O’zbek adabiyotining ozar tadqiqotchisi.

002

   Инсоният яратган мўъжизаларидан бири интернет дунёнинг исталган томонидаги кишилар билан мулоқот, фикр алмашиш имкониятини берди. Олмос Улвий билан ҳам интернет орқали танишганман. Олима ўзбек илм аҳлига бегона эмас. Унинг бир қатор тадқиқотлари ўзбек-озарбайжон адабий алоқаларига бағишланган. У Ўзбекистонда бўлган халқаро конференция ва симпозиумларда иштирок этган. Олмос хонимнинг Ўзбекистонда ҳамкорлари, дўстлари бисёр. Олмос Улвий ҳаёти ва фаолиятига назар ташлашдан олдин Ўзбек — Озар адабий алоқаларига бир назар ташлашни жоиз деб топдик. Зеро, олиманинг фаолияти минг йиллик тарихга эга бўлган бу икки халқнинг дўстлик ришталарининг узвий давоми бўла олади.

099
ОБИД ШОФИЕВ
Термиз давлат университети ўзбек адабиёти кафедраси ўқитувчиси
ЎЗБЕК АДАБИЁТИНИНГ ОЗАР ТАДҚИҚОТЧИСИ
Озарбайжон Миллий Билимлар Академиясининг Низомий номидаги адабиёт институти бош илмий ходими, филология фанлари доктори, профессор Олмос Улвий (Биннатова) портретига чизгилар
001

09Инсоният яратган мўъжизаларидан бири интернет дунёнинг исталган томонидаги кишилар билан мулоқот, фикр алмашиш имкониятини берди. Олмос Улвий билан ҳам интернет орқали танишганман. Олима ўзбек илм аҳлига бегона эмас. Унинг бир қатор тадқиқотлари ўзбек-озарбайжон адабий алоқаларига бағишланган. У Ўзбекистонда бўлган халқаро конференция ва симпозиумларда иштирок этган. Олмос хонимнинг Ўзбекистонда ҳамкорлари, дўстлари бисёр. Олмос Улвий ҳаёти ва фаолиятига назар ташлашдан олдин Ўзбек — Озар адабий алоқаларига бир назар ташлашни жоиз деб топдик. Зеро, олиманинг фаолияти минг йиллик тарихга эга бўлган бу икки халқнинг дўстлик ришталарининг узвий давоми бўла олади.

* * *

Ўзбекистон ва Озарбайжон. Икки мамлакатни минглаб чақирим йўл, денгизу тоғлар ажратиб турсада, лекин тили, маданияти, адабиёти бир-бирига анча яқиндир. Чунки бу икки халқнинг тарихий илдизи бир. Ўзбек ва озар халқи туркий қавмга мансуб миллат вакилларидир. Уларнинг адабий ва маданий алоқалари узоқ тарихга эга.
Ҳазрат Навоий Низомийни ўзига устоз билган. Унинг “Ҳамса”си бағишлов қисмидаги мана бу сатрларга қулоқ солсак:

Эмас осон бу майдон ичра турмоқ,
Низомий панжасига панжа урмоқ.

Ҳа, Навоий ўзидан олдин ўтган хамсанавис устозларидан сабоқ олди, Низомий “панжасига панжа уриш”га журъат этиб туркий тилда илк “Ҳамса” ни яратди. Албатта, Навоий ўз “Хамса”си бағишлов қисмида Низомий ва бошқа даҳоларга ўз юксак эҳтиромини кўрсатди. Қолаверса, Фузулий ҳам Навоийни ўзига устоз деб билганини ҳисобга олсак, ўзбек халқининг атоқли шоири Ғафур Ғуломнинг машҳур ибораси ёдимизга келади: “биз бир-биримизга шогирд, бир-биримизга устоз халқлармиз”. Ҳар иккала халқ Низомий Ганжавий, Алишер Навоий, Саййид Имомиддин Насимий, Муҳаммад Сулаймон ўғли Фузулий ижодидан бирдек баҳраманд бўлишган.

Ҳар икки мамлакат собиқ тузум мустамлакаси зулумотлари остида яшади. Икки халқнинг ватанпарвар, зиёли, атоқли фарзандлари не-не азоб-уқубатларни бошидан кечирди, қатағон қилинди. Бу йилларда ҳам ўзбек ва озарбайжон адабий, маданий, дўстона алоқалари бир зум ҳам тўхтамади. Ўз юртидан қувғин қилинган шоир Мақсуд Шайхзода Тошкентдан паноҳ топди, шу ерда умрининг охиригача яшаб, ижод қилди. Қолаверса, Озарбайжон адабиётшунос олими Ҳамид Орасли Навоий ижоди бўйича бир қатор тадқиқотлар олиб борган бўлса, Натан Маллаев, Воҳид Абдуллаев сингари ўзбек олимлари Низомий, Насимий ижоди бўйича изланишлар олиб боришди. Ўзбек адабиётининг кўплаб ижодкорлари озарбайжонлик адиб ва шоирлар билан доим ҳамкор, ҳамнафас бўлишди. Ва ниҳоят, икки халқ ўз азалий орзуси бўлган мустақиллик, озодликка бир вақтда эришди. Истиқлол йилларида дўстлик алоқалари янада мустаҳкамланди. Турли соҳаларда янги имкониятлар эшиги очилди. Айниқса, адабий алоқалар тобора ривожланиб бормоқда. Ўзбек адабиётининг бир қатор ижод намуналари озарбайжон тилига ёки озарбайжон ижодкорларининг асарлари ўзбек тилига ўгирилиб нашр этилаётгани фикримизга далил бўла олади. Бугун гўзал, навқирон ва қадимий Тошкентда Низомий ҳайкалининг қад кўтариб туриши, нуфузли бир олийгоҳнинг унинг номи билан аталиши ёки мафтункор Боку шаҳрига Навоий ҳайкалининг маҳобат бахш этиб туриши икки халқнинг дўстлиги мустаҳкам ва абадий эканлигидан дарак бериб турибди десак янглишмаймиз.

* * *

Олмос Улвий (Олмос Қосим қизи Биннатова) 1960 — йил 8-августда Озарбайжонда ўқитувчи оиласида таваллуд топган. 1977 — йилда ўрта мактабни тамомлаган. Болаликдан китобга ошно тутинади. Албатта, бунда касби ўқитувчилик бўлган отасининг таъсири катта бўлган. Ҳали бола пайтидаёқ америкалик ёзувчи Теодор Драйзернинг “Доҳий” асарини мутолаа қилади. Асар воқеаларини, мазмун-моҳиятини ҳали тўла идрок этолмаса-да ёш Олмосга асар жуда катта эстетик завқ берди, Южин тимсоли унга ўзгача руҳ бағишлади. Олмос озарбайжон адиби Илёс Афандиев, татар шоири Муса Жалил асарларини севиб мутолаа қилди, Чехов, Ги де Мопассан ижодидан баҳраманд бўлди. Китобга, адабиётга меҳр уни филология соҳасига етаклади. 1978-1984 — йилларда Баку Давлат Университетида таҳсил олди. 1986-1988-йилларда Озарбайжон Тиллар Университетини икки йиллик форс тили бўлимини тамомлайди. Форс тилини ўрганиш уни классик шоирларни шу тилда битган асарларини ўқиш, уни сирли дунёсидан воқиф бўлиш имкониятини берди.

Ҳозирги кунда Олмос Улвий Озарбайжон Миллий Билимлар Академиясининг Низомий номидаги адабиёт институтининг “Турк халқлари адабиёти” бўлимида бош илмий ходим бўлиб хизмат қилади. Филология фанлари доктори, профессор. У 1984-1997-йилларда “Адабиёт ва инсоният” газетасида ва 1997-йилдан ҳозирга қадар давлат газетаси бўлмиш “Халқ газетаси”нинг “Адабиёт ва инсоният” бўлимида ишлайди.
Олмос Улвий 1995-йилда “Демократия ва миллий мустақиллик йўлидаги ҳаракатнинг поэзияда акси” мавзусида номзодлик, 2010-йилда эса “ХХ аср Озарбайжон адабиётшунослигида ўзбек классикларининг ўрни” мавзусида докторлик диссертацияларини ҳимоя қилган.

Олмос Улви 1990-йилда Озарбайжон Озодлиги йўлида шаҳид бўлган Озарбайжон Миллий Қаҳрамони Улви Бунёдзоданинг хотирасига “Улви Бунёдзода Хотира Музейи”ни ташкил этган. Шунингдек, у “Атилла” номли илмий, адабий-бадиий журналнинг таъсисчиси ва бош муҳарриридир.

Олмос Улви оилали. Умр йўлдоши Озарбайжон Миллий Илмлар Академиясининг Фольклор институтида илмий ходим бўлиб фаолият юритади. Атилла исмли ўғли бор.
30-йилдирки, олима матбуотда илм, адабиёт, тарих, публицистикага оид мақолалари билан мунтазам чиқиш қилиб келади. Газета ва журналларда, китоб, алманах ва илмий тўпламларда, бир қатор халқаро журналларда турк, ўзбек, туркман, рус, инглиз, грузин, араб, форс, немис, қозоқ, қирғиз, татар ва бошқа тилларда илмий мақолалари эълон қилинган. Умуман, Озарбайжон ва хорижда 500 дан ортиқ мақоласи чоп этилган. Олмос Улвий Ўзбекистон, Туркия, Қирғизистон, Грузия, Россия, Украина, Туркманистон, Австрия ва бошқа мамлакатларда 60-дан ортиқ илмий симпозиум ва конференцияларда ўз маърузалари билан иштирок этган.

Олмос Улвий озарбайжон ва ўзбек адабий алоқалари контекстида ўзбек адабиётига доир 150 дан ортиқ мақолалар нашр эттирган. Олиманинг 2009- йилда Тошкентда “Озарбайжон-ўзбек (чиғатой) адабий алоқалари (даврлар, сиймолар, жанрлар, тамойиллар)” ва “Алишер Навоий Озарбайжон адабиётшунослигида” китобларининг тақдимоти ўтказилган.
Олмос Улвийнинг юқоридаги тадқиқотларида туркий халқлар ва ўзбек адабий алоқаларининг узоқ йиллик тарихини қамраб олганлиги, қолаверса, Алишер Навоийнинг Озарбайжон адабиётшунослигида ўрганилишига оид маълумотлари эътиборга лойиқдир. Унинг бу борадаги тадқиқотлари икки халқ адабий алоқалари тарихида алоҳида саҳифани ташкил этади десак янглишмаган бўламиз.
Олима замонавий ўзбек адабиёти билан ҳам қизиқади ва бу борада ҳам бир қатор ишларни амалга оширган. У таниқли ва истеъдодли шоира Хосият Рустамова шеъриятини таҳлил қилар экан, ўзбек адабиётида ўзининг бетакрор ижоди билан янги бир овоз, янги бир истеъдод кириб келганлигини эътироф этади: “ХХI аср ўзбек поэзиясига янги, истеъдодли, қалби шеъриятга ошуфта, дард, янги овоз билан бир қиз қадам қўйди” (озарбайжон тилидан таржима бизники – О.Ш.). Олмос Улвий Хосият Рустамова шеъриятини Юнус Эмро, Улви Бунёдзода шеърияти билоан муқояса қилиб ўрганар экан, унинг ўзига хос дарди, фалсафаси борлигини айтиб ўтади.

Умуман, Олмос Улвийнинг ўзбек-озарбайжон адабий алоқалари доирасида олиб борган ишлари, фаоллиги таҳсинга сазовор. Унинг шогирдлари ҳам ўзбек адабиёти бўйича изланишлар олиб боряпти. Олима ўзбек адабиётига оид тадқиқотларини давом эттиряпти. Олмос Улвийнинг олиб бораётган фаолияти Ўзбекистон ва Озарбайжон мамлакатлари ўртасидаги дўстлик, ҳамкорлик ришталарини янада мустаҳкамлаш, ривожлантиришда ўзига хос ўрин тутади деб бемалол айта оламиз.

Филология фанлари доктори, профессор Олмос Улвийнинг нашр этилган китоблари
(Бу ерда олиманинг нашр этилган, ўзи нашрга тайёрлаган китобларининг бир қисми келтирилмоқда)
001

1. Поэззияда миллий-озодлик туйғулари (монография), Боку, 1998 й.
2. Адабиёт умри яшовчан абадият меъморидир (монография), Боку.
3. Адабий туйғуларим. Портретлар, тушунчалар, қайдлар. Боку.
4. Озарбайжон-ўзбек (чиғатой) адабий алоқалари (даврлар, сиймолар, жанрлар, тамойиллар). Боку.
5. Алишер Навоий Озарбайжон адабиётшунослигида. Мақолалар тўплами. Боку, 2009 й.
6. Улви Бунёдзода. Буюк туйғуларим (тўпловчи, тартиб этувчи, нашрга тайёрловчи, муҳаррир ва сўзбоши муаллифи Олмос Улви). Боку, 1990 й.
7. Улви Бунёдзода.Умрим сенинг ишқингда (тўпловчи, тартиб этувчи, нашрга тайёрловчи, муҳаррир ва сўзбоши муаллифи Олмос Улви). Боку, 1998 й.
8. Улви Бунёдзода.Умр йўли (поэма), озарбайжон, грузин, рус, турк, инглиз тилларида (тўпловчи, нашрга тайёрловчи, муҳаррир ва сўзбоши муаллифи Олмос Улви). Тбилиси, 2009 й.
9. Улви Бунёдзода.Умр йўли (поэма), озарбайжон ва грузин тилларида (тўпловчи, нашрга тайёрловчи, муҳаррир ва сўнгсўз муаллифи Олмос Улви). Боку, 2009 й.
10. Қашам Аслан. Мағлуб ўлим (повесть, ҳикоя, миниатюра ва мақолалар). (Муҳаррир ва сўзбоши муаллифи Олмос Улви). Боку, 2013 йил.

011
Олмос  хоним ўзбек шоираси Хосият Рустамова билан. Тошкент, 2014 й.

099
OBID SHOFIEV
Termiz davlat universiteti o’zbek adabiyoti kafedrasi o’qituvchisi
O’ZBEK ADABIYOTINING OZAR TADQIQOTCHISI
Ozarbayjon Milliy Bilimlar Akademiyasining Nizomiy nomidagi adabiyot instituti bosh ilmiy xodimi, filologiya fanlari doktori, professor Olmos Ulviy (Binnatova) portretiga chizgilar
001

09Insoniyat yaratgan mo»jizalaridan biri internet dunyoning istalgan tomonidagi kishilar bilan muloqot, fikr almashish imkoniyatini berdi. Olmos Ulviy  bilan ham internet orqali tanishganman. Olima o’zbek ilm ahliga begona emas. Uning bir qator tadqiqotlari o’zbek-ozarbayjon adabiy aloqalariga bag’ishlangan. U O’zbekistonda bo’lgan xalqaro konferentsiya va simpoziumlarda ishtirok etgan. Olmos  xonimning O’zbekistonda hamkorlari, do’stlari bisyor. Olmos Ulviy hayoti va faoliyatiga nazar tashlashdan oldin O’zbek — Ozar adabiy aloqalariga bir nazar tashlashni joiz deb topdik. Zero, olimaning faoliyati ming yillik tarixga ega bo’lgan bu  ikki xalqning do’stlik rishtalarining uzviy davomi bo’la oladi.

* * *

O’zbekiston va Ozarbayjon. Ikki mamlakatni minglab chaqirim yo’l, dengizu tog’lar ajratib tursada, lekin tili, madaniyati, adabiyoti bir-biriga ancha yaqindir. Chunki bu ikki xalqning tarixiy ildizi bir. O’zbek va ozar xalqi turkiy qavmga mansub  millat vakillaridir. Ularning adabiy va madaniy aloqalari uzoq tarixga ega.  Hazrat Navoiy Nizomiyni o’ziga ustoz bilgan. Uning “Hamsa”si bag’ishlov qismidagi mana bu satrlarga quloq solsak:

Emas oson bu maydon ichra turmoq,
Nizomiy panjasiga panja urmoq.

Ha, Navoiy o’zidan oldin o’tgan xamsanavis ustozlaridan saboq oldi, Nizomiy “panjasiga panja urish”ga jur’at etib turkiy tilda ilk “Hamsa” ni yaratdi. Albatta, Navoiy o’z “Xamsa”si bag’ishlov qismida Nizomiy va boshqa daholarga o’z yuksak  ehtiromini ko’rsatdi. Qolaversa, Fuzuliy ham Navoiyni o’ziga ustoz deb bilganini hisobga olsak, o’zbek xalqining atoqli shoiri G’afur G’ulomning mashhur iborasi yodimizga keladi: “biz bir-birimizga shogird, bir-birimizga ustoz xalqlarmiz”. Har  ikkala xalq Nizomiy Ganjaviy, Alisher Navoiy, Sayyid Imomiddin Nasimiy, Muhammad Sulaymon o’g’li Fuzuliy ijodidan birdek bahramand bo’lishgan.

Har ikki mamlakat sobiq tuzum mustamlakasi zulumotlari ostida yashadi. Ikki xalqning vatanparvar, ziyoli, atoqli farzandlari ne-ne azob-uqubatlarni boshidan kechirdi, qatag’on qilindi. Bu yillarda ham o’zbek va ozarbayjon adabiy,
madaniy, do’stona aloqalari bir zum ham to’xtamadi. O’z yurtidan quvg’in qilingan shoir Maqsud Shayxzoda Toshkentdan panoh topdi, shu yerda umrining oxirigacha yashab, ijod qildi. Qolaversa, Ozarbayjon adabiyotshunos olimi Hamid Orasli Navoiy ijodi  bo’yicha bir qator tadqiqotlar olib borgan bo’lsa, Natan Mallaev, Vohid Abdullaev singari o’zbek olimlari Nizomiy, Nasimiy ijodi bo’yicha izlanishlar olib borishdi. O’zbek adabiyotining ko’plab ijodkorlari ozarbayjonlik adib va shoirlar bilan doim  hamkor, hamnafas bo’lishdi. Va nihoyat, ikki xalq o’z azaliy orzusi bo’lgan mustaqillik, ozodlikka bir vaqtda erishdi. Istiqlol yillarida do’stlik aloqalari yanada mustahkamlandi. Turli sohalarda yangi imkoniyatlar eshigi ochildi. Ayniqsa, adabiy  aloqalar tobora rivojlanib bormoqda. O’zbek adabiyotining bir qator ijod namunalari ozarbayjon tiliga yoki ozarbayjon ijodkorlarining asarlari o’zbek tiliga o’girilib nashr etilayotgani fikrimizga dalil bo’la oladi. Bugun go’zal, navqiron va  qadimiy Toshkentda Nizomiy haykalining qad ko’tarib turishi, nufuzli bir oliygohning uning nomi bilan atalishi yoki maftunkor Boku shahriga Navoiy haykalining mahobat baxsh etib turishi ikki xalqning do’stligi mustahkam va abadiy ekanligidan  darak berib turibdi desak yanglishmaymiz.

* * *

Olmos Ulviy (Olmos Qosim qizi Binnatova) 1960 — yil 8-avgustda Ozarbayjonda o’qituvchi oilasida tavallud topgan. 1977 — yilda o’rta maktabni tamomlagan. Bolalikdan kitobga oshno tutinadi. Albatta, bunda kasbi o’qituvchilik bo’lgan otasining  ta’siri katta bo’lgan. Hali bola paytidayoq amerikalik yozuvchi Teodor Drayzerning “Dohiy” asarini mutolaa qiladi. Asar voqealarini, mazmun-mohiyatini hali to’la idrok etolmasa-da yosh Olmosga asar juda katta estetik zavq berdi, Yujin timsoli  unga o’zgacha ruh bag’ishladi. Olmos ozarbayjon adibi Ilyos Afandiev, tatar shoiri Musa Jalil asarlarini sevib mutolaa qildi, Chexov, Gi de Mopassan ijodidan bahramand bo’ldi. Kitobga, adabiyotga mehr uni filologiya sohasiga yetakladi. 1978-1984  — yillarda Baku Davlat Universitetida tahsil oldi. 1986-1988-yillarda Ozarbayjon Tillar Universitetini ikki yillik fors tili bo’limini tamomlaydi. Fors tilini o’rganish uni klassik shoirlarni shu tilda bitgan asarlarini o’qish, uni sirli  dunyosidan voqif bo’lish imkoniyatini berdi.

Hozirgi kunda Olmos Ulviy Ozarbayjon Milliy Bilimlar Akademiyasining Nizomiy nomidagi adabiyot institutining “Turk xalqlari adabiyoti” bo’limida bosh ilmiy xodim bo’lib xizmat qiladi. Filologiya fanlari doktori, professor. U 1984-1997-
yillarda “Adabiyot va insoniyat” gazetasida va 1997-yildan hozirga qadar davlat gazetasi bo’lmish “Xalq gazetasi”ning “Adabiyot va insoniyat” bo’limida ishlaydi. Olmos Ulviy 1995-yilda “Demokratiya va milliy mustaqillik yo’lidagi harakatning poeziyada aksi” mavzusida nomzodlik, 2010-yilda esa “XX asr Ozarbayjon adabiyotshunosligida o’zbek klassiklarining o’rni” mavzusida doktorlik dissertatsiyalarini  himoya qilgan.

Olmos Ulvi 1990-yilda Ozarbayjon Ozodligi yo’lida shahid bo’lgan Ozarbayjon Milliy Qahramoni Ulvi Bunyodzodaning xotirasiga “Ulvi Bunyodzoda Xotira Muzeyi”ni tashkil etgan. Shuningdek, u “Atilla” nomli ilmiy, adabiy-badiiy jurnalning  ta’sischisi va bosh muharriridir.

Olmos Ulvi oilali. Umr yo’ldoshi Ozarbayjon Milliy Ilmlar Akademiyasining Fol`klor institutida ilmiy xodim bo’lib faoliyat yuritadi. Atilla ismli o’g’li bor. 30-yildirki, olima matbuotda ilm, adabiyot, tarix, publitsistikaga oid maqolalari bilan muntazam chiqish qilib keladi. Gazeta va jurnallarda, kitob, almanax va ilmiy to’plamlarda, bir qator xalqaro jurnallarda turk, o’zbek, turkman, rus,  ingliz, gruzin, arab, fors, nemis, qozoq, qirg’iz, tatar va boshqa tillarda ilmiy maqolalari e’lon qilingan. Umuman, Ozarbayjon va xorijda 500 dan ortiq maqolasi chop etilgan. Olmos Ulviy O’zbekiston, Turkiya, Qirg’iziston, Gruziya, Rossiya, Ukraina, Turkmaniston, Avstriya va boshqa mamlakatlarda 60-dan ortiq ilmiy simpozium va konferentsiyalarda o’z ma’ruzalari bilan ishtirok etgan.

Olmos Ulviy ozarbayjon va o’zbek adabiy aloqalari kontekstida o’zbek adabiyotiga doir 150 dan ortiq maqolalar nashr ettirgan. Olimaning 2009- yilda Toshkentda “Ozarbayjon-o’zbek (chig’atoy) adabiy aloqalari (davrlar, siymolar, janrlar,
tamoyillar)” va “Alisher Navoiy Ozarbayjon adabiyotshunosligida” kitoblarining taqdimoti o’tkazilgan. Olmos Ulviyning yuqoridagi tadqiqotlarida turkiy xalqlar va o’zbek adabiy aloqalarining uzoq yillik tarixini qamrab olganligi, qolaversa, Alisher Navoiyning Ozarbayjon adabiyotshunosligida o’rganilishiga oid ma’lumotlari e’tiborga loyiqdir. Uning bu boradagi tadqiqotlari ikki xalq adabiy aloqalari tarixida alohida sahifani tashkil etadi desak yanglishmagan bo’lamiz. Olima zamonaviy o’zbek adabiyoti bilan ham qiziqadi va bu borada ham bir qator ishlarni amalga oshirgan. U taniqli va iste’dodli shoira Xosiyat Rustamova she’riyatini tahlil qilar ekan, o’zbek adabiyotida o’zining betakror ijodi bilan yangi bir ovoz, yangi bir iste’dod kirib kelganligini e’tirof etadi: “XXI asr o’zbek poeziyasiga yangi, iste’dodli, qalbi she’riyatga oshufta, dard, yangi ovoz bilan bir qiz qadam qo’ydi” (ozarbayjon tilidan tarjima bizniki – O.SH.). Olmos Ulviy Xosiyat  Rustamova she’riyatini Yunus Emro, Ulvi Bunyodzoda she’riyati biloan muqoyasa qilib o’rganar ekan, uning o’ziga xos dardi, falsafasi borligini aytib o’tadi.

Umuman, Olmos Ulviyning o’zbek-ozarbayjon adabiy aloqalari doirasida olib borgan ishlari, faolligi tahsinga sazovor. Uning shogirdlari ham o’zbek adabiyoti bo’yicha izlanishlar olib boryapti. Olima o’zbek adabiyotiga oid tadqiqotlarini davom  ettiryapti. Olmos Ulviyning olib borayotgan faoliyati O’zbekiston va Ozarbayjon mamlakatlari o’rtasidagi do’stlik, hamkorlik rishtalarini yanada mustahkamlash, rivojlantirishda o’ziga xos o’rin tutadi deb bemalol ayta olamiz.

Filologiya fanlari doktori, professor Olmos Ulviyning nashr etilgan kitoblari
(Bu yerda olimaning nashr etilgan, o’zi nashrga tayyorlagan kitoblarining bir qismi keltirilmoqda)
001

1. Poezziyada milliy-ozodlik tuyg’ulari (monografiya), Boku, 1998 y.
2. Adabiyot umri yashovchan abadiyat me’moridir (monografiya), Boku.
3. Adabiy tuyg’ularim. Portretlar, tushunchalar, qaydlar. Boku.
4. Ozarbayjon-o’zbek (chig’atoy) adabiy aloqalari (davrlar, siymolar, janrlar, tamoyillar). Boku.
5. Alisher Navoiy Ozarbayjon adabiyotshunosligida. Maqolalar to’plami. Boku, 2009 y.
6. Ulvi Bunyodzoda. Buyuk tuyg’ularim (to’plovchi, tartib etuvchi, nashrga tayyorlovchi, muharrir va so’zboshi muallifi Olmos Ulvi). Boku, 1990 y.
7. Ulvi Bunyodzoda.Umrim sening ishqingda (to’plovchi, tartib etuvchi, nashrga tayyorlovchi, muharrir va so’zboshi muallifi Olmos Ulvi). Boku, 1998 y.
8. Ulvi Bunyodzoda.Umr yo’li (poema), ozarbayjon, gruzin, rus, turk, ingliz tillarida (to’plovchi, nashrga tayyorlovchi, muharrir va so’zboshi muallifi Olmos Ulvi). Tbilisi, 2009 y.
9. Ulvi Bunyodzoda.Umr yo’li (poema), ozarbayjon va gruzin tillarida (to’plovchi, nashrga tayyorlovchi, muharrir va so’ngso’z muallifi Olmos Ulvi). Boku, 2009 y.
10. Qasham Aslan. Mag’lub o’lim (povest`, hikoya, miniatyura va maqolalar). (Muharrir va so’zboshi muallifi Olmos Ulvi). Boku, 2013 yil.

004

(Tashriflar: umumiy 128, bugungi 1)

Izoh qoldiring