Voqif Samado’g’li. She’rlar.

yusuf samad

Таниқли озарбайжон шоири Воқиф Самадўғли (Vaqif Səmədoğlu) 1939 йилнинг 5-июнида Боку шаҳрида туғилган.Озарбайжон шеъриятиниг устунларидан бири бўлмиш Самад Вурғуннинг ўғли.
Воқиф Самадўғли Булбул номидаги мусиқа мактабини, Узейир Ҳожибеков номидаги Озарбайжон давлат консерваториясида таҳсил олган.»Ҳумой» мукофотининг соҳиби. 20 дан ортиқ фильм сенарийлари муаллифи.
Воқиф Самадўғлининг шеърлари туркий халқлар адабиёти хазинасидан муносиб ўрин эгаллаган.
Шоирнинг ўзбек ихлосмандлари номидан туғилган куни билан чин юракдан табриклаймиз, узоқ умр, янги асарлар тилаймиз!

011

ВОҚИФ САМАДЎҒЛИ ШЕЪРЛАРИДАН НАМУНАЛАР

* * *

Мозоримга
на қабр тоши қўйинг,
на ҳайкал.
Бир жуфт пояфзал қўйинг
оёқяланг
кийиб кетсин…

МАМОНТ

Йирик,
Мовий мамонт эдим
Ер юзининг Муз даврида.
У вақт
На Гўрўғли бор эди,
На Мери Пикфорд,
На Ломбаранский,
На Ҳенрих Форд.
У вақт ўнг йўқ эди,
Сўл йўқ эди.
Светафорли йўл йўқ эди.
Муз…
Денгиз…
Яна муз…
Совуқ эди.
Йирик,
Мовий Мамонт эдим.
Энди…Фортепиано муаллимиман.

* * *

Мен ўлган кун
Бир шамол эсажак
Кўчаларда
Ва ҳилпирар
Ипда осилиб қуриган
бир сариқ чечакли гўдак кўйлаги,
Мотам байроғидек ҳилпирар
Гўдак кўйлаги
мен ўлган кун.

* * *

Нелар қилмади Инсон
Бир хотин учун:
Халқлар,тиллар,
Қабилалар,ўлкалар,
Сарҳадлар ошиб
Муҳорибани қўйди
Уларнинг мудофаасига.
Бу бир хотин учун
Кетган урушда ютганимиз –
Шеър
Ва яна
Мусиқа бўлди.

* * *

Мактуб ёзсанг,
на бу ерга ёз,на боққа.
Дўлдан сўнгра тоғ ўтларининг
атрига тўлмиш
бир уйқунинг ичидаман,
уйқумга ёз
мактуб ёзсанг.

* * *

Ер юзида агар бир хотин бор бўлса
муҳаббар бор ер юзида.
Ер юзида бир гўдак бор бўлса –
авлод бор ер юзида.
Ер юзида
бир дарахт бор бўлса –
кўлка бор ер юзида.
Ер юзида
агар бир парча ер бўлса —
Ватан бор ер юзида.

* * *

Бир гўзал аёлнинг
Ёнидан ўтдим.
Тўхтамадим.
Бир гўзал нағма айтарди,
Тўхтамадим.
Бир гўзал дунёнинг
Ичидан кетардим.
Тўхтамадим…

Рауф Парфи таржималари

* * *

Энди арздан,энди доддан
Бош олиб қочмоқ вақтидир.
Очилмаган эшикларин
Кенг қилиб очмоқ вақтидир.

Энди ҳар сас,ҳар бир куйдан
Сукутга кетмоқ вақтидир,
Миллат,давлат зирвасидан
Инсонга етмоқ вақтидир.

На дуо-ю,на-да қарғиш,
На назир демак вақтидир.
Бу дунё сукут ичра,
Оллоҳга кўмак вақтидир.

Зирва — чўққи

* * *

Салом,ота,салом.
Биламан,сен
орқамдасан.

Мозорингдан бор-йўғи эллик-олтмиш
қадам масофада туриб
троллейбусни кутаман,ота.
Троллейбусга миниб,
сенинг ёнингга
келишга қадар
яшамоққа кетаман,ота.
Умр,шу эканми,ота?

Келди…
Салом, троллейбус,
алвидо, ота…

* * *

Сен маним
асл онамсан,Озодлик,
ман сенинг
эшигинг олдида турган ёт боланг.

Сен энг сўнгги умидим қолдирган
оқ байроқсан,Озодлик,
мен сени
силкиган шамол.

* * *

Туғилдим 1939-да,
1937-да тутилдим.
48-да бувим ўлди,
умримда илк дафъа
мурда узра йиғладим.

Балиқлар сақладим
аквариумда.

Очиқ қолди деразам
бир қиш кечаси.
Ўлди балиқлар…

Энди 1965-нинг
январ кечасидир.
Сезяпсанми,яшамоқ истайман.

 

* * *

Қўлимни узатдим
севинчлар томон,
кўрдимки, йўқ,
ўртамизда туғлар турарди.

Отамни чақирдим,
кўмакка келсин,
кўрдимки, йўқ,
ўртамизда қабр турарди.

Юзимни бурдим сўнг
Аллоҳ тарафга,
кўрдимки, йўқ,
ўртамизда ҳаёт турарди.

 

* * *

Мен ўлган кун
бир шамол эсажак кўчаларда.
Ва силкитажак
чақалоқнинг
арқонга осиғли,қуриган,
сариқ гулли кўйлакларини.

Мотам байроғидек ҳилпиражак
гўдак кўйлаклари
мен ўлган кун…

Хуршид Даврон таржималари

 БИЗМАС,АЛЛОҲ ИШОНАР БИЗГА…

Бизмас,
Аллоҳ ишонар бизга…
Ишонмас қўлимиз қонга ботганда,
инсон инсонга тош отганда.
Бир он кўк юзи
гўдак табассуми каби кўринганда кўзга,
инсон “Дунё гўзалдир” деганда
юзини тутиб денгизга,
биз эмас,
Аллоҳ ишонар бизга.

СЎНГ КЕЧАДИР БУ ТУН ҲАМ ЯНА…

Сўнг кечадир бу тун яна,
Бу тонг яна охирги саҳар.
Сўнгги шамол тўлар елканга,
Қайиқ кезар дарбадар…

Охирги ёғочдир бу,
Эсар сўнгги елвизак.
Боғлайди охирги йўлинг
Яна сўнгинчи фалак…

Энди охирги кўчадан
Қўйилар сўнгги қадамлар.
Яна айланур шарпага
Сарсари сўнгги одамлар…

Туғилар охирги инсон,
Охирги инсон-да ўлар.
Шунда сўнгги бора йиғлаган
Сўнгги бора кулгандай бўлар…

1963

БИР ЖУФТ КОВУШ…

Мозоримга
қўйманг қабртоши
ва ё ҳайкал.
Бир жуфт ковуш қўйинг,
кийиб кетсин
бир оёқяланг…

1963

ҚЎЛИМНИ УЗАТДИМ…

Қўлимни узатдим
севинч ахтариб,
Кўрдим –
йўқ,
ўртада кадар ётарди.
Отамни чақирдим –
ёрдамга келсин,
Кўрдим –
йўқ,
ўртада қабр ётарди.
Юз тутиб кетардим
Аллоҳ тарафга,
Кўрдим –
воҳ,
ўртада умр ётарди…

1980

MЕН ЎЛГАН КУН…

Мен ўлган кун
бир шамол эсажак кўчаларда.
Ва учирар
ипга осилган, қуриган
сариқ доғли гўдак иштонини.
Мотам байроғидек ҳилпирар
гўдак иштони
мен ўлган кун…

1982

MЕНГА БИР ОЗ ЁМҒИР…

Менга бироз ёмғир,
бироз коньяк,
бироз-да кўз ёши лозимдир,
бир-да яна бу хона,
бу чироқ, бу қоғоз-қалам
бугун лозимдир ёмон.
Ва бир-да
эшигининг калити
ўз қўлимда бўлган
бир мозор лозимдир менга,
керакмас
бу эшикнинг олдида,
бу хонада ўтириб
шеър ёзмоқдан ўзга роҳат…

1982

ИЛОҲИ, ҚАЙСИ ТИЛДА ЁЛВОРАЙ СЕНГА?..

Илоҳи,
қайси тилда ёлворай сенга?
Бир дуо етар
йўқса сенгада
оғиз очмоқ керакдир дона-дона?
Сенга эмас, дунёга эмас,
ўзимга куларман,
чунки яратганинг неча минг тилдан
фақат иккисини биларман.
Буларнинг биридан
ер ҳам, кўк ҳам хабарсиз…
Иккинчисида
ёлвораман сенга энди:
Господи, помоги, господи…

1982

Карим Баҳриев таржималари

 

 

(Tashriflar: umumiy 57, bugungi 1)

Izoh qoldiring