Ушбу шеърни менга йўллаган Бахтиёр Темур, бу шеър Шавкат Раҳмон таваллудининг 70 нишонланаётган йилда, забардаст шоирнинг ёзганларидан таъсирланиб пайдо бўлганини ёзади.
Бахтиёр Темур
ТОЗА ҲАВОЛАРИМ
Бахтиёр Темур (Темиров) – 1962 йил, 6-июнда Хатирчи туманидаги Лангар қўрғонида туғилган. 1985 йилда Самарқанд Давлат Дорулфунунини тугатган. Республика матбуотида 80-йиллардан қатнашиб келади. “Ҳуррият”(2003) шеърлар тўплами чоп этилган, шеърлари кўплаб жамоа тўпламларида босилган.
Мусаффо ҳаволар, зангор ҳаволар
Балки, ватанингиз қорли тоғлардир,
Чашмалар бўйи ё кўм-кўк арчазор,
Дарёлар соҳили, зардин боғлардир…
Сиздир йўқлаб-сиқтаб келган ҳар баҳор.
Мусаффо ҳаволар, зангор ҳаволар,
Тиниқ ҳаволар, эй, бегард ҳаволар
Сиз ҳар тонг димоғда уйғоқ наволар,
Қорлар ўлкасидан эсган саболар,
Ҳаётбахш ҳаволар, сўлим ҳаволар.
Сизсиз бўғилгайдир шаҳарлар кўпдан,
Уловлар буруқситар, анҳорлар булғанч.
Серрайган қувурлар заҳарлар сепган,
Ҳар гузар ахлаттепа, ҳар ёнда аянч.
Заҳарли ҳаволар, ўлим ҳаволар.
Шундай ширин ҳаёт, эртак замонда
Шаҳр аро менга ҳам етмассиз кўп бор.
Заҳри қотиллар шод, қара, кўп жонда,
Бу туришда уфққа етмоқ кўп душвор,
О, умрим интилган гулим ҳаволар.
О тоза ҳаволар, бегард ҳаволар,
Худди ўзбекнинг бир зўр шоиридан
Мусаффо бағрингиз аяган каби,
Кўксимга тўлсангиз, кўзимдан силққан
Жами яхшиларга раво матлабим.
Мен ҳам бағрингизда туғулгандирман,
Мен ҳам фарзандингиз, меҳрингизга зор.
О, сизни кўксимга тўлдиргандирман,
О, сиздан мурувват кўрганларим бор…
Бағрингизда куйлаб юрганларим бор.
Такатовда туриб кузатдим кўп бор,
Пасмовут биттадир, биттадир Қортут.
Бир ёни Нурота, бир ён Қўшработ,
Бир ён Олтинсою, ҳар ён зумрад юрт,
Энг тоза заррангиз Лангаримда бут.
Чашмадай, чиннидай тоза ҳаволар
Менга сизсиз яшаш жудаям мушкул.
Энг сўлим жойларни, чашма, сойларни
Дилбар гўшаларни тиканлар ўраб
Меники дер кимлар ҳовони сўраб
Кўзи, юрагини чарви қоплаган-
Қўйнингизда пари жононлар билан
Жом тутиб кайфини сурмоқ бўлганлар…
Аммо сиз йўлатманг асло уларни
Бағрингиздан ҳайданг, айтинг чўқисин
Бургутлар, лочинлар, калхатлар
Чўпонларнинг ити таласин, бос денг,
Бўри еб илону чаёнлар чақсин
Мусаффо бағрингиз булғаганларни…
Покликни бемалол хўрлаганларни —
Сиз — ёлғонни билмас тоғлик болакай —
Укамсиз, шаҳарлик шумни кўрмаган
Сиз жажжи қизалоқ, шеър айтиб, тунлар,
Нақшинкор ва рангдор кашталар тиккан…
Тоза ҳаволарим, опамдирсиз сиз
Неча йилки, онам ўрнида кутган
Қачон келар дея кўзларин тиккан.
Тоза ҳаво, мухбир синглимдирсиз сиз
Ҳаққиқат йўқ экан дея йиғлаган…
Тоза ҳаволарим, бокираларим,
Сизни кўп булғади нопоклар зоти
Ва бу йил беаёв қасос олдингиз
Зор-зорлар кўксидан атайлаб қочиб.
Бир ютим ҳавога зор бўлиб, кетди,
Неча қадрдонлар, яхши-ёмонлар,
Айни дам ётарлар оқ хоналарда
Тонггача борми-йўқ… этиб гумонлар.
О, тоза ҳаволар, бегард ҳаволар
Кечиринг сиз бизни — хом сут эмганни
Муҳими еб-ичмоқ, ош байрам қилмоқ
Ҳаво дегани не бўпди деганни
Эй, сиз, мониторлар қошида тун-кун
Фисқу фасодлардан эзилган жонлар…
Бахтиёр Темур шеърларини мана бу саҳифада ўқишингиз мумкин.
Ushbu sheʼrni menga yoʼllagan Baxtiyor Temur, bu sheʼr Shavkat Rahmon tavalludining 70 nishonlanayotgan yilda, zabardast shoirning yozganlaridan taʼsirlanib paydo boʼlganini yozadi.
Baxtiyor Temur
TOZА HАVOLАRIM
Baxtiyor Temur (Temirov) – 1962 yil, 6-iyunda Xatirchi tumanidagi Langar qoʼrgʼonida tugʼilgan. 1985 yilda Samarqand Davlat Dorulfununini tugatgan. Respublika matbuotida 80-yillardan qatnashib keladi. “Hurriyat”(2003) sheʼrlar toʼplami chop etilgan, sheʼrlari koʼplab jamoa toʼplamlarida bosilgan.
Musaffo havolar, zangor havolar
Balki, vataningiz qorli togʼlardir,
Chashmalar boʼyi yo koʼm-koʼk archazor,
Daryolar sohili, zardin bogʼlardir…
Sizdir yoʼqlab-siqtab kelgan har bahor.
Musaffo havolar, zangor havolar,
Tiniq havolar, ey, begard havolar
Siz har tong dimogʼda uygʼoq navolar,
Qorlar oʼlkasidan esgan sabolar,
Hayotbaxsh havolar, soʼlim havolar.
Sizsiz boʼgʼilgaydir shaharlar koʼpdan,
Ulovlar buruqsitar, anhorlar bulgʼanch.
Serraygan quvurlar zaharlar sepgan,
Har guzar axlattepa, har yonda ayanch.
Zaharli havolar, oʼlim havolar.
Shunday shirin hayot, ertak zamonda
Shahr aro menga ham yetmassiz koʼp bor.
Zahri qotillar shod, qara, koʼp jonda,
Bu turishda ufqqa yetmoq koʼp dushvor,
O, umrim intilgan gulim havolar.
O toza havolar, begard havolar,
Xuddi oʼzbekning bir zoʼr shoiridan
Musaffo bagʼringiz ayagan kabi,
Koʼksimga toʼlsangiz, koʼzimdan silqqan
Jami yaxshilarga ravo matlabim.
Men ham bagʼringizda tugʼulgandirman,
Men ham farzandingiz, mehringizga zor.
O, sizni koʼksimga toʼldirgandirman,
O, sizdan muruvvat koʼrganlarim bor…
Bagʼringizda kuylab yurganlarim bor.
Takatovda turib kuzatdim koʼp bor,
Pasmovut bittadir, bittadir Qortut.
Bir yoni Nurota, bir yon Qoʼshrabot,
Bir yon Oltinsoyu, har yon zumrad yurt,
Eng toza zarrangiz Langarimda but.
Chashmaday, chinniday toza havolar
Menga sizsiz yashash judayam mushkul.
Eng soʼlim joylarni, chashma, soylarni
Dilbar goʼshalarni tikanlar oʼrab
Meniki der kimlar hovoni soʼrab
Koʼzi, yuragini charvi qoplagan-
Qoʼyningizda pari jononlar bilan
Jom tutib kayfini surmoq boʼlganlar…
Аmmo siz yoʼlatmang aslo ularni
Bagʼringizdan haydang, ayting choʼqisin
Burgutlar, lochinlar, kalxatlar
Choʼponlarning iti talasin, bos deng,
Boʼri yeb ilonu chayonlar chaqsin
Musaffo bagʼringiz bulgʼaganlarni…
Poklikni bemalol xoʼrlaganlarni —
Siz — yolgʼonni bilmas togʼlik bolakay —
Ukamsiz, shaharlik shumni koʼrmagan
Siz jajji qizaloq, sheʼr aytib, tunlar,
Naqshinkor va rangdor kashtalar tikkan…
Toza havolarim, opamdirsiz siz
Necha yilki, onam oʼrnida kutgan
Qachon kelar deya koʼzlarin tikkan.
Toza havo, muxbir singlimdirsiz siz
Haqqiqat yoʼq ekan deya yigʼlagan…
Toza havolarim, bokiralarim,
Sizni koʼp bulgʼadi nopoklar zoti
Va bu yil beayov qasos oldingiz
Zor-zorlar koʼksidan ataylab qochib.
Bir yutim havoga zor boʼlib, ketdi,
Necha qadrdonlar, yaxshi-yomonlar,
Аyni dam yotarlar oq xonalarda
Tonggacha bormi-yoʼq… etib gumonlar.
O, toza havolar, begard havolar
Kechiring siz bizni — xom sut emganni
Muhimi yeb-ichmoq, osh bayram qilmoq
Havo degani ne boʼpdi deganni
Ey, siz, monitorlar qoshida tun-kun
Fisqu fasodlardan ezilgan jonlar…
