Baxtiniso Mahmudova. Yangi she’rlar

Ashampoo_Snap_2017.10.29_21h47m59s_001_.pngШоира қизим Бахтинисо, туғилган кунинг қутлуғ бўлсин!

Бу қалб сизни Қайғу билан ҳам кулиб таништиради. Мен шоира кўнглининг ёруғ табассумини ҳис этаяпман. Ҳаммаси рост, ҳаммаси кўнгил сатрлари. Мен бу шеърларни ўқиётиб, Бахтинисонинг қалбини кўраяпман, Бахтинисонинг ўзини англаяпман. Муҳими шу! (Эшқобил Шукурнинг «Бахтинисо шеърларини ўқидим» мақоласидан. Мақола мана бу саҳифада).

Бахтинисо Маҳмудова
ЯНГИ ШЕЪРЛАР
07

   Бахтинисо Маҳмудова 1993 йилнинг 31 октябрида Қашқадарё вилояти Чироқчи туманида туғилган. «Юрт келажаги – 2015» иқтидорли ёшлар танлови ғолибаси. «Ҳовучдаги юрак», «Уфққа йўл» номли шеърий тўпламлари нашр этилган. Шеърлари «Хуршид Даврон кутубхонаси» саҳифаларида мунтазам ёритилади.

07

* * *

Майли, бўлганича бўлсин ҳаммаси,231_n.jpg
Бетартиб кўнглимни ўрганиб олдим.
Не бўбди, қуёшга тик қаролмасам,
Дунёни ўзгартмай, ўзгариб олдим.

Кўзимга илиниб ўтди ёмғирлар,
Кўнглимга кўриниб ўтди ёмғирлар.
Тилиниб, уриниб ўтди ёмғирлар,
Булутлар туртмади — сесканиб олдим.

Айни куз. Пойимга йиқилди хазон-
Дарахтлар заминга этдими эҳсон?
Бари номукаммал ва бари осон,
Йиғимда тингланиб, тўпланиб олдим.

Майли, бўлганича бўлсин ҳаммаси,
Бетартиб кўнглимни ўрганиб олдим…

* * *

Бунча дилбар кўринмасанг, куз?!
Бунча сулув оқмаса сувлар?!
Гуллар маъсум, еллар дилафрўз,
Ҳаволаниб кетяпти кунлар.

Бу боғларда ҳаловат тайин,
Қолмоқ истар кўзларим жуда.
Айтгил, сенга қандай қарайин,
Ғариб баҳорларнинг ёнида.

МЕН БИЛАНСАН

Мен билансан,
Кунларимда оҳор бордир,
Оҳанг бордир,
Кузларимда баҳор бордир.
Кўзларимда мурувват бор ва зор бордир,
Мен билансан!

Муҳаббат бор, музларимга олов бергай,
Олам бергай,
Сўзларимга оро бергай.
Бир йиғласам, юпатгувчи биров бергай,
Мен билансан!

Осмонларда фақатгина қушлар қолмиш,
Гоҳ заминий, гоҳ самовий кучлар қолмиш.
Юлдуз санаб… тушларимда тушлар қолмиш…
Мен билансан!

Юрагимга юрагини тўкди шомлар,
Тўлди шомлар.
Дарёларга чўкди шомлар.
Мени олиб кетгунича намозшомлар,
Мен билансан,
Мен билансан,
Мен билансан!

* * *

Ишқим бўлак, ишқим ўзи сафар, илло,
Жим қўшилгай, Худо деган нидоларга.
Мени кўрсат, мендан жой бер, мени йўлла,
Овозингнинг ортидаги дунёларга…

* * *

Сен кетган йўлларга тўйиб қарайман,
Хотиржам қарайман, юракларим нам:
«Ахир ҳар лаҳзани яшамоқ мумкин,
Кўҳна кўнгилдаги кўҳна ишқда ҳам ».

Қарайман, ҳаммаси ўз ҳудудида,
Ҳеч нега керакмас тасалли, далда.
Фақат… шу ҳолимда… шу нигоҳларим
Ёдингга суриниб кетмаса бўлди.

***

Мен барига кўндим…
Ойдин фасллар
Кўзимга ажинлар солиб ўтади.
Нечун
бир дил истаб,
бошимни қўйсам,
Туннинг елкалари толиб ўтади?!

Мен барига кўндим.
Эшик очилар.
Мен интиқ шамоллар келмайди кириб.
Гарчи, остонамда гуллар қадамлар,
Гарчи, томонларни оламан териб.

Мен барига кўндим,
Ҳаммаси яхши,
Ҳаммаси жойида,
Ғам йўқ ғамимга.
Фақатки, юрагим беҳузур, бешон,
Минг йилки, кўникмас, кўникканимга.

Мен барига кўндим…

* * *

Шундай соғиндимки бугун барини!
Соғиндим, тош ўпган йўлларни бирам!
Ҳеч кимдан бекитмай ҳайратларини
Дарё-дарё оққан шамолларни ҳам.

Шовуллаб борсайдим барига бардам,
Шовуллаб чиқсайди соғинчим қирга.
Гулдай ҳисларимдан эҳсон қилардим,
Гул хайр этмаган гулхайриларга…

Кутубхонамизда Бахтинисо Маҳмудовага оид саҳифалар:
Baxtiniso Mahmudova. She’rlar
Baxtiniso Mahmudova. Yangi she’rlar
Baxtiniso Mahmudova. Yangi she’rlar & Eshqobil Shukur. Baxtiniso she’rlarini o’qidim…
Baxtiniso Mahmudova. Xudo va yig’i
Halima Ahmedova. Menga o’sha quyoshni yubor. Baxtinisoga maktub


Shoira qizim Baxtiniso, tug‘ilgan kuning qutlug‘ bo‘lsin!

Bu qalb sizni Qayg‘u bilan ham kulib tanishtiradi. Men shoira ko‘nglining yorug‘ tabassumini his etayapman. Hammasi rost, hammasi ko‘ngil satrlari. Men bu she’rlarni o‘qiyotib, Baxtinisoning qalbini ko‘rayapman, Baxtinisoning o‘zini anglayapman. Muhimi shu! (Eshqobil Shukurning “Baxtiniso she’rlarini o‘qidim” maqolasidan. Maqola mana bu sahifada).

Baxtiniso Mahmudova
YANGI SHE’RLAR
07

   Baxtiniso Mahmudova 1993 yilning 31 oktyabrida Qashqadaryo viloyati Chiroqchi tumanida tug‘ilgan. «Yurt kelajagi – 2015» iqtidorli yoshlar tanlovi g‘olibasi. «Hovuchdagi yurak», «Ufqqa yo‘l» nomli she’riy to‘plamlari nashr etilgan. She’rlari «Xurshid Davron kutubxonasi» sahifalarida muntazam yoritiladi.

07

* * *

Mayli, bo‘lganicha bo‘lsin hammasi,033_n.jpg
Betartib ko‘nglimni o‘rganib oldim.
Ne bo‘bdi, quyoshga tik qarolmasam,
Dunyoni o‘zgartmay, o‘zgarib oldim.

Ko‘zimga ilinib o‘tdi yomg‘irlar,
Ko‘nglimga ko‘rinib o‘tdi yomg‘irlar.
Tilinib, urinib o‘tdi yomg‘irlar,
Bulutlar turtmadi — seskanib oldim.

Ayni kuz. Poyimga yiqildi xazon-
Daraxtlar zaminga etdimi ehson?
Bari nomukammal va bari oson,
Yig‘imda tinglanib, to‘planib oldim.

Mayli, bo‘lganicha bo‘lsin hammasi,
Betartib ko‘nglimni o‘rganib oldim…

* * *

Buncha dilbar ko‘rinmasang, kuz?!
Buncha suluv oqmasa suvlar?!
Gullar ma’sum, yellar dilafro‘z,
Havolanib ketyapti kunlar.

Bu bog‘larda halovat tayin,
Qolmoq istar ko‘zlarim juda.
Aytgil, senga qanday qarayin,
G‘arib bahorlarning yonida.

MEN BILANSAN

Men bilansan,
Kunlarimda ohor bordir,
Ohang bordir,
Kuzlarimda bahor bordir.
Ko‘zlarimda muruvvat bor va zor bordir,
Men bilansan!

Muhabbat bor, muzlarimga olov bergay,
Olam bergay,
So‘zlarimga oro bergay.
Bir yig‘lasam, yupatguvchi birov bergay,
Men bilansan!

Osmonlarda faqatgina qushlar qolmish,
Goh zaminiy, goh samoviy kuchlar qolmish.
Yulduz sanab… tushlarimda tushlar qolmish…
Men bilansan!

Yuragimga yuragini to‘kdi shomlar,
To‘ldi shomlar.
Daryolarga cho‘kdi shomlar.
Meni olib ketgunicha namozshomlar,
Men bilansan,
Men bilansan,
Men bilansan!

* * *

Ishqim bo‘lak, ishqim o‘zi safar, illo,
Jim qo‘shilgay, Xudo degan nidolarga.
Meni ko‘rsat, mendan joy ber, meni yo‘lla,
Ovozingning ortidagi dunyolarga…

* * *

Sen ketgan yo‘llarga to‘yib qarayman,
Xotirjam qarayman, yuraklarim nam:
«Axir har lahzani yashamoq mumkin,
Ko‘hna ko‘ngildagi ko‘hna ishqda ham ».

Qarayman, hammasi o‘z hududida,
Hech nega kerakmas tasalli, dalda.
Faqat… shu holimda… shu nigohlarim
Yodingga surinib ketmasa bo‘ldi.

***

Men bariga ko‘ndim…
Oydin fasllar
Ko‘zimga ajinlar solib o‘tadi.
Nechun
bir dil istab,
boshimni qo‘ysam,
Tunning yelkalari tolib o‘tadi?!

Men bariga ko‘ndim.
Eshik ochilar.
Men intiq shamollar kelmaydi kirib.
Garchi, ostonamda gullar qadamlar,
Garchi, tomonlarni olaman terib.

Men bariga ko‘ndim,
Hammasi yaxshi,
Hammasi joyida,
G‘am yo‘q g‘amimga.
Faqatki, yuragim behuzur, beshon,
Ming yilki, ko‘nikmas, ko‘nikkanimga.

Men bariga ko‘ndim…

* * *

Shunday sog‘indimki bugun barini!
Sog‘indim, tosh o‘pgan yo‘llarni biram!
Hech kimdan bekitmay hayratlarini
Daryo-daryo oqqan shamollarni ham.

Shovullab borsaydim bariga bardam,
Shovullab chiqsaydi sog‘inchim qirga.
Gulday hislarimdan ehson qilardim,
Gul xayr etmagan gulxayrilarga...

Kutubxonamizda Baxtiniso Mahmudovaga oid sahifalar:
Baxtiniso Mahmudova. She’rlar
Baxtiniso Mahmudova. Yangi she’rlar
Baxtiniso Mahmudova. Yangi she’rlar & Eshqobil Shukur. Baxtiniso she’rlarini o’qidim…
Baxtiniso Mahmudova. Xudo va yig’i
Halima Ahmedova. Menga o’sha quyoshni yubor. Baxtinisoga maktub

DSCN6313.JPG

09

(Tashriflar: umumiy 201, bugungi 2)

2 izoh

  1. Бари номукаммал ва бари осон,
    Йиғимда тингланиб, тўпланиб олдим.

  2. Assalom, Bahtiniso qizim.Sherlaringiz Juda tasirchan, men ham sherry at shaydosiman.Sherlarimni qanday kitobni chiqartisam buladi? Oldindan tashakkur.

Izoh qoldiring