Фахриёр, ҳали кўп ўрганиладиган, атрофида баҳсу мунозаралар қўпайиб борадиган истеъдод, ўзлигини сақлагани ҳолда бугунги поэтик тафаккур изланишлари жуғрофиясини ҳам шаклий, ҳам мазмунан қамраб олган кўламли шоир (Аҳмад Аъзамнинг «Мени истаган шеърият» мақоласидан)

Фахриёр
ШЕЪРЛАР

ГУЛ АТРИ

тўғри чизиқ бўйлаб тарқар гул атри
гул атрини синдирмас

мабодо шамол
уни эгса
ғижимласа
синдирса
гул атрининг синиқларидан
қайғулироқ нарса йўқдир очунда

синдирмаслик учун гулнинг атрини
дунёга келганимиз билмайин
яшабмиз
бирор кимдан рухсат ҳам олмай

гул атрининг синиғи жарангида
тумов тушлар акс садоси

акс садони
ўнгариб ололмай қийналаман

бу дунёда менинг вазифам
тушларни ўнгармоқ бўлди ҳар қачон

синиқ гул атри
тушлардаги бахтнинг сояси

бу соя туш ортидаги нурнинг манбаи
қўнимсизлиги
сабаб лопиллайди ўнгимда

нур синдирар гул атрини

ДАМ ОЛИШ КУНИ

бугун дам олиш куни

мен ўзимга четдан қарамоқ
ва миянинг фикр тўлдириб
ташлаган жойларин тартибга
келтирмоқ учун
тушунчаларни
бешинчи қаватдаги уйим деразасидан
сигарет қолдиғидай
асфалт кўчага отиб ўйнайман
менга ёқар уларнинг
тақиллаб асфалтга урилишлари
ва мияси чайқалиб
дабдираши ёқар жудаям

садист бўлгиси келар гоҳида зериккан одам
ҳарқалай
уришгандан кўра хотинни
фикрларни
тушунчаларни
қийнаш мазза эмасми

офтобда жимирлаб ётар фикрлар
сочилган кўйи
бирин боши ёрилган
бошқасининг қонаган бурни

анча енгил тортаман

кўчадаги тушунчаларни
тепадан кузатмоқ завқини
ҳар кимга ҳам бермас Яратган

бу эрмак ҳам жонимга теккач
уйга кираман
ва миянинг бўшаб қолган жойларин
тўлдирмоқ қасдида
китоб ўқийман бир пас
ўзимдан ҳам қайсар
ўлиб кетган худоларнинг ўрнин тўлдирмоқ учун
дунёга келган
Ницше китобин

сўнгра андак кўз илинади

бир замон хотиннинг турткилашидан
чўчиб уйғонаман
жон ҳавлида кўрпачадан
ирғиб туриб кетаман
ва сўрайман тинчликми дея

мана булар сизникими
дер хотиним ҳовлиқиб
ва етти яшар
қизчам ҳовучидаги боя ўзим отиб ўйнаган
фикрларга қилар ишора

қизчамнинг ҳовучида
сувдан чиқиб қолган тангабалиқдай
оғзин каппа-каппа очиб питирлар эди
ўзим деразадан кўчага отган
постмодернизм
метаҳикоя
ва деструкция

НАВБАТ

жавондаги китоблар
сенга ўқилишга навбатга турар

сендан ўтмоқ учун
навбатга турар кунлар
баъзан сиғмай қолар битта танангга
келажакдан бирваракай келган кунлар
ойлар сендан бир кунда ўтмоқ бўлар
вужудингга сиғмаган кунлар
ёриб ташлагудай

ҳаёт дунёдаги энг ирганч нарсаларни
юрагингда филтрлаб
туйғу
адреналин ясамоқ учун
қатор қилиб териб қўяр келгуси кунларингга

юрак боёқиш
қон ўрнига
туйғуларни ўтмишга ҳайдар
ўтмиш тўлиб борар қанордай
туйғули хотирларга
китоб моддийлашган ёвузлиги шоирнинг
унинг арвоҳи
бизнинг кечинмалар билан тирикдир
ўтмиш қанорига тиқилган

кун кўради туйғуларни еб

қайсидир арвоҳнинг абадийлиги
сенга навбатга турган
қай китобни қўлга
олишингга боғлиқ жудаям

* * *

ТУН СОЧИБ ЮБОРАР ОДАМНИ

парчалайди бешафқат
зулмат қадар кенгаясан тунлари

юлдузлар
сачраб кетган хаёлларингдир
сен шўрлик
кундузи ҳарф
кечаси юлдуз бўлиб сачрайсан

юлдузлар ҳарфларнинг позитивидир

хотирага кўчган кунлар
учган юлдуз бўлиб бир-бир ўча бошлайди
ўз учқунларинг
кул бўлиб бошингга ёғар тун бўйи
тонгни бўзартирар учқунлар кули

эрталаб
қийналасан ўзингни йиғиб ололмай
сен
тунга сочилиб кетган бир одам

кўнгил қолиб кетар қайси бир тушда
хаёл ойдан қайтиб келмаган
яшаш истагини хотининг
топиб берар аллақайси бўғжамалардан

бўйинбоғ шаклидаги яшаш истаги

ўрнингдан турасан сўник ва зилдай
тунда эҳтирослар оққан томирдан
эрталаб хафа қон оқар

зилдай вужудингга Яратган
ҳаммасининг ўрнига
жойлаб қўйган бош оғриғини

* * *

кераксиз нарсалар табиийлиги

ортега и гассет уларни
жамиятдан ташқарига
чиқариб ташлаган эди бир пайтлар
кераксиз нарсалар ёввойилиги
севилмаган қиз юрагидай
асов ва ўжар
бу юракни муҳаббат
жамиятга
судраб киритиб бўлмас
қайтанга
жамиятнинг ўзи унга
кирмоқ изнини сўрар

гул ҳеч қачон жамиятга кириб келмайди
жамиятнинг ўзи гулга қараб чопади

жамият ўз сарҳадларин ҳамиша
кераксиз нарсалар ҳисобига кенгайтар
ёввойилик сари кенгайиб борар
хонаки ҳаёт

кераксиз нарсалар зарурияти

ХУДБИНЛИК

юракни қантарасан

онтарилар онтологнинг кўз қарашидай
тусини ўзгартган битта тушунча
дунё устига

ортиб кетар мумкинлик эҳтимоли
ўзинг учун яшашнинг

бирор кимни суймай туриб ҳам
бирор кимга куймай туриб ҳам
яшаш мумкин экан бемалол
яшамаслик мумкин экан ундан ҳам

яшамаслик мумкинлигин илож деб билган
аянчли кўнгил
ўзини аямас худбинлик ҳаққи

юракни қантарасан

КЕЧИНМА

…the best way out is always through…
Robert Frost*

ким ўйлаб топган экан бу сўзни
идишга ўхшаш бир сўз
нимани жойласанг жойлашаверар

бемор иштаҳасидай
нозик эмас сўзнинг таъби у қадар
гуноҳ каби умрни кечирмоққа
дунёга келган банданинг
ўзга имкони йўқдир

кечинма
умрни кечирмоқ жараёнида
банданинг кўнгилга туккан туйғулари

бўйиндаги сиртмоқ каби туйғуни
кечирганинг эвазига
ким ечиб олади
билмайсан

кечинма
сиртмоқдай маҳкумлик
ўқилмаган ҳукмнинг шарпаси
муқаррар қатл

Ҳар ким бўйнида
бир сиртмоқ қатлни кўтариб юрар
кечинма қилиб

ўлим қўрқинчлимас
фақат кечинмага чидаб берсанг бас
фақат тасаввурга дош берсанг бўлди

кечинма
сиртмоқ каби
бу дунёда ечилмас

кечкининг
кечиргининг қолдиғи
кечинма
13 рақами каби
ҳеч нарсага бўлинмас
парчаланмас
унинг
катталашиб бораётган яхлитлиги
юракни ёради қоқ ўртасидан
ҳаёт ва мамотга тенгдан насиба
улашади одил кечинма

кечинма
кўнгил ҳукми

адо этилмагунча
ҳукмдан қутулиб бўлмайди.

* Энг зўр чиқиш йўли ҳамиша орадан ўтади… Р.Фрост – америкалик шоир