Муслимбек Мусалламнинг шеъриятида ўзига мафтунликдан йироқ, хавфу умид орасида яшаётган, унутилган битта ғарибгина шеър орзусида Худованд томон покланиб бораётган Одамни кўраман. Шунингдек, адабиёт мулкида унинг “ўйчан сурати” билан бирга тирик сатрлари ҳам қолишига ишонаман (Одил Икромнинг сўзидан).

Муслимбек МУСАЛЛАМ
ШЕЪРЛАР

Муслим Мусалламов 1986 йил Намангaн шаҳрида туғилган. »Келажак овози — 2008″ танлови ғолиби. Ёш ижодкорларнинг “Зомин” , “Дўрмон” семинарлари қатнашчиси. Шеърлари вилоят, республика нашрларида ва «Хуршид Даврон кутубхонаси» сайти саҳифаларида чоп этилган.

* * *

Сен билан турналар кетдилар бирга,
Шафтоли боғларга кайтиб келди Май.
Бир оғир айрилиқ тушди кўнгилга,
Хадичадан айро қолган Расулдай.

Самога ўрлади саҳройи қумлар,
Билолнинг охига кўшилди оҳим .
Сендан айро кечган савдойи кунлар,
Мажнунни эслатиб кўйди нигоҳим.

Сенинг изларингни излайман ҳануз ,
Ўйласам бир оғир оғриқ тирналар .
Йигирма саккиз йил кўзларимда куз ,
Йигирма саккиз йил қайтмас турналар.

* * *

Анорлар ёрилиб кетди кечалар ,
Қарғалар базмидан титраб кетди кўк.
Йиқилди тонг отмай беҳол ғунчалар,
Дарахтлар сарғарди, энди Баҳор йўқ.

Очилган гулларга келмасми раҳми,
Нечун қуёш кафтда тутиб турмас чўғ.
Кўксида кўтариб туради Ҳақни —
Япроқлар заминга тўкилгиси йўқ .

Яна алдадилар, яна хиёнат.
Милён бўёқларни қулатар бир ўқ .
Азизим ишонманг бу шунчаки дард,
Азизим боғларга куз келгани йўқ .

22.10.2014

* * *

Ойбек домла портретига чизгилар

Қандоқ чизай суратин айтинг ,
Сочларида қалам синади .
Икки қошин чизётган пайти
Ўртасида олам синади .

Қандоқ чизай унинг кўзига ,
Қарамоққа кўзим бермас дош .
Тонгда турсам, мато юзига
Фаришталар йиғлаб тўкар ёш .

Қандоқ чизай унинг нигоҳи ,
Тарихларни айлайди баён .
Чўлпон, бўлиб кўринар гоҳи,
Гоҳ Навоий бўлар намоён .

Ичга ютиб йиллар додини,
Ойбек ўтар йўлни пойлайман .
Бир Миллатнинг эътиқодини —
Шеърларини дилга  жойлайман.

* * *

Ёмғирда юрмоқни  ёқтираман-да,
Очилган бодомнинг гулини кўрсам.
Юрагим ёрилиб кетади бирдан,
Мунғайган боғларни ҳолини сўрсам . .

Баъзан сармаст шоир юрагим билан,
Шамга ўзин урган парвонага хос,
Ҳорғин  оёқларим ботган заминдан ,
Мен учиб кетаман осмонга нохос.

* * *

Ҳар бир ғишти асли мўжиза,
Беш асрки топгандай сайқал.
Регистон  — Ўзбекнинг покиза
Юрагига қўйилган ҳайкал .

Ранги кўчди қизил гулларга ,
Жангда ўлган шаҳидлар қони.
Армон бўлди Ҳазрат Бобурга,
Самарқанднинг мовий осмони .

Урмасин деб ёвлар ҳасади ,
Ботмасин деб илло пичоқлар .
Гўё Амур Темур жасади ,
Самарқандни ётар қучоқлаб .

28.02.2016

* * *

Баҳор яна боғларни кезар,
Хандон отиб сочилар кўклам .
Табиат шоҳ асарин чизар,
Майин ёмғир томчилар кўкдан .

Баҳор яна боғларни кезар,
Қушлар пешвоз чиқар йўлига .
Бойчечакла қирларни безар
Ва бош қўяр ўрик гулига.

Баҳор яна боғларни кезар,
Кўнгилларга танитиб Ҳақни.
Шу кетишда юрагим сезар,
Уйғотади бир куни ШАРҚНИ…

Баҳор яна боғларни кезар

* * *

Турфа эълонлардан айланади бош,
Турфа эълонларни менга дахли йўқ.
Меҳр бунча танқис, диллар бунча тош ,
Наҳотки биттаям кўнгил аҳли йўқ?

Нимага бир тўйиб ёғмайсан ёмғир?,
Нимага бир тўлиб чақмайсан чақин?.
Майсалар кафтидан тўкилар соғинч,
Тераклар юраги осмонга яқин.

Билмадим қайси бир йилларда қолдим.
Бунчалар ҳаётнинг заҳри кўпайди.
Ишқ йўқдир, Хайёмдай хаёлга толдим,
Наҳотки беишқлар аҳли кўпайди.

Кайтмоққа кеч бўлди,
кетмоққа махкум,
Бир ғариб, бир далли ўйлар ичида.
Нетай сендан ўзга ишқ топди якун,
Нетай бир ўзингни соғиндим жуда.

05.04.2015

* * *

Деразамга урилади қор…
Рауф Парфи

Деразага ўзин урар қуш,
Тугаб борар сабру саботи.
Деразага ўзин урар қуш ,
Чил- чил синиб кетар қаноти.

Деразага ўзин урар қуш ,
Кўзларидан ёш оқар сиза .
Деразага ўзин урар қуш ,
Бунга чидолмайди дераза.

18.04.2016

* * *

Ўртамиздан ўтиб кетар май ,
Майингина ёмғирин сочиб .
Ҳудди Ҳазрат Чўлпон айтгандай :
Қўлларимда баҳорнинг сочи .

Ўртамиздан ўтиб кетар май,
Қадамлари эштилар ёзнинг .
Тун тугамай , тонг ҳали отмай ,
Қони сачраб кетар гилоснинг .

Ўртамиздан ўтиб кетар май ,
Саҳроларда тўздириб қумни.
Ёмғирлари урилар муздай ,
Куз бизларга шунча яқинми ?

11.05.2016

* * *

Жазоланди ўртада қисмат ,
Синов уриб қўйди беаёв .
Тирикмикин бунда муҳаббат ,
Вақт боғларни топтаб кетган ёв .

Кўтариш ҳам оғир бу бошни ,
Косасида хаёллар сузар .
Уфққа ботиб кетган қуёшни,
Туни билан оғриғи эзар .

Гуллар кирар оқшомга юпун ,
Ҳазин қўшиқ айтиб ўтар сой .
Чимилдиққа ўхшайди булут ,
Келинчакка ўхшаб кетар ой .

* * *

Ёмғир бир кун мен учун тўкил,
Мен деб бир кун елгин шаббода .
Бошинг силаб ўлтирайин гул ,
Юрак яйраб олсин ҳавода .

Осмон менга шунчалар яқин ,
Сезиб турар кўнглим қатини .
Излаяпман ёруғ дунёдан ,
Етти жаннат нафосатини.

Тўлиб кетди тунлари кўнглим,
Ерга уриб синдирдим чил- чил.
«Шоирларга эргашманг» дединг.
Мен эргашдим,
Ё Раббим кечир …

28.07.2016

Muslimbek Musallamning she’riyatida o‘ziga maftunlikdan yiroq, xavfu umid orasida yashayotgan, unutilgan bitta g‘aribgina she’r orzusida Xudovand tomon poklanib borayotgan Odamni ko‘raman. Shuningdek, adabiyot mulkida uning “o‘ychan surati” bilan birga tirik satrlari ham qolishiga ishonaman (Odil Ikromning so‘zidan).

Muslimbek MUSALLAM
SHE’RLAR

Muslim Musallamov 1986 yil Namangan shahrida tug‘ilgan. »Kelajak ovozi — 2008″ tanlovi g‘olibi. Yosh ijodkorlarning “Zomin” , “Do‘rmon” seminarlari qatnashchisi. She’rlari viloyat, respublika nashrlarida va “Xurshid Davron kutubxonasi” sayti sahifalarida chop etilgan.

* * *

Sen bilan turnalar ketdilar birga,
Shaftoli bog‘larga kaytib keldi May.
Bir og‘ir ayriliq tushdi ko‘ngilga,
Xadichadan ayro kolgan Rasulday.

Samoga o‘rladi sahroyi qumlar,
Bilolning oxiga ko‘shildi ohim .
Sendan ayro kechgan savdoyi kunlar,
Majnunni eslatib ko‘ydi nigohim.

Sening izlaringni izlayman hanuz ,
O‘ylasam bir og‘ir og‘riq tirnalar .
Yigirma sakkiz yil ko‘zlarimda kuz ,
Yigirma sakkiz yil qaytmas turnalar.

* * *

Anorlar yorilib ketdi kechalar ,
Qarg‘alar bazmidan titrab ketdi ko‘k.
Yiqildi tong otmay behol g‘unchalar,
Daraxtlar sarg‘ardi, endi Bahor yo‘q.

Ochilgan gullarga kelmasmi rahmi,
Nechun quyosh kaftda tutib turmas cho‘g‘.
Ko‘ksida ko‘tarib turadi Haqni —
Yaproqlar zaminga to‘kilgisi yo‘q .

Yana aldadilar, yana xiyonat.
Milyon bo‘yoqlarni qulatar bir o‘q .
Azizim ishonmang bu shunchaki dard,
Azizim bog‘larga kuz kelgani yo‘q .

22.10.2014

* * *

Oybek domla portretiga chizgilar

Qandoq chizay suratin ayting ,
Sochlarida qalam sinadi .
Ikki qoshin chizyotgan payti
O‘rtasida olam sinadi .

Qandoq chizay uning ko‘ziga ,
Qaramoqqa ko‘zim bermas dosh .
Tongda tursam, mato yuziga
Farishtalar yig‘lab to‘kar yosh .

Qandoq chizay uning nigohi ,
Tarixlarni aylaydi bayon .
Cho‘lpon, bo‘lib ko‘rinar gohi,
Goh Navoiy bo‘lar namoyon .

Ichga yutib yillar dodini,
Oybek o‘tar yo‘lni poylayman .
Bir Millatning e’tiqodini —
She’rlarini dilga joylayman.

* * *

Yomg‘irda yurmoqni yoqtiraman-da,
Ochilgan bodomning gulini ko‘rsam.
Yuragim yorilib ketadi birdan,
Mung‘aygan bog‘larni holini so‘rsam . .

Ba’zan sarmast shoir yuragim bilan,
Shamga o‘zin urgan parvonaga xos,
Horg‘in oyoqlarim botgan zamindan ,
Men uchib ketaman osmonga noxos.

* * *

Har bir g‘ishti asli mo‘jiza,
Besh asrki topganday sayqal.
Registon — O‘zbekning pokiza
Yuragiga qo‘yilgan haykal .

Rangi ko‘chdi qizil gullarga ,
Jangda o‘lgan shahidlar qoni.
Armon bo‘ldi Hazrat Boburga,
Samarqandning moviy osmoni .

Urmasin deb yovlar hasadi ,
Botmasin deb illo pichoqlar .
Go‘yo Amur Temur jasadi ,
Samarqandni yotar quchoqlab .

28.02.2016

* * *

Bahor yana bog‘larni kezar,
Xandon otib sochilar ko‘klam .
Tabiat shoh asarin chizar,
Mayin yomg‘ir tomchilar ko‘kdan .

Bahor yana bog‘larni kezar,
Qushlar peshvoz chiqar yo‘liga .
Boychechakla qirlarni bezar
Va bosh qo‘yar o‘rik guliga.

Bahor yana bog‘larni kezar,
Ko‘ngillarga tanitib Haqni.
Shu ketishda yuragim sezar,
Uyg‘otadi bir kuni SHARQNI…

Bahor yana bog‘larni kezar

* * *

Turfa e’lonlardan aylanadi bosh,
Turfa e’lonlarni menga daxli yo‘q.
Mehr buncha tanqis, dillar buncha tosh ,
Nahotki bittayam ko‘ngil ahli yo‘q?

Nimaga bir to‘yib yog‘maysan yomg‘ir?,
Nimaga bir to‘lib chaqmaysan chaqin?.
Maysalar kaftidan to‘kilar sog‘inch,
Teraklar yuragi osmonga yaqin.

Bilmadim qaysi bir yillarda qoldim.
Bunchalar hayotning zahri ko‘paydi.
Ishq yo‘qdir, Xayyomday xayolga toldim,
Nahotki beishqlar ahli ko‘paydi.

Kaytmoqqa kech bo‘ldi,
ketmoqqa maxkum,
Bir g‘arib, bir dalli o‘ylar ichida.
Netay sendan o‘zga ishq topdi yakun,
Netay bir o‘zingni sog‘indim juda.

05.04.2015

* * *

Derazamga uriladi qor…
Rauf Parfi

Derazaga o‘zin urar qush,
Tugab borar sabru saboti.
Derazaga o‘zin urar qush ,
Chil- chil sinib ketar qanoti.

Derazaga o‘zin urar qush ,
Ko‘zlaridan yosh oqar siza .
Derazaga o‘zin urar qush ,
Bunga chidolmaydi deraza.

18.04.2016

* * *

O‘rtamizdan o‘tib ketar may ,
Mayingina yomg‘irin sochib .
Huddi Hazrat Cho‘lpon aytganday :
Qo‘llarimda bahorning sochi .

O‘rtamizdan o‘tib ketar may,
Qadamlari eshtilar yozning .
Tun tugamay , tong hali otmay ,
Qoni sachrab ketar gilosning .

O‘rtamizdan o‘tib ketar may ,
Sahrolarda to‘zdirib qumni.
Yomg‘irlari urilar muzday ,
Kuz bizlarga shuncha yaqinmi ?

11.05.2016

* * *

Jazolandi o‘rtada qismat ,
Sinov urib qo‘ydi beayov .
Tirikmikin bunda muhabbat ,
Vaqt bog‘larni toptab ketgan yov .

Ko‘tarish ham og‘ir bu boshni ,
Kosasida xayollar suzar .
Ufqqa botib ketgan quyoshni,
Tuni bilan og‘rig‘i ezar .

Gullar kirar oqshomga yupun ,
Hazin qo‘shiq aytib o‘tar soy .
Chimildiqqa o‘xshaydi bulut ,
Kelinchakka o‘xshab ketar oy .

* * *

Yomg‘ir bir kun men uchun to‘kil,
Men deb bir kun yelgin shabboda .
Boshing silab o‘ltirayin gul ,
Yurak yayrab olsin havoda .

Osmon menga shunchalar yaqin ,
Sezib turar ko‘nglim qatini .
Izlayapman yorug‘ dunyodan ,
Yetti jannat nafosatini.

To‘lib ketdi tunlari ko‘nglim,
Yerga urib sindirdim chil- chil.
“Shoirlarga ergashmang” deding.
Men ergashdim,
Yo Rabbim kechir …

28.07.2016