9 феврал — Буюк Алишер Навоий таваллуд топган кун
Ҳазрат Мир Алишер Навоий ўзбекнинггина эмас, бутун туркий халқлар юзининг оқидир, деб айтганда Чингиз Айтматов минг карра ҳақ эди Hazrat Mir Alisher Navoiy o’zbekninggina emas, butun turkiy xalqlar yuzining oqidir, deb aytganda Chingiz Aytmatov ming karra haq edi.
Хуршид Даврон
АЛИШЕР НАВОИЙ
Қўлга қалам олган олис кун,
Шеър ёзишни бошлаган ондан,
Қабрингизга бош эгмоқ учун
Боргим келар Ўзбекистондан.
Самарқанддан чиқсам мен йўлга
Қуёш уфқда ҳали қизармай,
Суҳбатимиз қизисин дея
Олай бобом чордоғидан май.
Чиқсам шаҳар бағридан сўнгги
Хазонларни босиб бирма-бир
Ва кузатсин кун нури сингиб
Чарақлаган мовий Гўри Мир.
Кечиб ўтсам Амударёни
Ҳилол билан бирга баробар,
Кечиб ўтсам қадим дунёни
Ва Ҳиротга кирсам тонготар…
У ёғини қилмам тасаввур,
Йиғи қисар кўксимни биран,
Яшаяпман қабрингиз бир қур
Кўриб ўлмоқ нияти билан
Ва сиёҳи қуриб битмаган
Шеърларимга туриб юзма-юз,
Ҳар кун тунда йўлга чиқаман,
Ҳар кун тонгда қайтаман маъюс…
1980
Хurshid Davron
ALISHER NAVOIY
Qo’lga qalam olgan olis kun,
She’r yozishni boshlagan ondan,
Qabringizga bosh egmoq uchun
Borgim kelar O’zbekistondan.
Samarqanddan chiqsam men yo’lga
Quyosh ufqda hali qizarmay,
Suhbatimiz qizisin deya
Olay bobom chordog’idan may.
Chiqsam shahar bag’ridan so’nggi
Xazonlarni bosib birma-bir
Va kuzatsin kun nuri singib
Charaqlagan moviy Go’ri Mir.
Kechib o’tsam Amudaryoni
Hilol bilan birga barobar,
Kechib o’tsam qadim dunyoni
Va Hirotga kirsam tongotar…
U yog’ini qilmam tasavvur,
Yig’i qisar ko’ksimni biran,
Yashayapman qabringiz bir qur
Ko’rib o’lmoq niyati bilan
Va siyohi qurib bitmagan
She’rlarimga turib yuzma-yuz,
Har kun tunda yo’lga chiqaman,
Har kun tongda qaytaman ma’yus…
1980
