O’zbekiston xalq shoiri Omon Matjon vafot etdi

082020 йилнинг 28 октябридан 29 октябрига ўтар кечаси Ўзбекистон халқ шоири   Омон Матжон 77 ёшида Тошкент шаҳрида вафот этди. Илоҳим, Аллоҳи Карим раҳматига олган бўлсин.

   Омон аканинг шахсияти мен мансуб бўлган авлод учун жуда қадрли эди, десам, хато қилмайман. Деярли ҳаммамизнинг илк китобларимиз Ғафур Ғулом номидаги нашриётнинг Омон Матжон раҳбарлик қиладиган шеърият бўлими томонидан тайёрланган. Бўлимда ишлаган адабиётшунос олим Асқарали Шаропов, Шавкат Раҳмон, шу бўлимда кичик муҳаррир бўлиб ишлаган Назми опа биз учун жуда қадрдон инсонларга айланган эдилар.

  Омон ака Самарқанд университетида ўқиганида унга устозлик қилган атоқли адабиётшунос олим Нуриддин Шукуров мен туғилган Чордара қишлоғига туташ Туркманқишлоқлик эди. Шу инсон туфайли мен илк маротиба Омон ака билан танишганман. Вақт ўтиб, ака-укадай яқин бўлганман.

  Қурбақаободдан янги ҳовли олганларида биз ҳашарга борардик. Ишлаш қаёқда дейсиз. Омон аканинг ўзи биринчи бўлиб тартибни бузарди: стол теннисида ўйин бошлаб юбарди. Ҳашарга борганларнинг ҳаммаси ишни қўйиб, шу ўйинни томоша қилишу гап сотиш билан овора бўлардик. Омон ака барчамизга ўзини тенгдошдек тутарди.

Омон ака ўзбек адабиётининг юксак чинорларидан бири эди. Эркин Воҳидов, Абдулла Орипов, Рауф Парфи, Чўлпон Эргаш, Маъруф Жалил каби шеъриятимиз обу ҳавосини белгилаб тургувчи ижодкор эди. Айни шу сабабдан ҳам унинг мероси адабиётимизнинг келгуси тақдирига ҳам жуда узоқ йиллар таъсир кўрсатади, деб ўйлайман. Илоҳим, Аллоҳи Карим раҳматига олган бўлсин.

Хуршид Даврон

2020 yilning 28 oktyabridan 29 oktyabriga o’tar kechasi O’zbekiston xalq shoiri  Omon Matjon 77 yoshida Toshkent shahrida vafot etdi. Ilohim, Allohi Karim rahmatiga olgan bo’lsin.

Omon akaning shaxsiyati men mansub boʼlgan avlod uchun juda qadrli edi, desam, xato qilmayman. Deyarli hammamizning ilk kitoblarimiz Gʼafur Gʼulom nomidagi nashriyotning Omon Matjon rahbarlik qiladigan sheʼriyat boʼlimi tomonidan tayyorlangan. Boʼlimda ishlagan adabiyotshunos olim Аsqarali Sharopov, Shavkat Rahmon, shu boʼlimda kichik muharrir boʼlib ishlagan Nazmi opa biz uchun juda qadrdon insonlarga aylangan edilar.

02Omon aka Samarqand universitetida oʼqiganida unga ustozlik qilgan atoqli adabiyotshunos olim Nuriddin Shukurov men tugʼilgan Chordara qishlogʼiga tutash Turkmanqishloqlik edi. Shu inson tufayli men ilk marotiba Omon aka bilan tanishganman. Vaqt oʼtib, aka-ukaday yaqin boʼlganman.

Qurbaqaoboddan yangi hovli olganlarida biz hasharga borardik. Ishlash qayoqda deysiz. Omon akaning oʼzi birinchi boʼlib tartibni buzardi: stol tennisida oʼyin boshlab yubardi. Hasharga borganlarning hammasi ishni qoʼyib, shu oʼyinni tomosha qilishu gap sotish bilan ovora boʼlardik. Omon aka barchamizga oʼzini tengdoshdek tutardi.

Omon aka oʼzbek adabiyotining yuksak chinorlaridan biri edi. Erkin Vohidov, Аbdulla Oripov, Rauf Parfi, Choʼlpon Ergash, Maʼruf Jalil kabi sheʼriyatimiz obu havosini belgilab turguvchi ijodkor edi. Аyni shu sababdan ham uning merosi adabiyotimizning kelgusi taqdiriga ham juda uzoq yillar taʼsir koʼrsatadi, deb oʼylayman. Ilohim, Аllohi Karim rahmatiga olgan boʼlsin.

Xurshid Davron

07

(Tashriflar: umumiy 108, bugungi 1)

Izoh qoldiring