Андижон вилоятида бўлиб ўтаётган Қуръон мусобақаларининг ҳудудий босқичини kun.uz сайтида ёритиш мақсадида “Олтинкўл” жоме масжидида бўлганимда, жуда қизиқ воқеага гувоҳ бўлдим.
Қуръон мусобақасида рўй берган воқеа
кўпчиликнинг кўзига ёш келтирди
Андижон вилоятида бўлиб ўтаётган Қуръон мусобақаларининг ҳудудий босқичини KUN.UZ сайтида ёритиш мақсадида “Олтинкўл” жоме масжидида бўлганимда, жуда қизиқ воқеага гувоҳ бўлдим.
Масжидда Балиқчи, Олтинкўл ва Андижон туманидан келган эркак иштирокчилар ўртасидаги ҳифз ва тиловат йўналишидаги мусобақалар якунланиб, ғолибларни тақдирлаш маросими бўлиб ўтаётган эди. Ҳакамлар ҳар бир ғолибни масжид марказига исм-шарифи билан чақириб, уларга биринчи ўринни олганлиги ҳақидаги диплом ва қимматбаҳо совғаларни топширар, иштирокчи ва тамошабинлар уларни қутлаб туришар эди.
Маълумки, туман ва шаҳар босқичида ғолиб бўлган қатнашчилар мусобақанинг кейинги, вилоят биринчилигига йўлланма олади.
Ҳар бир иштирокчи эзгу ниятда кунларни тунларга улаганча илм ўрганиб, ғолиб чиқиш иштиёқида бўлганлиги аниқ.
Тақдирлаш тадбири якунига етиб қолганида, ғолиблардан бири бўлган Муҳаммадсодиқ Давлатов ҳакамлар ҳайъати ёнига келиб: “Мен шартларни бажариш давомида кўп адашган эдим. Аслида, Бурҳониддин Давлатов ғолибликка лойиқ эди. Фамилиямиз бир хил бўлганлиги учун англашилмовчилик бўлмадимикан?”, дея мурожаат қилибди.
Ҳакамлар олинган балларни текшириб чиққанларида, ҳақиқатан ҳам Муҳаммадсодиққа фамилиядош бўлган қори йигит – Бурҳониддин Давлатовнинг баллари юқори эканлиги аниқланди. Баъзида, 200 нафардан зиёд киши қатнашаётган мусобақада исм ва шарифдаги ўхшашлик боис, ана шундай англашилмовчилик бўлиши эҳтимолдан ҳоли эмас.
Шундан сўнг барчаси ўз ўрнига тушди. Ҳакамлар энди давра марказига Бурҳониддин Давлатовни чорлаб, унга биринчи даражали дипломни топширдилар. Давра тўрига ғолиб билан биргаликда, унинг дўсти, ростгўй ва ҳамиятли Муҳаммадсодиқ ҳам чиқди.
Ҳайъат раиси йиғилганлар олдида ибрат кўрсатган қори йигитни кўзида ёш билан дуо қилди.
Ҳакамларнинг ўзлари бўлиб ўтган ибратли воқеага эътибор қаратишимни сўрашди.
Ислом дини инсонни эзгуликка чорлайди. Олган мукофотини ўзидан кўра илмлироқ бўлган дўстига раво билган Муҳаммадсодиққа боқиб, одамийлик ва мардлик хислатларини туйдим.
Қуръонни ўқиш, ўрганиш ва англаш мақсадида ташкил қилинган мусобақаларнинг нафақат илм эгалари, балки кенг омма иштирокида ўтказилишининг асл моҳияти ҳам шунда бўлса, не ажаб…
Kun.uzм ухбири Элмурод Эрматов, Андижон
M: www.kun.uz
Andijon viloyatida bo‘lib o‘tayotgan Qur’on musobaqalarining hududiy bosqichini kun.uz saytida yoritish maqsadida “Oltinko‘l” jome masjidida bo‘lganimda, juda qiziq voqeaga guvoh bo‘ldim.
Qur’on musobaqasida ro‘y bergan voqea
ko‘pchilikning ko‘ziga yosh keltirdi
Andijon viloyatida bo‘lib o‘tayotgan Qur’on musobaqalarining hududiy bosqichini KUN.UZ saytida yoritish maqsadida “Oltinko‘l” jome masjidida bo‘lganimda, juda qiziq voqeaga guvoh bo‘ldim.
Masjidda Baliqchi, Oltinko‘l va Andijon tumanidan kelgan erkak ishtirokchilar o‘rtasidagi hifz va tilovat yo‘nalishidagi musobaqalar yakunlanib, g‘oliblarni taqdirlash marosimi bo‘lib o‘tayotgan edi. Hakamlar har bir g‘olibni masjid markaziga ism-sharifi bilan chaqirib, ularga birinchi o‘rinni olganligi haqidagi diplom va qimmatbaho sovg‘alarni topshirar, ishtirokchi va tamoshabinlar ularni qutlab turishar edi.
Ma’lumki, tuman va shahar bosqichida g‘olib bo‘lgan qatnashchilar musobaqaning keyingi, viloyat birinchiligiga yo‘llanma oladi.
Har bir ishtirokchi ezgu niyatda kunlarni tunlarga ulagancha ilm o‘rganib, g‘olib chiqish ishtiyoqida bo‘lganligi aniq.
Taqdirlash tadbiri yakuniga yetib qolganida, g‘oliblardan biri bo‘lgan Muhammadsodiq Davlatov hakamlar hay’ati yoniga kelib: “Men shartlarni bajarish davomida ko‘p adashgan edim. Aslida, Burhoniddin Davlatov g‘oliblikka loyiq edi. Familiyamiz bir xil bo‘lganligi uchun anglashilmovchilik bo‘lmadimikan?”, deya murojaat qilibdi.
Hakamlar olingan ballarni tekshirib chiqqanlarida, haqiqatan ham Muhammadsodiqqa familiyadosh bo‘lgan qori yigit – Burhoniddin Davlatovning ballari yuqori ekanligi aniqlandi. Ba’zida, 200 nafardan ziyod kishi qatnashayotgan musobaqada ism va sharifdagi o‘xshashlik bois, ana shunday anglashilmovchilik bo‘lishi ehtimoldan holi emas.
Shundan so‘ng barchasi o‘z o‘rniga tushdi. Hakamlar endi davra markaziga Burhoniddin Davlatovni chorlab, unga birinchi darajali diplomni topshirdilar. Davra to‘riga g‘olib bilan birgalikda, uning do‘sti, rostgo‘y va hamiyatli Muhammadsodiq ham chiqdi.
Hay’at raisi yig‘ilganlar oldida ibrat ko‘rsatgan qori yigitni ko‘zida yosh bilan duo qildi.
Hakamlarning o‘zlari bo‘lib o‘tgan ibratli voqeaga e’tibor qaratishimni so‘rashdi.
Islom dini insonni ezgulikka chorlaydi. Olgan mukofotini o‘zidan ko‘ra ilmliroq bo‘lgan do‘stiga ravo bilgan Muhammadsodiqqa boqib, odamiylik va mardlik xislatlarini tuydim.
Qur’onni o‘qish, o‘rganish va anglash maqsadida tashkil qilingan musobaqalarning nafaqat ilm egalari, balki keng omma ishtirokida o‘tkazilishining asl mohiyati ham shunda bo‘lsa, ne ajab…
Kun.uzm uxbiri Elmurod Ermatov, Andijon
M: www.kun.uz
