Мен интернет тизимида мунтазам кузатиб борадиган сайтлардан бири таниқли адабиётшунос олим ва мутаржим Маҳмуджон Йўлдошевнинг веб-саҳифасидир. Унинг саҳифаларида эълон қилинган турк ва жаҳон адабиёти намуналари таржимаси билан таништириб бормоқдамиз. Бугун сизга турк шоири Шукри Сунай Оқин шеърлари таржимасини тақдим этмоқдамиз.
ШУКРИ СУНОЙ ОҚИН
ШЕЪРЛАР
Маъруфжон Йўлдошев таржималари
Шукри Сунай Оқин (Şükrü Sunay Akın) 1962 йилнинг 12 сентабрида Трабзўн вилоятига қарашли Мачка туманида туғилди. Ўрта ва олий таълимни Истанбулда тамомлади. Унинг илк шеър китоби «Макилар» номи билан 1989 йилда нашр қилинган. 1990 йилда чоп қилинган «Эски азоблар, Фожиа жилоси, 62 қуён» деб номланган иккинчи китобининг номини таниқли шоир Жамол Сураё қўйган. У бир неча йил Мармара университетининг Нафис санъат факултетида ишлади. Муждат Гезен Санъат Марказида «бир кишилик театр» лойиҳаси бўйича дарс берди. 2005 йилда шоир «Истанбул ўйинчоқлар музейи» деб номланган шахсий уй-музейини очди. Ҳозиргача шоирнинг ўндан ортиқ шеър китоби нашр қилинган. Бугунги кунда Суной Оқин телевидение соҳасида фаолият кўрсатиб келмоқда.
Нуқтали вергул
Вергул
ҳеч тинмаган
бир довулнинг тўқмоғи
сўзларни чақирар
қоғозлардаги тўйга
Кўз ёшлари
Ўтинсиз печканинг
ёнида титраган
болани кўрган ёмғир
кўз ёшларини хонага
шифтдаги ёриқлардан
оҳиста сиздиради
Севмоқ
Шифт остига сиғинган
кўчманчи қушларнинг
қор зарралари орасида
тушган оппоқ парини ҳам
кўрабилмоқ…
Мана шудир
Севмоқ!
Оқ
У қора эди
Ўққа тутганлар оппоқ
қурол овозидан
ҳуркиб кўкка
учган қушлар
оппоқ
Булут
Узиб бўлдик умидни
ёмғирдан
юрак шамойилига
кирса ҳам ҳатто
кўкдаги митти булут
Читтак
Оёқ излари
асло кўринмайди
қор сўзи
қўлланган шеърларда
дон қидирган читтакнинг
Дераза
Ҳиди маҳаллани тутсин
дея овқатларининг
оқшом пайти
очиб қўяди деразасини
янги келин
Она қуш
Қовжираган бир ўт
каби яшаяпман
кўзлардан узоқ
ёлғизоёқ йўлакнинг
бир чеккасида
Ягона айбим
соп бўлмаганим
болтанинг
қонли ўйинларига
Аммо шунга қарамай
умидга тўла қалбим
балки бир она қуш
мени олиб кетар деб
шохдаги уясига
Кўмир
Яна бир кўмир
чарсиллади сандалда
яна бир кончининг қалби
ура бошлади
иссиққина хонада
Ҳайкал
Фақат мен биламан
диктатор ҳайкалларини
кирлатмоқ учун
кўчиб юришини
дунёдаги бутун
қушларнинг
Чўпон
Бир овоздан қўйлар
эчкини сайладилар
ўзларига бош қилиб
аслида сурувнинг бошига
бўрининг қариндоши
кўппакни қўяди
чўпон
Манба: Маҳмуджон Йўлдошевнинг веб-саҳифаси
Men internet tizimida muntazam kuzatib boradigan saytlardan biri taniqli adabiyotshunos olim va mutarjim Mahmudjon Yo’ldoshevning veb-sahifasidir. Uning sahifalarida e’lon qilingan turk va jahon adabiyoti namunalari tarjimasi bilan tanishtiribbormoqdamiz. Bugun sizga turk shoiri Shukri Sunay Oqin she’rlari tarjimasini taqdim etmoqdamiz.
SHUKRI SUNOY OQIN
SHE’RLAR
Ma’rufjon Yo’ldoshev tarjimalari
Shukri Sunay Oqin (Şükrü Sunay Akın) 1962-yilning 12-sentabrida Trabzo’n viloyatiga qarashli Machka tumanida tug’ildi. O’rta va oliy ta’limni Istanbulda tamomladi. Uning ilk she’r kitobi «Makilar» nomi bilan 1989-yilda nashr qilingan. 1990-yilda chop qilingan «Eski azoblar, Fojia jilosi, 62 quyon» deb nomlangan ikkinchi kitobining nomini taniqli shoir Jamol Surayo qo’ygan. U bir necha yil Marmara universitetining Nafis san’at fakultetida ishladi. Mujdat Gezen San’at Markazida «bir kishilik teatr» loyihasi bo’yicha dars berdi. 2005-yilda shoir «Istanbul o’yinchoqlar muzeyi» deb nomlangan shaxsiy uy-muzeyini ochdi. Hozirgacha shoirning o’ndan ortiq she’r kitobi nashr qilingan. Bugungi kunda Sunoy Oqin televidenie sohasida faoliyat ko’rsatib kelmoqda.
Nuqtali vergul
Vergul
hech tinmagan
bir dovulning to’qmog’i
so’zlarni chaqirar
qog’ozlardagi to’yga
Ko’z yoshlari
O’tinsiz pechkaning
yonida titragan
bolani ko’rgan yomg’ir
ko’z yoshlarini xonaga
shiftdagi yoriqlardan
ohista sizdiradi
Sevmoq
Shift ostiga sig’ingan
ko’chmanchi qushlarning
qor zarralari orasida
tushgan oppoq parini ham
ko’rabilmoq…
Mana shudir
Sevmoq!
Oq
U qora edi
O’qqa tutganlar oppoq
qurol ovozidan
hurkib ko’kka
uchgan qushlar
oppoq
Bulut
Uzib bo’ldik umidni
yomg’irdan
yurak shamoyiliga
kirsa ham hatto
ko’kdagi mitti bulut
Chittak
Oyoq izlari
aslo ko’rinmaydi
qor so’zi
qo’llangan she’rlarda
don qidirgan chittakning
Deraza
Hidi mahallani tutsin
deya ovqatlarining
oqshom payti
ochib qo’yadi derazasini
yangi kelin
Ona qush
Qovjiragan bir o’t
kabi yashayapman
ko’zlardan uzoq
yolg’izoyoq yo’lakning
bir chekkasida
Yagona aybim
sop bo’lmaganim
boltaning
qonli o’yinlariga
Ammo shunga qaramay
umidga to’la qalbim
balki bir ona qush
meni olib ketar deb
shoxdagi uyasiga
Ko’mir
Yana bir ko’mir
charsilladi sandalda
yana bir konchining qalbi
ura boshladi
issiqqina xonada
Haykal
Faqat men bilaman
diktator haykallarini
kirlatmoq uchun
ko’chib yurishini
dunyodagi butun
qushlarning
Cho’pon
Bir ovozdan qo’ylar
echkini sayladilar
o’zlariga bosh qilib
aslida suruvning boshiga
bo’rining qarindoshi
ko’ppakni qo’yadi
cho’pon
Manba: Mahmudjon Yo’ldoshevning veb-sahifasi
