Яқинда неча йиллардан буён қўл урилмаган қоғозларим ичидан чорак асрдан зиёд аввал таржима қилган озарбайжон шоири Дилсўзнинг «Дунё, сенда насибам бор» шеърини топиб олдим. Ўқиб кўриб, ўз вақтида уни бирон бир матбуотга бермаганимдан афсусландим ва уни сизга тақдим этишни истадим.
ДИЛСЎЗ
ДУНЁ, СЕНДА НАСИБАМ БОР
Хуршид Даврон таржимаси
Дунё, сенда насибам бор:
Олажакман эрта-кеч.
Энг аввало бир юрт истайман –
Тунлари сут берсин йиғлаган гўдакларга,
Шамоллар эсганида байроқлари сочилсин.
Бир тулпор истайман мен –
Ғиротдан учқур,
Оқ отдан учқур,
Бўз отдан учқур,
Узан бахши тилидан учқур –
Етиб олай олислаб кетганларга.
Бир кўприк истайман мен –
Остидан йиллар оқиб ўтсин,
Устидан биз ўтайлик
Айрилиққа қўл силтаб.
Бир юрак истайман мен –
Байроқ-байроқ қилиб тўғрасам уни,
Узоққа кетувчилар қўлларига олсинлар.
Бир байроқ истайман мен –
Юрагим совуқ қотса кийиб олайин уни.
Бир тоғ истайман мен –
Қирралари учли-учли –
Қўнсин бургутлари юрагимнинг бошига.
Бир чайла истайман мен –
Оғочига осиб қўяй қиличим – ғазабимни,
Илиб қўяй елдан тез тулпорим юганини.
Бир умид истайман мен –
Тупроқда, ҳавода, сувда,
Темирда, ўтда тоблансин.
Бир сўз истайман мен –
Қўлим мева туткан бутоқлардадир,
Мевалари пишиб-пишиб бол тортиб
Мен ўлгунча ерга тушажак.
Дунё, сенда насибам бор,
Олажакман эрта-кеч.
Yaqinda necha yillardan buyon qo’l urilmagan qog’ozlarim ichidan chorak asrdan ziyod avval tarjima qilgan ozarbayjon shoiri Dilso’zning «Dunyo, senda nasibam bor» she’rini topib oldim. O’qib ko’rib, o’z vaqtida uni biron bir matbuotga bermaganimdan afsuslandim va uni sizga taqdim etishni istadim.
DILSO’Z
DUNYO, SENDA NASIBAM BOR
Xurshid Davron tarjimasi
Dunyo, senda nasibam bor:
Olajakman erta-kech.
Eng avvalo bir yurt istayman –
Tunlari sut bersin yig’lagan go’daklarga,
Shamollar esganida bayroqlari sochilsin.
Bir tulpor istayman men –
G’irotdan uchqur,
Oq otdan uchqur,
Bo’z otdan uchqur,
Uzan baxshi tilidan uchqur –
Yetib olay olislab ketganlarga.
Bir ko’prik istayman men –
Ostidan yillar oqib o’tsin,
Ustidan biz o’taylik
Ayriliqqa qo’l siltab.
Bir yurak istayman men –
Bayroq-bayroq qilib to’g’rasam uni,
Uzoqqa ketuvchilar qo’llariga olsinlar.
Bir bayroq istayman men –
Yuragim sovuq qotsa kiyib olayin uni.
Bir tog’ istayman men –
Qirralari uchli-uchli –
Qo’nsin burgutlari yuragimning boshiga.
Bir chayla istayman men –
Og’ochiga osib qo’yay qilichim – g’azabimni,
Ilib qo’yay yeldan tez tulporim yuganini.
Bir umid istayman men –
Tuproqda, havoda, suvda,
Temirda, o’tda toblansin.
Bir so’z istayman men –
Qo’lim meva tutkan butoqlardadir,
Mevalari pishib-pishib bol tortib
Men o’lguncha yerga tushajak.
Dunyo, senda nasibam bor,
Olajakman erta-kech.
