14-январ — Ватан ҳимоячилари куни
Ватан ҳимоячилари куни барча ватанимиз ҳимояси ва ривожида турли хил касбларда хизмат кўрсатаётган Ўзбекистон ўғлонларига муборак бўлсин! Ватан ҳимоясида шаҳид кетган ўғлонлар хотираси олдида, дуолар айтиб, бош эгайлик! Уларнинг номини унутмайлик!
Хуршид ДАВРОН
ЖИГАРЛАРИМ
Ватан чегараларини ҳимоя қилиб қурбон бўлган ўзбек ўғлонлари хотирасига
Ватан учун жонин берган жигарларим,
Ҳурлик учун қонин берган жигарларим,
Хоинларни итдай қирган жигарларим,
Унутмайди номингизни она Ватан.
Волидангиз:«Фарзандимдан розиман» — дер,
Ризолигин айтар сизга шу она ер,
Эй, Бобуржон, эй,Улуғбек, эй Алишер,
Номингизни унутмайди она Ватан.
Ортингизда ўзбек деган миллат қолди,
Ўзбекистон деган улуғ давлат қолди,
Сиздан мерос жасорату шиддат қолди,
Сизни асло унутмайди она Ватан.
Сиз туфайли уйим тинчдур,бахтим омон,
Сиз туфайли кунлар келар дориломон,
Эй Ғафуржон, эй Маҳмуджон, эй Эломон,
Унутмайди,унутмайди сизни Ватан.
Садоқатни жо айлаб сиз дилингизга,
Белбоғ бойлаб шижоатдан белингизга,
Кўкрагингиз қалқон бўлди элингизга,
Сизни абад унутмайди она Ватан.
Токи ўзбек, Ўзбекистон дунёда бор —
Сизлар ила қилар фахр ва ифтихор,
Эй Қаҳрамон, эй Маъруфжон, эй Сайёр,
Унутмайди, унутмайди сизни Ватан.
Ҳаққингизга дуо айтар Темур бобо,
Дуо айтар Тўмарисдек қутлуғ момо,
Дуо айтар қонингизни ичган гиёҳ,
Унутмайди номингизни она Ватан.
Энди сизга Алпомишлар йўлдошу ёр,
Энди сизга абадият айтар алёр,
Эй Юнусбек, Абдухалил, эй Дониёр,
Унутмайди,унутмайди сизни Ватан.
Ватан учун шаҳид кетган жигарларим,
Ор-номусни баланд тутган жигарларим,
Абадият сари кетган жигарларим,
Унутмайди номингизни она Ватан.
14-yanvar — Vatan himoyachilari kuni
Vatan himoyachilari kuni barcha vatanimiz himoyasi va rivojida turli xil kasblarda xizmat ko’rsatayotgan O’zbekiston o’g’lonlariga muborak bo’lsin! Vatan himoyasida shahid ketgan o’g’lonlar xotirasi oldida, duolar aytib, bosh egaylik! Ularning nomini unutmaylik!
Xurshid DAVRON
JIGARLARIM
Vatan chegaralarini himoya qilib qurbon bo’lgan o’zbek o’g’lonlari xotirasiga
Vatan uchun jonin bergan jigarlarim,
Hurlik uchun qonin bergan jigarlarim,
Xoinlarni itday qirgan jigarlarim,
Unutmaydi nomingizni ona Vatan.
Volidangiz:«Farzandimdan roziman» — der,
Rizoligin aytar sizga shu ona yer,
Ey,Boburjon, ey,Ulug’bek, ey Alisher,
Nomingizni unutmaydi ona Vatan.
Ortingizda o’zbek degan millat qoldi,
O’zbekiston degan ulug’ davlat qoldi,
Sizdan meros jasoratu shiddat qoldi,
Sizni aslo unutmaydi ona Vatan.
Siz tufayli uyim tinchdur,baxtim omon,
Siz tufayli kunlar kelar dorilomon,
Ey G’afurjon, ey Mahmudjon, ey Elomon,
Unutmaydi,unutmaydi sizni Vatan.
Sadoqatni jo aylab siz dilingizga,
Belbog’ boylab shijoatdan belingizga,
Ko’kragingiz qalqon bo’ldi elingizga,
Sizni abad unutmaydi ona Vatan.
Toki o’zbek, O’zbekiston dunyoda bor —
Sizlar ila qilar faxr va iftixor,
Ey Qahramon, ey Ma’rufjon, ey Sayyor,
Unutmaydi, unutmaydi sizni Vatan.
Haqqingizga duo aytar Temur bobo,
Duo aytar To’marisdek qutlug’ momo,
Duo aytar qoningizni ichgan giyoh,
Unutmaydi nomingizni ona Vatan.
Endi sizga Alpomishlar yo’ldoshu yor,
Endi sizga abadiyat aytar alyor,
Ey Yunusbek, Abduxalil, ey Doniyor,
Unutmaydi,unutmaydi sizni Vatan.
Vatan uchun shahid ketgan jigarlarim,
Or-nomusni baland tutgan jigarlarim,
Abadiyat sari ketgan jigarlarim,
Unutmaydi nomingizni ona Vatan.
