Eshqobil Shukur. Yo’l. Ibrohim Haqqulga

021Атоқли навоийшунос ва тасаввуфшунос олим Иброҳим Ҳаққулга бағишланган шоир Эшқобил Шукурнинг шеърини тақдим этамиз.

Эшқобил Шукур
ЙЎЛ
Иброҳим Ҳаққулга бағишланади

Мен бир умиддирман, Ҳақни тиловчи,
Қадамимда хатар, қилич бўйнимда…
Адоқсиз йўлларда ҳорғин йўловчи,
Кафаним эгнимда, қайғум қўйнимда.

Кўҳна бир дарвешдай боравераман…
Чақмоқлар гуллайди товонларимда.
Кўзларимда Уни кўравераман,
Чўққилар букилар довонларимда.

Тонглар кўксим тонгдай сокин ёрилар,
Тунлар ёриламан дор ва ўлимга.
Қақшаган кўзимда дарё тирилар,
Кафаним эгнимда, эрким кўнглимда..

Йўл қалтис, манзил-ку ёрдан-да йироқ,
Ёнғинлар талоши ичу тошимда.
Қанча суюклисан, суйгулим, бироқ,
Кафаним эгнимда, ўлим бошимда.

Кўнглимни қай тарзда баён этайин,
Абадий музликлар ёнар тафтимда.
Бошимни қай сори олиб кетайин,
Кафаним эгнимда, жоним кафтимда.

Наҳот қалблар энди темир каби жўн,
Наҳот туйғулар ҳам замон ўйнинда.
Кимга тилло камар, кимга зарбоф тўн,
Кафаним эгнимда, жандам кейнимда.

Йўқданми, Ҳақданми келар бир овоз,
Бир ҳаётга ўхшар, бир-да ўлимга.
Мен яна тонгларга чиқаман пешвоз,
Кафаним эгнимда, эрким кўнглимда.

То булбули таъбим* фиғони ортар,
Боғларни булғаган зоғлар қошинда.
Мени Маҳшар қадар бир қисмат кутар,
Кафаним эгнимда, қўлим бошимда.

Феврал, 2021

*Нодирабегим ибораси

Аtoqli navoiyshunos va tasavvufshunos olim Ibrohim Haqqulga bagʼishlangan shoir Eshqobil Shukurning sheʼrini taqdim etamiz.

Eshqobil Shukur
YOʼL
Ibrohim Haqqulga bag’ishlanadi

Men bir umiddirman, Haqni tilovchi,
Qadamimda xatar, qilich boʼynimda…
Аdoqsiz yoʼllarda horgʼin yoʼlovchi,
Kafanim egnimda, qaygʼum qoʼynimda.

Koʼhna bir darveshday boraveraman…
Chaqmoqlar gullaydi tovonlarimda.
Koʼzlarimda Uni koʼraveraman,
Choʼqqilar bukilar dovonlarimda.

Tonglar koʼksim tongday sokin yorilar,
Tunlar yorilaman dor va oʼlimga.
Qaqshagan koʼzimda daryo tirilar,
Kafanim egnimda, erkim koʼnglimda..

Yoʼl qaltis, manzil-ku yordan-da yiroq,
Yongʼinlar taloshi ichu toshimda.
Qancha suyuklisan, suygulim, biroq,
Kafanim egnimda, oʼlim boshimda.

Koʼnglimni qay tarzda bayon etayin,
Аbadiy muzliklar yonar taftimda.
Boshimni qay sori olib ketayin,
Kafanim egnimda, jonim kaftimda.

Nahot qalblar endi temir kabi joʼn,
Nahot tuygʼular ham zamon oʼyninda.
Kimga tillo kamar, kimga zarbof toʼn,
Kafanim egnimda, jandam keynimda.

Yoʼqdanmi, Haqdanmi kelar bir ovoz,
Bir hayotga oʼxshar, bir-da oʼlimga.
Men yana tonglarga chiqaman peshvoz,
Kafanim egnimda, erkim koʼnglimda.

To bulbuli taʼbim* figʼoni ortar,
Bogʼlarni bulgʼagan zogʼlar qoshinda.
Meni Mahshar qadar bir qismat kutar,
Kafanim egnimda, qoʼlim boshimda.

Fevral, 2021

*Nodirabegim iborasi

034

(Tashriflar: umumiy 132, bugungi 1)

1 izoh

Izoh qoldiring