Usmon Qo’chqor ‘She’r sehri’ teleloyihasida.

089    Бир неча кундан кейин 60 ёшини нишонлайдиган  истеъдодли шоир ва моҳир таржимон Усмон Қўчқорни саҳифамиз,  шеърият ихзлосмандлари ва шоир мухлислари номидан чин юракдан табриклаб,   сиҳат-саломатлик, баракали ижод,қаламига қувват  тилаймиз.

011

Истеъдодли шоир Усмон Қўчқор 1955 йилнинг 15 июнида Бухоро вилояти, Шофиркон туманида оддий меҳнаткаш оилада дунёга келади, У ўрта мактабни тугатгач, 1970—1975 йилларда Тошкент Давлат дорилфунунида таҳсил олади. Шундан сўнг у 1975—1977 йилларда Ғафур Ғулом номидаги Адабиёт ва санъат нашриётида ишлайди. 1977—1979 йилларда эса она юрти Шофирконга бориб, ўрта мактабларда она тили ва адабиётидан дарс беради.
1979-1986 йилларда Тошкентда — «Ўзбекистон» нашриётида муҳаррир бўлиб хизмат қилади. 1986-1988 йилларда «Чўлпон» нашриётида, 1988-1991 йилларда «Ёшлик» ойномасида фаолият кўрсатади. Ҳозирги кунда у «Жаҳон адабиёти» журналида ишламоқда.
Шоир ижодининг бошланиши асосан 70-йиллар охири ва 80-йиллар бошларига тўғри келади. Унинг биринчи шеърий тўплами 1982 йилда «Ҳаяжонга кўмилган дунё» номи билан чоп эттирилади. Тўпламга кирган кўпчилик шеърлар шоирнинг изланишларидан, ўз услубини яратаётганлигидан дарак берса ҳам улар ёшликнинг беғубор, содда, одамий қалб туйғуларидан ташкил тонганлиги китобхонни ўзига жалб этади.
Сўнгра, шоирнинг «Акссиз садолар» (1986) номли иккинчи шеърлар тўплами босилди. Кетма-кет эса «Уйқудаги минора» (1987), «Оғир карвон» (1991) каби анча жиддий, салмоқли шеърий гулдасталари яратилди. Бу тўпламлар шоир дунёқарашининг кенг ва чуқурлиги, мавзулар доирасининг беқиёслиги, фикрларининг теранлиги билан ажралиб туради.
Шоир ўз шеърларида ҳамиша замонлар қиёсидан ҳақиқат, нур излайди. Инсонни эзгу ва мукаммал этгувчи руҳни излайди, баъзан топади, баъзан эса… Хусусан «Қувғин» достонида қатағонлик даври азиятлари, изтироб ва алҳамлари ҳақида аччиқ ҳақиқатни очади.
У таржимон, журналист сифатида ҳам самарали ижод қилди. Шоир Шарқ ва Ғарб адабиётининг энг яхши намуналарини ўзбек тилига таржима қилди. Жумладан, машҳур азарбайжон адиби Юсуф Самадўғлиннинг «Қатл куни» романининг таржимаси шундан далолат беради.


011

Iste’dodli shoir Usmon Qo’chqor 1955 yilning 15 iyunida Buxoro viloyati, Shofirkon tumanida oddiy mehnatkash oilada dunyoga keladi, U o’rta maktabni tugatgach, 1970—1975 yillarda Toshkent Davlat dorilfununida tahsil oladi. Shundan so’ng u 1975—1977 yillarda G’afur G’ulom nomidagi Adabiyot va san’at nashriyotida ishlaydi. 1977—1979 yillarda esa ona yurti Shofirkonga borib, o’rta maktablarda ona tili va adabiyotidan dars beradi.
1979-1986 yillarda Toshkentda — «O’zbekiston» nashriyotida muharrir bo’lib xizmat qiladi. 1986-1988 yillarda «Cho’lpon» nashriyotida, 1988-1991 yillarda «Yoshlik» oynomasida faoliyat ko’rsatadi. Hozirgi kunda u «Jahon adabiyoti» jurnalida ishlamoqda.
Shoir ijodining boshlanishi asosan 70-yillar oxiri va 80-yillar boshlariga to’g’ri keladi. Uning birinchi she’riy to’plami 1982 yilda «Hayajonga ko’milgan dunyo» nomi bilan chop ettiriladi. To’plamga kirgan ko’pchilik she’rlar shoirning izlanishlaridan, o’z uslubini yaratayotganligidan darak bersa ham ular yoshlikning beg’ubor, sodda, odamiy qalb tuyg’ularidan tashkil tonganligi kitobxonni o’ziga jalb etadi.
So’ngra, shoirning «Akssiz sadolar» (1986) nomli ikkinchi she’rlar to’plami bosildi. Ketma-ket esa «Uyqudagi minora» (1987), «Og’ir karvon» (1991) kabi ancha jiddiy, salmoqli she’riy guldastalari yaratildi. Bu to’plamlar shoir dunyoqarashining keng va chuqurligi, mavzular doirasining beqiyosligi, fikrlarining teranligi bilan ajralib turadi.
Shoir o’z she’rlarida hamisha zamonlar qiyosidan haqiqat, nur izlaydi. Insonni ezgu va mukammal etguvchi ruhni izlaydi, ba’zan topadi, ba’zan esa… Xususan «Quvg’in» dostonida qatag’onlik davri aziyatlari, iztirob va alhamlari haqida achchiq haqiqatni ochadi.
U tarjimon, jurnalist sifatida ham samarali ijod qildi. Shoir Sharq va G’arb adabiyotining eng yaxshi namunalarini o’zbek tiliga tarjima qildi. Jumladan, mashhur azarbayjon adibi Yusuf Samado’g’linning «Qatl kuni» romanining tarjimasi shundan dalolat beradi.

09

(Tashriflar: umumiy 67, bugungi 1)

Izoh qoldiring