Кеча дўстим — адабиётшунос олим, филология фанлари доктори Маъруфжон Йўлдошев қўнғироқ қилиб Туркиянинг Эге (Эгей) университети (Ege Üniversitesi)да олима Жансу Делибалта (Cansu Delibalta Gürbulak) менинг ижодим бўйича докторлик илмий ишини муваффақиятли ёқлагани хабарини етказди. Тез (дессертация) сўнгги йиллардаги энг яхши илмий ишлардан бири бўлгани алоҳида айтилибди.

Мен бу ишда ўз ҳиссасини қўшган Маъруфжонга, салкам 4 йиллик машаққатли меҳнат қилган олима синглим Жансу Делибалтага, унинг сафдошларига, оила аъзоларига, устозларига, хусусан профессор Доктор Явуз Акпинарга, Шарифа Ялчинқоя хонимга энг эзгу тилакларимни йўллайман. Саҳифадаги видеода Шу тилакларим акс этган ва 3-4 кун аввал Жансуга йўллаган миннатдорлик мурожаатимни, шунингдек, Жансу билан 2015 йилда илк учрашувларимиз пайтидаги фотосуратларни шодлик ила илова қиламан.

  Бу воқеа хусусида адабиётшунос олим, доктор Маъруфжон Йўлдошев шундай маълумот ёзади: Туркиянинг Эге университети докторанти Жансу Делибалта кеча аллома шоиримиз Хуршид Даврон ижодига бағишланган докторлик диссертатциясини муваффақиятли ҳимоя қилди. Жансу шоир ижоди ва ҳаётини жиддий ўрганди, унинг публицистикасидан тортиб ижтимоий тармоқлардаги ёзган-чизганларигача кузатиб таҳлил қилиб борди. Шоирнинг олам ва инсон ҳақидаги ўйлари, кундалик майда масалалар қаршисидаги тутумидан тортиб миллатга алоқадор катта масалалар қаршисидаги туришигача таҳлил қилиб чиқди. Шоир феноменини замонавий илмий тадқиқ тамойиллари асосида ўрганиб чиқди. Жансу бу тадқиқоти билан тўхтаб қолмайди ва ўзбек адабиётини Туркияда танитишдан чарчамайди деган умиддаман.

Азизлар бир устознинг шогирди ҳимоясидан кейин ёзган дил сўзларини сизларга илиндим. Илм қиламан деб умидланган ҳар шогирднинг шундай устози бўлсин. Раҳмат сизга Шарифа устоз.

Проф.Др. Шарифа Ёлчинқоя:
Бугун туркологиямиз янги бир фан доктори билан бойиди. Мумтоз адабиёт мутахассиси бўлишимга қарамай, икки йилдан бери замонавий ўзбек адабиёти бўйича ёзилаётган диссертацияга раҳбарлик қилиш мобайнида кўп нарса ўргандим. Жансу Делибалта Гурбулак бугун Хуршид Даврон ва унинг асарлари мавзусидаги диссертацияси ҳимояси билан турк тили ва адабиёти соҳасида фан доктори илмий даражасини олди. Бу диссертацияга кўпчиликнинг меҳнати сингди. Университетимиздаги фаолиятини якунлаб юртига қайтган қимматли ҳамкасбим Проф. Др. Маъруфжон Йўлдошев ушбу диссертация мавзусини танлаган ва илмий раҳбарлик қилган. Кейин барчамизнинг устозимиз Проф. Др. Ёвуз Оқпинар нафақага айрилгунича Жансуга раҳбарлик қилиб турганлар. Диссертациянинг боришини кузатиш ҳайъатидаги ҳамкасбларимиз Др. Йилмаз Ўзкая ва Др. Салжук Туркйилмазлар ўз маслаҳат ва ёрдамлари билан менинг ишимни енгиллатдилар. Доцент Саломи Фидокор ҳам ўзбек фольклори мутахасисси сифатида ёнимизда турди. Кенгашда Истанбулдан вақт топиб келган Проф. Др. Меҳмет Ачаа бу соҳанинг катта билимдони сифатида Жансунинг диссертациясини теран таҳлил қилиб берди. Барча устозларимизга ташаккурларимизни билдирамиз. Иш жараёнида кўнглини оғритган бўлсам, узр сўраган ҳолда Жансуни чин кўнгилдан табриклайман. Мен бу оламни тарк этган шоиру ўзонлар билан дардлашишни ёқтирадиган одамман. Жансу соясида, Оллоҳ узоқ умр берсин, тирик шоир кўнгилдошим бўлди. Хуршид Давронга оташин саломлар… Кенгаш қарори ўқилаётган пайтда мен ҳам йиғладим, Жансу. Фақат бу кўз ёшлар ғурурдан эди…

Kecha do’stim — adabiyotshunos olim, filologiya fanlari doktori Ma’rufjon Yo’ldoshev qo’ng’iroq qilib Turkiyaning Ege (Egey) universiteti (Ege Üniversitesi)da olima Jansu Delibalta (Cansu Delibalta Gürbulak) mening ijodim bo’yicha doktorlik ilmiy ishini muvaffaqiyatli yoqlagani xabarini yetkazdi. Tez (dessertatsiya) so’nggi yillardagi eng yaxshi ilmiy ishlardan biri bo’lgani alohida aytilibdi. Men bu ishda o’z hissasini qo’shgan Ma’rufjonga, salkam 4 yillik mashaqqatli mehnat qilgan olima singlim Jansu Delibaltaga, uning safdoshlariga, oila a’zolariga, ustozlariga, xususan professor Doktor Yavuz Akpinarga, Sharifa Yalchinqoya xonimga eng ezgu tilaklarimni yo’llayman. Sahifadagi videoda Shu tilaklarim aks etgan va 3-4 kun avval Jansuga yo’llagan minnatdorlik murojaatimni, shuningdek, Jansu bilan 2015 yilda ilk uchrashuvlarimiz paytidagi fotosuratlarni shodlik ila ilova qilaman.

Bu voqea xususida adabiyotshunos olim, doktor Ma’rufjon Yo’ldoshev shunday ma’lumot yozadi: Turkiyaning Ege universiteti doktoranti Jansu Delibalta kecha alloma shoirimiz Xurshid Davron ijodiga bag’ishlangan doktorlik disserttsiyasini muvaffaqiyatli himoya qildi. Jansu shoir ijodi va hayotini jiddiy o’rgandi, uning publitsistikasidan tortib ijtimoiy tarmoqlardagi yozgan-chizganlarigacha kuzatib tahlil qilib bordi. Shoirning olam va inson haqidagi o’ylari, kundalik mayda masalalar qarshisidagi tutumidan tortib millatga aloqador katta masalalar qarshisidagi turishigacha tahlil qilib chiqdi. Shoir fenomenini zamonaviy ilmiy tadqiq tamoyillari asosida o’rganib chiqdi. Jansu bu tadqiqoti bilan to’xtab qolmaydi va o’zbek adabiyotini Turkiyada tanitishdan charchamaydi degan umiddaman.

Azizlar bir ustozning shogirdi himoyasidan keyin yozgan dil so’zlarini sizlarga ilindim. Ilm qilaman deb umidlangan har shogirdning shunday ustozi bo’lsin. Rahmat sizga Sharifa ustoz.

Prof.Dr. Sharifa Yolchinqoya:
Bugun turkologiyamiz yangi bir fan doktori bilan boyidi. Mumtoz adabiyot mutaxassisi bo’lishimga qaramay, ikki yildan beri zamonaviy o’zbek adabiyoti bo’yicha yozilayotgan dissertatsiyaga rahbarlik qilish mobaynida ko’p narsa o’rgandim. Jansu Delibalta Gurbulak bugun Xurshid Davron va uning asarlari mavzusidagi dissertatsiyasi himoyasi bilan turk tili va adabiyoti sohasida fan doktori ilmiy darajasini oldi. Bu dissertatsiyaga ko’pchilikning mehnati singdi. Universitetimizdagi faoliyatini yakunlab yurtiga qaytgan qimmatli hamkasbim Prof. Dr. Ma’rufjon Yo’ldoshev ushbu dissertatsiya mavzusini tanlagan va ilmiy rahbarlik qilgan. Keyin barchamizning ustozimiz Prof. Dr. Yovuz Oqpinar nafaqaga ayrilgunicha Jansuga rahbarlik qilib turganlar. Dissertatsiyaning borishini kuzatish hay’atidagi hamkasblarimiz Dr. Yilmaz O’zkaya va Dr. Saljuk Turkyilmazlar o’z maslahat va yordamlari bilan mening ishimni yengillatdilar. Dotsent Salomi Fidokor ham o’zbek folьklori mutaxasissi sifatida yonimizda turdi. Kengashda Istanbuldan vaqt topib kelgan Prof. Dr. Mehmet Achaa bu sohaning katta bilimdoni sifatida Jansuning dissertatsiyasini teran tahlil qilib berdi. Barcha ustozlarimizga tashakkurlarimizni bildiramiz. Ish jarayonida ko’nglini og’ritgan bo’lsam, uzr so’ragan holda Jansuni chin ko’ngildan tabriklayman. Men bu olamni tark etgan shoiru o’zonlar bilan dardlashishni yoqtiradigan odamman. Jansu soyasida, Olloh uzoq umr bersin, tirik shoir ko’ngildoshim bo’ldi. Xurshid Davronga otashin salomlar… Kengash qarori o’qilayotgan paytda men ham yig’ladim, Jansu. Faqat bu ko’z yoshlar g’ururdan edi…