichida ko’milib qoldim?!

Xavotir

Meni unuttirar ish qog’ozlaring,
Uzoqlashtiradi qalam, daftarlar.
“Yodlaringdan o’chib borayotirman”,
Yuragimda shunday xavfu xatarlar.

Laziz tuyg’ulardan ayirsa agar,
Unutilib ketsa ishq ovozlari.
Bori tashvishlarga qiron kelsinu,
Yonib ketsin barcha ish qog’ozlari…

Qisqa qo’ng’iroqlar… salom-aliklar,
Sovuq suhbatlarda umr o’tsa gar.
Sochdan tirnoq qadar muzlab o’tarman,
Ilohiy hislar-la sevmasang agar…

Azizim, muqaddas rishtalar haqqi,
Uyg’ot yuragingni g’aflat xobidan.
Iltimos, sevging-la qutqargil meni,
Unutilib ketish iztirobidan!

* * *

Bunchalar ham yorug’dir isming,
Buncha hayotbaxshsan, azizim.
Bu dunyoda sen kabi meni
Jondan ortiq sevmadi hech kim.

Sevilmadim… uzoq yig’ladim,
Tangrim seni ayladi tortiq.
Bu dunyoda hech kim sen kabi
Sevolmadi jonidan ortiq.

Nafaslaring uyg’otdi har tong,
Tushlarimda ko’rdim tunlari.
Sening sevging bilan uyg’undir,
Baxtiyoru baxtsiz kunlarim.

Ming tashakkur hammasi uchun,
Yaxshiyamki topganman seni.
Yuragimdek yaqin kel menga,
Olislardan chorlab tur meni…

Mehr nima?

Olis yo’llar yurib toliqdim juda,
Mehr suvlarini ichirdingiz Siz.
Hatto kechirmadim o’zimni o’zim,
Bori ayblarimni kechirdingiz Siz!

Mehr deganlari nima aslida,
Mehr – qalbimizning oppoq yelkani.
O’zini o’zi ham sevolmaganni,
Bag’ringga jim bosib sevmoq degani!

Sening isming

Seni sevdim, seni unutdim,
Va yo’qotdim dunyoning rangin.
Sening isming aytilgan joyda,
Mening boshim egilmish mangu.

So’rar ekan mendan odamlar:
“Qani sening jonu jahoning?”
Men boshimni egib aytarman:
“Kuyib ketmish mening jahonim!”

Bu haqorat va bu tahqirlar
aro ma’yus borarkanman men.
O’z-o’zingga mahliyo bo’lib,
Boshing mag’rur yurarkansan Cen!

Bo’ldi endi tugat savdoni!
Bas qil endi, bu o’yin tamom.
Bu aldovlar, bu xiyonatlar
Meni ta’qib aylamish mudom.

Endi yo’lim bormas sen tomon,
Endi sendan begona yodim.
Axir ishqning hadsiz bag’riga
To’lib ketmish mening faryodim!

Ko’k bag’riga to’lsa-da har tun,
Vasl izlab yulduzlar, oylar.
Ketayapman… chorladi meni
Sening isming aytilmas joylar…

Uzoq yo’llar

Men uzoq yo’llarni yaxshi ko’raman,
Chunki uzoq yurdim uzoq yo’llarda.
Va har bir qadamda o’ylab yuraman:
Nechun poyingizda xorman gullarday…

Men uzoq yo’llarni yaxshi ko’raman
Garchi yetkazmadi sizga bu yo’llar.
Qirlarning bag’ridan jimgina o’tsam,
Meni eslarmikan qizg’aldoqgullar?..

Men uzoq yo’llarni yaxshi ko’raman
Garchi bu yo’llarda to’kildi qonim.
Tumanli yo’llarda ko’p uzoq yurib,
Sizni uzoq kutdim… sultonim!

Men uzoq yo’llardan umid qilaman:
Garchi ko’p dog’ bo’ldi bu yo’lda dillar.
Sizni yuragimga yaqinlashtirar,
Meni Sizga eltar bu uzoq yo’llar…

Savol

Falak!
Eshiklaring qaerda sening?
Qayg’u!
Beshiklaring qaerda sening?
Ey dil!
Qo’shiqlaring qaerda sening?

* * *

O’z yo’lini o’zi topgan odam
Men o’z yo’limni topib oldim…
O’zim topgan yo’lda yuribman
Adashib o’zim…

Umr

Xudoyim!
Ba’zan yaratganingga shukr deymiz.
Ba’zan nega yaratding deymiz.
Shundoq o’tyapti
Umrimiz.

Men

Ibodatim chala,
Toatim chala,
Chala mening
Yozgan she’rlarim…
Chala imoratdek
Bitmadim sira…

Manba: “Kitob dunyosi” gazetasi, 2013 yil 5(152)-son

002

(Tashriflar: umumiy 11 526, bugungi 1)

23 izoh

  1. опа сизни шерларингизни хар гал окисам кузимга ёш оламан энг огир кунларимизда биринчи марта китобингизни укиганимда ичида хамма шер сиз ёзган эмас худди мен ёзганде мени хаётимга мос эканди ижодизга омад

  2. Ассалому алайкум. Гулжамол опа. Мен сизни 2015 йил 17 июндаги O’zLiDeP Сиёсий Кенгаши Ижроя қўмитасининг мажлислар залидаги маърузангиздан жуда таъсирланиб кетдим. Хақиқий ватанпарвар, жамият аёллари учун куюнчи инсонлигингиз яққол кўринди. Мен сизни биринчи маротаба шу мажлисда танидим. Шу куни мен хам анчадан бери дилимдаги келажак ёш қизларимизнинг дарди билан бир ғояни кўтарган эдим лекин вақт чегарали бўлганлиги учун улгурмадим. Яъни умумий ўрта мактаб битирувчи қизларини касбга йўналтиришдаги муоммолар хақида(агар эслаган бўлсангиз). Мажлисдан сўнг кўп ёш қизлар менга мактабни битиргандан кейин ота-оналари уларни турмушга мажбурлаб бераётганликларини куюниб айтишди. Шу масала бўйича вақтигиз бўлса сиз билан яқиндан маслахатлашмоқчи эдим.

  3. Фаридахон, илик фикрлар учун рахмат.Узр кеч укидим.Гулжамол

  4. Assalomu Aleykum Gulchehra apa. Tahminan 2006-2007 yillarda radioda bir intirviyuda ona haqidagi she’ringizni o’qigan ediz shu she’rni saytda yozib qo’ying iltimos. Juda yaxshi she’r edi!

  5. Opa men Òzbek tili va adabiyoti òqituvchisiman. She’rlaringiz menga juda ham yoqadi. Opa sizni Iroda Fayoz tahallusi bilan ijod qiladigan shogirdingiz bormi?

  6. Мен сизни ижодингизни чукур хурмат киламан мен хозир владивастокдан сизни тенглиман доим мен сизни таниганимга 13йил булди биласизми каттакургондаги 61мактабга борганингизни шер укиган едингиз даврада мен узим билан барча китобларингизни олиб. Юраман хозир дунйонинг бир четида юрибман лекн хар тунда китобларингизни укиб уйкуга кетаман опажон

  7. Гулхаёжон салом…дунёни кайси чеккасида булманг мехрим сиз Билан,чунки мехрдан мехр пайдо булди…рахмат мехриз учун.

  8. Assalomu alaykum qalbimdagi qadri balandim Guljamol opa Asqarova!
    Ancha yillardan beri ijodingizni kuzataman!
    Ammo sira ham sezmadim takrorlarni!
    Har gal she’rlaringizni uqiganimda uzgacha zavq olaman
    hayotga qaytadi ruhim!
    Siz xalq orasidan chiqib xalqning qalbiga kirgan SHOIRAsiz!
    Ijodingiz bundan ham balandga parvoz etaversin!!!
    Mehr ila Dilsora Baxronova
    Navoiy viloyati

  9. Ассалому алайкум Гулжамол опа!
    «Агар сенда Аллох берган истеъдоднинг учкуни булмаса, устозинг қуёш бўлгандаям, сен юлдуз бўлолмайсан » деган сўзларга ишонгим келади баъзида. чунки шундай иқтидорлар борки, хали устоз кўрмай туриб , Худо юқтирган қобилият билан ўз сўзини айта олади.
    Аллоҳ берган истеъдодингизга кўз тегмасин!
    Италия

  10. Раьножон рахмат…адашмасам нитщени сузи Эди бу… Илохим,худо юктиргани рост булсин.сог ОМОН булинг.келинг…

  11. Ассалому алайкум Гулжамол опа сиз билан куришиб гаплашишнинг иложи борми? буласа бошим кукка етарди.

  12. Ассалому алайкум Хадичахон. Мен «Дугоналар» деган журналдаман. телефонимиз 71 267-39-75. Келинг

  13. Assalomu alaykum iltimos Guljamol Asqarovani Xush köngil otamni yiglatib qöydim she’rlarini telegramdagi saxifalariga qöying.

  14. Салом Гулжамол опа мен мактабгача таьлим мутахасисиман менга шерларингиз жуда екади Рушнолик номли китобингиздан бошлаб мутола киламан яна бунданда буюк ижод сизни тарк этмасин Зебинисо

  15. Assalomu alaykum,Guljamol opa,sizni nafaqat o’zingizni balki shaxsiyatingizni ham hurmat qilaman. Ilohim ijodingiz bundanda gullab yashnasin,ko’z tegmasin…

  16. Sherlaringiz xammasi juda xam ajoyib. Xar qancha maqtasam kam. She’rlarga beriladigan eng yaxshi ta’riflarga loyiq. Sizni xam she’rlaringizni xam juda xam yaxshi ko’raman!

  17. Ўзбек шеъриятида Зулфия, Х.Худойбердиевалар шеърларининг гўзалликлари, шижоаткорликлари сингари Гулжамол Асқарованинг ижоди хам ўзига хос ажойиб! Факат мен адабиётшунос эмаслигимдан бу борада фикрларимни тўлиқ ифодалаб беролмайман. Айта олишим мумкин бўлгани шу-ки, Гулжамолнинг шеърларини ўқисам бошкача бўлиб кетавераман. Худди-ки, унинг шеърларида менинг дардим акс этгандек…
    Бундан анча йиллар аввал чет давлатга чикиб кетгандим. Юкларим орасидан нималардир ўралиб келиб қолган газета парчасида унинг ажойиб бир шеъри парчасини ўқиб колдим. «Ўйлар эдим…» деб бошланар эди. Афсус, охири йиртилиб қолган экан. Интернетга кириб давомини изладим, тополмадим. «Зиё истаган қалблар учун…» сайтига кириб Гулжамолнинг шеърлари рўйхатини топдим. Ажойиб! Лекин мен излаган шеъри киритилмаган экан. Мухлисларнинг шарҳлар бўлимига кириб ўша шеърни излаётганим ҳақида ёздим. Жавоб келмади. У шеърни ҳамиша ёддан ўқиб юравердим. Охирини эса ўзим «ижод қилиб» тугатиб қўйдим.
    Йиллар ўтиб ўзбекистонимизга қайтдим. Бир куни бир масала бўйича Ўзб.Респ. Хотин қизлар Қўмитасига ишим тушиб колди. Коридор буйлаб очиқ турган бир эшик ёнидан ўтиб кетарканман, ичкарида шоирамиз Гулжамолни журнал варақлаб турганига кўзим тушди. (Қўмита раиси ўринбосари экан) Тўхтаб қолдим. Кирсам-ми ё кирмасам-микин деб ўйланиб турдим. Ҳаяжонландим. Ҳаётимда ҳалича шеърият аҳли билан юзма-юз туриб суҳбатлашмаганман. Мен учун шоир аҳли гўёки бошқача, сирли одамлардек… (шундай бўлишларини юракдан истайман ҳам).
    Минг бир хижолат билан хонасига кирарканман, ўзимни таништирдим ва суҳбат давомида ўшанда интернет сайтидаги илтимосимга жавоб ололмаганимни ҳам айтиб ўтдим. ”У ака сиз бўласиз-ми? Шарҳларингизни ўқиганман. Рахмат ажойиб фикрларингиз учун! Сиз излаган шеъримнинг охирини шарҳларга ташлай олмаганим сабаби, мен ўша пайтлар яхши ўрганиб ололмаганим учун қанақа килиб жўнатишни билмагандим” дея хижолат бўлдилар. Ва менга кўзларимни қувонтириб янги шеърий тўпламини ҳадя қилди. Биз анча вақт самимий суҳбатлашдик. Шоира синглимизнинг сўзларида унинг ўзининг шеърларидаги каби самимий инсонни кўрдим. Бу жуда ажойиб учрашув эди!
    Менга ҳадя қилган китобини тез – тез варақлаб тураман. Ҳар гал уни варақлар эканман, албатта, биринчи саҳифасидан бошлайман. Ундаги ”Рахматилла ака! Сиздек инсонларнинг борига шукур! Гулжамол Асқарова”деган дил изҳорини ўқирканман, кўнглимни хушкайфият чулғаб олади.
    Мен Гулжамол синглимизга сиҳат-саломатлик, оилавий бахт, ижодида эса юксак парвозлар ато этишини худодан сўраб қоламан. Шеъриятимиз поғонасида уни Зулфия, Халима Худойбердиевалар қаторида кўришни жуда-жуда ҳоҳлай

  18. Sizga xavas qiladigon oddiy bir shoira qiz Raxmatova Sarvinozman! Hozir 18 yoshda bo‘lsam. 8 yoshligimdan beri Guljamol Asqarovani she‘riyatiga qiziqaman. U insonni judayam yoqtiraman ular meni idealimdagi ayoldir.

  19. Assalomu alaykum Guljamol opa biz dugonam bilan sizga juda havas qilamiz.
    Nasib etsa sizdek shoira bo’lmoqchimiz.
    Biz Kattaqo’rg’ondan 1-maktab o’quvchilari Muzaffarova Marjona va Nematullayeva Marjona.

  20. Men o»ktamova zuxra men 7yoshimdan guljamol asqarova sheriga juda qiziqaman

  21. Assalomu alaykum Guljamol opa.Qarang ancha yillardan beri sizni ijodingizga qiziqib yurardim. Hayot tashvishlari bn bulib hecj vaqt bulmasdi.Va nihoyat bugun siz va sizni sherlaringiz bn goyibona diydorlashib turibman.Bilasiz ayol kishining kungli nozik buladi.Nimadandir yoki kimdandir kungli ogrisa dardlarini nima bilandir baham kurgisi keladi.Ana shunaqa damlarda sizni qachonlardir gazetada uqigan ikki misra sheringizni bot bot takrorlayman.Menga bayram tatimas.Hatto oddiy kunchalik.Bu sherni nomini ham bilmasamda mana shu ikki misra yodimda qolib ketgan.Shu ikki misra meni qancha dardlarimni yengillashtiradi.Opajon agar shu sherizni yozib qoldirsangiz mendanda baxtli odam bulmasa kk.Bundan keyingi ijodizga ulkan zafarlar tilab qoluvchi kamtaringina muxlisangiz

  22. Аввало ассалому алайкум,хурматли Гулжамол Аскарова!Сизни ижодингизни 2001 йилдан бери кузатиб келаман. Уша «Рушнолик» номли илк китобчангиз кулимдан тушмаганлиги учун хозир жуддддаям «аянчли ахвол»га келиб колган. Албатта, бу учун сиздан узр сурайман. Мен асли сиз билан тенгкурман. Сизни шеърий китобингиз кулимга тушмай аввал, муаллифи кимлигини билмаганим холда яхши куриб» Нега мени ютказиб куйдинг, ок теракми, кук терак уйнаб», «севаман деб хат ёз бир яна, каерларда колдинг, синфдош» дейилгучи мисраларингизни ёд олиб айтиб юрардим. Кейинги укиган шеърий китобим «Эркалик имтиёзи» булди. Бу китобга нега бундай ном куйганингизни кейинчалик айтмокчилигингиз хакида ёзгандингиз.Шу китобингиздаги «Уйготувчи алла» номли шеърингизни укиб, очиги, нега аввалрок билмадим бу нарсани, дея афсусландим. Ва узимча дилимдаги нолаларимни кулдан келганча сатрларга жойладим.
    Она армони
    Мен боламга ухлатувчимас,
    Уйготувчи алла айтаман.
    Г. Аскарова.
    Attang, attang, òqib qoldim bu she’rni kecg
    Attang, attang, uqib qoldim bu sirni kech
    Men bolamni ulģaytirib beshigida.
    Uyģotuvchi allalarni aytmabman hech

    Endi mendan bolam rozi bòlarmikin
    Dunyosidan kòngillari tòlarmikin
    Men qòrqaman, uxlatuvchi allalarim
    Zalvorlari bir kun baģrin tilarmikin.

    Uyģonishga ahd bòlarmi yuragida
    Qumģondayin qaynarmi kuch bilagida.
    Elim, yurtim deya yonib qumģondayin
    Vatan dardin kòtararmi kuragida.

    Guljamolning satrin òqib nogoh bu kun
    Yuragimga tòldi armon tugun-tugun.
    Qalbim yiģlar, kòz yoshlarim daryosida
    Uyģotuvchi allalarim suzar beun.

    Tangrim, endi bolam uchun panohdirsan
    Men bir gumroh, bugun katta gunohdirman.
    Òzing ģaflat uyqusidan asragin-a
    Men xatoyim ostidagi bir ohdirman.

    Tangrim, sen ham mendan rozi bòlarmisan…

    Siz, bir she’ringizda «Kun kelar, enfg buyuk kitob bòlaman…» deya bong urgan edingiz. Albatta, albatta, siz bugun ham «buyuk kitob»siz va bundan keyin ham shunday bòlib qolishingiz, shubhasiz! Ijodingizga barkamollik tilayman.
    Umidaxon Anorboyeva. Andijon. Jalaquduq.

  23. Гулжомол !Сизни шьерларингизни укисам,бошка бир дуньега кириб кетаман…Сиз Узбекни Анна Ахматоваси,Марина Цветаевасисиз!

Izoh qoldiring