Go’zal Ro’ziyeva. Sukunatga cho’kayotgan qichqiriqman

042    Ўтган йил кузининг сўнгги куни (30 октябрда) туғилган куни билан табриклаб, бухоролик истеъдодли шоира Гўзал Рўзиеванинг бир туркум шеърларини сайтда эълон қилган эдим (Мана бу саҳифада ўқинг). Гўзал фейсбук тармоғи саҳифаларидан топган ёш ижодкорлардан бири эди. Бугун шоиранинг «Ёшлик» журналининг шу йилги 2-сонида босилган шеърий туркумини сизга тақдим этишдан мамнунман.

Гўзал РЎЗИЕВА
СУКУНАТГА ЧЎКАЁТГАН ҚИЧҚИРИҚМАН
044

Гўзал Рўзиева 1986 йил 31 октябрда Бухоро вилояти Жондор туманининг Тобагар қишлоғида туғилган.1993-2004 йилларда Жондор туманидаги 22-ўрта умумтаълим мактабини, 2004-2008 йилларда Файзулла Хўжаев номидаги Бухоро давлат университети тарих факультетини тугатган.

044

***

045

Орзу-камалакранг,
Умид-зангори,
Севги…Қиш қоридан ҳам оппоқ эди!
Меҳр яшилликни олган майсадан,
Нафрат-тун.
Йўқ,ундан қорароқ эди.

Соғинч-заъфаронроқ эди кузакдан,
Япроқдек дилдираб елни кутарди.
Ишонч-пушти мисол,
Ҳаяжон-олранг,
Қувонч-шаффофликда сувдан ўтарди.

Алам….
Йўқ,аламнинг рангги ёқмади.
У жонни қийнаркан,қонталаш экан.
О,буюк мусаввир,ҳаёт расмида
Кўрдим,барча ранглар аралаш экан.

Балки,у шу сабаб оҳанграбо куч,
Аммо,мени қийнар бир савол ҳамон.
Қўлга қалам олиб,тақдирим учун
Қайси рангни маъқул кўрдинг,Художон?..

* * *

Тун. Кўчада фонуслар сайли.
Шаҳар тинмай сочар ёғдулар.
Аммо битта чироғини ҳам
Юрагимга ёқолмас улар…

Қоронғулик кирар бостириб,
Изтиробга тўлгандек дунё.
Чироқлардан хавфсираб, эй тун,
Кўксим узра беркиндингми, ё?

Дерлар, ёлғиз туғилмас шоир,
Унга қай бир туйғулар эгиз.
Она, менга азобми уйқаш
Ё дард билан туққанмидингиз…

Умримнинг энг ёрқин нурларин,
Олдинг дунё, яна жимсан, жим.
Тунд йўлларга ёғду ҳисларим
Улашмоқдан, ахир чарчадим!

Иркит ҳаёт, бунча ожизсан!
Лабларимда кўзёшнинг таъми.
Қуёш, наҳот бир сўнган қалбга
Нур бермоққа арзимайсанми…

СИЗДАН ЙИРОҚДА

Сиздан йироқда…
Мен кимман, билмадим!
Сизсизлик жонимга ўқдай қадалган.
Қаршимда бир қадаҳ — ҳижронли оғу,
Бу дунёда,
Ёлғиз менга аталган!..

Сизсиз… ,
Кўз олдимни туманлар босган.
Сизсиз… оёқларим зил-замбил, оғир.
Тақдир йўлларимга дорларин осган,
Уларга илиниб юрагим оғрир.

Денгиздай тошгандим,
Шўх наво эдим.
Энди сиздан йироқ,
Тилсизман, жимман.

Тезроқ менга қайтинг, мана енгилдим,
Энди билсам,
Сизсиз…
Сизсиз
Ҳеч кимман!

НИМА БЎПТИ…

Ёдингизни кўнглин тоқига илиб,
Нима бўпти,сизни соғинса бир қиз…
Борлигингизнида бахти деб билиб,
Хотира альбомга овунса бир қиз…

Кўксига кечалар урганда ханжар,
Болишга дардларин айтиб йиғласа.
Дунё кенг,чарх рангин бўлсаю агар,
Сиз сабаб…
Сиз сабаб сиғмаса…

Қуёш тингламаса,уфққа беркиниб,
Моҳни қийнамаса қалбининг оҳи.
Бир сизга интилиб,сизга юкуниб
Яшагани бўлса,ёлғиз гуноҳи…

Қиз юраги ўзи шундай муммо,
Салга бу борлиқдан тўяди.
Унутади,бхтли бўлади,аммо
Нари борса…
Севгига ишонмай қўяди…

Нима бўпти …

***

Юрагингда музлар бор эди,
Чўғлар тутган қўлим совқотди.
Қалбингга илиқлик берай,дедиму…
Умримнинг ёзини йўқотдим.

Юрагингда музлар бор эди,
Айтолмадим ҳеч ҳаддим сиғиб.
Ёнишларим , о,бекор эди,
Кўклам кетди,гулларин йиғиб…

Юрагингда музлар бор эди,
Нима қилай,аритолмадим!..
Қай биримиз гуноҳкор эдик,
Куз қуёши эритолмади.

Буёғи қиш.Қўрқаман энди.
Фақат,сўзим малолга олма.
Қандай бўлсанг,бўлгин илтимос
Қородамга айланиб қолма!..

БАҲОРНИ СОҒИНДИМ…

Пойимга гулларин тўшаган,
Бир гўзал ифорни соғиндим.
Меҳрда синглимга ўхшаган,
Баҳорни соғиндим…

Қизғалдоқлар қучган тоғларни,
Хуш насимлар эсган боғларни,
Олиб келган дилхуш чоғларни,
Баҳорни соғиндим…

Арғимоқда учган ҳисларни,
Ўсма сурган сирдош қизларни,
Ўрик гули тўккан изларни,
Баҳорни соғиндим…

Қорлар эзган маъюс торкўча,
Чучмомага интиқ зор кўча,
Охир айтди дардларин кеча,
“Баҳорни соғиндим!..”

Капалакман,асли гулдаги,
Соғинчми у оғриқ,дилдаги
Йиғламадим!..
Йўқ,йўқ шунчаки,
Баҳорни соғиндим…

Манба: «Ёшлик» журнали, 2015 йил, 2-сон

01Go’zal RO’ZIEVA
SUKUNATGA CHO’KAYOTGAN QICHQIRIQMAN

044

Go’zal Ro’zieva 1986 yil 31 oktyabrda Buxoro viloyati Jondor tumanining Tobagar qishlog’ida tug’ilgan.1993-2004 yillarda Jondor tumanidagi 22-o’rta umumta’lim maktabini, 2004-2008 yillarda Fayzulla Xo’jaev nomidagi Buxoro davlat universiteti tarix fakul`tetini tugatgan. 

044

***

027

Orzu-kamalakrang,
Umid-zangori,
Sevgi…Qish qoridan ham oppoq edi!
Mehr yashillikni olgan maysadan,
Nafrat-tun.
Yo’q,undan qoraroq edi.

Sog’inch-za’faronroq edi kuzakdan,
Yaproqdek dildirab yelni kutardi.
Ishonch-pushti misol,
Hayajon-olrang,
Quvonch-shaffoflikda suvdan utardi.

Alam….
Yo’q,alamning ranggi yoqmadi.
U jonni qiynarkan,qontalash ekan.
O,buyuk musavvir,hayot rasmida
Ko’rdim,barcha ranglar aralash ekan.

Balki,u shu sabab ohangrabo kuch,
Ammo,meni qiynar bir savol hamon.
Qo’lga qalam olib,taqdirim uchun
Qaysi rangni ma’qul ko’rding,Xudojon?..

* * *

Tun. Ko’chada fonuslar sayli.
Shahar tinmay sochar yog’dular.
Ammo bitta chirog’ini ham
Yuragimga yoqolmas ular…

Qorong’ulik kirar bostirib,
Iztirobga to’lgandek dunyo.
Chiroqlardan xavfsirab, ey tun,
Ko’ksim uzra berkindingmi, yo?

Derlar, yolg’iz tug’ilmas shoir,
Unga qay bir tuyg’ular egiz.
Ona, menga azobmi uyqash
YO dard bilan tuqqanmidingiz…

Umrimning eng yorqin nurlarin,
Olding dunyo, yana jimsan, jim.
Tund yo’llarga yog’du hislarim
Ulashmoqdan, axir charchadim!

Irkit hayot, buncha ojizsan!
Lablarimda ko’zyoshning ta’mi.
Quyosh, nahot bir so’ngan qalbga
Nur bermoqqa arzimaysanmi…

SIZDAN YIROQDA

Sizdan yiroqda…
Men kimman, bilmadim!
Sizsizlik jonimga o’qday qadalgan.
Qarshimda bir qadah — hijronli og’u,
Bu dunyoda,
Yolg’iz menga atalgan!..

Sizsiz… ,
Ko’z oldimni tumanlar bosgan.
Sizsiz… oyoqlarim zil-zambil, og’ir.
Taqdir yo’llarimga dorlarin osgan,
Ularga ilinib yuragim og’rir.

Dengizday toshgandim,
Sho’x navo edim.
Endi sizdan yiroq,
Tilsizman, jimman.

Tezroq menga qayting, mana yengildim,
Endi bilsam,
Sizsiz…
Sizsiz
Hech kimman!

NIMA BO’PTI…

Yodingizni ko’nglin toqiga ilib,
Nima bo’pti,sizni sog’insa bir qiz…
Borligingiznida baxti deb bilib,
Xotira al`bomga ovunsa bir qiz…

Ko’ksiga kechalar urganda xanjar,
Bolishga dardlarin aytib yig’lasa.
Dunyo keng,charx rangin bo’lsayu agar,
Siz sabab…
Siz sabab sig’masa…

Quyosh tinglamasa,ufqqa berkinib,
Mohni qiynamasa qalbining ohi.
Bir sizga intilib,sizga yukunib
Yashagani bo’lsa,yolg’iz gunohi…

Qiz yuragi o’zi shunday mummo,
Salga bu borliqdan to’yadi.
Unutadi,bxtli bo’ladi,ammo
Nari borsa…
Sevgiga ishonmay qo’yadi…

Nima bo’pti …

***

Yuragingda muzlar bor edi,
Cho’g’lar tutgan qo’lim sovqotdi.
Qalbingga iliqlik beray,dedimu…
Umrimning yozini yo’qotdim.

Yuragingda muzlar bor edi,
Aytolmadim hech haddim sig’ib.
Yonishlarim , o,bekor edi,
Ko’klam ketdi,gullarin yig’ib…

Yuragingda muzlar bor edi,
Nima qilay,aritolmadim!..
Qay birimiz gunohkor edik,
Kuz quyoshi eritolmadi.

Buyog’i qish.Qo’rqaman endi.
Faqat,so’zim malolga olma.
Qanday bo’lsang,bo’lgin iltimos
Qorodamga aylanib qolma!..

BAHORNI SOG’INDIM…

Poyimga gullarin to’shagan,
Bir go’zal iforni sog’indim.
Mehrda singlimga o’xshagan,
Bahorni sog’indim…

Qizg’aldoqlar quchgan tog’larni,
Xush nasimlar esgan bog’larni,
Olib kelgan dilxush chog’larni,
Bahorni sog’indim…

Arg’imoqda uchgan hislarni,
O’sma surgan sirdosh qizlarni,
O’rik guli to’kkan izlarni,
Bahorni sog’indim…

Qorlar ezgan ma’yus torko’cha,
Chuchmomaga intiq zor ko’cha,
Oxir aytdi dardlarin kecha,
“Bahorni sog’indim!..”

Kapalakman,asli guldagi,
Sog’inchmi u og’riq,dildagi
Yig’lamadim!..
Yo’q,yo’q shunchaki,
Bahorni sog’indim…

Manba: «Yoshlik» jurnali, 2015 yil, 2-son

01

(Tashriflar: umumiy 339, bugungi 1)

4 izoh

  1. Go’zal she’rlaringizni o’qib shodligim olamga sig’may qoldi.Go’ zal tashbehlar,barkamol misralar-ajoyib !!!omad omad.Baxt doimo hamroh bo’lsin.

Izoh qoldiring