Аввал ҳам кутубхонамиз саҳифаларида Настарин Ифорзода шеърлари ва бир ҳикояси эълон қилинган эди. Бугун унинг янги шеърларини тақдим этмоқдамиз.

Настарин Ифорзода
ЯНГИ ШЕЪРЛАР 

* * *

Сочилиб кетаман
бир куни борлиққа
Куз бўлиб
Тамшаниб-тамшаниб
Айтилмай қолган бир
Сўз бўлиб…

* * *

Нафасланса ҳақ сўз кўкрак қафасда,
Кўнглинг эрк истаган ер бўлса боир –
Сен миллат туғини ўпмаёқ мардсан,
Сен – миллат туғига айланган шоир.

* * *

Тонггача ўчмади хонангда чироқ,
Тонггача руҳингда кезди ғалаён.
Тонггача новдалар кўз очди титроқ —
Сенинг бир имонгга интиқ бўлган жон.

Эй, гулгун рўмолин ёпинган аёл
Гуногун ҳисларда оқма, бегона.
Ахир сен тушларга кирмаган хаёл,
Ахир сен қаноти куйган парвона.

Сенинг куймакларинг устун баридан,
Баридан азиздир кўнглинг сарҳади.
Ўчириб ташла бахт дафтарларидан
Ишқни,
Қайтмоқликка сиғмасин ҳадди…

Бир йўлга чиққансан, ёрсан Ёрпараст
Бир йўлга чиққансан озуғинг иймон…
….Ахир сенинг айтар ёлғонларинг рост
Ахир унинг барча ростлари ёлғон.

Тонггача ўчмади хонангда чироқ…

* * *

Ярим тун…
Ярим дил…
Фалакда
йиғлайди мўъжиза.
Мусиқа инграган юракда
Илинжлар
тизза — тизза..

Ҳечсизлик бир сиртмоқ
бўйнимда
Тиллодан ўрилган
занжирдек
Минг йиллар асрадим
қўйнимда
Оримни
энг кескир
ханжардек…

Нидолар етади
Худога
Бир куни
эшилар маъволар
Фақат сиз
кетмангиз йироққа
ЎЗИни севдирган ялдолар…

* * *

Бир куй булиб қуйиламан ҳали дилларга,
Ҳали осмонимда гуллайди висол.
Рангин камалакка осилиб олиб,
Саломларга ошиқар уятчан ҳилол.

Ҳали кузакларга қолмайди куним,
Баҳорнинг тафтига тўяман сўнгсиз,
Бир тошкин ҳисларга тўлади дилим.
Сиз эса…сиз эса … қоласиз…МЕНСИЗ!!!

* * *

Кафтимни очаман, қўлларим фоли
Исмингни айтади бесўроқ.
Хаёлинг — кўнглимнинг иқболи,
Минг йилки сочини тарайди фироқ…

Бир бора нигоҳга етмайди Журъат,
Миллион заррага айланар руҳим.
Асли шу эмасми энг гўзал хилқат,
Изҳорга етмаган шукуҳим?!

Жимжит кечаларга боғлайман ўзни,
Ҳар нечук қайдадир уйғоқсан сен ҳам!
…Асир этолмадим биргина Сўзни:
«Мен сени севаман, азизам»…

* * *

Лойиқ сўз тополмай қизарди тилим,
Чайналди фикрнинг бўсағасида.
Сўз айта олмаслик шунчаки ўлим —
Қийналмоқ..
суханнинг сағанасида.

Сизга сўз тополмай шомни тутатдим,
Хуфтон кўлкасида йўқолди соям.
Журъатнинг пойида ўзни тугатдим,
Узлатда сўзсизлик бўлди ҳамсоям.

Асли бир СЎЗни деб ўлмоқ арзирли
Агар бор-будини айласам тавоф.
Розийдим,
СЎЗ бўлса устоз фузунли,
Минг йил ҳужрасида турсам эътикоф.

* * *

Тун ярмимни ютиб кетади
Кун ярмимни ютиб кетади
Шамол айтар, ўкинма, гулим
Яраларинг битиб кетади.

Мен ярамни тошга севдирдим,
Гуллолага айланиб кетди.
Кўзларимни ёшга севдирдим,
Тун лолага айланиб кетди.

Тундан ярмим оламан қарзга,
Кундан ярмим оламан қарзга —
Хаёлларим тўлади дарзга,
Дарзлар дарсга айланиб кетди.

Тун ярмимни ютиб кетади…

ТЎРТЛИКЛАР

Аё дўст, руҳ-у жон ичида жаммиз,
Гоҳ заиф, гоҳ мағрур, гоҳ боши хаммиз.
Сирингни сирдош деб сочма ҳар касга,
Шайтонга енгилган ғофил одаммиз.

* * *

Аё Дўст! Ўзимни изладим-топдим
Ўзингни топган кун ўзни йўқотдим.
Кибрнинг жомига тўкма қонимни —
Ки, нафс камонидан пайконлар отдим.

* * *

Аё Дўст! Ҳолимга боқ — мен бир нафасман
Гоҳ баланд, гоҳ писанд этилмас касман.
Далли- девона деб кулма ҳолимга,
Кимга Ишқ, ким учун оташпарастман..

Avval ham kutubxonamiz sahifalarida Nastarin Iforzoda sheʼrlari va bir hikoyasi eʼlon qilingan edi. Bugun uning yangi sheʼrlarini taqdim etmoqdamiz.

Nastarin Iforzoda
YANGI SHEʼRLAR 

* * *

Sochilib ketaman
bir kuni borliqqa
Kuz boʻlib
Tamshanib-tamshanib
Aytilmay qolgan bir
Soʻz boʻlib…

* * *

Nafaslansa haq soʻz koʻkrak qafasda,
Koʻngling erk istagan yer boʻlsa boir – 
Sen millat tugʻini oʻpmayoq mardsan,
Sen – millat tugʻiga aylangan shoir.

* * *

Tonggacha oʻchmadi xonangda chiroq,
Tonggacha ruhingda kezdi gʻalayon.
Tonggacha novdalar koʻz ochdi titroq —
Sening bir imongga intiq boʻlgan jon.

Ey, gulgun roʻmolin yopingan ayol
Gunogun hislarda oqma, begona.
Axir sen tushlarga kirmagan xayol,
Axir sen qanoti kuygan parvona.

Sening kuymaklaring ustun baridan,
Baridan azizdir koʻngling sarhadi.
Oʻchirib tashla baxt daftarlaridan
Ishqni,
Qaytmoqlikka sigʻmasin haddi…

Bir yoʻlga chiqqansan, yorsan Yorparast
Bir yoʻlga chiqqansan ozugʻing iymon…
….Axir sening aytar yolgʻonlaring rost
Axir uning barcha rostlari yolgʻon.

Tonggacha oʻchmadi xonangda chiroq…

* * *

Yarim tun…
Yarim dil…
Falakda
yigʻlaydi moʻjiza.
Musiqa ingragan yurakda
Ilinjlar
tizza — tizza..

Hechsizlik bir sirtmoq
boʻynimda
Tillodan oʻrilgan
zanjirdek
Ming yillar asradim
qoʻynimda
Orimni
eng keskir
xanjardek…

Nidolar yetadi
Xudoga
Bir kuni
eshilar maʼvolar
Faqat siz
ketmangiz yiroqqa
OʻZIni sevdirgan yaldolar…

* * *

Bir kuy bulib quyilaman hali dillarga,
Hali osmonimda gullaydi visol.
Rangin kamalakka osilib olib,
Salomlarga oshiqar uyatchan hilol.

Hali kuzaklarga qolmaydi kunim,
Bahorning taftiga toʻyaman soʻngsiz,
Bir toshkin hislarga toʻladi dilim.
Siz esa…siz esa … qolasiz…MЕNSIZ!!!

* * *

Kaftimni ochaman, qoʻllarim foli
Ismingni aytadi besoʻroq.
Xayoling — koʻnglimning iqboli,
Ming yilki sochini taraydi firoq…

Bir bora nigohga yetmaydi Jurʼat,
Million zarraga aylanar ruhim.
Asli shu emasmi eng goʻzal xilqat,
Izhorga yetmagan shukuhim?!

Jimjit kechalarga bogʻlayman oʻzni,
Har nechuk qaydadir uygʻoqsan sen ham!
…Asir etolmadim birgina Soʻzni:
“Men seni sevaman, azizam”…

* * *

Loyiq soʻz topolmay qizardi tilim,
Chaynaldi fikrning boʻsagʻasida.
Soʻz ayta olmaslik shunchaki oʻlim —
Qiynalmoq..
suxanning sagʻanasida.

Sizga soʻz topolmay shomni tutatdim,
Xufton koʻlkasida yoʻqoldi soyam.
Jurʼatning poyida oʻzni tugatdim,
Uzlatda soʻzsizlik boʻldi hamsoyam.

Asli bir SOʻZni deb oʻlmoq arzirli
Agar bor-budini aylasam tavof.
Roziydim,
SOʻZ boʻlsa ustoz fuzunli,
Ming yil hujrasida tursam eʼtikof.

* * *

Tun yarmimni yutib ketadi
Kun yarmimni yutib ketadi
Shamol aytar, oʻkinma, gulim
Yaralaring bitib ketadi.

Men yaramni toshga sevdirdim,
Gullolaga aylanib ketdi.
Koʻzlarimni yoshga sevdirdim,
Tun lolaga aylanib ketdi.

Tundan yarmim olaman qarzga,
Kundan yarmim olaman qarzga —
Xayollarim toʻladi darzga,
Darzlar darsga aylanib ketdi.

Tun yarmimni yutib ketadi…

TOʻRTLIKLAR

Ayo doʻst, ruh-u jon ichida jammiz,
Goh zaif, goh magʻrur, goh boshi xammiz.
Siringni sirdosh deb sochma har kasga,
Shaytonga yengilgan gʻofil odammiz.

* * *

Ayo Doʻst! Oʻzimni izladim-topdim
Oʻzingni topgan kun oʻzni yoʻqotdim.
Kibrning jomiga toʻkma qonimni —
Ki, nafs kamonidan paykonlar otdim.

* * *

Ayo Doʻst! Holimga boq — men bir nafasman
Goh baland, goh pisand etilmas kasman.
Dalli- devona deb kulma holimga,
Kimga Ishq, kim uchun otashparastman..