Бу қиз Сирдарё бўйларида туғилган, вояга етган, шоира бўлган; қувноқ қиз, битта гапиради, ўнта кулади, назокати ва маданияти билан ром қилади. Исми ҳам жисмига ва шеърига монанд: Гулчеҳра. Кўп йиллардан бери матбуотда журналистлик қилади, ёзган мақолалари, суҳбат, репортажлари самимияти ва фикрчанлиги билан ўзига тортади (Иброҳим Ғафуровнинг «Лирик қаҳрамонга хат»идан. Уни мана бу саҳифада ўқишингиз мумкин).

Гулчеҳра МУРОДАЛИЕВА
ВА АЛЛОҲ ҒАМ БЕРДИ ВА ТУШДАЙ УМР…
Шеърлар

* * *

Балки осон бўлар, балки енгилроқ –
Қочсангу, бир из ҳам қолмаса. Бироқ…
Тобора шиддатроқ, тобора ингроқ
Бағирни кемирар бир Ишқ-ки, мутлақ.

Қочсангу… бир қушдай учсангу – кетсанг.
Қочсангу шамолдай, – қайтмасанг бир бор!
Қочсангу…
Дунёнинг сўнггига етсанг, –
Интиқ кутиб олса бир ИШҚ-ки – МУТЛАҚ!..

09.06.1994.

* * *

Қорайди сой, – тикилдим, (вой!..) –
Сенинг сокин кўзинг янглиғ.
Ва учдилар атрофимда
Сариқ барглар – мунглиғ-мунглиғ…

Кетай, дедим –
кетдим басир,
Кўнглимда Ишқ – илоҳий сир.
…Турна қайтмас ёбонларга
Ғамларимдан тиклай қаср!

Тўсма шамол
йўлим зинҳор,
Ёмғир бўлай, – бўлай увол!..
Сўз очма: умр – ғарибликдир. –
Тақдир – ҳақдир.
Балким… ҳақдир…

01.04.1990.

* * *

Ва Аллоҳ ғам берди
ва тушдай умр.
Ва ишқдан кўзларим ҳўл бўлди, – хаста.
“Мени майса янглиғ бедор қил, ё Раб!” –
Ва ғаним кўксимга чўкди оҳиста…

Худоё, сен менга Ёрмассан, дедим.
Йўқсан-ку, аслида бормассан, дедим.
Бошимга ёмғирлар қулади, – тоғлар! –
Қошимда йиғлади дарвиш – гадолар…

Ва йиллар ўртади бенур, бекадар.
Ва саҳролар чўкди кўзимга бадар.
“Бир Онам суёлди мени жон бериб…” –
Ва соҳиллар тўлди бўғзимга қадар!..

04.02.1993.

* * *

Тақдирда: бир бора гулламоқ
Ва абад тўкилмоқ, тўкилмоқ…
Саҳарнинг тўлғонган жимлиги
Қўйнида сўкилмоқ. Сўкилмоқ…

Тақдирда: қоқигул баргидай
Кўнгил бор, –
тегинсанг – куясан.
Мен-ку, Ғам тўла бир жомман,
Сен нега суясан?..

08.06.1988.

* * *

Хотирангиз шаккардан ширин…
Мен забонсиз майсадай, – сархуш…
Ёмғир ҳиди келар ҳаводан.

Сизни севмоқ аслида… қийин.
Гар узоқдан соям кўринса
(мени эмас, ўзгани деган)
бу юракни аста яширинг.

Ёмғир ҳиди келар ҳаводан, –
Йўлларимни тўсган итлар ҳам
энди бари, бари… бир тийин!
(Хотирангиз шаккардан ширин)

27.07.1991.

* * *

Биру Борим, дийдорингни кўрарманму?
Аҳмад Яссавий

Юз бургандим дунёларнинг дунёсига,
Одамликнинг пок ҳам нопок рўёсига.
…Қайдин инди бу Ишқ – қалбим гўёсидай? –
Биру Борим, дийдорингни кўрарманму?

Суйганларим кўзларини кўкка тикди,
Суймаганим пойларимга тиғлар экди,
Елкам эзар армон юки, ҳасрат юки…
Биру Борим, дийдорингни кўрарманму?

Қор ёғарми, қуёш чақнар, – юракда сел! –
Волидамсиз кўнглим боғин урмоқда ел…
Хастаманми, девонами – сўрмайди эл,
…Биру Борим, дийдорингни кўрарманму?

Энди менинг падаримдек бузруким йўқ, –
Кўз нурим йўқ, паноҳбоним, ғамхўрим йўқ, –
Қалқон тутсам, кўксим тешар хасча бир ўқ!..
Биру Борим, дийдорингни кўрарманму?

Нолишларим – бандаликнинг хонишлари,
Кўкни тутар юрагимнинг ёнишлари,
Номард ғаним ханжар урди, – оҳ, нишдайин! –
Биру Борим, дийдорингни кўрарманму?

Меҳрим қолди жонга кирган ҳаволарда,
Бандим теккан тупроқ, майса, саболарда,
Бир боғ бўлсам, Ўздан кечсам хазонлардай,
Биру Борим, дийдорингни кўрарманму?

Ишқдан куюб хокистару тупроқ ўлсам,
Ё дарвишдай остонангда урвоқ бўлсам,
Ер қаърида милён йиллар гирён кутсам,
Биру Борим, дийдорингни кўрарманму?..

25.02.2011.

* * *

Эй, кўзим нурига
лангарин ташлаган,
Тоғ кўнглим егану
меҳримни емаган!..

Эй, гулдек юзимга
оёғин қўйганим,
Юрагим бир юлиб
кўксим минг ўйганим…

Ўлмаган қулдайин
баҳорга етдим-ку,
Муздайин ҳасратим
сойларга отдим-ку!

Шамоллар эсдилар,
ёмғири – ҳулволи.
Кўксимда лолалар –
Ишқимнинг уволи.

Юзларин беркитиб
уёлган майсалар
Томимнинг бошида
қанотлар қоқсалар –

Бегона чордоққа
беркитган каби Ғам,
Энди бу Кўнгилга
ортиқча ўзим ҳам…

08.04.2012.

* * *

Кунлар ўтаётир гоҳ хуш, гоҳ нохуш, –
Саҳрога тўкилган томчи сингари.
Карвоннинг ортидан кетяпмиз – сархуш, –
Илгари, илгари…
Илгари!..

Ортда қолар даштлар,
Ортда – фасллар.
Изимизда йиллар гулхани!
Бизда хоҳиш йўқ-ку… Кўринмас ришта
авраб тортаверар илгари…

…Худоё,
кўзимда дардлар гуллади. –
Худоё,
соғинчдан кўмилди йўлим!..
Бўғзимда бир савол – чўғдай – йиллади:
“Гар етсам…
Онамни кўроламанми?
Отам дийдорига тўёламанми?!”

08.03.2016.

* * *

Офтобим ичимдадир, – ганжим ичимда…
Ғанимим – ичимда… Ранжим ичимда.
…Қўйвор, айланайин селга, шамолга, –
Узилган ҳар банди-бандим ичимда!..

Қара, кўнмас дилим анордай ёрдим.
Яна самоларда кўрдим соямни…
Яна… кўксимдаги ханжарни суйдим.
Севдим юрагимдан ўсган тоғларни.

Энди карвонларнинг доди ичимда,
Дардим ичимдадир,
Фарёдим – ичимда!..

Юзимни тонгларга бурган қувончим, –
Соғинчим, овунчим, кўздаги ёшим… –
Энди сизни ташлаб кетайин қандоқ,
Бошимни кундага элтган йўловчим?!

Ахир, дунёимнинг бори ичимда,
Дорим ичимдадир,
Жаллодим – ичимда!..

04.03.2016.

    Bu qiz Sirdaryo bo’ylarida tug’ilgan, voyaga yetgan, shoira bo’lgan; quvnoq qiz, bitta gapiradi, o’nta kuladi, nazokati va madaniyati bilan rom qiladi. Ismi ham jismiga va she’riga monand: Gulchehra. Ko’p yillardan beri matbuotda jurnalistlik qiladi, yozgan maqolalari, suhbat, reportajlari samimiyati va fikrchanligi bilan o’ziga tortadi (Ibrohim G’afurovning «Lirik qahramonga xat»idan. Uni mana bu sahifada o’qishingiz mumkin).

Gulchehra MURODALIYEVA
VA ALLOH G’AM BERDI VA TUSHDAY UMR…
She’rlar

* * *

Balki oson bo’lar, balki yengilroq –
Qochsangu, bir iz ham qolmasa. Biroq…
Tobora shiddatroq, tobora ingroq
Bag’irni kemirar bir Ishq-ki, mutlaq.

Qochsangu… bir qushday uchsangu – ketsang.
Qochsangu shamolday, – qaytmasang bir bor!
Qochsangu…
Dunyoning so’nggiga yetsang, –
Intiq kutib olsa bir ISHQ-ki – MUTLAQ!..

09.06.1994.

* * *

Qoraydi soy, – tikildim, (voy!..) –
Sening sokin ko’zing yanglig’.
Va uchdilar atrofimda
Sariq barglar – munglig’-munglig’…

Ketay, dedim –
ketdim basir,
Ko’nglimda Ishq – ilohiy sir.
…Turna qaytmas yobonlarga
G’amlarimdan tiklay qasr!

To’sma shamol
yo’lim zinhor,
Yomg’ir bo’lay, – bo’lay uvol!..
So’z ochma: umr – g’ariblikdir. –
Taqdir – haqdir.
Balkim… haqdir…

01.04.1990.

* * *

Va Alloh g’am berdi
va tushday umr.
Va ishqdan ko’zlarim ho’l bo’ldi, – xasta.
“Meni maysa yanglig’ bedor qil, yo Rab!” –
Va g’anim ko’ksimga cho’kdi ohista…

Xudoyo, sen menga Yormassan, dedim.
Yo’qsan-ku, aslida bormassan, dedim.
Boshimga yomg’irlar quladi, – tog’lar! –
Qoshimda yig’ladi darvish – gadolar…

Va yillar o’rtadi benur, bekadar.
Va sahrolar cho’kdi ko’zimga badar.
“Bir Onam suyoldi meni jon berib…” –
Va sohillar to’ldi bo’g’zimga qadar!..

04.02.1993.

* * *

Taqdirda: bir bora gullamoq
Va abad to’kilmoq, to’kilmoq…
Saharning to’lg’ongan jimligi
Qo’ynida so’kilmoq. So’kilmoq…

Taqdirda: qoqigul bargiday
Ko’ngil bor, –
teginsang – kuyasan.
Men-ku, G’am to’la bir jomman,
Sen nega suyasan?..

08.06.1988.

* * *

Xotirangiz shakkardan shirin…
Men zabonsiz maysaday, – sarxush…
Yomg’ir hidi kelar havodan.

Sizni sevmoq aslida… qiyin.
Gar uzoqdan soyam ko’rinsa
(meni emas, o’zgani degan)
bu yurakni asta yashiring.

Yomg’ir hidi kelar havodan, –
Yo’llarimni to’sgan itlar ham
endi bari, bari… bir tiyin!
(Xotirangiz shakkardan shirin)

27.07.1991.

* * *

Biru Borim, diydoringni ko’rarmanmu?
Ahmad Yassaviy

Yuz burgandim dunyolarning dunyosiga,
Odamlikning pok ham nopok ro’yosiga.
…Qaydin indi bu Ishq – qalbim go’yosiday? –
Biru Borim, diydoringni ko’rarmanmu?

Suyganlarim ko’zlarini ko’kka tikdi,
Suymaganim poylarimga tig’lar ekdi,
Yelkam ezar armon yuki, hasrat yuki…
Biru Borim, diydoringni ko’rarmanmu?

Qor yog’armi, quyosh chaqnar, – yurakda sel! –
Volidamsiz ko’nglim bog’in urmoqda yel…
Xastamanmi, devonami – so’rmaydi el,
…Biru Borim, diydoringni ko’rarmanmu?

Endi mening padarimdek buzrukim yo’q, –
Ko’z nurim yo’q, panohbonim, g’amxo’rim yo’q, –
Qalqon tutsam, ko’ksim teshar xascha bir o’q!..
Biru Borim, diydoringni ko’rarmanmu?

Nolishlarim – bandalikning xonishlari,
Ko’kni tutar yuragimning yonishlari,
Nomard g’anim xanjar urdi, – oh, nishdayin! –
Biru Borim, diydoringni ko’rarmanmu?

Mehrim qoldi jonga kirgan havolarda,
Bandim tekkan tuproq, maysa, sabolarda,
Bir bog’ bo’lsam, O’zdan kechsam xazonlarday,
Biru Borim, diydoringni ko’rarmanmu?

Ishqdan kuyub xokistaru tuproq o’lsam,
YO darvishday ostonangda urvoq bo’lsam,
Yer qa’rida milyon yillar giryon kutsam,
Biru Borim, diydoringni ko’rarmanmu?..

25.02.2011.

* * *

Ey, ko’zim nuriga
langarin tashlagan,
Tog’ ko’nglim yeganu
mehrimni yemagan!..

Ey, guldek yuzimga
oyog’in qo’yganim,
Yuragim bir yulib
ko’ksim ming o’yganim…

O’lmagan quldayin
bahorga yetdim-ku,
Muzdayin hasratim
soylarga otdim-ku!

Shamollar esdilar,
yomg’iri – hulvoli.
Ko’ksimda lolalar –
Ishqimning uvoli.

Yuzlarin berkitib
uyolgan maysalar
Tomimning boshida
qanotlar qoqsalar –

Begona chordoqqa
berkitgan kabi G’am,
Endi bu Ko’ngilga
ortiqcha o’zim ham…

08.04.2012.

* * *

Kunlar o’tayotir goh xush, goh noxush, –
Sahroga to’kilgan tomchi singari.
Karvonning ortidan ketyapmiz – sarxush, –
Ilgari, ilgari…
Ilgari!..

Ortda qolar dashtlar,
Ortda – fasllar.
Izimizda yillar gulxani!
Bizda xohish yo’q-ku… Ko’rinmas rishta
avrab tortaverar ilgari…

…Xudoyo,
ko’zimda dardlar gulladi. –
Xudoyo,
sog’inchdan ko’mildi yo’lim!..
Bo’g’zimda bir savol – cho’g’day – yilladi:
“Gar yetsam…
Onamni ko’rolamanmi?
Otam diydoriga to’yolamanmi?!”

08.03.2016.

* * *

Oftobim ichimdadir, – ganjim ichimda…
G’animim – ichimda… Ranjim ichimda.
…Qo’yvor, aylanayin selga, shamolga, –
Uzilgan har bandi-bandim ichimda!..

Qara, ko’nmas dilim anorday yordim.
Yana samolarda ko’rdim soyamni…
Yana… ko’ksimdagi xanjarni suydim.
Sevdim yuragimdan o’sgan tog’larni.

Endi karvonlarning dodi ichimda,
Dardim ichimdadir,
Faryodim – ichimda!..

Yuzimni tonglarga burgan quvonchim, –
Sog’inchim, ovunchim, ko’zdagi yoshim… –
Endi sizni tashlab ketayin qandoq,
Boshimni kundaga eltgan yo’lovchim?!

Axir, dunyoimning bori ichimda,
Dorim ichimdadir,
Jallodim – ichimda!..

04.03.2016.