Ўзбекистон ва жуда кўп мамлакатларда истеъдодли қизиқчи актёр сифатида танилган Ўзбекистонда хизмат кўрсатган артист Обид Асомов вафот этди. Аллоҳ раҳматига олсин.

Обиджон ўз йўналишидаги санъат оламида мен катта ҳурмат билан билан қараган санъаткор эди. «Ёшлар» телеканалининг дастлабки йилларида Обиджон билан «Обид-шоу» телелойиҳаси орқали танишиб, анча яқинлашиб қолган эдик. Истеъдодли режиссёр Адҳам Усмонов билан Обиджон туфайли пайдо бўлиб, ўзбек томошабинининг севимли телевизион дастурига айланган мазкур телелойиҳа шунча вақт ўтиб ҳам ўзига хослиги туфайли ҳалигача унитилмади.
Обид Асомов нафақат қизиқчи актёр, шу билан баробар дурустгина рассом ҳам эди. Энг муҳими, у яхши инсон эди.
Унинг оиласига, яқинларига, ёру дўстларига сабр тилайман.

Инна лиллаҳи ва инна илаҳи рожиун.

Обид Асомов 1963 йилда Тошкентнинг Чилонзор туманида туғилган. Тошкент театр ва рассомчилик институтида таҳсил олган, 1993 йилда эса «Обид-А» театрига асос солган.

«Кулол ва хурмача», «Алпомиш», «Дев ва пакана», «Тоҳир ва Зуҳра (замонавий талқин)» каби фильмларда суратга тушган. 2000 йиллар охиридан бошлаб россиялик таниқли юморист Евгений Петросяннинг таклифига кўра, «Кривое зеркало» телешоусида қатнашди.

Обид Асомов 2018 йилнинг 24 майида «Ўзбекфильм» ҳузуридаги «Мультипликацион фильмлар студияси» директори этиб тайинланган эди.

  Oʻzbekiston va juda ko’p mamlakatlarda isteʼdodli qiziqchi aktyor sifatida tanilgan Oʻzbekistonda xizmat koʻrsatgan artist Obid Asomov vafot etdi. Alloh rahmatiga olsin.

Obidjon oʻz yoʻnalishidagi sanʼat olamida men katta hurmat bilan bilan qaragan sanʼatkor edi. “Yoshlar” telekanalining dastlabki yillarida Obidjon bilan “Obid-shou” teleloyihasi orqali tanishib, ancha yaqinlashib qolgan edik. Isteʼdodli rejissyor Adham Usmonov bilan Obidjon tufayli paydo boʻlib, oʻzbek tomoshabinining sevimli televizion dasturiga aylangan mazkur teleloyiha oradan shuncha vaqt o’tib ham oʻziga xosligi tufayli haligacha unitilmadi.

Obid Asomov nafaqat qiziqchi aktyor, shu bilan barobar durustgina rassom ham edi. Eng muhimi, u yaxshi inson edi.

Uning oilasiga, yaqinlariga, yoru doʻstlariga sabr tilayman.

Inna lillahi va inna ilahi rojiun.

Qiziqchi va aktyor Obid Asomov 1963 yilda Toshkentning Chilonzor tumanida tugʻilgan. Toshkent teatr va rassomchilik institutida tahsil olgan, 1993 yilda esa “Obid-A” teatriga asos solgan.

“Kulol va xurmacha”, “Alpomish”, “Dev va pakana”, “Tohir va Zuhra (zamonaviy talqin)” kabi filmlarda suratga tushgan. 2000 yillar oxiridan boshlab rossiyalik taniqli yumorist Yevgeniy Petrosyanning taklifiga koʻra, “Krivoye zerkalo” teleshousida qatnashdi.

Obid Asomov 2018 yilning 24 mayida “Oʻzbekfilm” huzuridagi “Multiplikatsion filmlar studiyasi” direktori etib tayinlangan edi.