Адабиёт, шеърият дунёсига эндигина кириб келаётган ёшлардан бири Раҳмиддин Абраев 1995 йил 24 декабрда Қашқадарё вилояти Муборак тумани Қарлуқ қишлоғида туғилган. Бухоро Давлат тиббиёт институти қошидаги академик лицейининг «Хорижий филология» гуруҳини тамомлаган. Айни вақтда «Муборак Ҳаёти» газетаси адабий ходими ҳамда Қарши Давлат Университетининг ўзбек филологияси факултети талабаси. 2011 – йилда ўтказилган «Дўрмон» II республика семинари иштирокчиси.
Раҳмиддин Абраев
ШЕЪРЛАР
СИЗНИ РАНЖИТСАМ
Мен ишқнинг баҳосин билмаган телба,
Мен зарнинг қадрини билмаган заргар.
Мен саргардон сузган ташландиқ кема,
Сизни ранжитганим рост бўлса агар.
Эй сиз вафо кутган мендек ғофилдан,
Қаноти қайрилиб қолган кабутар,
Мен эсам жафокор золим, сабилман,
Сизни ранжитганим рост бўлса агар.
Кабутардай ҳуркиб назар ташлайсиз,
Кўзингиз ботади жонимга қадар.
Жоним, айтинг, қачон исён бошлайсиз
Сизни ранжитганим рост бўлса агар?!
Истанг, пойингизга гуллар сочаман,
Гуллар садоқатдан берсалар хабар.
Сиз тўккан ёшларни майдек ичаман,
Сизни ранжитганим рост бўлса агар.
* * *
ЮРАГИМНИ ОСМОНГА ОТДИМ,
Лекин жавоб бўлмади кўкдан.
Кун ортидан ҳаллослаб чопдим,
Нур изладим қоронғуликдан.
Юрагимни осмонга отдим,
Худовандо қудратинг кўрсат.
Майсаларни қучоқлаб ётдим,
Кўкка қараб ўтди кўп фурсат.
Юрагимни осмонга отдим,
Худо қози, ҳозир – розиман!
Бор будимни арзонга сотдим,
Сочларини юлди Ёсуман.
Юрагимни осмонга отдим,
Ерга тегмас бўлди курагим.
Кун ҳам ботди, янги тонг отди
Фақат, қайтиб тушгач Юрагим…
СИЗНИ ЁМОН ЯХШИ КЎРАМАН
Ҳижрон билан қўрқитманг мени,
Тушларимда кўриб тураман.
Ёмон кўриб ҳатто ўзимни,
Сизни ёмон яхши кўраман.
Юлдузларни кўзлаганим рост,
Баъзан ёлғон сўзлаганим рост.
Бўзтўрғайдай бўзлаганим рост,
Сизни ёмон яхши кўраман.
Таскин бермай сокин кечалар,
Юрак бедор қўнғироқ чалар.
Нима дейди қўнғироқчалар?
Сизни ёмон яхши кўраман.
Муҳаббат бор дунёда ҳоким,
Шафқат солар дилларга токим.
Қоришмасдан тупроққа хоким,
Сизни ёмон яхши кўраман.
Жону дилдан шоирни суйган,
Ватанимда бекман, тўраман.
Мен яхшини унутиб қўйган,
Сиз ёмонни яхши кўраман.
БОБУР МУНОЖОТИ
Дунё кездим юрт соғинчида,
Ломаконда илло ўлмадим.
Ҳиндистонда шоҳ бўлдим, нега
Самарқандда гадо бўлмадим?!
Не кунларни солмади фалак,
Дарддан эгик бошимга яна.
Ёлғон бўлмас тўлгандир десам,
Кўз ёшимдан Ганга ва Жамна.
Мен тарихда шоҳаншоҳ бўлиб,
Шоир бўлиб қолдим дилларда.
Кетган менман бошимни олиб,
Хоким қолди ўзга элларда.
Кўзларимнинг қораси, оқи
Шеърларимга сингган — тирикман.
Ёзган шеъру байтларим ҳаққи,
Сенга қайтиб келганман, Ватан!
ИСРОИЛ СУБҲОНИЙГА МАКТУБ
Сен – хотира юрти, Исроил Субҳон...
Эшқобил ШУКУР
“Шашқаторга” бош уриб чиқдим,
“Минг бир кеча” тўкиб кўзёшим.
“Зарбулматал” ўқиди кимдир,
“Чорзарб” тинглаб гангиди бошим.
Кечалари боқиб турди жим,
“Зарбулғазал” етти тарафдан.
Энди сира келмайди уйқум,
“Зарбулматал” ўқимай ётсам.
Етти Пирдан меърос қолганми,
“Зарбулнақал” ўгитларингиз?
Кўнглингизга Худо солганми,
Ахир шундай буюк қалбингиз.
Эшик қоқдим “Ҳазордостон”га,
Кутиб олди “Муҳаббат Қасри”.
Тинглай кетдим мингта афсона,
Чизмоқ учун парилар расмин.
Сизни ўқиб шоир бўлдим, рост,
Мижжа қоқмай кеча-кундузи.
Бунга гувоҳ болиш остида,
“Бухоронинг Етти Юлдузи”.
Дон ҳам сочдим “Деҳқон Қуши”га,
Ва “Пинҳоний Ибодат” қилдим.
Расулуллоҳ кирган тушимда
Ҳазрат Навоийнида кўрдим.
Тақсир!
Силанг бошимни аста,
Мен ҳам туяй пирларнинг кучин.
Тонглар мендан жавоб кутмоқда
Ухламаган тунларим учун!!!
Adabiyot, she’riyat dunyosiga endigina kirib kelayotgan yoshlardan biri Rahmiddin Abraev 1995 yil 24 dekabrda Qashqadaryo viloyati Muborak tumani Qarluq qishlog’ida tug’ilgan. Buxoro Davlat tibbiyot instituti qoshidagi akademik litseyining «Xorijiy filologiya» guruhini tamomlagan. Ayni vaqtda «Muborak Hayoti» gazetasi adabiy xodimi hamda Qarshi Davlat Universitetining o’zbek filologiyasi fakulteti talabasi. 2011 – yilda o’tkazilgan «Do’rmon» II respublika seminari ishtirokchisi.
Rahmiddin Abraev
SHE’RLAR
SIZNI RANJITSAM
Men ishqning bahosin bilmagan telba,
Men zarning qadrini bilmagan zargar.
Men sargardon suzgan tashlandiq kema,
Sizni ranjitganim rost bo’lsa agar.
Ey siz vafo kutgan mendek g’ofildan,
Qanoti qayrilib qolgan kabutar,
Men esam jafokor zolim, sabilman,
Sizni ranjitganim rost bo’lsa agar.
Kabutarday hurkib nazar tashlaysiz,
Ko’zingiz botadi jonimga qadar.
Jonim, ayting, qachon isyon boshlaysiz
Sizni ranjitganim rost bo’lsa agar?!
Istang, poyingizga gullar sochaman,
Gullar sadoqatdan bersalar xabar.
Siz to’kkan yoshlarni maydek ichaman,
Sizni ranjitganim rost bo’lsa agar.
* * *
YURAGIMNI OSMONGA OTDIM,
Lekin javob bo’lmadi ko’kdan.
Kun ortidan halloslab chopdim,
Nur izladim qorong’ulikdan.
Yuragimni osmonga otdim,
Xudovando qudrating ko’rsat.
Maysalarni quchoqlab yotdim,
Ko’kka qarab o’tdi ko’p fursat.
Yuragimni osmonga otdim,
Xudo qozi, hozir – roziman!
Bor budimni arzonga sotdim,
Sochlarini yuldi Yosuman.
Yuragimni osmonga otdim,
Yerga tegmas bo’ldi kuragim.
Kun ham botdi, yangi tong otdi
Faqat, qaytib tushgach Yuragim…
SIZNI YOMON YAXSHI KO’RAMAN
Hijron bilan qo’rqitmang meni,
Tushlarimda ko’rib turaman.
Yomon ko’rib hatto o’zimni,
Sizni yomon yaxshi ko’raman.
Yulduzlarni ko’zlaganim rost,
Ba’zan yolg’on so’zlaganim rost.
Bo’zto’rg’ayday bo’zlaganim rost,
Sizni yomon yaxshi ko’raman.
Taskin bermay sokin kechalar,
Yurak bedor qo’ng’iroq chalar.
Nima deydi qo’ng’iroqchalar?
Sizni yomon yaxshi ko’raman.
Muhabbat bor dunyoda hokim,
Shafqat solar dillarga tokim.
Qorishmasdan tuproqqa xokim,
Sizni yomon yaxshi ko’raman.
Jonu dildan shoirni suygan,
Vatanimda bekman, to’raman.
Men yaxshini unutib qo’ygan,
Siz yomonni yaxshi ko’raman.
BOBUR MUNOJOTI
Dunyo kezdim yurt sog’inchida,
Lomakonda illo o’lmadim.
Hindistonda shoh bo’ldim, nega
Samarqandda gado bo’lmadim?!
Ne kunlarni solmadi falak,
Darddan egik boshimga yana.
Yolg’on bo’lmas to’lgandir desam,
Ko’z yoshimdan Ganga va Jamna.
Men tarixda shohanshoh bo’lib,
Shoir bo’lib qoldim dillarda.
Ketgan menman boshimni olib,
Xokim qoldi o’zga ellarda.
Ko’zlarimning qorasi, oqi
She’rlarimga singgan — tirikman.
Yozgan she’ru baytlarim haqqi,
Senga qaytib kelganman, Vatan!
ISROIL SUBHONIYGA MAKTUB
Sen – xotira yurti, Isroil Subhon...
Eshqobil SHUKUR
“Shashqatorga” bosh urib chiqdim,
“Ming bir kecha” to’kib ko’zyoshim.
“Zarbulmatal” o’qidi kimdir,
“Chorzarb” tinglab gangidi boshim.
Kechalari boqib turdi jim,
“Zarbulg’azal” yetti tarafdan.
Endi sira kelmaydi uyqum,
“Zarbulmatal” o’qimay yotsam.
Yetti Pirdan me’ros qolganmi,
“Zarbulnaqal” o’gitlaringiz?
Ko’nglingizga Xudo solganmi,
Axir shunday buyuk qalbingiz.
Eshik qoqdim “Hazordoston”ga,
Kutib oldi “Muhabbat Qasri”.
Tinglay ketdim mingta afsona,
Chizmoq uchun parilar rasmin.
Sizni o’qib shoir bo’ldim, rost,
Mijja qoqmay kecha-kunduzi.
Bunga guvoh bolish ostida,
“Buxoroning Yetti Yulduzi”.
Don ham sochdim “Dehqon Qushi”ga,
Va “Pinhoniy Ibodat” qildim.
Rasululloh kirgan tushimda
Hazrat Navoiynida ko’rdim.
Taqsir!
Silang boshimni asta,
Men ham tuyay pirlarning kuchin.
Tonglar mendan javob kutmoqda
Uxlamagan tunlarim uchun!!!
Yurakdan aytilgan misralar. Rahmiddinning she’rlarini o’qib xursand bo’ldim. Omad tilayman barcha yosh shoirlarimizga
Rahmiddin Abraev!!!
Ijodida buyuk shoirlar uyg’unligi bor!!! Omad!!!
Xursand bo’ldim yigitcha she’rlaringni bir-ikkitasidan! To’xtama!!!
Navoiyni, Mashrabni voyaga yetkazgan xalqning oldiga chiqib o’zingizni shoir deb tanishtirish albatta uyat bo’ladi. Saytdagi «Sizni ranjitsam», «Yuragimni osmonga otdim», «Sizni yomon yaxshi ko’raman» kabi she’rlarimni birozgina o’zgartirgandim. (Saytda e’lon qilinganidan so’ng) Ustoz Xurshid Davronga buxorolik ustozim Ibodat Rajabova shu she’rlarni yuborgan ekanlar. Shuning uchun ko’pdan xijil tortib yurgandim. Ayniqsa xalqimizning Mirzo Kenjabekday taniqli va sevikli ustoz shoiridan shunday iliq fikr eshitaman deb xayolimga ham keltirmagandim (Haliyam ko’zlarimga ishonmayroq turibman). Agar bittagina she’rim Siz azizlarga manzur bo’lgan bo’lsa ham o’zimni baxtiyor sezaman. Cheksiz hurmat va ehtirom bilan, muallif.
Шоир айтмоқчи бўлган сўзига ўзи ишонсагина, бошқаларни ҳам ишонтира олади. Ёш шоирда ана шу ишонч бор. Муҳими шуки, у ҳар бир сўз ортида шу сўз учун жавобгарлик ҳисси борлигини билади.Худо хоҳласа, Раҳмиддин зўр шоир бўлади.