Умримнинг йигирма йилидан зиёди Ўзбекистон телерадио компанияси каналларида ўтди. Шу сабабдан бу даргоҳда бўлаётган воқеаларга, аниқроғи телеканаллар фаолиятида кўзга ташланаётган айрим камчиликларга бепарво бўлолмайман. Бу гапларни ёзаяпману бошқа бир гап онгу шууримда айланади. Бир пайтлар бир донишманд кутилаётган ижтимоий ўзгаришлар ҳақида гапираётиб, лўнда қилиб айтган эди: » Ҳамма гапни айтадиган кунлар келади. Аммо, унутма, бўтам, ўшандаям, бу гапларни эшитадиган қулоқ топилмайди…»

«МАДАНИЯТ ВА МАЪРИФАТ» ТЕЛЕКАНАЛИ
БАҲОНА АЙРИМ МУЛОҲАЗАЛАР
Хуршид ДАВРОН
Ўзбекистон халқ шоири

2012 йилда Ўзбекистон миллий телерадиокомпанияси таркибида Президент фармонига кўра ташкил этилган “Madaniyat va ma`rifat” телеканалининг фаолиятидан кўзланган мақсадлар юксак эди. Мен айни ўша кунлар телеканал фаолиятини ташкил этишда бевосита иштирок этганимдан фахрланаман.

Иш бошлаганидан кўп ўтмай канал халқимизнинг назарига тушди. Канал кўрсатувлари телерадиокомпания таркибидаги бошқа каналлар кўрсатувларидан алоҳида ажралиб тургани яққол кўриниб турарди. Бу каналда фаолият юритган ижодий жамоа таркибида телеканал мақсади ва вазифаларини теран англаган журналистларнинг фаолияти кўпчиликнинг диққатига сазовор бўлгани ҳам сир эмас.

Ҳаммаси яхши эди… Аммо, кейинги йиллар “Маданият ва маърифат” телеканалининг фақат номигигина қолдимикан, деган хавотирдаман.

Бу хавотир сабабларини англатиш учун 2019 йил мобайнида “Madaniyat va ma`rifat” телеканали эфирларида кўрганларимни таҳлил қилишга қарор қилдим. Чунки, мулоҳазаларим мана шу очиқ фактлар билан кўпроқ боғлиқ.

Ёзиб ўтганимдек, ўтган қисқа вақт давомида “Madaniyat va ma`rifat” телеканали ўз ўрни ва аудиториясига эга телеканалга айланди. муайян ютуқларга эришди. Аммо кўрсатувларни камида менчалик кузатиб борадиган томошабинларнинг барчасига яхши маълумки, телеканал ҳеч қачон бугунги даражага тушиб кетмаган.

Яқиндан бошлаб “Тундаликлар” кўрсатуви эфирга узатила бошланди. Ҳақиқатдан чиройли ном, чиройли йўналиш танланган. Устоз Асқад Мухторнинг “Тундаликлар”ига мос равишда яхши суҳбатлар бўлди. Кўп давраларда бу кўрсатув ҳақида эътирофлар ҳам бўлди. Катта-катта ёзувчиларимиз, олимларимизнинг мақтовлари қулоққа чалинди. Аммо кўрсатув шу қадар кўп эфирга узатилдики (адашмасам ҳар куни эфирга узатилган вақтлар ҳам бўлди), суҳбатдошларнинг ҳам сараги ва пучаги билиниб қолди. Бир ўрта ёш хонанда ё ўртамиёна актёр билан бир соат давомида нимани гаплашиш мумкин, ахир? Кўрсатув “Тундаликлар”ми, шунга мос равишда суҳбатдошни таклиф қилиш, томошабинларни соғинтириб, ҳафтада бир ё икки марта эфирга узатишса бўлмасмикан, деб ўйладим.

Яқинда номаълум бўлган сабабга кўра – русча олиб бориладиган кўрсатувлар пайдо бўлди. Уларнинг бирининг номи:“Ўзбекона ўзлик”. Кўрсатувнинг русча олиб борилиши ва унга атай қилгандай “Ўзбекона ўзлик” деб ном қўйишнинг ўзиёқ телеканалнинг айни пайтдаги ачинарли аҳволидан далолат бериб турибди. Русча олиб бориладиган кўрсатувни бундай номлаш бориб турган нодонлик бўлса, аслида бунинг маънавий фожеа эканлигини англамаслик, аксинча, шунга очиқ-ойдин йўл қўйиш, томошабин кўз ўнгида шу ишнинг эгаси, қаҳрамони сифатида намоён бўлиш –телеканал учун шармандаликнинг ўзгинасидир. “Madaniyat va ma`rifat”нинг “танлаган” кўрсатувини, танлаган номини қаранг? Ҳар қандай миллий тил миллат маданиятининг, маънавиятининг, санъатининг, қадриятларининг онаси саналади. Миллий қадриятларимиз, санъатимиз ва маданиятимиз номидан иш кўрадиган телеканалда Она тилига муносабат шуми?! Ушбу кўрсатув давлат тили ҳақидаги қонунимизнинг ўттиз йиллигига қилинган туҳфами?! Бу саволни телеканалнинг чучмал номдаги янги кўрсатувларидан бири бўлмиш “Сараланган саналар”ида кўндаланг қўйишга тўғри келади! Бундай жимжимадор номлар нега керак бўлиб қолди? “Сараланган саналар”, “Тафаккурдан томган томчилар” “Маданий термин”. Дарвоқе, “термин” сўзи ўзбекчага “атама” деб таржима қилинишини ҳам эслатиб қўйиш керак. “Маданий” деган сўзнинг ёнида ўзбекча муқобили мавжуд бўлган русча сўз турса яхшимас-да. Телеканалда она тилимизга бағишланган бирорта ҳам лойиҳа йўқ. МТРКда мана шу очиқ фактни оддий бир зиёли сифатида таҳлил қилиб кўрадиган тайинли раҳбар ҳам йўқ, шекилли… Ахир, ҳар қандай мафкуранинг асоси энг аввало, Она тили ҳисобланади-ку?!

——————————

МТРКдаги бебошдоқлик шу даражага етдики, шу йилдан бошлаб компания каналларининг деярли барчасида рус тилида олиб бориладиган кўрсатувлар пайдо бўлди. Бу «бўтқа»нинг пайдо бўлишини асло тушунмайман, буни ким «ўйлаб топган бўлса», у ўта фаросатсиз одам деб биламан.

Ҳақиқатан ҳам рус тилида кўрсатувлар зарурати мавжуд бўлганида телерадиокомпания раҳбарияти халқ билан мулоқот қилиб, суриштирув ўтказиб бунинг нечоғлик заруратини аниқ билиб олиши, бу заруратнинг сабабларини очиқ-ойдин жамоатчиликка маълум қилиши керак эди. Куни-кечагина бир неча она тилимизга беписандлик қилиб, рус тилини давлат тили даражасига кўтаришга бўлган кимсалар уринишига жамоатчилик қандай жавоб берганини яққол кўрдик-ку, ахир! МТРКда юзага чиққан бу ҳолат аслида Она тилимизга, Давлат тилига қаратилган ўша беписандликни пайдо бўлишига хизмат қилмадимикин?
Менинг бу мулоҳазамни рус тилига қаршилик деб эмас, Она тилимиз ҳимоясига қаратилганини англашларини истайман. Бу ишни мутлақ бошқача ташкил этиш лозим эди, яъни ҳақиқатан ҳам рус тилида кўрсатувлар зарурати мавжудлиги аниқланган тақдирда, ҳеч иккиланмай тўлиқ рус тилида фаолият олиб борадиган канал ташкил қилиш маъқул бўларди. Бошқа барча каналлар (Мен бу ўринда нафақат МТРК таркибидаги, қолган барча хусусий ва нодавлат телеканалларини ҳам назарда тутмоқдаман) фақат давлат тилида ишлаши шарт деб белгиланиши лозим. Фақат шундагина Қонун билан ҳимоя қилинган Давлат тилига бўлган муносабат ижтимоий маъно топарди, фақат шундагина Она тилимизнинг нураб ётган мавқеъининг тикланишига хизмат қиладиган бош омил ҳимояси таъминланган бўларди.

———————————

“Madaniyat va ma`rifat” концепцион нуқтаи назардан жуда кўп нарсани қамраб олган. Телеканалда она тилига бағишланган кўрсатув йўқ, “зато”, тиббиётга бағишлангани бор. “Бебаҳо бойлик” номли арзонгаров кўрсатувни тиббий маданият ҳақидадир-да, деб ўйлашингиз мумкин, лекин унда тиббий маданият тарғиботидан асар ҳам тополмайсиз. Шунчаки, тиббиётга бағишланган, холос. Тиббий маданиятга бағишланган кўрсатув билан шунчаки тиббиётга бағишланганини фарқлаб олиш қийин эмас. Соҳанинг исталган йўналишида гапирилаверади, бу интервью берувчилар учунгина жуда қизиқ ва аҳамиятли бўлса керак. Бунақа шаклсиз, йўриғи номаълум кўрсатувларга нима учун эҳтиёж туғилганини шахсан мен англолмадим. Ниҳоят, буям савияга бориб тақалади.

Яқинда мана шунақа чучмал ном остида яна бир кўрсатув ташкил этилди: “Дилга ташриф”. Сал олдинроқ эрталаблари “Нонушта вақти” кўрсатуви кетарди, кейин у “Хуш кайфият” деб ўзгартирилди. (Адашмасам шундай. Кўрсатувни кўрмаганим учун номини ҳам эслаб қолмаганман) Ана шу “Хуш кайфият” номли тонги кўрсатувда лабларини beautix қилдириб (шишириб), “ҳарир кўйлаклар”да чиқувчи узункиприк қизчалар энди янги-янги кўрсатувларда пайдо бўлишмоқда. Бу тажрибасиз, нўноқ бошловчиларнинг дилимизга қилаётган ташрифларидан “тошнота” юз бераётир! Яъни, кўнгил айнимоқда! Уларни қаердан топиб келишган? Телеканалнинг расмий бадиий кенгаши йўқми? Йўқ бўлса нега тузилмайди? Бор бўлса, у қаерга қараяпти? – тушуниш қийин.

Бирор бир шоир, рассом ёки ҳайкалтарошни ойига беш марта ҳам эфирга кетиши мумкинлигини бир амаллаб ҳазм қилса бўлар (Ажойиб шоираларимиздан бирини ой давомида ана шундай кетма-кет беришди), лекин айнан битта бошловчининг бир кунда уч-тўртта кўрсатувда кетма-кет чиқишини қандай “ютиб” бўлади. Дарвоқе, бу телеканалми ёки Youtubeми?! Мана бу ҳолга нима дейсиз: бир куни “Маданият янгиликлари”да чиққан бошловчи орадан бир соат ўтар-ўтмас, “Яхшилик” кўрсатувини олиб боради, яна бир соат ўтмасдан, худди ўша бошловчи “Дилга ташриф”да хонадонимизга учинчи марта “ташриф буюради”. Уч соатнинг ичида-я! Ажаб, ушбу “Дилга ташриф” кўрсатувида кетмайдиган мавзунинг ўзи йўқ. Аммо, ҳаммаси пала-партиш.

Бугунга келиб “Madaniyat va ma`rifat” телеканали дидсизлик, саводсизлик ва фаросатсизлик уясига айланган, пул илинжида миллат болаларига бакалажканинг қопқоғини йиғдириб “маймун ўйнатаётган” телеканаллар даражасига тушиб бормоқда.

Умрининг 20 йилдан зиёдини телевидениеда ўтказган одам, телеканал тамал тошини қўйганларнинг бири, қолаверса, миллат зиёлиларининг бир вакили сифатида телеканал учун жон куйдираман, унинг тобора пастга қараб оғаётганидан қайғураман.

“Madaniyat va ma`rifat” телеканалининг мақсад ва вазифалари унинг ташкил этиш давомида аниқ белгилаб берилган. Гап бу вазифани амалга оширишга қодир, лаёқатли жамоани қайта тиклаш, бу жамоа бошига сиёсатбозликдан узоқ, жўрачилик, маҳаллийчиликдан йироқ, она тилимиз равнақи учун жон куйдирадиган, маърифатли ва маънавияти юксак раҳбарлар туриши керак.

P. S. Яна такрорлайман, умримнинг йигирма йилидан зиёди Ўзбекистон телерадио компанияси каналларида ўтди. Шу сабабдан бу даргоҳда бўлаётган воқеаларга, аниқроғи телеканаллар фаолиятида кўзга ташланаётган айрим камчиликларга бепарво бўлолмайман. Бу гапларни ёзаяпману бошқа бир гап онгу шууримда айланади. Бир пайтлар бир донишманд кутилаётган ижтимоий ўзгаришлар ҳақида гапираётиб, лўнда қилиб айтган эди: » Ҳамма гапни айтадиган кунлар келади. Аммо, унутма, бўтам, ўшандаям, бу гапларни эшитадиган қулоқ топилмайди…»

Umrimning yigirma yilidan ziyodi O’zbekiston teleradio kompaniyasi kanallarida o’tdi. Shu sababdan bu dargohda bo’layotgan voqealarga, aniqrog’i telekanallar faoliyatida ko’zga tashlanayotgan ayrim kamchiliklarga beparvo bo’lolmayman. Bu gaplarni yozayapmanu boshqa bir gap ongu shuurimda aylanadi. Bir paytlar bir donishmand kutilayotgan ijtimoiy o’zgarishlar haqida gapirayotib, lo’nda qilib aytgan edi: » Hamma gapni aytadigan kunlar keladi. Ammo, unutma, bo’tam, o’shandayam, bu gaplarni eshitadigan quloq topilmaydi…»

«MADANIYAT VA MA’RIFAT» TELEKANALI
BAHONA AYRIM MULOHAZALAR
Xurshid DAVRON
O’zbekiston xalq shoiri

2012 yilda O’zbekiston milliy teleradiokompaniyasi tarkibida Prezident farmoniga ko’ra tashkil etilgan “Madaniyat va ma`rifat” telekanalining faoliyatidan ko’zlangan maqsadlar yuksak edi. Men ayni o’sha kunlar telekanal faoliyatini tashkil etishda bevosita ishtirok etganimdan faxrlanaman.

Ish boshlaganidan ko’p o’tmay kanal xalqimizning nazariga tushdi. Kanal ko’rsatuvlari teleradiokompaniya tarkibidagi boshqa kanallar ko’rsatuvlaridan alohida ajralib turgani yaqqol ko’rinib turardi. Bu kanalda faoliyat yuritgan ijodiy jamoa tarkibida telekanal maqsadi va vazifalarini teran anglagan jurnalistlarning faoliyati ko’pchilikning diqqatiga sazovor bo’lgani ham sir emas.

Hammasi yaxshi edi… Ammo, keyingi yillar “Madaniyat va ma’rifat” telekanalining faqat nomigigina qoldimikan, degan xavotirdaman.

Bu xavotir sabablarini anglatish uchun 2019 yil mobaynida “Madaniyat va ma`rifat” telekanali efirlarida ko’rganlarimni tahlil qilishga qaror qildim. Chunki, mulohazalarim mana shu ochiq faktlar bilan ko’proq bog’liq.

Yozib o’tganimdek, o’tgan qisqa vaqt davomida “Madaniyat va ma`rifat” telekanali o’z o’rni va auditoriyasiga ega telekanalga aylandi. muayyan yutuqlarga erishdi. Ammo ko’rsatuvlarni kamida menchalik kuzatib boradigan tomoshabinlarning barchasiga yaxshi ma’lumki, telekanal hech qachon bugungi darajaga tushib ketmagan.

Yaqindan boshlab “Tundaliklar” ko’rsatuvi efirga uzatila boshlandi. Haqiqatdan chiroyli nom, chiroyli yo’nalish tanlangan. Ustoz Asqad Muxtorning “Tundaliklar”iga mos ravishda yaxshi suhbatlar bo’ldi. Ko’p davralarda bu ko’rsatuv haqida e’tiroflar ham bo’ldi. Katta-katta yozuvchilarimiz, olimlarimizning maqtovlari quloqqa chalindi. Ammo ko’rsatuv shu qadar ko’p efirga uzatildiki (adashmasam har kuni efirga uzatilgan vaqtlar ham bo’ldi), suhbatdoshlarning ham saragi va puchagi bilinib qoldi. Bir o’rta yosh xonanda yo o’rtamiyona aktyor bilan bir soat davomida nimani gaplashish mumkin, axir? Ko’rsatuv “Tundaliklar”mi, shunga mos ravishda suhbatdoshni taklif qilish, tomoshabinlarni sog’intirib, haftada bir yo ikki marta efirga uzatishsa bo’lmasmikan, deb o’yladim.

Yaqinda noma’lum bo’lgan sababga ko’ra – ruscha olib boriladigan ko’rsatuvlar paydo bo’ldi. Ularning birining nomi:“O’zbekona o’zlik”. Ko’rsatuvning ruscha olib borilishi va unga atay qilganday “O’zbekona o’zlik” deb nom qo’yishning o’ziyoq telekanalning ayni paytdagi achinarli ahvolidan dalolat berib turibdi. Ruscha olib boriladigan ko’rsatuvni bunday nomlash borib turgan nodonlik bo’lsa, aslida buning ma’naviy fojea ekanligini anglamaslik, aksincha, shunga ochiq-oydin yo’l qo’yish, tomoshabin ko’z o’ngida shu ishning egasi, qahramoni sifatida namoyon bo’lish –telekanal uchun sharmandalikning o’zginasidir. “Madaniyat va ma`rifat”ning “tanlagan” ko’rsatuvini, tanlagan nomini qarang? Har qanday milliy til millat madaniyatining, ma’naviyatining, san’atining, qadriyatlarining onasi sanaladi. Milliy qadriyatlarimiz, san’atimiz va madaniyatimiz nomidan ish ko’radigan telekanalda Ona tiliga munosabat shumi?! Ushbu ko’rsatuv davlat tili haqidagi qonunimizning o’ttiz yilligiga qilingan tuhfami?! Bu savolni telekanalning chuchmal nomdagi yangi ko’rsatuvlaridan biri bo’lmish “Saralangan sanalar”ida ko’ndalang qo’yishga to’g’ri keladi! Bunday jimjimador nomlar nega kerak bo’lib qoldi? “Saralangan sanalar”, “Tafakkurdan tomgan tomchilar” “Madaniy termin”. Darvoqe, “termin” so’zi o’zbekchaga “atama” deb tarjima qilinishini ham eslatib qo’yish kerak. “Madaniy” degan so’zning yonida o’zbekcha muqobili mavjud bo’lgan ruscha so’z tursa yaxshimas-da. Telekanalda ona tilimizga bag’ishlangan birorta ham loyiha yo’q. MTRKda mana shu ochiq faktni oddiy bir ziyoli sifatida tahlil qilib ko’radigan tayinli rahbar ham yo’q, shekilli… Axir, har qanday mafkuraning asosi eng avvalo, Ona tili hisoblanadi-ku?!

——————————

MTRKdagi beboshdoqlik shu darajaga yetdiki, shu yildan boshlab kompaniya kanallarining deyarli barchasida rus tilida olib boriladigan ko’rsatuvlar paydo bo’ldi. Bu «bo’tqa»ning paydo bo’lishini aslo tushunmayman, buni kim «o’ylab topgan bo’lsa», u o’ta farosatsiz odam deb bilaman.

Haqiqatan ham rus tilida ko’rsatuvlar zarurati mavjud bo’lganida teleradiokompaniya rahbariyati xalq bilan muloqot qilib, surishtiruv o’tkazib buning nechog’lik zaruratini aniq bilib olishi, bu zaruratning sabablarini ochiq-oydin jamoatchilikka ma’lum qilishi kerak edi. Kuni-kechagina bir necha ona tilimizga bepisandlik qilib, rus tilini davlat tili darajasiga ko’tarishga bo’lgan kimsalar urinishiga jamoatchilik qanday javob berganini yaqqol ko’rdik-ku, axir! MTRKda yuzaga chiqqan bu holat aslida Ona tilimizga, Davlat tiliga qaratilgan o’sha bepisandlikni paydo bo’lishiga xizmat qilmadimikin?

Mening bu mulohazamni rus tiliga qarshilik deb emas, Ona tilimiz himoyasiga qaratilganini anglashlarini istayman. Bu ishni mutlaq boshqacha tashkil etish lozim edi, ya’ni haqiqatan ham rus tilida ko’rsatuvlar zarurati mavjudligi aniqlangan taqdirda, hech ikkilanmay to’liq rus tilida faoliyat olib boradigan kanal tashkil qilish ma’qul bo’lardi. Boshqa barcha kanallar (Men bu o’rinda nafaqat MTRK tarkibidagi, qolgan barcha xususiy va nodavlat telekanallarini ham nazarda tutmoqdaman) faqat davlat tilida ishlashi shart deb belgilanishi lozim. Faqat shundagina Qonun bilan himoya qilingan Davlat tiliga bo’lgan munosabat ijtimoiy ma’no topardi, faqat shundagina Ona tilimizning nurab yotgan mavqe’ining tiklanishiga xizmat qiladigan bosh omil himoyasi ta’minlangan bo’lardi.

———————————

“Madaniyat va ma`rifat” kontseptsion nuqtai nazardan juda ko’p narsani qamrab olgan. Telekanalda ona tiliga bag’ishlangan ko’rsatuv yo’q, “zato”, tibbiyotga bag’ishlangani bor. “Bebaho boylik” nomli arzongarov ko’rsatuvni tibbiy madaniyat haqidadir-da, deb o’ylashingiz mumkin, lekin unda tibbiy madaniyat targ’ibotidan asar ham topolmaysiz. Shunchaki, tibbiyotga bag’ishlangan, xolos. Tibbiy madaniyatga bag’ishlangan ko’rsatuv bilan shunchaki tibbiyotga bag’ishlanganini farqlab olish qiyin emas. Sohaning istalgan yo’nalishida gapirilaveradi, bu intervьyu beruvchilar uchungina juda qiziq va ahamiyatli bo’lsa kerak. Bunaqa shaklsiz, yo’rig’i noma’lum ko’rsatuvlarga nima uchun ehtiyoj tug’ilganini shaxsan men anglolmadim. Nihoyat, buyam saviyaga borib taqaladi.

Yaqinda mana shunaqa chuchmal nom ostida yana bir ko’rsatuv tashkil etildi: “Dilga tashrif”. Sal oldinroq ertalablari “Nonushta vaqti” ko’rsatuvi ketardi, keyin u “Xush kayfiyat” deb o’zgartirildi. (Adashmasam shunday. Ko’rsatuvni ko’rmaganim uchun nomini ham eslab qolmaganman) Ana shu “Xush kayfiyat” nomli tongi ko’rsatuvda lablarini beautix qildirib (shishirib), “harir ko’ylaklar”da chiquvchi uzunkiprik qizchalar endi yangi-yangi ko’rsatuvlarda paydo bo’lishmoqda. Bu tajribasiz, no’noq boshlovchilarning dilimizga qilayotgan tashriflaridan “toshnota” yuz berayotir! Ya’ni, ko’ngil aynimoqda! Ularni qayerdan topib kelishgan? Telekanalning rasmiy badiiy kengashi yo’qmi? Yo’q bo’lsa nega tuzilmaydi? Bor bo’lsa, u qayerga qarayapti? – tushunish qiyin.

Biror bir shoir, rassom yoki haykaltaroshni oyiga besh marta ham efirga ketishi mumkinligini bir amallab hazm qilsa bo’lar (Ajoyib shoiralarimizdan birini oy davomida ana shunday ketma-ket berishdi), lekin aynan bitta boshlovchining bir kunda uch-to’rtta ko’rsatuvda ketma-ket chiqishini qanday “yutib” bo’ladi. Darvoqe, bu telekanalmi yoki Youtubemi?! Mana bu holga nima deysiz: bir kuni “Madaniyat yangiliklari”da chiqqan boshlovchi oradan bir soat o’tar-o’tmas, “Yaxshilik” ko’rsatuvini olib boradi, yana bir soat o’tmasdan, xuddi o’sha boshlovchi “Dilga tashrif”da xonadonimizga uchinchi marta “tashrif buyuradi”. Uch soatning ichida-ya! Ajab, ushbu “Dilga tashrif” ko’rsatuvida ketmaydigan mavzuning o’zi yo’q. Ammo, hammasi pala-partish.

Bugunga kelib “Madaniyat va ma`rifat” telekanali didsizlik, savodsizlik va farosatsizlik uyasiga aylangan, pul ilinjida millat bolalariga bakalajkaning qopqog’ini yig’dirib “maymun o’ynatayotgan” telekanallar darajasiga tushib bormoqda.

Umrining 20 yildan ziyodini televideniyeda o’tkazgan odam, telekanal tamal toshini qo’yganlarning biri, qolaversa, millat ziyolilarining bir vakili sifatida telekanal uchun jon kuydiraman, uning tobora pastga qarab og’ayotganidan qayg’uraman.

“Madaniyat va ma`rifat” telekanalining maqsad va vazifalari uning tashkil etish davomida aniq belgilab berilgan. Gap bu vazifani amalga oshirishga qodir, layoqatli jamoani qayta tiklash, bu jamoa boshiga siyosatbozlikdan uzoq, jo’rachilik, mahalliychilikdan yiroq, ona tilimiz ravnaqi uchun jon kuydiradigan, ma’rifatli va ma’naviyati yuksak rahbarlar turishi kerak.

P. S. Yana takrorlayman, umrimning yigirma yilidan ziyodi O’zbekiston teleradio kompaniyasi kanallarida o’tdi. Shu sababdan bu dargohda bo’layotgan voqealarga, aniqrog’i telekanallar faoliyatida ko’zga tashlanayotgan ayrim kamchiliklarga beparvo bo’lolmayman. Bu gaplarni yozayapmanu boshqa bir gap ongu shuurimda aylanadi. Bir paytlar bir donishmand kutilayotgan ijtimoiy o’zgarishlar haqida gapirayotib, lo’nda qilib aytgan edi: » Hamma gapni aytadigan kunlar keladi. Ammo, unutma, bo’tam, o’shandayam, bu gaplarni eshitadigan quloq topilmaydi…»