Nodira Nazar. She’rlar

09    Нодира Назар 1991-йил Қашқадарё вилояти Яккабоғ тумани Нўғайли қишлоғида туғилган. 2013 йили илк шеърий тўплами *Ҳаяжон фасли* нашр этилган. Ўзбекистон Давлат Жаҳон тиллари университети  талабаси.

099
Нодира НАЗАР
ШЕЪРЛАР
077

* * *

Сен кетгач,баҳорлар йиғлади дув-дув,
Сен кетгач,бошимни бердим кўз ёшга.
Сен кетгач,аҳволин сўрадим туннинг,
Сен кетгач, қаролмай қолдим Қуёшга.

Сен кетгач..
095
* * *

Барибир, кўнглингдан ўчиролмайсан,
Барибир,ёдингга келавераман.
Саҳролар Шамс эмас денгизни кутар,
Мен сенинг ёмғиринг бўлавераман.

Сезаман, Осмондек ёлғизсан ҳануз,
Ҳилолга тенглашиб яшайсан-якка.
Исмимни такрорлаб кеча-ю кундуз
Табора муҳрлаб қўйиб юракка.

Барибир,мен сенда яшайман мангу,
Кўнглингга ботса ҳам тошюрак бағир.
Шунчаки туғилмас энг сўнгги қайғу-
Ҳеч кимни шунчаки ютиб кетмас ер.

Барибир ,кўнглингдан ўчиролмайсан..

* * *

Биласанми,
сени кеча,куни кеча ёд этгандим,
Воажабки,ўнгда кўрдим,ишонмадим кўзларимга.
Неча йилки…
Мен ўзимни тополмайин яшар эдим,
Сиёҳ тўкиб яшар эдим вароқларнинг юзларига…
Биласанми…
ботинимда ёнар олов-ўткир шафқат.
Неажабки,зоҳиримда жилмайганча ёд этаман.
Бироқ ҳануз,ҳали ҳамон қароғимда йиғлар журъат,
Сени эслаб ҳар лаҳзада бу дунёни тарк этаман.
Ишонсайдинг,
Куни кеча Худойимга йиғладим зор,
Сенинг учун,кўнгил учун,қадр учун дарё бўлдим.
Қарори йўқ гуноҳкорга,ситамкорга бўлиб абгор
Айт-чи менга,сендан кейин сендан ўтиб яшолар ким?
Биласанми,
Ҳар синовнинг менинг учун қиймати бор,
Ўтган кундан …
ўтган тундан жафо қилмай,хато қилмай келар кечгим.
Фақат битта истиснода,истеҳзода яшар озор-
Сени кеча кутмадим,деб келар такрор қасам ичгим.
Сени кеча кутмагандим…

* * *

Қанийди,туйғулар берганда изн,
Қанийди,кўнглимни очолсам сенга.
Қанийди,ёнингда гул чизса изим,
Ёдинг талпинмаса ҳеч қачон менга.

Қанийди,умримиз бахтиёр бўлса,
Қанийди ғам биздан олмаса хабар.
Қанийди,кўрганим сийратинг бўлса,
Оллоҳ айбламас қабрга қадар.

Қанийди,ҳов ўша юлдуз мен бўлсам,
Сен бўлсанг,қанийди,елкамда очун.
Қанийди,бир марта қайта туғилсам,
Жон берсам…
жон берсам фақат сен учун.

Қанийди…

* * *

Ўхшата олмадим сени қуёшга,
Зеро,порламайсан осмонимда ҳеч.
Ҳамма сенга ўхшар ўзингдан бошқа…
Ўзимни ахтардим сендан эрта-кеч.

Ҳар лаҳза ортимдан эргашган рўё
Соямдай қилмагин даъво ёрликка.
Мен билан юзма-юз келганда гўё
Йўқсану ўхшайсан,бироқ борликка.

Мендан кетолмайсан,ҳатто,бир қадам,
Аммо,пайдолигим ичра йўқдайсан.
Ўхшашлик ҳақида шудир хулосам:
Ўхшамаган сайин менга ўхшайсан…

* * *

Кутдингиз,атаймас,билмаган эдим,
Хабарим йўқ эди ташрифингиздан.
Қалбимни емирар тилсиз кечирим,
Ғафлат ғолиб келди биз иккимиздан.

Айни дам ичимга сиғмайди алам,
Дардларим шодликдан ололмас улги.
Кутдирдим,ингради қўлимда қалам,
Мени ютар гўё сизсизлик мулки.

Кутдингиз.
Кутдирдим.
Ҳижрон бўлди ёр,
Тағин йироқлашди мендан самолар.
Энди бизни кутар юраклар аро
Йўлимизни пойлаб турган хатолар…

АНГЛАШ

Ҳануз кузакларда кезиб юрибман,
Ҳануз қароғларим хазонрезларда.
Мен билан ҳамроҳ у,сезиб турибман,
Соғинч ўз суратин чизган кезларда.
Осмон қучоғида тебранар булут,
Беркитиб боради қуёш зарларин.
Шафақ нурларидан таралгандек тунд,
Менга ошкор этар ҳазон ўз сирин.
“ол” дарахт бағридан сирғалиб барглар,
Ернинг қучоғида узилар жони.
Гўё паймонаси тўлган қалбимдек,
Кўзимга қоронғу айлар дунёни.
Ҳорғин булутларга боқаман илҳақ,
Қалбимни қуёшга чорлайвераман.
Ҳамроҳим,кузакнинг тасвирларидан,
Маҳзун юрагимнинг исмин тераман.
Қадамлар чалкашар ўзимга томон,
Кўзлар,лек,минг турли ўлимга гувоҳ,
Видодан саноқсиз ғам уйғонгандек
Кузакнинг юзлари гўё минг бир оҳ.
Ҳар ёққа тортқилар шум хаёлларим,
Ҳар ёққа ўзимни олиб қочаман.
Қароғим ҳазонрез кўксин ўйса-да,
Изимга надомат гардин сочаман.
Чекинар,чекиниб борар қадамлар,
Ҳайрихоҳ юрагим соғинчга мағтал.
Ҳамроҳим-кузакнинг баҳридан ўтдим,
Ҳазонрез Баҳорим келгани маҳал.

ТЎРТЛИКЛАР

* * *

Қўйинг, видоларни куйламанг ортиқ,
Ортиқ суратини чизманг ҳижроннинг.
Сиз қайдан биларсиз,энг кучли соғинч
Умрин тул қилишин ошиқ иноннинг…

* * *

Кўнгил ғашлигига ном топилмайди,
Топилмас,ҳаттоки,бир оғиз калом.
Ё ақл ғашликнинг исмин билмайди,
Ё унинг борлиғи-айтиб бўлмас ном.

* * *

Сени эслаганда увишар этим,
Сени эслаганда хўрсинар юрак.
Оҳ,қандай оғир-а йиғлаганимда
Сенинг хаёлларинг чалиши чапак.

* * *

Кечаларни қийнадим жуда
Қувиб солдим ором лаҳзасин.
Энди титроқ,фироқ авжида,
Энди тунда армон ухласин.

* * *

Яқинига йўлама ишқнинг
Ва хаёл ҳам сурма уни ҳеч.
Ахир,яхши ёнётган кундан
Юлдузларга тўла бўлган кеч.

* * *

Неки бўлса ўзимдан ўтди…
Хаёллардан,кўзимдан ўтди.
Мен тақдирни айблабман билмай
Азоб борки,сўзимдан ўтди…

07

065  Nodira Nazar 1991-yil Qashqadaryo viloyati Yakkabog’ tumani No’g’ayli qishlog’ida tug’ilgan. 2013 yili ilk she’riy to’plami *Hayajon fasli* nashr etilgan. O’zbekiston Davlat Jahon tillari universiteti talabasi.

Nodira NAZAR
SHE’RLAR
077

* * *

Sen ketgach,bahorlar yig’ladi duv-duv,
Sen ketgach,boshimni berdim ko’z yoshga.
Sen ketgach,ahvolin so’radim tunning,
Sen ketgach, qarolmay qoldim Quyoshga.

Sen ketgach..

* * *

Baribir, ko’nglingdan o’chirolmaysan,
Baribir,yodingga kelaveraman.
Sahrolar Shams emas dengizni kutar,
Men sening yomg’iring bo’laveraman.

Sezaman,Osmondek yolg’izsan hanuz,
Hilolga tenglashib yashaysan-yakka.
Ismimni takrorlab kecha-yu kunduz
Tabora muhrlab qo’yib yurakka.

Baribir,men senda yashayman mangu,
Ko’nglingga botsa ham toshyurak bag’ir.
Shunchaki tug’ilmas eng so’nggi qayg’u-
Hech kimni shunchaki yutib ketmas yer.

Baribir ,ko’nglingdan o’chirolmaysan..

* * *

Bilasanmi,
seni kecha,kuni kecha yod etgandim,
Voajabki,o’ngda ko’rdim,ishonmadim ko’zlarimga.
Necha yilki…
Men o’zimni topolmayin yashar edim,
Siyoh to’kib yashar edim varoqlarning yuzlariga…
Bilasanmi…
botinimda yonar olov-o’tkir shafqat.
Neajabki,zohirimda jilmaygancha yod etaman.
Biroq hanuz,hali hamon qarog’imda yig’lar jur’at,
Seni eslab har lahzada bu dunyoni tark etaman.
Ishonsayding,
Kuni kecha Xudoyimga yig’ladim zor,
Sening uchun,ko’ngil uchun,qadr uchun daryo bo’ldim.
Qarori yo’q gunohkorga,sitamkorga bo’lib abgor
Ayt-chi menga,sendan keyin sendan o’tib yasholar kim?
Bilasanmi,
Har sinovning mening uchun qiymati bor,
O’tgan kundan …
o’tgan tundan jafo qilmay,xato qilmay kelar kechgim.
Faqat bitta istisnoda,istehzoda yashar ozor-
Seni kecha kutmadim,deb kelar takror qasam ichgim.
Seni kecha kutmagandim…

* * *

Qaniydi,tuyg’ular berganda izn,
Qaniydi,ko’nglimni ocholsam senga.
Qaniydi,yoningda gul chizsa izim,
Yoding talpinmasa hech qachon menga.

Qaniydi,umrimiz baxtiyor bo’lsa,
Qaniydi g’am bizdan olmasa xabar.
Qaniydi,ko’rganim siyrating bo’lsa,
Olloh ayblamas qabrga qadar.

Qaniydi,hov o’sha yulduz men bo’lsam,
Sen bo’lsang,qaniydi,yelkamda ochun.
Qaniydi,bir marta qayta tug’ilsam,
Jon bersam…
jon bersam faqat sen uchun.

Qaniydi…

* * *

O’xshata olmadim seni quyoshga,
Zero,porlamaysan osmonimda hech.
Hamma senga o’xshar o’zingdan boshqa…
O’zimni axtardim sendan erta-kech.

Har lahza ortimdan ergashgan ro’yo
Soyamday qilmagin da’vo yorlikka.
Men bilan yuzma-yuz kelganda go’yo
Yo’qsanu o’xshaysan,biroq borlikka.

Mendan ketolmaysan,hatto,bir qadam,
Ammo,paydoligim ichra yo’qdaysan.
O’xshashlik haqida shudir xulosam:
O’xshamagan sayin menga o’xshaysan…

* * *

Kutdingiz,ataymas,bilmagan edim,
Xabarim yo’q edi tashrifingizdan.
Qalbimni yemirar tilsiz kechirim,
G’aflat g’olib keldi biz ikkimizdan.

Ayni dam ichimga sig’maydi alam,
Dardlarim shodlikdan ololmas ulgi.
Kutdirdim,ingradi qo’limda qalam,
Meni yutar go’yo sizsizlik mulki.

Kutdingiz.
Kutdirdim.
Hijron bo’ldi yor,
Tag’in yiroqlashdi mendan samolar.
Endi bizni kutar yuraklar aro
Yo’limizni poylab turgan xatolar…

09

ANGLASH

Hanuz kuzaklarda kezib yuribman,
Hanuz qarog’larim xazonrezlarda.
Men bilan hamroh u,sezib turibman,
Sog’inch o’z suratin chizgan kezlarda.
Osmon quchog’ida tebranar bulut,
Berkitib boradi quyosh zarlarin.
Shafaq nurlaridan taralgandek tund,
Menga oshkor etar hazon o’z sirin.
“ol” daraxt bag’ridan sirg’alib barglar,
Yerning quchog’ida uzilar joni.
Go’yo paymonasi to’lgan qalbimdek,
Ko’zimga qorong’u aylar dunyoni.
Horg’in bulutlarga boqaman ilhaq,
Qalbimni quyoshga chorlayveraman.
Hamrohim,kuzakning tasvirlaridan,
Mahzun yuragimning ismin teraman.
Qadamlar chalkashar o’zimga tomon,
Ko’zlar,lek,ming turli o’limga guvoh,
Vidodan sanoqsiz g’am uyg’ongandek
Kuzakning yuzlari go’yo ming bir oh.
Har yoqqa tortqilar shum xayollarim,
Har yoqqa o’zimni olib qochaman.
Qarog’im hazonrez ko’ksin o’ysa-da,
Izimga nadomat gardin sochaman.
Chekinar,chekinib borar qadamlar,
Hayrixoh yuragim sog’inchga mag’tal.
Hamrohim-kuzakning bahridan o’tdim,
Hazonrez Bahorim kelgani mahal.

TO’RTLIKLAR

* * *

Qo’ying, vidolarni kuylamang ortiq,
Ortiq suratini chizmang hijronning.
Siz qaydan bilarsiz,eng kuchli sog’inch
Umrin tul qilishin oshiq inonning…

* * *

Ko’ngil g’ashligiga nom topilmaydi,
Topilmas,hattoki,bir og’iz kalom.
YO aql g’ashlikning ismin bilmaydi,
YO uning borlig’i-aytib bo’lmas nom.

* * *

Seni eslaganda uvishar etim,
Seni eslaganda xo’rsinar yurak.
Oh,qanday og’ir-a yig’laganimda
Sening xayollaring chalishi chapak.

* * *

Kechalarni qiynadim juda
Quvib soldim orom lahzasin.
Endi titroq,firoq avjida,
Endi tunda armon uxlasin.

* * *

Yaqiniga yo’lama ishqning
Va xayol ham surma uni hech.
Axir,yaxshi yonyotgan kundan
Yulduzlarga to’la bo’lgan kech.

* * *

Neki bo’lsa o’zimdan o’tdi…
Xayollardan,ko’zimdan o’tdi.
Men taqdirni ayblabman bilmay
Azob borki,so’zimdan o’tdi…

07

(Tashriflar: umumiy 286, bugungi 1)

3 izoh

  1. Шеърларингиз самимий ва юракдан ёзилган. Бунақа шеърларни фақат оташин севган кишигина ёзиши мумкин. Ижодингизга ривож тилиман синглим

  2. ijodingizga o’lkan zafarlar tilayman !! she’rlaringiz bundanda jozibaliroq yaratilishini tilakdoshiman ..

Izoh qoldiring