Бас энди, такаббур, бадқовоқ, найнов,
Ёвлар милтиғини юрмайман ўқлаб.
Қандай шоир бўлдим, ёронлар, айтинг,
Бир ғариб дўстимни қўймасам йўқлаб.

Холдор Вулқон
ЙЎҚЛОВ

Хуршид Давронга

Бас энди, такаббур, бадқовоқ, найнов,
Ёвлар милтиғини юрмайман ўқлаб.
Қандай шоир бўлдим, ёронлар, айтинг,
Бир ғариб дўстимни қўймасам йўқлаб.

Баъзан дарвеш дўстим ёлғиз бир ўзи,
Дала адоғида ўйларга ботар.
Сояси акс этган кўлмак сувларин,
Ёмғирлар аёвсиз чимчилаб ётар.

Бошида шляпа, сочлари ўсган,
Кастими қоп каби, шими ҳам калта.
Жанубга отланган қушларга боқар,
Озғин елкасига осганча халта.

Дунёдан батамом безганми дейман,
Камгап, одамови, эмас чапани.
Ёлғизлик ва жимлик ёқади унга,
Ёқар кимсасиз йўл, қорлар кафани.

Қиш эди, қорларга туртиниб, бордим,
Ҳавога ўрлади қарғалар юзлаб.
Дарвеш дўстим шўрлик тик турган куйи,
Аёзли далада қолибди музлаб.

26 июль, 2012 йил.
Тонги соат 7  дан 55 минут ўтди.
Торонто шаҳри, Канада.

Xoldor Vulqon
YO’QLOV

Xurshid Davronga

Bas endi, takabbur, badqovoq, naynov,
Yovlar miltig‘ini yurmayman o‘qlab.
Qanday shoir bo‘ldim, yoronlar, ayting,
Bir g‘arib do‘stimni qo‘ymasam yo‘qlab.

Ba‘zan darvesh do‘stim yolg‘iz bir o‘zi,
Dala adog‘ida o‘ylarga botar.
Soyasi aks etgan ko‘lmak suvlarin,
Yomg‘irlar ayovsiz chimchilab yotar.

Boshida shlyapa, sochlari o‘sgan,
Kastimi qop kabi, shimi ham kalta.
Janubga otlangan qushlarga boqar,
Ozg‘in yelkasiga osgancha xalta.

Dunyodan batamom bezganmi deyman,
Kamgap, odamovi, emas chapani.
Yolg‘izlik va jimlik yoqadi unga,
Yoqar kimsasiz yo‘l, qorlar kafani.

Qish edi, qorlarga turtinib, bordim,
Havoga o‘rladi qarg‘alar yuzlab.
Darvesh do‘stim sho‘rlik tik turgan kuyi,
Ayozli dalada qolibdi muzlab.

26 iyul, 2012 yil.
Tongi soat 7dan 55 minut o‘tdi.
Toronto shahri, Kanada.