13 АВГУСТ — ЎЗБЕКИСТОН ХАЛҚ ШОИРИ УСМОН АЗИМ 70 ЁШДА!
Мен – Усмон Азим
Бойсунда туғилиб,
Тошкентда яшаяпман,
Дунёда яшаяпман
Ва бир аёлнинг юрагида.
ЎЗИМ ҲАҚИДА МАЪЛУМОТЛАР
Мен – Усмон Азим
Бойсунда туғилиб,
Тошкентда яшаяпман,
Дунёда яшаяпман
Ва бир аёлнинг юрагида.
Дунё рўзғоримдай,
Уни ўйлайвериб, сочларим оқарди…
Ҳаёт- китоб эмас дейишса, кулдим,
Чунки ўзим кўрганман (неча бор)
Ҳаётнинг сатрларга кирганини..
Ҳақиқатга чоҳдалигида ҳам сиғинавердим.
Қарашларим кўп ўзгарди;
Чунки фикрим ўсди, ақлим ўсди,
Ҳаёт дарс берди бошимга уриб-уриб…
Эрта сездим дунёнинг торлигини;
Тўрт тарафга урилавериб,
Пешонамда қолмади пешона.
Англадим,
Фақат осмонга интилиш мумкин,
Фақат кириш мумкин ерга.
Аниқ айтдим ҳамма нарсанинг исмини;
Тоза-тоза,
Ифлос-ифлос,
Ҳалол-ҳалол, ҳаром-ҳаром…
Фақат Худодан қўрқдим.
Фақат Худога шукур қилдим.
Худо берганини олдим интилиб.
Англадим,
Ўлсам, хар ким ўзича дафн этар мени;
Болаларим ўзича,
Тошкент ўзича,
Бойсун ўзича
Дунё ўзича.
Мени бор бўйимча ҳеч ким кўмолмас.
Хуллас,
Мен – Усмон Азим-
Ишончли қўллардаман;
Худога топширганман ўзимни,
Ўзимга ўзимни васият қилганман…
13 AVGUST — O‘ZBEKISTON XALQ SHOIRI USMON AZIM 70 YOSHDA!
OʼZIM HАQIDА MА’LUMOTLАR
Men – Usmon Аzim
Boysunda tugʼilib,
Toshkentda yashayapman,
Dunyoda yashayapman
Va bir ayolning yuragida.
Dunyo roʼzgʼorimday,
Uni oʼylayverib, sochlarim oqardi…
Hayot- kitob emas deyishsa, kuldim,
Chunki oʼzim koʼrganman (necha bor)
Hayotning satrlarga kirganini..
Haqiqatga chohdaligida ham sigʼinaverdim.
Qarashlarim koʼp oʼzgardi;
Chunki fikrim oʼsdi, aqlim oʼsdi,
Hayot dars berdi boshimga urib-urib…
Erta sezdim dunyoning torligini;
Toʼrt tarafga urilaverib,
Peshonamda qolmadi peshona.
Аngladim,
Faqat osmonga intilish mumkin,
Faqat kirish mumkin yerga.
Аniq aytdim hamma narsaning ismini;
Toza-toza,
Iflos-iflos,
Halol-halol, harom-harom…
Faqat Xudodan qoʼrqdim.
Faqat Xudoga shukur qildim.
Xudo berganini oldim intilib.
Аngladim,
Oʼlsam, xar kim oʼzicha dafn etar meni;
Bolalarim oʼzicha,
Toshkent oʼzicha,
Boysun oʼzicha
Dunyo oʼzicha.
Meni bor boʼyimcha hech kim koʼmolmas.
Xullas,
Men – Usmon Аzim-
Ishonchli qoʼllardaman;
Xudoga topshirganman oʼzimni,
Oʼzimga oʼzimni vasiyat qilganman…
