3 январь — Ҳазрат Мир Алишер Навоий хотираси куни

          Ҳазрат Навоийнинг руҳи покларига бағишладик. Илоҳи, руҳлари шод бўлсин.

Фарҳод Арзиев
МУНОЖОТ

     Фарҳод Арзиев 1975 йилда Навоий вилояти, Нурота туманида туғилган. Ўзбекистон Миллий университетини, Ҳиндистон Оммавий ахборот воситалари институтини, Буюк Британиядаги Сити университетини тугатган. «Ёлғизлик ранглари» шеърий тўпламининг муаллифи.

Ҳазрат Навоийнинг руҳи покларига бағишладик. Илоҳи, руҳлари шод бўлсин.

1.

Авф қилгин ўзинг, мендан айблик,
Ки жоним истади фанодан ҳижрат.
Қодирсан, ҳунаринг ғайбу ғойиблик,
Ўздан ниҳонимни ўзимга кўрсат.

2.

Англадим, айтганинг ишқдан далолат,
Севдим то кўнглиму жоним саломат.
Илоҳи, сен агар шуни истадинг,
Не учун бошимда бунча маломат?

3.

Кўзимнинг нури тўкилди-ку, сўзга на ҳожат,
Бундан алам тортмоқ бизга на ҳожат.
Ишониб келганим: сен ахир нурсан ,
Сенинг ҳузурингда кўзга на ҳожат.

4.

Кўнглим боғ бўлсаки, бир дилбари жоно била қолсам.
Ул соз чалсаки, таралиб наво, Жонимга бало била қолсам.
Илоҳи, бундан ўзга мурод кўнглимда йўқдир ,
Ўлар чоғимда ҳам токи Ўша наво била қолсам.

5.

Эй, сен шафоат этдинг, мен билмадим,
Эй, номимга тиловат этдинг, мен билмадим,
Эй, сен меҳрингда давомат этдинг, мен билмадим,
Эй, сен ўзимни ўзимга маломат этдинг, мен билмадим.

6.

Шабнамларингки, кўзимга мазмун бўлса,
Шамларинг жилваси тилимда афсун бўлса,
Илоҳи, сен мени тушун; сўзларим
То ҳажр савдосида мазлум бўлса.

7.

Кўзимни юмсаму  кўзингни юмсанг,
Ёнимда сен бўлсанг, ёнингда бўлсам,
Мен сени кўрсайдим, сен мени кўрсанг,
Ёдимда бўлсайдинг, ёдингда бўлсам.

8.

Сочларинг толаси… кўзинг қароси…
Ҳажринг изтироби… кўнгил яроси…
Бул маҳзун сувратга умрларида
Йиғлаб кўрмаганлар бир бор қаросин.

9.

На ишқимни ўлдирди хитобинг,
На шаштимни синдирди шитобинг.
Муни ёзганим яна гуноҳим.
Жимсан. Жимсан. Жимсан.

10.

Гоҳи меҳру вафо кутдим фанодан ҳам,
Гоҳи озорландим меҳру вафодан ҳам.
Жафолар кўргаздинг эй, меҳри дарё,
Мен сени истадим жафодан ҳам.

11.

Лаблари шаккарлиги бул яна савдодир.
Кўзлари гавҳарлиги бул яна савдодир.
Ёр букун қошимда ишвалар қилур, лекин,
Ҳажри муқаррарлиги бул яна савдодир.

12.

Агар созим жимдур — наволар ўзга,
Агар рангим синиқ — ҳаволар ўзга.
Даво қидирмасдим бу ерлардан мен,
Билсайдим дардимга даволар ўзга.

13.

Не учун сўздурки, сўроққа мойил,
Не учун кўздурки, йироққа мойил,
Не учун кўнгилдир фироққа, мойил,
Не учун вужуддир туфроққа мойил…

14.

На тунимда малак висоли
На кунимда фалак хаёли,
На хушдир руҳият ҳавоси,
Ёраб, шулми эндн фано малоли?…

15.

Ёраб, алар жисму жонимга шитоб этарлар,
Гуноҳларим йиғиб китоб этарлар ,
Фақат тушунмайман, бир кунмас бир кун,
Нега суягимдан Каъба бунёд этарлар?..

16.

Кўзимнинг ёшлари уммонингдан назар,
Меҳрим уммонлиги золи замонингдан назар.
Юлдузлар жилвасидан тортиб нигоҳим,
Заминга назарим осмонингдан назар.

17.

Дўстим, ул кўзларнинг хумморлигини билсанг,
Телба юрагимнинг хушторлигини билсанг,
Дуолар қилмасдинг, тузалгин, дея,
Менинг не сабабдан беморлигимни билсанг.

18.

Етар бўлсам етарман, озорим ўзимдандир,
Ўтар бўлсам ўтарман, бозорим ўзимдандир,
Сиз бахтиёр бўлсангиз — кетмоғим керак бўлса,
Кетар бўлсам кетарман, мозорим ўзимдандир.

19.

Сенинг борлигингдан — менинг борлигим,
Сенинг ёрлигингдан — менинг ёрлигим.
Шубҳаларинг нега, муҳрингни билсанг,
Сенинг ёрлиғингдан менинг ёрлиғим.

20.

Тоғларнинг бошида қор бўлса агар,
Ғорларда афсунгар мор бўлса агар,
Сенинг борлигинг ҳам шунга яқиндир,
Мен сени соғиндим бор бўлсанг агар.

21.

Айрилиқ йўллари қаро бўлмаса,
Изғирин, ёмғирлар аро бўлмаса,
Балки севмас эдим сени бунчалик,
Илоҳи, кўнглимда яро бўлмаса.

22.

Билмадим омонат хаёлимни ҳам,
Маст юрдим, билмадим заволимни ҳам.
Тупроқман, корига олсину, майли,
Мастлардан берсайди кулолимни ҳам.

23.

Тунманам, гар тунга ўхшарсан,
Кунманам, гар кунга ўхшарсан.
Қанчалик мен сенга ўхшасам,
Шунчалик сен менга ўхшарсан.

24.

Сўзларим сеники ошкорми, зимдан,
Ҳар не ўтган бўлса, ўтди ўзимдан,
Куну тун бошимга балолар ёғди,
Сендан ўзгаларга айтган сўзимдан.

25.

Куйладим, куйлаган бўлсам ҳавасдан,
Изладим, излаган бўлсам ҳавасдан.
Ахир, сендан яна не ҳам тиларман,
Илоҳи, сен олов, қошингда хасман..

26.

Ўтдим ё ўтмадим қайси кўчадан,
Қолдим ё қолмадим дунё ичида.
Изламоқ бўлсангиз излангиз мени,
Кўнглимга ёр ишқи тушган кечадан.

3 yanvar — Hazrat Mir Alisher  Navoiy xotirasi kuni

Hazrat Navoiyning ruhi poklariga bag’ishladik. Ilohi, ruhlari shod bo’lsin.

Farhod Arziev
MUNOJOT

Farhod Arziev 1975 yilda Navoiy viloyati, Nurota tumanida tug’ilgan. O’zbekiston Milliy universitetini, Hindiston Ommaviy axborot vositalari institutini, Buyuk Britaniyadagi Siti universitetini tugatgan. «Yolg’izlik ranglari» she’riy to’plamining muallifi.

Hazrat Navoiyning ruhi poklariga bag’ishladik. Ilohi, ruhlari shod bo’lsin.

1.

Avf qilgin o’zing, mendan ayblik,
Ki jonim istadi fanodan hijrat.
Qodirsan, hunaring g’aybu g’oyiblik,
O’zdan nihonimni o’zimga ko’rsat.

2.

Angladim, aytganing ishqdan dalolat,
Sevdim to ko’nglimu jonim salomat.
Ilohi, sen agar shuni istading,
Ne uchun boshimda buncha malomat?

3.

Ko’zimning nuri to’kildi-ku, so’zga na hojat,
Bundan alam tortmoq bizga na hojat.
Ishonib kelganim: sen axir nursan ,
Sening huzuringda ko’zga na hojat.

4.

Ko’nglim bog’ bo’lsaki, bir dilbari jono bila qolsam.
Ul soz chalsaki, taralib navo, Jonimga balo bila qolsam.
Ilohi, bundan o’zga murod ko’nglimda yo’qdir ,
O’lar chog’imda ham toki O’sha navo bila qolsam.

5.

Ey, sen shafoat etding, men bilmadim,
Ey, nomimga tilovat etding, men bilmadim,
Ey, sen mehringda davomat etding, men bilmadim,
Ey, sen o’zimni o’zimga malomat etding, men bilmadim.

6.

Shabnamlaringki, ko’zimga mazmun bo’lsa,
Shamlaring jilvasi tilimda afsun bo’lsa,
Ilohi, sen meni tushun; so’zlarim
To hajr savdosida mazlum bo’lsa.

7.

Ko’zimni yumsamu ko’zingni yumsang,
Yonimda sen bo’lsang, yoningda bo’lsam,
Men seni ko’rsaydim, sen meni ko’rsang,
Yodimda bo’lsayding, yodingda bo’lsam.

8.

Sochlaring tolasi… ko’zing qarosi…
Hajring iztirobi… ko’ngil yarosi…
Bul mahzun suvratga umrlarida
Yig’lab ko’rmaganlar bir bor qarosin.

9.

Na ishqimni o’ldirdi xitobing,
Na shashtimni sindirdi shitobing.
Muni yozganim yana gunohim.
Jimsan. Jimsan. Jimsan.

10.

Gohi mehru vafo kutdim fanodan ham,
Gohi ozorlandim mehru vafodan ham.
Jafolar ko’rgazding ey, mehri daryo,
Men seni istadim jafodan ham.

11.

Lablari shakkarligi bul yana savdodir.
Ko’zlari gavharligi bul yana savdodir.
Yor bukun qoshimda ishvalar qilur, lekin,
Hajri muqarrarligi bul yana savdodir.

12.

Agar sozim jimdur — navolar o’zga,
Agar rangim siniq — havolar o’zga.
Davo qidirmasdim bu yerlardan men,
Bilsaydim dardimga davolar o’zga.

13.

Ne uchun so’zdurki, so’roqqa moyil,
Ne uchun ko’zdurki, yiroqqa moyil,
Ne uchun ko’ngildir firoqqa, moyil,
Ne uchun vujuddir tufroqqa moyil…

14.

Na tunimda malak visoli
Na kunimda falak xayoli,
Na xushdir ruhiyat havosi,
Yorab, shulmi endn fano maloli?…

15.

Yorab, alar jismu jonimga shitob etarlar,
Gunohlarim yig’ib kitob etarlar ,
Faqat tushunmayman, bir kunmas bir kun,
Nega suyagimdan Ka’ba bunyod etarlar?..

16.

Ko’zimning yoshlari ummoningdan nazar,
Mehrim ummonligi zoli zamoningdan nazar.
Yulduzlar jilvasidan tortib nigohim,
Zaminga nazarim osmoningdan nazar.

17.

Do’stim, ul ko’zlarning xummorligini bilsang,
Telba yuragimning xushtorligini bilsang,
Duolar qilmasding, tuzalgin, deya,
Mening ne sababdan bemorligimni bilsang.

18.

Yetar bo’lsam yetarman, ozorim o’zimdandir,
O’tar bo’lsam o’tarman, bozorim o’zimdandir,
Siz baxtiyor bo’lsangiz — ketmog’im kerak bo’lsa,
Ketar bo’lsam ketarman, mozorim o’zimdandir.

19.

Sening borligingdan — mening borligim,
Sening yorligingdan — mening yorligim.
Shubhalaring nega, muhringni bilsang,
Sening yorlig’ingdan mening yorlig’im.

20.

Tog’larning boshida qor bo’lsa agar,
G’orlarda afsungar mor bo’lsa agar,
Sening borliging ham shunga yaqindir,
Men seni sog’indim bor bo’lsang agar.

21.

Ayriliq yo’llari qaro bo’lmasa,
Izg’irin, yomg’irlar aro bo’lmasa,
Balki sevmas edim seni bunchalik,
Ilohi, ko’nglimda yaro bo’lmasa.

22.

Bilmadim omonat xayolimni ham,
Mast yurdim, bilmadim zavolimni ham.
Tuproqman, koriga olsinu, mayli,
Mastlardan bersaydi kulolimni ham.

23.

Tunmanam, gar tunga o’xsharsan,
Kunmanam, gar kunga o’xsharsan.
Qanchalik men senga o’xshasam,
Shunchalik sen menga o’xsharsan.

24.

So’zlarim seniki oshkormi, zimdan,
Har ne o’tgan bo’lsa, o’tdi o’zimdan,
Kunu tun boshimga balolar yog’di,
Sendan o’zgalarga aytgan so’zimdan.

25.

Kuyladim, kuylagan bo’lsam havasdan,
Izladim, izlagan bo’lsam havasdan.
Axir, sendan yana ne ham tilarman,
Ilohi, sen olov, qoshingda xasman..

26.

O’tdim yo o’tmadim qaysi ko’chadan,
Qoldim yo qolmadim dunyo ichida.
Izlamoq bo’lsangiz izlangiz meni,
Ko’nglimga yor ishqi tushgan kechadan.