O’zbekiston xalq shoiri Omon Matjonni xotirlab…“Sevimli” telekanalining «Har nafasda uygʼoqman» teleloyuhasi

021Омон аканинг шахсияти мен мансуб бўлган авлод учун жуда қадрли эди, десам, хато қилмайман. Деярли ҳаммамизнинг илк китобларимиз Ғафур Ғулом номидаги нашриётнинг Омон Матжон раҳбарлик қиладиган шеърият бўлими томонидан тайёрланган. Бўлимда ишлаган адабиётшунос олим Асқарали Шаропов, Шавкат Раҳмон, шу бўлимда кичик муҳаррир бўлмиш Назми опа биз учун жуда қадрдон инсонларга айланган эдилар.

Омон ака Самарқанд университетида ўқиганида унга устозлик қилган атоқли адабиётшунос олим Нуриддин Шукуров мен туғилган Чордара қишлоғига туташ Туркманқишлоқлик эди. Шу инсон туфайли мен илк маротиба Омон ака билан танишганман. Вақт ўтиб, ака-укадай яқин бўлганман.

Қурбақаобод(Бугунги Янгиобод)дан янги ҳовли олганларида биз ҳашарга борардик. Ишлаш қаёқда дейсиз. Омон аканинг ўзи биринчи бўлиб тартибни бузарди: стол теннисида ўйин бошлаб юборарди. Ҳашарга борганларнинг ҳаммаси ишни қўйиб, шу ўйинни томоша қилишу гап сотиш билан овора бўлардик. Омон ака барчамизга ўзини тенгдошдек тутарди.

Омон ака ўзбек адабиётининг юксак чинорларидан бири эди. Абдулҳамид Чўлпон, Ойбек, Усмон Носир, Асқад Мухтор, Эркин Воҳидов, Абдулла Орипов, Рауф Парфи каби шеъриятимиз обу ҳавосини белгилаб тургувчи ижодкор эди. Айни шу сабабдан ҳам унинг мероси адабиётимизнинг келгуси тақдирига ҳам жуда узоқ йиллар таъсир кўрсатади, деб ўйлайман.

Хуршид Даврон
Ўзбекистон халқ шоири

Omon akaning shaxsiyati men mansub boʼlgan avlod uchun juda qadrli edi, desam, xato qilmayman. Deyarli hammamizning ilk kitoblarimiz Gʼafur Gʼulom nomidagi nashriyotning Omon Matjon rahbarlik qiladigan sheʼriyat boʼlimi tomonidan tayyorlangan. Boʼlimda ishlagan adabiyotshunos olim Аsqarali Sharopov, Shavkat Rahmon, shu boʼlimda kichik muharrir boʼlmish Nazmi opa biz uchun juda qadrdon insonlarga aylangan edilar.

Omon aka Samarqand universitetida oʼqiganida unga ustozlik qilgan atoqli adabiyotshunos olim Nuriddin Shukurov men tugʼilgan Chordara qishlogʼiga tutash Turkmanqishloqlik edi. Shu inson tufayli men ilk marotiba Omon aka bilan tanishganman. Vaqt oʼtib, aka-ukaday yaqin boʼlganman.

Qurbaqaobod(Bugungi Yangiobod)dan yangi hovli olganlarida biz hasharga borardik. Ishlash qayoqda deysiz. Omon akaning oʼzi birinchi boʼlib tartibni buzardi: stol tennisida oʼyin boshlab yuborardi. Hasharga borganlarning hammasi ishni qoʼyib, shu oʼyinni tomosha qilishu gap sotish bilan ovora boʼlardik. Omon aka barchamizga oʼzini tengdoshdek tutardi.

Omon aka oʼzbek adabiyotining yuksak chinorlaridan biri edi. Аbdulhamid Choʼlpon, Oybek, Usmon Nosir, Аsqad Muxtor, Erkin Vohidov, Аbdulla Oripov, Rauf Parfi kabi sheʼriyatimiz obu havosini belgilab turguvchi ijodkor edi. Аyni shu sababdan ham uning merosi adabiyotimizning kelgusi taqdiriga ham juda uzoq yillar taʼsir koʼrsatadi, deb oʼylayman.

Xurshid Davron
Oʼzbekiston xalq shoiri

0032

(Tashriflar: umumiy 36, bugungi 1)

Izoh qoldiring