Рафиқ барчамизни Наврўз айёми билан табриклаб, эзгу тилаклар билдириб, янги шеърларидан юборибди. Барчамиз номидан шоир дўстимизни биз ҳам қутлаб, саломатлик, ижодий янгиликлар тилаймиз.
Рафиқ ЎЗТУРК
ШЕЪРЛАР
***
кўча кезсанг таъқиб қилган
уйга келсанг
тўшагингга ўраниб олган
бир қайғу
ухласанг тушларингга кирган
ухламасанг сени туш кўрган
ва сени рўёларда яшашга
мажбур қилган
кулсанг кулмасанг
кўзларингда қалқиб тураверадиган
бир ишқ
бир шимол
қиш кунлари йўлингдан чиқса
қалин кийимларга ўраниб олган
юзларига қиров қўнган
севгилинг баҳор
уни йўл бўйида таниб қолсанг
ортидан етиб
бир ёввойи каптарни тутиб олгандай
қўлларидан тутсанг муз қотган
юзларидан ўпиб йиғласанг
ва эриб битса дилдаги аёз
яна ўша дил сўзларингни
минг бор очилса ҳам
сийқаси чиқмаган баҳор гуллари каби
шивирласанг унинг қулоқларига
азизам
юрагим мадори бу нима юриш
сен баҳорсан ахир
айтмаганмидим
сенга фақат баҳор ярашади
***
бир кулгин
ноқулай аҳволга солиб қўйгувчи
бир кулгинг керак
бир ҳаётдай жарангласин у
бир баҳордай ёришсин дунём
йўқса бу дардлар оғушига мен
шу қадар қулай
жойлашиб олибман
қабрга жойлашиб олган
тирикдай
бир кулай
***
оғриққа ўрганган юрагингни сен
қийнамай
яйрашга ўргат бугундан
бир оз баҳор иста
севиниб иста
истаганинг қолар ҳеч йўқса
оғриққа тўймаган кўнглингни
бир оз енгил тортишга ўргат
қара осмон нақадар мовий
ёки кенг бағрида тўлишиб
кезинади кулранг булутлар
қара юлдузлар
фақат қара
баҳор гулларини сендан аямас
фақат уни севгил
ундан қочма сен
озгина севин
***
тунда бош қўйган ёстиғимнинг
нафаси қайтгандай туйилар
бошим оғир ўйларга тўла
бу кетишда деб ўйлайман
ҳеч ерга кетмаяпман гарчи
вақт тобути ичра димиқиб
ҳолсиз ётибман
димиқиш
бир портлаш бор бу димиқишда
бир туғилиш бор
***
соат етти
ишдан қайтаётиб
кўзим тушиб қолади бехос
автобусда кетаётган бахтга
зерикиб кетган шўрлик
дафъатан ташланган нигоҳдан эриб
кулиб боқаркан
ёришиб кетади бир сабоҳ
албатта
юрак кўп татиган бундай туйғуни
ҳар гал очилганда мудроқ кўзларим
айтиш мумкин бўлса кимгадир шуни
шудир бахт ҳақида айтар сўзларим
тўлиб кетмаса ҳам яшил автобус
бир зумда ялтироқ капалакларга
шодлик юрагимга инади
туйқус
файз олиб киради совуқ шаҳарга
Дил
1
ҳар ким ўз исмини ёқтиргани каби
эй дил
бунча хушламасанг ёд этишимни
сен кўксимга сиққанинг каби
мен ҳам бир тиқилинч автобусда
димиқиб кетяпман
сендан фарқли ўлароқ
бу темир қутида узоқ қолмайман
ишон ахир тушибоқ
хат ёзаман сенга
ҳол сўрайман
токи ёлғиз эканмиз
менинг кўкрак қафасим каби
автобус ҳам вақтинчалик қамоқ
эй дил эркимиз яқин
фақат чида
2
этагинг барига илаштириб
бир ҳарир фаслимни
сен кетдинг
фақат дил қолди
Дилбар куй
1
ичимни куйдирган оловнинг
тафтида бир лаҳза
исиндингми айт
қанча сўз демай
лабларим юзингга етмади
сен жануб томонда
мен эса шимолнинг
дайди шамолларига кўксимни бериб
сени аччиқ қумсадим
эркам
севгилим
2
сен бир пайтлар менга юборган
севги номли куйни сўрадим
менда йўқ-да дединг
менда йўқ-да
хонамни тўлдирган
бу майин куйни
узоқ тингладим
3
сендан нафратландим
юрагимда уйқинг бузилди
тиззангни қучоқлаб
йиғладинг юм-юм
узоқ юпатдим сени
4
дунё қанақадир тор бугун
фақат шундай турсам сиғяпман
лабларим қулоғингга
тегиб кетса айтарсан
аслида жим турсанг ҳам
гапирсанг ҳам барибир
менга ҳаёт бериб қўяверасан
***
оҳангга айлансанг бир куни
масалан
шопеннинг биллур изтиробига
бу дунёдан бехабар
ўртайверсанг дилларни маҳзун
кулгимни қистатма
нимадир қилиб
барибир қолмоқни истайсан
тубансан
бетоқат малъун
***
кўпдан бери мен
дуч келмаганим
сенсиз ва қорсиз тошкент
учиб кетиш орзусисиз
соғиниш гашти
ва чекиб санғиш
бу шаҳарга сенсизлик янги
ва янги йил арафасида
ажойиб сийлиқ
жоним
елкамга қордай қўн
бир лаҳзада эриб кетгани
шу бор истагим
***
ҳар ким ўзиники деб билган баҳор
ўтару кетар
ва биров оғзидан туфлолмай юрар
ширинтаъм қанд мазасидай
бездирган сўзни
салом деб кўради танишга
дуч келган бировга
қалайсиз деб ёзиб кўради
йўқ ўхшамайди
оғзидан ҳеч аримайди
ўша чучмал таъм
севги
Дада
тош асридан қолган телефони билан
қўнғироқ қиларди у тош асридан
юрагини кемирган соғинч
ё қўрқув
алам
уни бир нималарни ғудраниб сўнг
қизилни босишга мажбур қиларди
дада майли
овозингиз эшитилмаяпти
ҳеч нима ўзгармайди
эшитилса ҳам
сизнинг ёдингизга тушганимдан
юзимда на қувонч
на кўзимда нам
шунчаки ичимда бир туйғу
ва айтишга арзимаса ҳам
айта қолай
бу хайр
Rafiq barchamizni Navro‘z ayyomi bilan tabriklab, ezgu tilaklar bildirib, yangi she’rlaridan yuboribdi. Barchamiz nomidan shoir do‘stimizni biz ham qutlab, salomatlik, ijodiy yangiliklar tilaymiz.
Rafiq O’ZTURK
SHE’RLAR
***
ko’cha kezsang ta’qib qilgan
uyga kelsang
to’shagingga o’ranib olgan
bir qayg’u
uxlasang tushlaringga kirgan
uxlamasang seni tush ko’rgan
va seni ro’yolarda yashashga
majbur qilgan
kulsang kulmasang
ko’zlaringda qalqib turaveradigan
bir ishq
bir shimol
qish kunlari yo’lingdan chiqsa
qalin kiyimlarga o’ranib olgan
yuzlariga qirov qo’ngan
sevgiling bahor
uni yo’l bo’yida tanib qolsang
ortidan yetib
bir yovvoyi kaptarni tutib olganday
qo’llaridan tutsang muz qotgan
yuzlaridan o’pib yig’lasang
va erib bitsa dildagi ayoz
yana o’sha dil so’zlaringni
ming bor ochilsa ham
siyqasi chiqmagan bahor gullari kabi
shivirlasang uning quloqlariga
azizam
yuragim madori bu nima yurish
sen bahorsan axir
aytmaganmidim
senga faqat bahor yarashadi
***
bir kulgin
noqulay ahvolga solib qo’yguvchi
bir kulging kerak
bir hayotday jaranglasin u
bir bahorday yorishsin dunyom
yo’qsa bu dardlar og’ushiga men
shu qadar qulay
joylashib olibman
qabrga joylashib olgan
tirikday
bir kulay
***
og’riqqa o’rgangan yuragingni sen
qiynamay
yayrashga o’rgat bugundan
bir oz bahor ista
sevinib ista
istaganing qolar hech yo’qsa
og’riqqa to’ymagan ko’nglingni
bir oz yengil tortishga o’rgat
qara osmon naqadar moviy
yoki keng bag’rida to’lishib
kezinadi kulrang bulutlar
qara yulduzlar
faqat qara
bahor gullarini sendan ayamas
faqat uni sevgil
undan qochma sen
ozgina sevin
***
tunda bosh qo’ygan yostig’imning
nafasi qaytganday tuyilar
boshim og’ir o’ylarga to’la
bu ketishda deb o’ylayman
hech yerga ketmayapman garchi
vaqt tobuti ichra dimiqib
holsiz yotibman
dimiqish
bir portlash bor bu dimiqishda
bir tug’ilish bor
***
soat yetti
ishdan qaytayotib
ko’zim tushib qoladi bexos
avtobusda ketayotgan baxtga
zerikib ketgan sho’rlik
daf’atan tashlangan nigohdan erib
kulib boqarkan
yorishib ketadi bir saboh
albatta
yurak ko’p tatigan bunday tuyg’uni
har gal ochilganda mudroq ko’zlarim
aytish mumkin bo’lsa kimgadir shuni
shudir baxt haqida aytar so’zlarim
to’lib ketmasa ham yashil avtobus
bir zumda yaltiroq kapalaklarga
shodlik yuragimga inadi
tuyqus
fayz olib kiradi sovuq shaharga
Dil…
1
har kim o’z ismini yoqtirgani kabi
ey dil
buncha xushlamasang yod etishimni
sen ko’ksimga siqqaning kabi
men ham bir tiqilinch avtobusda
dimiqib ketyapman
sendan farqli o’laroq
bu temir qutida uzoq qolmayman
ishon axir tushiboq
xat yozaman senga
hol so’rayman
toki yolg’iz ekanmiz
mening ko’krak qafasim kabi
avtobus ham vaqtinchalik qamoq
ey dil erkimiz yaqin
faqat chida
2
etaging bariga ilashtirib
bir harir faslimni
sen ketding
faqat dil qoldi
Dilbar kuy
1
ichimni kuydirgan olovning
taftida bir lahza
isindingmi ayt
qancha so’z demay
lablarim yuzingga yetmadi
sen janub tomonda
men esa shimolning
daydi shamollariga ko’ksimni berib
seni achchiq qumsadim
erkam
sevgilim
2
sen bir paytlar menga yuborgan
sevgi nomli kuyni so’radim
menda yo’q-da deding
menda yo’q-da
xonamni to’ldirgan
bu mayin kuyni
uzoq tingladim
3
sendan nafratlandim
yuragimda uyqing buzildi
tizzangni quchoqlab
yig’lading yum-yum
uzoq yupatdim seni
4
dunyo qanaqadir tor bugun
faqat shunday tursam sig’yapman
lablarim qulog’ingga
tegib ketsa aytarsan
aslida jim tursang ham
gapirsang ham baribir
menga hayot berib qo’yaverasan
***
ohangga aylansang bir kuni
masalan
shopenning billur iztirobiga
bu dunyodan bexabar
o’rtayversang dillarni mahzun
kulgimni qistatma
nimadir qilib
baribir qolmoqni istaysan
tubansan
betoqat mal’un
***
ko’pdan beri men
duch kelmaganim
sensiz va qorsiz toshkent
uchib ketish orzusisiz
sog’inish gashti
va chekib sang’ish
bu shaharga sensizlik yangi
va yangi yil arafasida
ajoyib siyliq
jonim
yelkamga qorday qo’n
bir lahzada erib ketgani
shu bor istagim
***
har kim o’ziniki deb bilgan bahor
o’tdi va ketdi
va birov og’zidan tuflolmay yurar
shirinturush bir qand ta’miday
bezdirgan so’zni
salom deb ko’radi tanishga
duch kelgan birovga
qalaysiz deb yozib ko’radi
yo’q o’xshamaydi
og’zidan hech arimaydi
o’sha chuchmal ta’m
sevgi
Dada
tosh asridan qolgan telefoni bilan
qo’ng’iroq qilardi u tosh asridan
yuragini kemirgan sog’inch
yo qo’rquv
alam
uni bir nimalarni g’udranib so’ng
qizilni bosishga majbur qilardi
dada mayli
ovozingiz eshitilmayapti
hech nima o’zgarmaydi
eshitilsa ham
sizning yodingizga tushganimdan
yuzimda na quvonch
na ko’zimda nam
shunchaki ichimda bir tuyg’u
va aytishga arzimasa ham
ayta qolay
bu xayr
