Shu yilning 15 iyunida O’zbekiston davlat konservatoriyasida she’rlarim asosida yosh kompozitor  Kamoliddin Azimob tomonidan bastalangan oratoriyaning birinchi ijrosi bo’lib o’tdi. Hali talaba bo’lmish bastakorning birinchi katta ishi musiqashunoslar tomonidan o’z bahosini oladi. Men esa Kamoliddinga kelgusidagi ijodiy ishlariga muvaffaqiyatlar tilab qolaman.

Matn muallifi — O’zbekiston xalq shoiri  Xurshid Davron
Bastakor — O’zbekiston davlat konservatoriyasi talabasi Kamoliddin Azimov
Suxandon — Bahrom Boltayev
Solistlar: G’ulom Nazirov,Damir Rahmonov,Ilyos Muhammadiyev
O’zbekiston Milliy simfonik orkestri (rahbari — xalq artisti,professor Ismoil Jalilov)
Dirijor — Zohid Haqnazarov
O’zbekiston davlat konservatoriyasi talabalari xori

БУХОРО ҚЎШИҒИ

Мен Бухоро тупроғиман, ҳар бир заррамдан
Фалакларга таралади илоҳий шуур,
Мен Бухоро тупроғиман, ҳар бир заррамда
Жо бўлгандир қучоқ-қучоқ олтин ила дур.

Мен Бухоро тупроғиман, қадим бағримда,
Кўҳна дунё сир-асрори,тарихи пинҳон.
Ҳар заррамга қони сингган алп ўғлонларим
Кеча-кундуз ухламасдан менга нигоҳбон.

Мен Бухоро тупроғиман, ҳар бир заррамда
Неча-неча авлиёнинг муқаддас хоки.
Неча Туркий,неча Сўғдий менинг бағримда,
Неча – неча даҳоларнинг қувончи,oҳи.

Мен Бухоро тупроғиман, қулоғинг тутсанг,
Эшитилар Бухорийлар қадам товуши.
Барчасини сақлагайман иссиқ бағримда
Барчасига Ватан бўлган менинг оғушим.