2023 йилда Туркияда бўлиб ўтган машъум зилзилага бағишлаб Озарбайжон ёзарлар бирлиги,Турк маданияти ва мероси фонди томонидан нашр этилган ва 18 давлат ижодкорлари асарлари жамланган шеърий антологияга Ўзбекистон халқ шоири Хуршид Давроннинг «Қизалоғим, сенинг суратинг…» шеъри киритилди.
Хуршид ДАВРОН
ҚИЗАЛОҒИМ, СЕНИНГ СУРАТИНГ…
2023 йил 6 февралида Туркияда рўй берган даҳшатли зилзиладан 128 соат — 5 кун ўтиб Искендерун шаҳрида вайроналар остидан тирик қолган икки ойлик қизалоқни топишди.
Қизалоғим, сенинг суратинг
турибди иштахтамнинг устида.
Саҳар пайти турасолиб сенга қарайман —
Кўнглим умидларга,
Севинчларга тўлар шу заҳот.
Бутун вужудимни ишончга чулғар
Нур тўла кўзингда балқиган ҳаёт.
Ўзи нима сени асради?
Ҳатто зулмат қўйнида
уйқу олгач кўзларингни
Лабларингни қимирлата қимирлата
Момиқ маммаларни излаганингми?
Ўзи нима сени асради?
Ё ҳали қўрқув нималигин билмаганингми,
Беш кеча-кундуз онанг кўзларига,
Отанг юзларига боқиб кулмаганингми?
Боболарингнинг қўрқувсиз ирсиятими,
Ё игнадай ёриқдан тушиб турган ипдай ингичка нурми?
Ўзи нима сени асради?
Онанг жонсиз эди, отанг қонсиз эди
Сени билмас эди, танимас эди,
Ғавғоларга кўмилиб ухлаган олам.
Оллоҳ нигоҳи эдими ўша ипдай нур
Оллоҳнинг қўли билан бағрига олдими
Сени ва ўзини қутқарган одам?
Қизалоғим, сенинг суратинг
турибди иштахтамнинг устида.
Шаҳар сукунатда ниманидир кутарди.
Эшитиларди ернинг нафас олиши.
Минглаган одамлар вайроналарда
кўзда ёши қолмай,
бардоши қолмай,
Кўккамас, ерга боқиб бўзлашар эди.
Шунда товуш бердинг вайроналар остидан
Шунда силкиниб кетди ернинг ўқ томирлари
Ҳаёт бақирарди сенинг товушинг билан
Қизалоғим, сенинг суратинг
турибди иштахтамнинг устида.
Ярим тунда уйқу олдидан сенинг кўзларингга қарайман
Тонгда умид билан қарайман сенинг кўзларингга.
Дунё билмас эди сенинг исмингни,
Отанг, онанг олиб кетган эди исмингни.
Сени бағрига босди бутун Туркия
Мен ҳам олислардан Туркияни бағримга босдим,
Исмингни билмасдим, аммо ўша он
“О маним Туркиям” деб шивирладим…
Абадият кенгликлари теран боқар менга
сенинг кўзларинг билан,
қизалоғим маним,
маним Туркиям…
2023
2023 yilda Turkiyada bo‘lib o‘tgan mash’um zilzilaga bag‘ishlab Ozarbayjon yozarlar birligi,Turk madaniyati va merosi fondi tomonidan nashr etilgan va 18 davlat ijodkorlari asarlari jamlangan she’riy antologiyaga O‘zbekiston xalq shoiri Xurshid Davronning «Qizalog‘im, sening surating…» she’ri kiritildi.
Xurshid DAVRON
QIZALOG‘IM, SЕNING SURATING…
2023 yil 6 fevralida Turkiyada ro‘y bergan dahshatli zilziladan 128 soat — 5 kun o‘tib Iskenderun shahrida vayronalar ostidan tirik qolgan ikki oylik qizaloqni topishdi.
Qizalog‘im, sening surating
turibdi ishtaxtamning ustida.
Sahar payti turasolib senga qarayman —
Ko‘nglim umidlarga,
Sevinchlarga to‘lar shu zahot.
Butun vujudimni ishonchga chulg‘ar
Nur to‘la ko‘zingda balqigan hayot.
O‘zi nima seni asradi?
Hatto zulmat qo‘ynida
uyqu olgach ko‘zlaringni
Lablaringni qimirlata qimirlata
Momiq mammalarni izlaganingmi?
O‘zi nima seni asradi?
Yo hali qo‘rquv nimaligin bilmaganingmi,
Besh kecha-kunduz onang ko‘zlariga,
Otang yuzlariga boqib kulmaganingmi?
Bobolaringning qo‘rquvsiz irsiyatimi,
Yo ignaday yoriqdan tushib turgan ipday ingichka nurmi?
O‘zi nima seni asradi?
Onang jonsiz edi, otang qonsiz edi
Seni bilmas edi, tanimas edi,
G‘avg‘olarga ko‘milib uxlagan olam.
Olloh nigohi edimi o‘sha ipday nur
Ollohning qo‘li bilan bag‘riga oldimi
Seni va o‘zini qutqargan odam?
Qizalog‘im, sening surating
turibdi ishtaxtamning ustida.
Shahar sukunatda nimanidir kutardi.
Eshitilardi yerning nafas olishi.
Minglagan odamlar vayronalarda
ko‘zda yoshi qolmay,
bardoshi qolmay,
Ko‘kkamas, yerga boqib bo‘zlashar edi.
Shunda tovush berding vayronalar ostidan
Shunda silkinib ketdi yerning o‘q tomirlari
Hayot baqirardi sening tovushing bilan
Qizalog‘im, sening surating
turibdi ishtaxtamning ustida.
Yarim tunda uyqu oldidan sening ko‘zlaringga qarayman
Tongda umid bilan qarayman sening ko‘zlaringga.
Dunyo bilmas edi sening ismingni,
Otang, onang olib ketgan edi ismingni.
Seni bag‘riga bosdi butun Turkiya
Men ham olislardan Turkiyani bag‘rimga bosdim,
Ismingni bilmasdim, ammo o‘sha on
“O manim Turkiyam” deb shivirladim…
Abadiyat kengliklari teran boqar menga
sening ko‘zlaring bilan,
qizalog‘im manim,
manim Turkiyam…
2023
