Nargiza Asad. She’rlar

08

Бугунги ёшлар шеъриятида ўзига хос овози бор Наргиза Асад шеърларида аёл қалбининг ичкин изтироблари оғриқлари ётади .Унинг шеърларида умидга йўғрилган ёруғликни кўраман (Мусалламнингмактубидан).

08
Наргиза Асад
ШЕЪРЛАР
09

Наргиза Асад 1984 йил Тошкент вилоятининг Қуйи Чирчиқ тумани Гул қишлоғида туғилган. Тошкент давлат маданият институтида таҳсил олган. Талабалик йилларидаги илмий-ижодий изланишлари самараси ўлароқ, унинг “Саодат манзили” илмий мақолалар ва “Ишқ остонаси” номли шеърий тўпламлари чоп этилган. Шунингдек, “Юрагимнинг сарҳадлари” номли шеърий китоби 2011 йил нашрдан чиққан.

09

***

Соат тўққиз.
тугайди ишинг.
Харид қилдинг
ширинлик атай.
Катта йўлга чиққандинг
шошиб,
Сендан кетиб борар трамвай.
Қўлингдаги юкинг
оғирми?
оғир балки майда
ташвишлар.
Оғринмайсан…
ҳадемай кўклам!
Бугунча қиш уйингда қишлар.
Ошиқасан
Йўлингда аёз.
Эримайди қордаги изинг.
Кута-кута
аммо
жонгинам,
Ухлаб қолар
бугун ҳам қизинг.

* * *

Уюлиб ётади столда қоғоз,
Бошинг кўтаролмайсан ишдан.
Хонанг иссиқ…
совқотдим бир оз
Жоним, хабаринг борми қишдан!
Қиялатиб эшигинг насим
Остонангдан бўйлар сўнгги бор.
Англамадинг,
соғиниш касбим,
Қара! ахир кетяпти баҳор…
Увишдими недандир тананг
Қароғимда қолса тилаклар.
Кўрмаганга йўйгач ишхонанг
Олиб кетди
мени лайлаклар…
Хазонбоғдан келса гар овоз
Изла, энди туйғуларимни.
Йиллар бўйи титкилаб қоғоз,
Тополмайсан
кулгуларимни

* * *

Совуқ тушди… нигоҳларинг муз
Совуқ урди кузги гулларни.
Гапирмайсан, орзиқиб илҳақ
Кутганмидим
шундай кунларни.
Жим кезасан, солмайин ғавғо
Қарамайсан,
боқиб турсам зор.
Нигоҳларинг тегиб яшнаган
Бу хонада гуллар бахтиёр.
Юзларимни артади насим
Пайвандламоқ бўлар дилларни.
Кўнглим синган шундайин кунда
Сен ўйлайсан ҳамон гулларни.
Совуқ тушди…

* * *

Гумбурлаб кетади кўк юзи,
Деразани ёпаман аранг.
Шамоллар
дўқ урса ҳовлида,
Қўрқиб кетар ҳатто кучукчанг.
Урушларни кўрмаган болам,
Тиқиласан,
паноҳми пинжим.
Ўтиб кетди довул-бўронлар.
Кўзларингни
очавер, қизим.

БОЛАЛИК

Мурғак эди, мусаффо эди,
Ўтар эди кунлар кинодек.
Кўмар эди тангаларини
Боғ пойига
Буратинодек.
Гард қўнмаган нигоҳларига,
Ошуфтаҳол боқарди қушлар.
Бекам кўриб
еру самони
Камалакранг эди тушлари.
Бир кун деди Карло отаси
Эҳ, ҳаётда бўлмас нималар.
Кино тугаб,
Буратинони
Олиб кетди учар кемалар…

* * *

Гумбурлади кўкда ўқ
Ҳаво нафаси сиқди.
Томошадан қолмай деб
Қўзиқоринлар чиқди.
Ётиб олди бари жон
Пусиб кетди номардлар.
Тик турарди ёнса ҳам
Яшин урган дарахтлар.

ҚИШКИ ЭРТАК

Боғлар аро кезасан ўйчан,
Кипригингда қотаяпти сир
Оқлик ичра, бегардлик ичра,
Сен кимнидир
кутдинг, декабрь.
Сочларингни суяди қиров
Йиллар ўтса, ким-кимга муштоқ.
Бахт рангими, армон рангми, айт,
Тушларимга
кирасан – оппоқ…
Лайлакқорлар йўқлаган тонгда,
О, кетишинг шунча тайинми.
Қишнинг боши, йилнинг сўнгисан
Аросатда яшаш қийинми?…

1

Атроф жим-жит,
Боғ йўли сокин…
Жунжикади
уфқдаги саҳар
Елкасига шарф
ташлаб
секин
Остонадан ҳатласа
январь
Қўли бормай
бирорта ишга
Хўрсинади-
музлатиб дилни.
Янги ҳаёт
бағишлаб
қишга
Ўйлайди у, жим…
эски йилни.

2

Гап талашиб кеча
қиш билан,
Ҳовуридан тушолмас мўри.
Зериктириб ховлида бунда
Тарашадек қотади сўри.
Шеърлар ёзар
қилар хиргойи,
Хаёл сурса… беришмас халал.
Ким учундир ҳалитдан қаранг
Бойчечаклар
теряпти февраль.

ҚИЗИЛ ЕЛКАН

Шовуллайди бетиним уммон,
Шивирласа тилакларини.
Олисларга кўз тиккан қизнинг,
Шамол ўйнар
кўйлакларини.
Бармоғига ким таққан узук,
Ишонади хаёлларига.
Телба десин,
парво қилмайди,
Денгизчининг аёлларига.
Орзу билан яшайди, гарчи,
Ишқ йўлида заҳмат чекканлар.
Уфқ томондан ногаҳон бир кун,
Сузиб келди
қизил елканлар!
Мен келдим, — дер, — жонгинам Ассоль…
Қолгани шу хотирам ёдда.
Жўн ҳаётни ҳайратга солиб,
Олиб кетди қизни шаҳзода.
Шовуллайди хали ҳам уммон,
Соҳилларда қолганми излар.
Кўйлаклари
ҳилпираб тонгдан,
Эртакларни кутади қизлар…

005

Nargiza Asad
SHE’RLAR
09

Nargiza Asad 1984 yil Toshkent viloyatining Quyi Chirchiq tumani Gul qishlog’ida tug’ilgan. Toshkent davlat madaniyat institutida tahsil olgan. Talabalik yillaridagi ilmiy-ijodiy izlanishlari samarasi o’laroq, uning “Saodat manzili” ilmiy maqolalar va “Ishq ostonasi” nomli she’riy to’plamlari chop etilgan. Shuningdek, “Yuragimning sarhadlari” nomli she’riy kitobi 2011 yil nashrdan chiqqan.

09

***

Soat to’qqiz.
tugaydi ishing.
Xarid qilding
shirinlik atay.
Katta yo’lga chiqqanding
shoshib,
Sendan ketib borar tramvay.
Qo’lingdagi yuking
og’irmi?
og’ir balki mayda
tashvishlar.
Og’rinmaysan…
hademay ko’klam!
Buguncha qish uyingda qishlar.
Oshiqasan
Yo’lingda ayoz.
Erimaydi qordagi izing.
Kuta-kuta
ammo
jonginam,
Uxlab qolar
bugun ham qizing.

* * *

Uyulib yotadi stolda qog’oz,
Boshing ko’tarolmaysan ishdan.
Xonang issiq…
sovqotdim bir oz
Jonim, xabaring bormi qishdan!
Qiyalatib eshiging nasim
Ostonangdan bo’ylar so’nggi bor.
Anglamading,
sog’inish kasbim,
Qara! axir ketyapti bahor…
Uvishdimi nedandir tanang
Qarog’imda qolsa tilaklar.
Ko’rmaganga yo’ygach ishxonang
Olib ketdi
meni laylaklar…
Xazonbog’dan kelsa gar ovoz
Izla, endi tuyg’ularimni.
Yillar bo’yi titkilab qog’oz,
Topolmaysan
kulgularimni

* * *

Sovuq tushdi… nigohlaring muz
Sovuq urdi kuzgi gullarni.
Gapirmaysan, orziqib ilhaq
Kutganmidim
shunday kunlarni.
Jim kezasan, solmayin g’avg’o
Qaramaysan,
boqib tursam zor.
Nigohlaring tegib yashnagan
Bu xonada gullar baxtiyor.
Yuzlarimni artadi nasim
Payvandlamoq bo’lar dillarni.
Ko’nglim singan shundayin kunda
Sen o’ylaysan hamon gullarni.
Sovuq tushdi…

* * *

Gumburlab ketadi ko’k yuzi,
Derazani yopaman arang.
Shamollar
do’q ursa hovlida,
Qo’rqib ketar hatto kuchukchang.
Urushlarni ko’rmagan bolam,
Tiqilasan,
panohmi pinjim.
O’tib ketdi dovul-bo’ronlar.
Ko’zlaringni
ochaver, qizim.

BOLALIK

Murg’ak edi, musaffo edi,
O’tar edi kunlar kinodek.
Ko’mar edi tangalarini
Bog’ poyiga
Buratinodek.
Gard qo’nmagan nigohlariga,
Oshuftahol boqardi qushlar.
Bekam ko’rib
yeru samoni
Kamalakrang edi tushlari.
Bir kun dedi Karlo otasi
Eh, hayotda bo’lmas nimalar.
Kino tugab,
Buratinoni
Olib ketdi uchar kemalar…

* * *

Gumburladi ko’kda o’q
Havo nafasi siqdi.
Tomoshadan qolmay deb
Qo’ziqorinlar chiqdi.
Yotib oldi bari jon
Pusib ketdi nomardlar.
Tik turardi yonsa ham
Yashin urgan daraxtlar.

QISHKI ERTAK

Bog’lar aro kezasan o’ychan,
Kiprigingda qotayapti sir
Oqlik ichra, begardlik ichra,
Sen kimnidir
kutding, dekabr`.
Sochlaringni suyadi qirov
Yillar o’tsa, kim-kimga mushtoq.
Baxt rangimi, armon rangmi, ayt,
Tushlarimga
kirasan – oppoq…
Laylakqorlar yo’qlagan tongda,
O, ketishing shuncha tayinmi.
Qishning boshi, yilning so’ngisan
Arosatda yashash qiyinmi?…

1

Atrof jim-jit,
Bog’ yo’li sokin…
Junjikadi
ufqdagi sahar
Yelkasiga sharf
tashlab
sekin
Ostonadan hatlasa
yanvar`
Qo’li bormay
birorta ishga
Xo’rsinadi-
muzlatib dilni.
Yangi hayot
bag’ishlab
qishga
O’ylaydi u, jim…
eski yilni.

2

Gap talashib kecha
qish bilan,
Hovuridan tusholmas mo’ri.
Zeriktirib xovlida bunda
Tarashadek qotadi so’ri.
She’rlar yozar
qilar xirgoyi,
Xayol sursa… berishmas xalal.
Kim uchundir halitdan qarang
Boychechaklar
teryapti fevral`.

QIZIL YELKAN

Shovullaydi betinim ummon,
Shivirlasa tilaklarini.
Olislarga ko’z tikkan qizning,
Shamol o’ynar
ko’ylaklarini.
Barmog’iga kim taqqan uzuk,
Ishonadi xayollariga.
Telba desin,
parvo qilmaydi,
Dengizchining ayollariga.
Orzu bilan yashaydi, garchi,
Ishq yo’lida zahmat chekkanlar.
Ufq tomondan nogahon bir kun,
Suzib keldi
qizil yelkanlar!
Men keldim, — der, — jonginam Assol`…
Qolgani shu xotiram yodda.
Jo’n hayotni hayratga solib,
Olib ketdi qizni shahzoda.
Shovullaydi xali ham ummon,
Sohillarda qolganmi izlar.
Ko’ylaklari
hilpirab tongdan,
Ertaklarni kutadi qizlar…

005

(Tashriflar: umumiy 130, bugungi 1)

1 izoh

Izoh qoldiring