Ёш шоира Ситора Шодиева шеърлари матбуотда, хусусан, «Шарқ юлдузи» журналида (2025-йил 6-сон) эълон қилинган. Бугун биз ҳам шоира шеърларини сизга тақдим этмоқдамиз.
Ситора Шодиева
ШЕЪРЛАР
Ситора Шодиева 1992 йил Бухоро вилоятида туғилган. Бухоро Давлат университетининг филология факультетида таҳсил олган. Ҳозирда Ўзбек адабиётшунослиги йўналиши магистранти. Шеърлари республика матбуотларида эълон қилинган.
***
Менга бирор сўз айт-
Кўз ёшдек тиниқ,
Тонгдайин мусаффо, ёмғирдай майин.
Жоним ҳалқумимни йиртгудек бўлсин,
Эшитганим сари, айтганинг сайин.
Кафтим чизиқлари ўйимдек чалкаш,
На-да чорловим бор, на этилгум рад.
Шундай Сўз топгинки ва ё жумла қур,
Кўзимда дунёни қайтадан ярат.
Оятдек қонимга кирсин ўрмалаб,
Ваҳийдек руҳимни ларзага солсин.
Буроқдек учсин-у,умримга бориб,
Сенингсиз йилларни суғуриб олсин.
Эшилай, янчилай, тўкилай чил-чил
Ишқ кўрсин-не гўзал қисмат битганин.
Таъқиқлар,
Таҳқирлар,
Тақдир кузатсин-
Лабингга бахт бўлиб сингиб кетганим.
Туҳфа айт,
Тортиқ айт,
Қутлуғ бир Сўз айт…
***
Видолар ўқилди, кўз ёшлар тинди
Тилларда мум қотди, қулф кийди лаблар,
Бир оташ паякун айлади дунни,
Букинди
Ўкинди
Юкинди
Қалблар…
Шундан илакишди руҳга қўрғошин-
Бевақт ҳомиладай улғайди ғашлик.
Ризвондан раддия олинган у кун-
Кўнгилда бошлади азалий очлик…
Очликки,Вафонинг бадалидек-
Зил,
Нафси Лаввомадай Ҳаққа очлик бу,
Томоғим татратган,бўғзим тирнаган-
Буғдой донасидай Ишққа очлик бу!
Асоси қоришиқ яратиғимнинг-
Ҳикматга
Ҳимматга
Ҳижратга,
Тавқи Ҳижрон ила қувғин қилингум-
Жаннатга
Жаннатга
Жаннатга
***
Баҳорий боғларга чанг солмасдноқ,
Руҳимга сирғалиб кирмоқда меъзон.
Ёдимнинг ланг очиқ дарчаларини,
Қуюндек парчалар хотира-хазон.
Сарғайиб боради кун сайин беҳол,
Отам елкасига тўн тутган саҳар.
Эски оқшомларни улаб бирма-бир,
Онам суратини чизгулик шаҳар.
Олис-олисларда,кўздан нарида,
Кимдир азон ўқиб уфққа туғ отар,
Меҳнаткаш қўлларга айланган умр,
Кўнглимни уйғотар,дилни уйғотар.
Менинг оламимда ишқ бор, Худо бор,
Қолгани мажҳуллик, мавҳумлик, билдим.
Кеча жавзоларга алданган қишлоқ,
Бугун сенга кузни ҳовучлаб келдим…
***
Мабодо… осмоннинг ранги ўзгарса,
Йиллар ортга қайтса, ўнг бўлса тушлар.
Ишқкуйлар чалинса кўкнинг буржида,
Кафтингга ин қурса илоҳий қушлар-
Менда қоласанми…
Соғинчдан гулласа, минг йиллик тошлар,
Дунё кулгучимда қолса сиқилиб,
Абобил лунжида бахтлар келтирса,
Кўнглим йўлларингда кетса ситилиб-
Менда қоласанми…
Ҳурлар доя бўлса оппоқ ҳиссларга,
Саболар Сулаймон тахтин элтсалар,
Ровийлар энг гўзал ҳадисин ўқиб-
Қандай севилганинг баён этсалар-
Менда қоласанми…
Тўрт ёнинг чорласа, оҳанрабодек,
Борсанг,топинганинг Ломакон бўлса.
Бош уриб қайтганинг муборак нуқта-
Қибланг-юрагимга ёнма-ён бўлса-
Менда қоласанми…
***
Соғиндим десангиз..
Осмон боғзида
Чалажон чақмоқлар гулдираб кетса,
Жисмимга чўғ тушса,алангасидан ,
Қирқ икки томоирим кул бўлиб битса.
Соғиндим десангиз…
Эпкиндай майин,
Маъволар яралса
Дилнинг зоридан.
Заминнинг етти қат бағрини ёриб ,
Баҳорлар кўрилса қишнинг қоридан.
Соғиндим десангиз…
Шу бир лаҳзанинг,
Пойида тиз чўкса умрим йиллари.
Абадий иқрорни чопқиллаб эмас,
Жимгина тингласа соат миллари.
Соғиндим десангиз…
Малойиклар ҳам,
Таъбир ўқисалар ҳузурингизда.
Юлдузлар бағрига беркинган бўлиб,
Жоним эриб кетса…шивирингизда.
***
Бир севги истардинг, йўргакдек суюк,
Билмасдинг дунёнинг бепушт эканин.
Эски чандиқлари Дўзахдай чуқур
Сени суямоқчи бўлган елканинг.
Гадо тўрвасидек бўйнингда умринг
Бири ҳирс солгулик,кими солар нафс.
Ўргимчакдек изғиб иркит хаёллар,
Ҳар куни руҳингга тўқийди қафас.
Тунни бўғизламоқ истайсан минг бор,
Лаҳаддек ўймоқчи бўласан кўзинг.
Тақдирга беркиниб оласан аҳён,
Òзингга хиёнат қилганда Òзинг.
Бир севги истайсан бўлгудек паноҳ,
Қулоғинг остида шивирлар Иблис…
Қонли этагингнинг истиғфоридан,
Оламга муҳаббат туғиб бер, Ой қиз….
***
Сенга келдим…
Минг йиллик ғамнинг,
Ғафлат тўла исканжасидан.
Мен юракни аранг қутқардим
Қабоҳатнинг зил-панжасидан.
Келдим….
Зардоб тўла кўзларнинг
Порласин деб қорачиғлари.
Тун ёқасин йиртганда маҳтоб.
Чириб битар ғусса тиғлари.
Келмасмидим…
Шул нигоҳларга
Оҳ,янгидан бўлмоққа маҳбус,
Коинотда ўқилиб ҳукум
Ва мангуга қолсам то ҳанус…
Қайтмас эдим..
Ишққа тирмашиб,
Яшамоқни билардим шараф,
Эсиз, Сенга келмаган Умрим.
Сенга элтмас йўлларимга-ҳайф…
Сенга келдим…
Yosh shoira Sitora Shodiyeva she’rlari matbuotda, xususan, «Sharq yulduzi» jurnalida (2025-yil 6-son) e’lon qilingan. Bugun biz ham shoira she’rlarini sizga taqdim etmoqdamiz.
Sitora Shodiyeva
SHЕ’RLAR
Sitora Shodiyeva 1992 yil Buxoro viloyatida tug‘ilgan. Buxoro Davlat universitetining filologiya fakultetida tahsil olgan. Hozirda O‘zbek adabiyotshunosligi yo‘nalishi magistranti. She’rlari respublika matbuotlarida e’lon qilingan.
***
Menga biror so‘z ayt-
Ko‘z yoshdek tiniq,
Tongdayin musaffo, yomg‘irday mayin.
Jonim halqumimni yirtgudek bo‘lsin,
Eshitganim sari, aytganing sayin.
Kaftim chiziqlari o‘yimdek chalkash,
Na-da chorlovim bor, na etilgum rad.
Shunday So‘z topginki va yo jumla qur,
Ko‘zimda dunyoni qaytadan yarat.
Oyatdek qonimga kirsin o‘rmalab,
Vahiydek ruhimni larzaga solsin.
Buroqdek uchsin-u,umrimga borib,
Seningsiz yillarni sug‘urib olsin.
Eshilay, yanchilay, to‘kilay chil-chil
Ishq ko‘rsin-ne go‘zal qismat bitganin.
Ta’qiqlar,
Tahqirlar,
Taqdir kuzatsin-
Labingga baxt bo‘lib singib ketganim.
Tuhfa ayt,
Tortiq ayt,
Qutlug‘ bir So‘z ayt…
***
Vidolar o‘qildi, ko‘z yoshlar tindi
Tillarda mum qotdi, qulf kiydi lablar,
Bir otash payakun ayladi dunni,
Bukindi
O‘kindi
Yukindi
Qalblar…
Shundan ilakishdi ruhga qo‘rg‘oshin-
Bevaqt homiladay ulg‘aydi g‘ashlik.
Rizvondan raddiya olingan u kun-
Ko‘ngilda boshladi azaliy ochlik…
Ochlikki,Vafoning badalidek-
Zil,
Nafsi Lavvomaday Haqqa ochlik bu,
Tomog‘im tatratgan,bo‘g‘zim tirnagan-
Bug‘doy donasiday Ishqqa ochlik bu!
Asosi qorishiq yaratig‘imning-
Hikmatga
Himmatga
Hijratga,
Tavqi Hijron ila quvg‘in qilingum-
Jannatga
Jannatga
Jannatga
***
Bahoriy bog‘larga chang solmasdnoq,
Ruhimga sirg‘alib kirmoqda me’zon.
Yodimning lang ochiq darchalarini,
Quyundek parchalar xotira-xazon.
Sarg‘ayib boradi kun sayin behol,
Otam yelkasiga to‘n tutgan sahar.
Eski oqshomlarni ulab birma-bir,
Onam suratini chizgulik shahar.
Olis-olislarda,ko‘zdan narida,
Kimdir azon o‘qib ufqqa tug‘ otar,
Mehnatkash qo‘llarga aylangan umr,
Ko‘nglimni uyg‘otar,dilni uyg‘otar.
Mening olamimda ishq bor, Xudo bor,
Qolgani majhullik, mavhumlik, bildim.
Kecha javzolarga aldangan qishloq,
Bugun senga kuzni hovuchlab keldim…
***
Mabodo… osmonning rangi o‘zgarsa,
Yillar ortga qaytsa, o‘ng bo‘lsa tushlar.
Ishqkuylar chalinsa ko‘kning burjida,
Kaftingga in qursa ilohiy qushlar-
Menda qolasanmi…
Sog‘inchdan gullasa, ming yillik toshlar,
Dunyo kulguchimda qolsa siqilib,
Abobil lunjida baxtlar keltirsa,
Ko‘nglim yo‘llaringda ketsa sitilib-
Menda qolasanmi…
Hurlar doya bo‘lsa oppoq hisslarga,
Sabolar Sulaymon taxtin eltsalar,
Roviylar eng go‘zal hadisin o‘qib-
Qanday sevilganing bayon etsalar-
Menda qolasanmi…
To‘rt yoning chorlasa, ohanrabodek,
Borsang,topinganing Lomakon bo‘lsa.
Bosh urib qaytganing muborak nuqta-
Qiblang-yuragimga yonma-yon bo‘lsa-
Menda qolasanmi…
***
Sog‘indim desangiz..
Osmon bog‘zida
Chalajon chaqmoqlar guldirab ketsa,
Jismimga cho‘g‘ tushsa,alangasidan ,
Qirq ikki tomoirim kul bo‘lib bitsa.
Sog‘indim desangiz…
Epkinday mayin,
Ma’volar yaralsa
Dilning zoridan.
Zaminning yetti qat bag‘rini yorib ,
Bahorlar ko‘rilsa qishning qoridan.
Sog‘indim desangiz…
Shu bir lahzaning,
Poyida tiz cho‘ksa umrim yillari.
Abadiy iqrorni chopqillab emas,
Jimgina tinglasa soat millari.
Sog‘indim desangiz…
Maloyiklar ham,
Ta’bir o‘qisalar huzuringizda.
Yulduzlar bag‘riga berkingan bo‘lib,
Jonim erib ketsa…shiviringizda.
***
Bir sevgi istarding, yo‘rgakdek suyuk,
Bilmasding dunyoning bepusht ekanin.
Eski chandiqlari Do‘zaxday chuqur
Seni suyamoqchi bo‘lgan yelkaning.
Gado to‘rvasidek bo‘yningda umring
Biri hirs solgulik,kimi solar nafs.
O‘rgimchakdek izg‘ib irkit xayollar,
Har kuni ruhingga to‘qiydi qafas.
Tunni bo‘g‘izlamoq istaysan ming bor,
Lahaddek o‘ymoqchi bo‘lasan ko‘zing.
Taqdirga berkinib olasan ahyon,
Òzingga xiyonat qilganda Òzing.
Bir sevgi istaysan bo‘lgudek panoh,
Qulog‘ing ostida shivirlar Iblis…
Qonli etagingning istig‘foridan,
Olamga muhabbat tug‘ib ber, Oy qiz….
***
Senga keldim…
Ming yillik g‘amning,
G‘aflat to‘la iskanjasidan.
Men yurakni arang qutqardim
Qabohatning zil-panjasidan.
Keldim….
Zardob to‘la ko‘zlarning
Porlasin deb qorachig‘lari.
Tun yoqasin yirtganda mahtob.
Chirib bitar g‘ussa tig‘lari.
Kelmasmidim…
Shul nigohlarga
Oh,yangidan bo‘lmoqqa mahbus,
Koinotda o‘qilib hukum
Va manguga qolsam to hanus…
Qaytmas edim..
Ishqqa tirmashib,
Yashamoqni bilardim sharaf,
Esiz, Senga kelmagan Umrim.
Senga eltmas yo‘llarimga-hayf…
Senga keldim…
