Ўзбекистонда хизмат кўрсатган маданият ходими, «Меҳнат шуҳрати»ордени соҳиби, таниқли драматург, Ўзбекистон Ёзувчилар уюшмаси аъзоси Шароф Бошбеков 2022 йилнинг 26 январь куни оламдан ўтди. Албатта биз Аллоҳникимиз ва, албатта, биз Унга қайтгувчимиз. Яратган эгам марҳум ижодкор дўстимизни раҳматига олган бўлсин.

Шароф Бошбеков 1951 йил 4 январда Самарқанд вилояти Булунғур тумани Ғубир қишлоғида туғилган. 1974 йили Тошкент театр ва рассомчилик санъати институтини тамомлаган. Ўқишни тугатгач, Муқимий номидаги давлат мусиқали театри, Сирдарё вилояти мусиқали драма театрида фаолият кўрсатган. Шундан сўнг Ўзбекистон Ёзувчилар уюшмаси (1983—1985), Ўзбекистон Миллий давлат академик драма театрида (1986—1987) адабий ходим бўлиб хизмат қилди.

Шароф Бошбеков ёзувчилик ижодини 1980 йилда «Тақдир эшиги» номли комедия билан бошлаган. Шундан сўнг адибнинг бирин-кетин ёзилган «Г варианти» (1981), «Ғурур» (1982), «Жумбоқ» (1986) ҳикоялари, «Тикансиз типратиканлар», «Мусиқа сайёраси», «Тентак фаришталар», «Тушов узган тулпорлар» (1983) драмаси, «Эшик қоққан ким?» (1987), «Эски шаҳар гаврошлари» (1998), «Темир хотин» (1989) каби жиддий комедиялари ўзбек драматургияси хазинасини бойитди. «Темир хотин» комедияси нафақат республикада, балки бошқа мамлакатлар театрларида ҳам саҳнага қўйилди. Мазкур асар аввал Республика миқиёсида ўтказилган театр фестивалида бош соврин – «Гран-при»ни қўлга киритди, сўнгра Марказий Осиё мамлакатлари орасида ўтказилган театр фестивалининг мутлақ ғолиби деб топилди. Ушбу песа асосида бадиий фильм, оперетта ишланди. Асар 1989 йилда Ўзбекистон Ёзувчилар уюшмасининг Мақсуд Шайхзода номидаги йиллик мукофотига лойиқ топилди.

Шароф Бошбеков сценарийси асосида «Маъруф ва Шариф», «Юзсиз» (1993), «Тилла бола» (1994) каби фильмлар яратилди. У «Масхарабоз» (1996), «Фарҳод ва Ширин» фильмларида ҳам сценарий муаллифи, ҳам режиссёр сифатида иштирок этди. Унинг сценарийси асосида «Чархпалак» телесериали суратга олинган. Бундан ташқари, «Тентак фаришталар» (1995), «Зўрдан зўр чиқса» (1996) каби саҳна асарлари ҳам республика театрларида муваффақиятли намойиш этилди.

Ҳажвий ҳикоялари «Ўзбекистон адабиёти ва санъати» газетасининг «Йилнинг энг яхши ҳажвий асари» (1982) мукофотига муносиб кўрилган. «Муштум» журналида эълон қилинган «Буюк мақтанчоқлик», «Буюк қўрқоқлик», «Буюк бахтиёрлик» номли публицистик мақолаларига журналнинг «Йилнинг энг яхши публицистик асари» (1992) мукофоти берилган.

Мустақиллик йиллари «Ўйин» (2002), «Дока рўмолнинг қуриши» (2004) телефильм сценарийларини ёзди, «Сўқмоқ» (2003), «Меҳр ва маузер» (2007) киноқиссаларини яратди. «Эшик қоққан ким бўлди?» (1989), «Фалакнинг гардиши» (2009), «Мусофир бўлмагунча» (2009), «Тентак фаришта» (2010), «Чархпалак» (2017), «Танланган асарлар» («2021») каби тўпламлари нашр этилган.

Шароф Бошбеков 1996 йили «Ўзбекистонда хизмат кўрсатган маданият ходими» фахрий унвони, 2001 йили «Меҳнат шуҳрати» ордени билан тақдирланган.

«Хуршид Даврон кутубхонаси» кўп сонли аъзолари ва адабиёт мухлислари номидан адибнинг оила аъзолари ва яқинларига чуқур ҳамдардлик билдиради.

O’zbekistonda xizmat ko’rsatgan madaniyat xodimi, «Mehnat shuhrati»ordeni sohibi, taniqli dramaturg, O’zbekiston Yozuvchilar uyushmasi a’zosi Sharof Boshbekov 2022 yilning 26 yanvarь kuni olamdan o’tdi. Albatta biz Allohnikimiz va, albatta, biz Unga qaytguvchimiz. Yaratgan egam marhum ijodkor do’stimizni rahmatiga olgan bo’lsin.

Sharof Boshbekov 1951 yil 4 yanvarda Samarqand viloyati Bulung’ur tumani G’ubir qishlog’ida tug’ilgan. 1974 yili Toshkent teatr va rassomchilik san’ati institutini tamomlagan. O’qishni tugatgach, Muqimiy nomidagi davlat musiqali teatri, Sirdaryo viloyati musiqali drama teatrida faoliyat ko’rsatgan. Shundan so’ng O’zbekiston Yozuvchilar uyushmasi (1983—1985), O’zbekiston Milliy davlat akademik drama teatrida (1986—1987) adabiy xodim bo’lib xizmat qildi.

Sharof Boshbekov yozuvchilik ijodini 1980 yilda «Taqdir eshigi» nomli komediya bilan boshlagan. Shundan so’ng adibning birin-ketin yozilgan «G varianti» (1981), «G’urur» (1982), «Jumboq» (1986) hikoyalari, «Tikansiz tipratikanlar», «Musiqa sayyorasi», «Tentak farishtalar», «Tushov uzgan tulporlar» (1983) dramasi, «Eshik qoqqan kim?» (1987), «Eski shahar gavroshlari» (1998), «Temir xotin» (1989) kabi jiddiy komediyalari o’zbek dramaturgiyasi xazinasini boyitdi. «Temir xotin» komediyasi nafaqat respublikada, balki boshqa mamlakatlar teatrlarida ham sahnaga qo’yildi. Mazkur asar avval Respublika miqiyosida o’tkazilgan teatr festivalida bosh sovrin – «Gran-pri»ni qo’lga kiritdi, so’ngra Markaziy Osiyo mamlakatlari orasida o’tkazilgan teatr festivalining mutlaq g’olibi deb topildi. Ushbu pesa asosida badiiy filьm, operetta ishlandi. Asar 1989 yilda O’zbekiston Yozuvchilar uyushmasining Maqsud Shayxzoda nomidagi yillik mukofotiga loyiq topildi.

Sharof Boshbekov stsenariysi asosida «Ma’ruf va Sharif», «Yuzsiz» (1993), «Tilla bola» (1994) kabi filьmlar yaratildi. U «Masxaraboz» (1996), «Farhod va Shirin» filьmlarida ham stsenariy muallifi, ham rejissyor sifatida ishtirok etdi. Uning stsenariysi asosida «Charxpalak» teleseriali suratga olingan. Bundan tashqari, «Tentak farishtalar» (1995), «Zo’rdan zo’r chiqsa» (1996) kabi sahna asarlari ham respublika teatrlarida muvaffaqiyatli namoyish etildi.

Hajviy hikoyalari «O’zbekiston adabiyoti va san’ati» gazetasining «Yilning eng yaxshi hajviy asari» (1982) mukofotiga munosib ko’rilgan. «Mushtum» jurnalida e’lon qilingan «Buyuk maqtanchoqlik», «Buyuk qo’rqoqlik», «Buyuk baxtiyorlik» nomli publitsistik maqolalariga jurnalning «Yilning eng yaxshi publitsistik asari» (1992) mukofoti berilgan.

Mustaqillik yillari «O’yin» (2002), «Doka ro’molning qurishi» (2004) telefilьm stsenariylarini yozdi, «So’qmoq» (2003), «Mehr va mauzer» (2007) kinoqissalarini yaratdi. «Eshik qoqqan kim bo’ldi?» (1989), «Falakning gardishi» (2009), «Musofir bo’lmaguncha» (2009), «Tentak farishta» (2010), «Charxpalak» (2017), «Tanlangan asarlar» («2021») kabi to’plamlari nashr etilgan.

Sharof Boshbekov 1996 yili «O’zbekistonda xizmat ko’rsatgan madaniyat xodimi» faxriy unvoni, 2001 yili «Mehnat shuhrati» ordeni bilan taqdirlangan.

«Xurshid Davron kutubxonasi» ko’p sonli a’zolari va adabiyot muxlislari nomidan adibning oila a’zolari va yaqinlariga chuqur hamdardlik bildiradi.