Rafiq Saydullo. Qish satrlari

0_1664a9_ad4bb5f3_orig.png  Рафиқ Сайдуллонинг шеърлари кутубхонамизда илк маротиба  эълон қилинганигаям 3 йилдан ошди. Ўтган вақт орасида ёш шоирнинг Нозим Ҳикмат, Хуан Рамон Хименес, Иосиф Бродский, Воқиф Самадўғли, Ешим Ағаоғлу, Ника Турбина ва бошқа шоирларнинг шеърларидан қилган таржималари билан таништирдик. Вақт ўтган сари ёш дўстимнинг қалами чархланиб бораётганидан, унинг шеърлари мамлакат адабий нашрларида пайдо бўлаётганидан қувонаман. Бугун Рафиқнинг янги шеърлари билан танишасиз.

Рафиқ Сайдулло
ҚИШ САТРЛАРИ
044

Халина Посвятовскаяга бағишлайман

***
09

1

Сен севги тилида
жуда ҳам равон гаплашасан.
Лабларинг қимири
менгзайди ғунчанинг очилишига.

Мен сенинг қаршингда-
муҳожир.
Мен сенинг қаршингда-
гапиришни биладиган соқов.

Мулойим юзингга анграйиб
минғирлайман ўзимча:
«Do you speak english?..»

Шунда
менга қизиқсиниб
тикилиб қоласан.

2

Шеърлар қайта ва қайта
яшаш истагининг
ҳосиласидир.

Ҳар сафар
гўзал ўлим топиб сўнг
фикрингдан қайтгинг келар.

Аммо шеърлар сунъий гул каби
илдиз отмас тупроққа.

Сунъий гуллар эса
шеър бўла олмайди ҳеч қачон.

***

1

Иссиқ, шинам уйнинг
деразасидан
қиш, албатта, гўзал ва
илиқ кўринар.

Иссиқ, шинам хонанинг
тор қучоғида
шоирона илҳомларга
берилса бўлар.

Қор…

2

Ташқарида совуқ,
ташқарида қор
гоҳ бўралаб гоҳ тиниб.

Сен менинг қалбимда,
мен сенинг…
ўтирибмиз исиниб.

Сен ёлғиз.
Мен ёлғиз.

3

Шеър — шоирнинг
қишда юпун қолган боласи.
У дайдилаб юраркан
йўлингиздан чиқиб қолар гоҳида.

Шунда —
сизга қараб бурнини тортган пайт,
беиҳтиёр завқланасиз…

ёки завқланмайсиз.

***

Деразамга яқин келди ой…
Во ажаб, мен нимани кўрдим!
У ялонғоч эди ҳойнаҳой,
тун қаърига ўзимни урдим.

Уйқим қочди тун бўйи… Кўча
айлангани чиқдим эрталаб.
Ногоҳ очилди бир дераза
ва нимани кўрдим, во ажаб!

БОЛАЛИКНИНГ КЎЗЛАРИ
Нино Чакветадзега

Кўзим очилгандан буён
ҳамма мени аямай
ташлаб кетяпти.

Умримнинг
ним қоронғи бир бурчагида
бир ола кучукдай
қолдим мунғайиб…

Дарвоқе, сиз кимсиз?

Бу мунчоқ кўзларни
қаердан олдингиз?
Қайтариб беринг уларни менга!

Шошманг!..

АРҒИМЧОҚ ВА  АЁЛ

1 (Арғимчоқ)

Сен ўзининг жимлигига
жим кўнаётган
бир бечорасан.

Қушнинг бир тутамгина
патлари каби
аҳволинг ночор…

Сенга бир аёл керак:
қанотман деб ўйлай бошлайсан
ўзингни шунда.

2 (Аёл)

Сен қийқириб,
шодон
арғимчоқ учасан.

Мана кенг осмон,
мана замин.
Фақат сенга ярашар.

Мен эса биламан,
сени ҳеч қаерга олиб
кетолмайди у.

***

Абдулазизхон Акрамовга

Сўз…
Бесўнақай харсангтошга
ўхшайди.

Кафтлари орасидан мўралаган
мурғак сабий каби
чечак униб чиқаётир
унинг четидан.

Қани у?
Анграяман қизиқиб:
оқ, пушти, қизил…

***

Сени тушимда кўрдим.
Ҳаммаси жуда ҳам оддий эди:

Лабларингга тегиб кетди лабларим,
кейин кулиб қўйдинг уни сийпалаб,
бир оз қизиллашди юзларинг.

Қизиқ,
ўнгда бундай бўлиши учун
қанча тасодиф керак одамга?
Масофачи?..

Биз бирга бормаган ёқларда
узоқ сайр этдик.
Бир узун кўприк узра
тунги чироқлар ёғдусига чўмилиб
узоқ югурдик.
Нега бунча ҳовлиқдик?
Яшаб бўларми, айт, бахтни ҳовлиқмай;
ухламай яшаб бўларми уни?..

Сени тушимда кўрдим,
жуда ҳам оддий эди ҳаммаси.

ҚЎШИҚ

Настарин Ифорзодага

Гул, сенинг нафасингдан
настарин иси келар.
Дилим ўртанар- буни
настарин қайдан билар.

Ой, сенинг юзларингдан
кумуш нурлар ёғилар.
Сенинг парвойинг фалак,
менинг дилим оғринар.

Ўксик дилни қўлтиқлаб,
яна қанча яшайман?
Ойни булут қоплаган,
настарингул қайдасан?

first-day-winter-full-moon-snow-tree-walk.jpg   Rafiq Saydulloning she’rlari kutubxonamizda ilk marotiba e’lon qilinganigayam 3 yildan oshdi. O‘tgan vaqt orasida yosh shoirning Nozim Hikmat, Xuan Ramon Ximenes, Iosif Brodskiy, Voqif Samado‘g‘li, Yeshim Ag‘aog‘lu va boshqa shoirlarning she’rlaridan qilgan tarjimalari bilan tanishtirdik.Vaqt o‘tgan sari yosh do‘stimning qalami charxlanib borayotganidan, uning she’rlari mamlakat adabiy nashrlarida paydo bo‘layotganidan quvonamiz. Bugun Rafiqning yangi she’rlari bilan tanishasiz.

Rafiq Saydullo
 QISH SATRLARI
044

Xalina Posvyatovskayaga bag’ishlayman

***
0334

1

Sen sevgi tilida
juda ham ravon gaplashasan.
Lablaring qimiri
mengzaydi g‘unchaning ochilishiga.

Men sening qarshingda-
muhojir.
Men sening qarshingda-
gapirishni biladigan soqov.

Muloyim yuzingga angrayib
ming‘irlayman o‘zimcha:
«Do you speak english?..»

Shunda
menga qiziqsinib
tikilib qolasan.

2

She’rlar qayta va qayta
yashash istagining
hosilasidir.

Har safar
go‘zal o‘lim topib so‘ng
fikringdan qaytging kelar.

Ammo she’rlar sun’iy gul kabi
ildiz otmas tuproqqa.

Sun’iy gullar esa
she’r bo‘la olmaydi hech qachon.

***

1

Issiq, shinam uyning
derazasidan
qish, albatta, go‘zal va
iliq ko‘rinar.

Issiq, shinam xonaning
tor quchog‘ida
shoirona ilhomlarga
berilsa bo‘lar.

Qor…

2

Tashqarida sovuq,
tashqarida qor
goh bo‘ralab goh tinib.

Sen mening qalbimda,
men sening…
o‘tiribmiz isinib.

Sen yolg‘iz.
Men yolg‘iz.

3

She’r — shoirning
qishda yupun qolgan bolasi.
U daydilab yurarkan
yo‘lingizdan chiqib qolar gohida.

Shunda —
sizga qarab burnini tortgan payt,
beihtiyor zavqlanasiz…

yoki zavqlanmaysiz.

***

Derazamga yaqin keldi oy…
Vo ajab, men nimani ko‘rdim!
U yalong‘och edi hoynahoy,
tun qa’riga o‘zimni urdim.

Uyqim qochdi tun bo‘yi… Ko‘cha
aylangani chiqdim ertalab.
Nogoh ochildi bir deraza
va nimani ko‘rdim, vo ajab!

BOLALIKNING KO‘ZLARI
Nino Chakvetadzega

Ko‘zim ochilgandan buyon
hamma meni ayamay
tashlab ketyapti.

Umrimning
nim qorong‘i bir burchagida
bir ola kuchukday
qoldim mung‘ayib…

Darvoqe, siz kimsiz?

Bu munchoq ko‘zlarni
qayerdan oldingiz?
Qaytarib bering ularni menga!

Shoshmang!..

ARG‘IMCHOQ VA AYOL

1 (Arg‘imchoq)

Sen o‘zining jimligiga
jim ko‘nayotgan
bir bechorasan.

Qushning bir tutamgina
patlari kabi
ahvoling nochor…

Senga bir ayol kerak:
qanotman deb o‘ylay boshlaysan
o‘zingni shunda.

2 (Ayol)

Sen qiyqirib,
shodon
arg‘imchoq uchasan.

Mana keng osmon,
mana zamin.
Faqat senga yarashar.

Men esa bilaman,
seni hech qayerga olib
ketolmaydi u.

***

Abdulazizxon Akramovga

So‘z…
Beso‘naqay xarsangtoshga
o‘xshaydi.

Kaftlari orasidan mo‘ralagan
murg‘ak sabiy kabi
chechak unib chiqayotir
uning chetidan.

Qani u?
Angrayaman qiziqib:
oq, pushti, qizil…

***

Seni tushimda ko‘rdim.
Hammasi juda ham oddiy edi:

Lablaringga tegib ketdi lablarim,
keyin kulib qo‘yding uni siypalab,
bir oz qizillashdi yuzlaring.

Qiziq,
o‘ngda bunday bo‘lishi uchun
qancha tasodif kerak odamga?
Masofachi?..

Biz birga bormagan yoqlarda
uzoq sayr etdik.
Bir uzun ko‘prik uzra
tungi chiroqlar yog‘dusiga cho‘milib
uzoq yugurdik.
Nega buncha hovliqdik?
Yashab bo‘larmi, ayt, baxtni hovliqmay;
uxlamay yashab bo‘larmi uni?..

Seni tushimda ko‘rdim,
juda ham oddiy edi hammasi.

QO‘SHIQ

Nastarin Iforzodaga

Gul, sening nafasingdan
nastarin isi kelar.
Dilim o‘rtanar- buni
nastarin qaydan bilar.

Oy, sening yuzlaringdan
kumush nurlar yog‘ilar.
Sening parvoying falak,
mening dilim og‘rinar.

O‘ksik dilni qo‘ltiqlab,
yana qancha yashayman?
Oyni bulut qoplagan,
nastaringul qaydasan?

04

(Tashriflar: umumiy 244, bugungi 1)

Izoh qoldiring