Жак Превер дунё шеъриятининг ёрқин сиймоларидан бири. Унинг шеърлари Ҳабибулло Саидғани,Муҳаммад Солиҳ, Хуршид Даврон,Шарофат Ботирова, Гўзал Бегим таржималари орқали ўзбек китобхонига ҳам яхши таниш. Бугун шоир шеърларидан Раҳмат Бобожон қилган таржималарни тақдим этамиз.
Жак ПРЕВЕР
ШЕЪРЛАР
Жак Превер (фр: Jacques Prévert; 1900-1977) — француз шеъриятидаги сюрреализм оқими намоёндаси. Бир қатор филмлар ссенарийлари муаллифи. Шеърлари машҳур қўшиқларга айланган лирик шоир саналали. 1946 йилда «Сўзлар» номли шеърий китоби чоп қилинган.
ПАРИЖ ОҚШОМИ
Олдин…
уч сигор ёндирар эдим кетма кет:
Бири кўрмоқ учун гулгун юзингни,
Иккинчиси эса ғунча лабларинг,
Охиргиси эса мовий кўзингни…
Сўнгра…
исмсиз зулматлар чўкди ўртага —
Ёлғизликни олмас эди хотир тан.
Гўё эслай кетдим ўша кунларни,
Қўлларимни тийдим,
аммо, чекмоқдан…
КУЗ
Қоқ йўл ўртасида бир от жасади,
Хазонга кўмилиб ётарди беун.
Ишқимиз…
Ишқимиз титрайди энди,
Қуёш ҳам қалтирар чарчоққа тутқун…
УЧРАШУВ
Кўзлари денгизга ўхшаган, эй қиз,
Нигоҳ тўлқинингга тушган он руҳим —
Айт, қайси тилсимниг мўжизасисан,
Қайси осмонлардан тушган ҳур ҳукм?
* * *
Финжонга тўлдирди қора қаҳвани,
Устидан сут солди, кейинчи аста
Таъбга кўра шакар ё икки оққанд.
Сўнгра,
қўлда кумуш қошиқча билан
Гўзаллик яратди қориштирганда…
Лаззат симирарди, йўқ, қаҳва эмас…
Финжонни столга қўйди сўнг секин.
Унсиз ўтирардим қаришисида мен,
Жимгина термулди
сигарет чекиб…
Ҳавода шаклга кирди тутунлар,
Куйган юракларни англарми кулдон?
Унсиз ўтирардим қаршисида мен,
Жимгина турдию
кетди йўл томон…
Бошига қўндирди бош кийимини,
Қора плашини кийди эгнига.
Шаррос ёғар эди кўчада ёмғир,
Кетди қора булут осмон остига…
Бирор сўз айтмади,
у жим,
мен ҳам жим,
Сукунат яйради ўртада бу дам.
Икки кафтим узра бошим йиқилди,
Англовим,
ахир у кетган осмоннинг —
Ёмғири кўпмасди йиғлаганимдан…
Раҳмат Бобожон таржимаси
Жак Превер ижоди «Хуршид Даврон кутубхонаси» саҳифаларида:
Жак Превер. Шеърлар
Жак Превер. Шеърлар. Шарофат Ботирова таржимаси
Хуршид Даврон. Европа ва рус шеъриятидан таржималар
Jak Prever dunyo sheʼriyatining yorqin siymolaridan biri. Uning sheʼrlari Habibullo Saidgʼani,Muhammad Solih, Xurshid Davron,Sharofat Botirova, Goʼzal Begim tarjimalari orqali oʼzbek kitobxoniga ham yaxshi tanish. Bugun shoir sheʼrlaridan Rahmat Bobojon qilgan tarjimalarni taqdim etamiz.
Jak PREVER
SHE’RLАR
Jak Prever (fr: Jacques Prévert; 1900-1977) — frantsuz sheʼriyatidagi syurrealizm oqimi namoyondasi. Bir qator filmlar ssenariylari muallifi. Sheʼrlari mashhur qoʼshiqlarga aylangan lirik shoir sanalali. 1946 yilda «Soʼzlar» nomli sheʼriy kitobi chop qilingan.
PАRIJ OQShOMI
Oldin…
uch sigor yondirar edim ketma ket:
Biri koʼrmoq uchun gulgun yuzingni,
Ikkinchisi esa gʼuncha lablaring,
Oxirgisi esa moviy koʼzingni…
Soʼngra…
ismsiz zulmatlar choʼkdi oʼrtaga —
Yolgʼizlikni olmas edi xotir tan.
Goʼyo eslay ketdim oʼsha kunlarni,
Qoʼllarimni tiydim,
ammo, chekmoqdan…
KUZ
Qoq yoʼl oʼrtasida bir ot jasadi,
Xazonga koʼmilib yotardi beun.
Ishqimiz…
Ishqimiz titraydi endi,
Quyosh ham qaltirar charchoqqa tutqun…
UCHRАSHUV
Koʼzlari dengizga oʼxshagan, ey qiz,
Nigoh toʼlqiningga tushgan on ruhim —
Аyt, qaysi tilsimnig moʼjizasisan,
Qaysi osmonlardan tushgan hur hukm?
* * *
Finjonga toʼldirdi qora qahvani,
Ustidan sut soldi, keyinchi asta
Taʼbga koʼra shakar yo ikki oqqand.
Soʼngra,
qoʼlda kumush qoshiqcha bilan
Goʼzallik yaratdi qorishtirganda…
Lazzat simirardi, yoʼq, qahva emas…
Finjonni stolga qoʼydi soʼng sekin.
Unsiz oʼtirardim qarishisida men,
Jimgina termuldi
sigaret chekib…
Havoda shaklga kirdi tutunlar,
Kuygan yuraklarni anglarmi kuldon?
Unsiz oʼtirardim qarshisida men,
Jimgina turdiyu
ketdi yoʼl tomon…
Boshiga qoʼndirdi bosh kiyimini,
Qora plashini kiydi egniga.
Sharros yogʼar edi koʼchada yomgʼir,
Ketdi qora bulut osmon ostiga…
Biror soʼz aytmadi,
u jim,
men ham jim,
Sukunat yayradi oʼrtada bu dam.
Ikki kaftim uzra boshim yiqildi,
Аnglovim,
axir u ketgan osmonning —
Yomgʼiri koʼpmasdi yigʼlaganimdan…
Rahmat Bobojon tarjimasi
Jak Prever ijodi «Xurshid Davron kutubxonasi» sahifalarida:
Jak Prever. She’rlar
Jak Prever. She’rlar. Sharofat Botirova tarjimasi
Xurshid Davron. Yevropa va rus sheriyatidan tarjimalar
