Бугун ўзбек тилига давлат тили мақоми берилганлигининг 28-йиллиги муносабати билан Риштон шаҳри марказидаги деҳқон бозори ҳудудида “Рошидоний” номидаги халқ кутубхонаси очилди. Катта китоб жавонини Дилшод Болтабоев ўз ҳисобидан ясаттирди.
РИШТОН БОЗОРИДА «РОШИДОНИЙ»
ХАЛҚ КУТУБХОНАСИ ИШ БОШЛАДИ
Риштонлик маърифатпарвар, асл касби тадбиркор бўлган Дилшод Болтабоев ташаббуси билан туман бозорида халқ кутубхонаси ташкил этилди. Дилшод Болтабоев ижтимоий тармоқларда бозор ҳудудида кутубхона ташкил этиш мақсади борлигини, бунинг учун унга босма китоблар юбориш мумкинлигини эълон қилганди.
Бугун ўзбек тилига давлат тили мақоми берилганлигининг 28-йиллиги муносабати билан Риштон шаҳри марказидаги деҳқон бозори ҳудудида 300 дан ортиқ китобни жамлаган “Рошидоний” номидаги халқ кутубхонаси очилди. Катта китоб жавонини Дилшод Болтабоев ўз ҳисобидан ясаттирди.
“Бунчалик кўп китоб йиғилади деб ўйламагандим. Жавонимизга баъзи китоблар сиғмай ҳам қолди. Кутубхона учун китобларни йиғишда Зоҳиджон ва Иброҳимжон акалар катта ёрдам бердилар. Хуршид Даврон, Исажон Султон, Ботир Эргашев, Хайрулла Ҳамидов, Баҳриддин Асрор каби муаллифлар ўз китобларини юборишганидан қувондим. Китоб жўнатган барча маърифатпарвар дўстларимга, ака-ука, опа-сингилларга катта раҳмат демоқчиман” дейди Дилшод Болтабоев.
Кутубхонада китоблар, газета ва журналлар ўрин олган. Бу ерда “Тафсири Ҳилол”, “Ал-Азкор”, “Риёзус солиҳийн” каби маърифий китоблардан тортиб, Алишер Навоий, Фёдор Достоевский, Александр Дюма, Чингиз Айтматов, Абдулла Қаҳҳор, Ўткир Ҳошимов, Абдулла Орипов асарларигача мавжуд.
Кутубхонадан фойдаланиш бепул. Исталган киши китобни олиб, фойдаланиши мумкин. “Бугуннинг ўзидаёқ бир неча киши келиб, китоблардан олиб кетдилар. Шу ерга келиб ҳам ўқишяпти”, дейди Дилшод Болтабоев.
“Рошидоний” халқ кутубхонасига ҳисса қўшмоқчи бўлсангиз, қуйидаги манзилга мурожаат қилинг: Фарғона вилояти, Риштон тумани, Мискин МФЙ, Эҳтиром кўчаси, 23-уй. Индекс: 150300. Дилшод Болтабоевга. Телефон (Telegram): +998905603300.
Манба: www.ziyouz.uz
Bugun o‘zbek tiliga davlat tili maqomi berilganligining 28-yilligi munosabati bilan Rishton shahri markazidagi dehqon bozori hududida “Roshidoniy” nomidagi xalq kutubxonasi ochildi. Katta kitob javonini Dilshod Boltaboyev o‘z hisobidan yasattirdi.
RISHTON BOZORIDA “ROSHIDONIY”
XALQ KUTUBXONASI ISH BOSHLADI
Rishtonlik ma’rifatparvar, asl kasbi tadbirkor bo‘lgan Dilshod Boltaboyev tashabbusi bilan tuman bozorida xalq kutubxonasi tashkil etildi. Dilshod Boltaboyev ijtimoiy tarmoqlarda bozor hududida kutubxona tashkil etish maqsadi borligini, buning uchun unga bosma kitoblar yuborish mumkinligini e’lon qilgandi.
Bugun o‘zbek tiliga davlat tili maqomi berilganligining 28-yilligi munosabati bilan Rishton shahri markazidagi dehqon bozori hududida 300 dan ortiq kitobni jamlagan “Roshidoniy” nomidagi xalq kutubxonasi ochildi. Katta kitob javonini Dilshod Boltaboyev o‘z hisobidan yasattirdi.
“Bunchalik ko‘p kitob yig‘iladi deb o‘ylamagandim. Javonimizga ba’zi kitoblar sig‘may ham qoldi. Kutubxona uchun kitoblarni yig‘ishda Zohidjon va Ibrohimjon akalar katta yordam berdilar. Xurshid Davron, Isajon Sulton, Botir Ergashev, Xayrulla Hamidov, Bahriddin Asror kabi mualliflar o‘z kitoblarini yuborishganidan quvondim. Kitob jo‘natgan barcha ma’rifatparvar do‘stlarimga, aka-uka, opa-singillarga katta rahmat demoqchiman” deydi Dilshod Boltaboyev.
Kutubxonada kitoblar, gazeta va jurnallar o‘rin olgan. Bu yerda “Tafsiri Hilol”, “Al-Azkor”, “Riyozus solihiyn” kabi ma’rifiy kitoblardan tortib, Alisher Navoiy, Fyodor Dostoyevskiy, Aleksandr Dyuma, Chingiz Aytmatov, Abdulla Qahhor, O‘tkir Hoshimov, Abdulla Oripov asarlarigacha mavjud.
Kutubxonadan foydalanish bepul. Istalgan kishi kitobni olib, foydalanishi mumkin. “Bugunning o‘zidayoq bir necha kishi kelib, kitoblardan olib ketdilar. Shu yerga kelib ham o‘qishyapti”, deydi Dilshod Boltaboyev.
“Roshidoniy” xalq kutubxonasiga hissa qo‘shmoqchi bo‘lsangiz, quyidagi manzilga murojaat qiling: Farg‘ona viloyati, Rishton tumani, Miskin MFY, Ehtirom ko‘chasi, 23-uy. Indeks: 150300. Dilshod Boltaboyevga. Telefon (Telegram): +998905603300.
Manba: www.ziyouz.uz
