Шоҳсанамнинг шеърларини илк мартаба тақдим этганимизда у ҳали талаба эди. Бугун шоира қизимнинг янги шеърлари билан таништирамиз…
Шоҳсанам Нишонова
«ТАЗАРРУ» ТУРКУМИДАН
Шоҳсанам Нишонова 1995 йилнинг 22 декабрида Фарғона вилояти Қува туманида туғилган. Ўзбекистон давлат Жаҳон тиллари Университетининг халқаро журналистика факультетида таҳсил олган. Журналистика ва оммавий коммуникацияр Университетида магистратура босқичини тамомлаган. Ёзувчилар уюшмаси аъзоси. «Иқрор» ва «Иккимизнинг эртакларимиз» номли китоби чоп этилган. Шеърлари турк, озарбайжон ва тожик тилларида таржима қилинган.
1
Гарчи йўлим аён, тафаккурим бор,
Ўз ҳолимга қўйсанг, таназзулим бор.
То қиёмат қадар фарзона қилгин,
Ҳар ишда ўзингга таваккулим бор.
2
Сени топгунимча кун қора бўлди,
Пора дилим элга ошкора бўлди.
Ёлғизим, ишқингда ўртаган дардлар
Васлинг умидида чикора бўлди.
3
Сени кўриб бўлмас дедилар, ахир
Қисмат шунча талхми, шунчалар тахир?
Гулда, қумда, сувда – ҳар ерда борсан,
Топа олғусидир ҳар кўнгли басир.
4
Ҳар яхшида Дорулхудони кўрдим,
Ҳар ёмонда ундан жудони кўрдим.
Кўзини кўрмадим ёримга боқиб,
Нигоҳида аввал Худони кўрдим.
5
Ҳушёрман хатарми, хавфми, огоҳ қил,
Магар паришонман, асра, паноҳ қил.
Унвоним йўқ қуллигимдан зиёда,
Ва лекин нафсимга ўзимни шоҳ қил!
6
Умримга сўз берсанг, шеър бўлар содир,
Сафарда собир қил, қаламда – собит.
Имонимни олма жонимдан олдин
Обид қил, обид қил, обид қил, обид!
7
Гул тиласам гулзор, қир сўрасам тоғ,
Етарми таърифин айтмоққа сўзим.
Кечир, товонимга тикан кирган чоғ,
Бошқа мўъжизани кўрмади кўзим.
8
Бошимда ҳижрону фироқ бор,
Қошимда яқину йироқ бор,
Умр бер, ҳузур бер, ўчирма,
Ортимда иккита чироқ бор.
9
Йўлингдан қайтганлар йўлин топмади,
Ломакон юрганлар, қўним топмади.
Яшаса яшади сени топганлар,
Икки дунёда ҳам ўлим топмади.
10
Дунё – гузар, қадим ҳийлакор,
На харидор бўлдим, на тужжор.
Сўз берсанг-у васфингни ёзсам,
Бедор ўтса тунларим, бедор.
11
Кечалар ойлидир, кунлар сафоли,
Ҳар кимнинг ўзига аёндир ҳоли.
Тўрт фасл жо бўлган қалбим уйини
Кибрдан холи қил, кибрдан холи.
12
Бир кун шодон, бир куним нолон,
Ҳайрон ўтар йилларим, ҳайрон.
Кўнгил Каъба дерлар, қўрқаман,
Қанчасини айладим вайрон.
13
Умрим доғли бўлса, доғларин ювгин,
Аросат йўлларда зое кетказма.
Битта чумолига, битта қушга ҳам,
Менинг қўлим билан озор етказма!
14
Қайтар дунё дерлар лаҳзада,
Ўзингга ё қоракўзингга қайтар.
Бори яхшилигим боламга урсин,
Бори ёмонлигим ўзимга қайтар.
15
Қайда қовжираган ғунчани кўрсам,
Азоби кўнглимга келди беомон.
Қайда савашлардан безиган авом,
Азоби шубҳасиз, кўнглимда давом.
16
Қўрққан бўлсам қўрқдим бандаларингдан,
Чеккан бўлсам келди жонимга жабр.
Саҳардан шом қадар сенга югурдим
Одам севганидан қўрқарми ахир?
17
Сочимга гард келса гилдан, шубҳасиз,
Бошимга дард келса, тилдан шубҳасиз,
Айтмаган сўзимга тавбаларим бор
Айтганларимга ҳам бисёр, шубҳасиз.
18
Ўзинг бердинг қанча қувончу ғамни,
Дилни бир ўзингга ёриб бўлмасми.
Бунча фирқалар кўп, кафтдек умримда,
Қошингга кўнгилдан бориб бўлмасми?!
19
Саҳроларга қараб гулистон кўрдим,
Не тонгки ҳар тараф дилистон кўрдим.
Ишқингдан қатра нур тушмагунича,
Кўрсам бу дунёни зимистон кўрдим.
20
Худодан қочмадим, Худога қочдим,
Шарт эмас бу ҳолга муллаю, қози.
Ҳар битта томирим Пули сиротдир,
Икки кўзим асли Мезон тарози.
21
Ўқидим шоҳларнинг тарихин қадим,
Қитъаю юртларни олдилар осон.
Менга шоҳлар каби хотима берма,
Кибр ё нафсга қилдирма яксон.
22
Жаннат аён чаман, гулларда дедим,
Дўзах пинҳон гаҳи тилларда дедим.
Сенинг даргоҳингни излаганларга,
Худонинг даргоҳи дилларда дедим.
23
Биламан, теграмда ҳаммаси бекор,
Неки сир англадим, садпора кўнглим.
Худойим-ай, мени уйғотиб юбор,
Ҳануз дунё билан овора кўнглим.
24
Сўйлагулик эмас кўрганларимни,
Биласан барига кўнганларимни.
Майли, бермасанг ҳам сўраганим, лек
Олмасанг бас ўзинг берганларингни.
25
Экинга сув келса – амал бўлгуси,
Туну кун тенг келса – ҳамал бўлгуси.
Ялдо кечасини кечган чоғларим,
Ёруғ кунларимга тамал бўлгуси.
26
Тасаддуқ ишқингни тожисар қилсанг,
Куйган сарим дардни мухтасар қилсанг.
На Жаннат, на дўзах сўраб юрмадим,
Етарки ҳолимга бир назар қилсанг.
27
Юзимизни ол эт, сомон эттирма,
Сенга не хуш—жонга малол эттирма.
Илло еганимиз ҳалол луқмадир,
Васлингдан ўзгасин хаёл эттирма!
28
Қисмат ғаюр келса ғамнок бўламиз,
Қачон бу ўйлардан озод бўламиз?!
Вайрона дунёда билдим, ўзингга
Ошиқ бўлган кундан обод бўламиз.
29
Даҳр уммонида хирмонимиз сўз
Бизларни ёмон сўз дегувчи қилма.
Мазлумга зулмдан қайтаргин яна
Етимлар ҳаққини егувчи қилма!
30
Синовга тушдик ишқ тегирмонида
Синовчининг кўнгли чок бўлмайдими?
Ошиқни синовлар поклар дедилар
Ошиқлар азалдан пок бўлмайдими?
Shohsanamning she’rlarini ilk martaba taqdim etganimizda u hali talaba edi. Bugun shoira qizimning yangi she’rlari bilan tanishtiramiz…
Shohsanam Nishonova
«TAZARRU» TURKUMIDAN
Shohsanam Nishonova 1995-yil 22-dekabrda Farg‘ona viloyati Quva tumanida tug‘ilgan. O‘zbekiston davlat Jahon tillari Universitetining xalqaro jurnalistika fakultetida tahsil olgan.
Jurnalistika va ommaviy kommunikatsiyar Universitetida magistratura bosqichini tamomlagan. Yozuvchilar uyushmasi a’zosi. «Iqror» va «Ikkimizning ertaklarimiz» nomli kitobi chop etilgan. She’rlari turk, ozarbayjon va tojik tillarida tarjima qilingan.
1
Garchi yo‘lim ayon, tafakkurim bor,
O‘z holimga qo‘ysang, tanazzulim bor.
To qiyomat qadar farzona qilgin,
Har ishda o‘zingga tavakkulim bor.
2
Seni topgunimcha kun qora bo‘ldi,
Pora dilim elga oshkora bo‘ldi.
Yolg‘izim, ishqingda o‘rtagan dardlar
Vasling umidida chikora bo‘ldi.
3
Seni ko‘rib bo‘lmas dedilar, axir
Qismat shuncha talxmi, shunchalar taxir?
Gulda, qumda, suvda – har yerda borsan,
Topa olg‘usidir har ko‘ngli basir.
4
Har yaxshida Dorulxudoni ko‘rdim,
Har yomonda undan judoni ko‘rdim.
Ko‘zini ko‘rmadim yorimga boqib,
Nigohida avval Xudoni ko‘rdim.
5
Hushyorman xatarmi, xavfmi, ogoh qil,
Magar parishonman, asra, panoh qil.
Unvonim yo‘q qulligimdan ziyoda,
Va lekin nafsimga o‘zimni shoh qil!
6
Umrimga so‘z bersang, she’r bo‘lar sodir,
Safarda sobir qil, qalamda – sobit.
Imonimni olma jonimdan oldin
Obid qil, obid qil, obid qil, obid!
7
Gul tilasam gulzor, qir so‘rasam tog‘,
Yetarmi ta’rifin aytmoqqa so‘zim.
Kechir, tovonimga tikan kirgan chog‘,
Boshqa mo‘jizani ko‘rmadi ko‘zim.
8
Boshimda hijronu firoq bor,
Qoshimda yaqinu yiroq bor,
Umr ber, huzur ber, o‘chirma,
Ortimda ikkita chiroq bor.
9
Yo‘lingdan qaytganlar yo‘lin topmadi,
Lomakon yurganlar, qo‘nim topmadi.
Yashasa yashadi seni topganlar,
Ikki dunyoda ham o‘lim topmadi.
10
Dunyo – guzar, qadim hiylakor,
Na xaridor bo‘ldim, na tujjor.
So‘z bersang-u vasfingni yozsam,
Bedor o‘tsa tunlarim, bedor.
11
Kechalar oylidir, kunlar safoli,
Har kimning o‘ziga ayondir holi.
To‘rt fasl jo bo‘lgan qalbim uyini
Kibrdan xoli qil, kibrdan xoli.
12
Bir kun shodon, bir kunim nolon,
Hayron o‘tar yillarim, hayron.
Ko‘ngil Ka’ba derlar, qo‘rqaman,
Qanchasini ayladim vayron.
13
Umrim dog‘li bo‘lsa, dog‘larin yuvgin,
Arosat yo‘llarda zoye ketkazma.
Bitta chumoliga, bitta qushga ham,
Mening qo‘lim bilan ozor yetkazma!
14
Qaytar dunyo derlar lahzada,
O‘zingga yo qorako‘zingga qaytar.
Bori yaxshiligim bolamga ursin,
Bori yomonligim o‘zimga qaytar.
15
Qayda qovjiragan g‘unchani ko‘rsam,
Azobi ko‘nglimga keldi beomon.
Qayda savashlardan bezigan avom,
Azobi shubhasiz, ko‘nglimda davom.
16
Qo‘rqqan bo‘lsam qo‘rqdim bandalaringdan,
Chekkan bo‘lsam keldi jonimga jabr.
Sahardan shom qadar senga yugurdim
Odam sevganidan qo‘rqarmi axir?
17
Sochimga gard kelsa gildan, shubhasiz,
Boshimga dard kelsa, tildan shubhasiz,
Aytmagan so‘zimga tavbalarim bor
Aytganlarimga ham bisyor, shubhasiz.
18
O‘zing berding qancha quvonchu g‘amni,
Dilni bir o‘zingga yorib bo‘lmasmi.
Buncha firqalar ko‘p, kaftdek umrimda,
Qoshingga ko‘ngildan borib bo‘lmasmi?!
19
Sahrolarga qarab guliston ko‘rdim,
Ne tongki har taraf diliston ko‘rdim.
Ishqingdan qatra nur tushmagunicha,
Ko‘rsam bu dunyoni zimiston ko‘rdim.
20
Xudodan qochmadim, Xudoga qochdim,
Shart emas bu holga mullayu, qozi.
Har bitta tomirim Puli sirotdir,
Ikki ko‘zim asli Mezon tarozi.
21
O‘qidim shohlarning tarixin qadim,
Qit’ayu yurtlarni oldilar oson.
Menga shohlar kabi xotima berma,
Kibr yo nafsga qildirma yakson.
22
Jannat ayon chaman, gullarda dedim,
Do‘zax pinhon gahi tillarda dedim.
Sening dargohingni izlaganlarga,
Xudoning dargohi dillarda dedim.
23
Bilaman, tegramda hammasi bekor,
Neki sir angladim, sadpora ko‘nglim.
Xudoyim-ay, meni uyg‘otib yubor,
Hanuz dunyo bilan ovora ko‘nglim.
24
So‘ylagulik emas ko‘rganlarimni,
Bilasan bariga ko‘nganlarimni.
Mayli, bermasang ham so‘raganim, lek
Olmasang bas o‘zing berganlaringni.
25
Ekinga suv kelsa – amal bo‘lgusi,
Tunu kun teng kelsa – hamal bo‘lgusi.
Yaldo kechasini kechgan chog‘larim,
Yorug‘ kunlarimga tamal bo‘lgusi.
26
Tasadduq ishqingni tojisar qilsang,
Kuygan sarim dardni muxtasar qilsang.
Na Jannat, na do‘zax so‘rab yurmadim,
Yetarki holimga bir nazar qilsang.
27
Yuzimizni ol et, somon ettirma,
Senga ne xush—jonga malol ettirma.
Illo yeganimiz halol luqmadir,
Vaslingdan o‘zgasin xayol ettirma!
28
Qismat g‘ayur kelsa g‘amnok bo‘lamiz,
Qachon bu o‘ylardan ozod bo‘lamiz?!
Vayrona dunyoda bildim, o‘zingga
Oshiq bo‘lgan kundan obod bo‘lamiz.
29
Dahr ummonida xirmonimiz so‘z
Bizlarni yomon so‘z deguvchi qilma.
Mazlumga zulmdan qaytargin yana
Yetimlar haqqini yeguvchi qilma!
30
Sinovga tushdik ishq tegirmonida
Sinovchining ko‘ngli chok bo‘lmaydimi?
Oshiqni sinovlar poklar dedilar
Oshiqlar azaldan pok bo‘lmaydimi?
