Туғилган куним муносабати билан ижтимоий тармоқларда самимий тилаклар билдирган даврадошларимга,аввалан ёш шоир дўстларимга, телефон орқали кўнглимни шодлантирган жигарларимга, уйга келиб муборакбод этган инсонларга, узоқ-яқин юртлардан қутловлар йўллаган қардошларимга, барча юртдошларимга энг самимий миннатдорчилигимни айтаман. Барчангизни Аллоҳи Карим ўз паноҳида асрасин.
Хуршид Даврон
21.01. 2020
Нодира Афоқова
ХАЛҚ ШОИРИ ХУРШИД ДАВРОНГА
Қип-қизил қуёшдай
Қонаган юрак
Бўғзига тиқилар, чиқар отилиб,
Тонгдай отар шоир хўрлик тунида,
Жигар ранг қонлардан оқ нурлар эшиб —
Ёғдудан яралгандир асл шоирлар.
Шамолдай эсар у
Бўғилган жонлар
Қақшаса бир ютум ҳавога зор-зор.
Бир ютум нафасдай,
Бир тоза нафас.
Кўз ёшларни артар,
Супурар шўрин —
Ҳаводан яралган асл шоирлар.
Нохуш бир башорат,
Қўрқинч, алағда
Тушларни айтарлар титраб жонлари,
Пичирлаб айтарлар.
Ёлвориб, умидвор.
Узоқ-узоқларга олиб кетар у,
Беминнат дарёдай.
Куюк дарёдай.
Куйга айлантирар,
Гулга айлантирар,
Дурга айлантирар тушларингизни —
Сувдан яралгандир асл шоирлар.
Боғлар улғаяжак қучоқларида,
Тоғлар улғаяжак қучоқларида,
Маъданлар етилар қаватма-қават.
Ҳар бир заррасида ҳаёт ва қудрат,
Заминдай тўшалар —
Тупроқдан яралган асл шоирлар.
Тангрининг тилмочи,
Одамнинг асл фарзанди –
Шоирлар.
Tug’ilgan kunim munosabati bilan ijtimoiy tarmoqlarda samimiy tilaklar bildirgan davradoshlarimga,avvalan yosh shoir do’stlarimga, telefon orqali ko’nglimni shodlantirgan jigarlarimga, uyga kelib muborakbod etgan insonlarga, uzoq-yaqin yurtlardan qutlovlar yo’llagan qardoshlarimga, barcha yurtdoshlarimga eng samimiy minnatdorchiligimni aytaman. Barchangizni Allohi Karim o’z panohida asrasin.
Xurshid Davron
21.01. 2020
Nodira Afoqova
XALQ ShOIRI XURShID DAVRONGA
Qip-qizil quyoshday
Qonagan yurak
Bo’g’ziga tiqilar, chiqar otilib,
Tongday otar shoir xo’rlik tunida,
Jigar rang qonlardan oq nurlar eshib —
Yog’dudan yaralgandir asl shoirlar.
Shamolday esar u
Bo’g’ilgan jonlar
Qaqshasa bir yutum havoga zor-zor.
Bir yutum nafasday,
Bir toza nafas.
Ko’z yoshlarni artar,
Supurar sho’rin —
Havodan yaralgan asl shoirlar.
Noxush bir bashorat,
Qo’rqinch, alag’da
Tushlarni aytarlar titrab jonlari,
Pichirlab aytarlar.
Yolvorib, umidvor.
Uzoq-uzoqlarga olib ketar u,
Beminnat daryoday.
Kuyuk daryoday.
Kuyga aylantirar,
Gulga aylantirar,
Durga aylantirar tushlaringizni —
Suvdan yaralgandir asl shoirlar.
Bog’lar ulg’ayajak quchoqlarida,
Tog’lar ulg’ayajak quchoqlarida,
Ma’danlar yetilar qavatma-qavat.
Har bir zarrasida hayot va qudrat,
Zaminday to’shalar —
Tuproqdan yaralgan asl shoirlar.
Tangrining tilmochi,
Odamning asl farzandi –
Shoirlar.
