5-октябрь — Устоз Нажмиддин Комилов туғилган кун!
Бир воқеани доим эслаб тураман. Бу воқеа раҳматли Озод Шарафиддинов у кишини қандай юксак эҳтиром билан эътироф қилганига далил бўлади. Олимнинг “Тасаввуф” деган китоби эълон қилиниб, халқ ичида кенг тарқалган вақт эди. Озод Шарафиддинов домланинг ҳам бир китоби нашрдан чиқиб, бир куни шу китобнинг тақдимоти бўлди. Шу сабаб билан бир қанча олим ва ижодкорлар у кишининг уйига борган эдик. Озод ака ногирон эдилар, баъзан оромкурсида амаллаб ўтирардилар. Нажмиддин Комилов кириб келганида, устоз Озод акада у кишига нисбатан ҳурмат аломатлари ва муносиб қаршилаб олиш иштиёқи пайдо бўлди. Кўришган вақтларида дарҳол Нажмиддин Комиловнинг қўлларини тутиб, кўзларига сурдилар ва: “Шу “Тасаввуф” китобини ёзган қўлларингизни бир кўзларимга сурай”, дедилар.
Эркин Воҳидов
ТЕРАН ДАРЁ СОКИН ОҚАР...
Бир суҳбатда Алихонтўра Соғуний ҳазратларидан Алишер Навоийнинг бир байтини шарҳлаб беришларини сўраган эдим:
Ашрақат мин акси шамсил-каъси анворул-ҳудо,
“Ёр аксин майда кўр”, деб жомдин чиқди садо.
Май нима? Жом нима? Ёр нима? Ваҳдат нима? У зот шу истилоҳларни бир соат шарҳлаган эдилар. Ўшанда Навоийнинг нақадар буюклигига ва Соғунийнинг улуғ олим эканликларига тан берганман. Энди ўйласам, ўша мажлисда тасаввуф ҳақида бир маъруза бўлган экан.
У киши суҳбатда “тасаввуф” сўзини ишлатиб: “Тасаввуфни билмаган киши, унга теран кирмаган киши Навоийни била олмайди”, деган эдилар. Мен бу сўзнинг маъносини яна кўп йиллар ўтгандан кейин, “Ёшлик” журналида Нажмиддин Комиловнинг “Тимсоллар тимсоли” мақоласи эълон этилгач, теранроқ англадим.
У даврда одамлар тасаввуфни яхши билмаган, Қуръон ва ҳадисларни яхши билмаган. Бу маънавий хазиналарнинг билимдони бўлган Алихонтўра Соғуний эса бизга ёндош қўшни маҳаллада турардилар, ўша шарҳ ва суҳбатларни у кишидан ёзиб олмаганимга, яна бориб, такрор-такрор мурожаат этмаганимга кўп афсусланаман.
Шўро даврида, у кишининг сиёсий мавқеи жиҳатидан, уйларига бориш, у киши билан суҳбатда бўлиш ҳисоб-китобда бўлар эди. Яъни, ҳаётлари шўро сиёсатчилари томонидан назоратда тутилар эди.
Биз ўша маҳалда тасаввуфни гарчи ақлимиз, илмимиз билан тушуниб етмаган бўлсак-да, лекин тасаввуф оламини кўнглимиз билан ҳис қилиб, қалбимиз билан уни англаганмиз.
Ҳолбуки, биз “дин афъюндир”, деган даврда яшаганмиз. У замонда ҳазрат Навоий ижодини ҳаққоний талқин қилишнинг иложи бўлган эмас. Гўё Навоий динга зарба берган, руҳонийларга қарши курашган, деб тушунтирилар эди. Ваҳоланки, Навоийнинг бутун ҳаёти ижтимоий ҳаёт билан қанчалик боғлиқ бўлса, дин билан, Қуръон ва ҳадис билан ҳам шунчалик боғлиқ бўлган экан. Навоий барча ғазал ва достонларида мажозий ишқни восита қилиб, илоҳий ишқни куйлаган экан!
Ана шу борадаги маърифий ишларни биринчи бўлиб бошлаган, аввал мақолалар ёзиб, жиддий ишлар олиб борган, кейин эса икки жилдлик “Тасаввуф” китобини ёзиб, сўнг ҳазрат Навоий асарлари шарҳига киришиб, маънолар оламига жиддий сафар қилган олим Нажмиддин Комилов бўлди.
Нажмиддин Комиловнинг мумтоз шеъриятнинг ирфоний маънолари ҳақидаги илк мақолаларини ўқиганимизда биз учун янги бир олам очилгандек бўлган эди.
Нажмиддин Комиловни Тошкент илмий, адабий муҳитидаги ҳар бир ижодкор ёки олим чин дилдан ҳурмат қилар, у кишининг илмий-маънавий салоҳиятига, фазилатига тан берар эди.
Бир воқеани доим эслаб тураман. Бу воқеа раҳматли Озод Шарафиддинов у кишини қандай юксак эҳтиром билан эътироф қилганига далил бўлади. Олимнинг “Тасаввуф” деган китоби эълон қилиниб, халқ ичида кенг тарқалган вақт эди. Озод Шарафиддинов домланинг ҳам бир китоби нашрдан чиқиб, бир куни шу китобнинг тақдимоти бўлди. Шу сабаб билан бир қанча олим ва ижодкорлар у кишининг уйига борган эдик. Озод ака ногирон эдилар, баъзан оромкурсида амаллаб ўтирардилар. Нажмиддин Комилов кириб келганида, устоз Озод акада у кишига нисбатан ҳурмат аломатлари ва муносиб қаршилаб олиш иштиёқи пайдо бўлди. Кўришган вақтларида дарҳол Нажмиддин Комиловнинг қўлларини тутиб, кўзларига сурдилар ва: “Шу “Тасаввуф” китобини ёзган қўлларингизни бир кўзларимга сурай”, дедилар.
Нажмиддин Комилов шунчалик улуғ олим бўлишига қарамай, ниҳоятда камтарин инсон эди, у киши бу ҳолдан жуда хижолат бўлиб: “Сиздан ўрганганмиз, сиздан ўрганганмиз”, дея олди, холос. Камтарликдан у кишининг ана шундай хижолат бўлганини кўрганмиз.
У киши ниҳоятда камгап, сокин, заруриятсиз гапга аралашавермас, кўпроқ эшитишга мойил эди. Зотан, “Чуқур дарё сокин оқади”, деган гап бор. Нажмиддин Комиловнинг камтаринлигини ўйласам, бир форсий байт эсимга келади:
Нокасе гар аз касе боло нишинад айб нест,
Чунки хас дар рўйи об-у, зери дарё гавҳар аст.
Яъни: “Агар нокас касдан юқорида ўтирса, айб эмас. Чунки хас сувнинг юзида-ю, гавҳар дарёнинг тагида бўлади”.
Нажмиддин Комилов чинакам гавҳар эди, қалби гавҳар, илми, тафаккури гавҳар эди. Халққа гавҳар улашиб яшаган инсон эди.
Яна муҳим бир тарихий воқеани эслайман. 2000 йил бошида Олий Мажлис иккинчи чақириқ халқ депутатларининг ташкилий йиғини бўлди. Ўша мажлисга белгиланган расмий тартибга кўра, Республика Сайлов комиссиясининг раиси сифатида Нажмиддин Комилов раислик қилдилар.
Шунда муҳтарам Президентимиз нутқ сўзлаб, нутқнинг маънавият ҳақидаги қисмида ҳазрат Алишер Навоийдан сўз очдилар ва ижодкор депутатларга юзланиб, ҳозирги инсонлар нима учун Навоий ижодини теран англамаслигини, ҳазрат Навоийни халққа англатиш учун нималар қилиш кераклигини айтиб, ўртага фикр ташладилар, депутатларни шу ҳақда фикрлашга чақирдилар. Ўшанда энг билимдон зот Нажмиддин Комилов эди. Ҳазрат Навоийни халққа англатиш йўлида энг кўп хизмат қилаётган киши ҳам шу киши эди. Бу дард – мумтоз адабиётни, Алишер Навоий ижодини халққа англатиш, етказиш дарди ҳаммамизнинг дардимиз ва энг аввал Нажмиддин Комиловнинг дарди эди. Лекин у киши бир оғиз ҳам сўз айтгани йўқ. Сукут сақлаб, тафаккур қилиб ўтирди. Биз ўшанда Нажмиддин Комиловнинг айтмаган сўзларини, қалбидан кечираётган туйғуларини юракдан ҳис этиб турганмиз. Ўшанда энг ақлли гапни ҳам, энг тўғри жавобни ҳам у киши айтиши мумкин эди. Лекин азбаройи камтарлиги ва одоби жиҳатидан сукутни раво кўрди.
Ўз ўрнида айтмоғимиз лозимки, Навоий ижодини одамларга англатиш, Навоий маърифатини халққа етказиш кўп йилларни талаб қилиши турган гап эди. Чунки кўп йиллар давомида халқимизда Навоийдан узоқлашиш ҳолати пайдо бўлган эди.
* * *
Нажмиддин Комилов ўз даврида жуда кам қолган уламоларнинг, яъни мадраса кўрган катта шайх ва алломаларнинг суҳбатини олган, улардан илм, одоб ва маърифат ўрганган киши эди; мустамлака замонида қадри бўлмаса ҳам, лекин комил инсонлар ичида жуда улуғ ҳурматга эга бўлган чинакам буюк уламолар билан бирга бўлиб, улардан дарс эшитган шахс эди. Масалан, у кишининг марҳум Қутбиддин Эшон Муҳитдинов билан бўлган муносабатлари, илмий-маърифий ҳамкорликлари илм аҳли учун ибратдир. Қутбиддин Эшон Муҳитдинов билан яқиндан таниш бўлмаган эсам-да, ул зотни яхши билганман. У киши – филология фанлари номзоди, Ўзбекистон Фанлар академияси Тил ва адабиёт институтининг маънавий илмий ходими, ҳазрати Алишер Навоий асарлари тилининг изоҳли луғатини тузишда фаол иштирок этган, айниқса, “Хамса” каби муҳташам асар луғатини тузишда жонбозлик кўрсатган асл аллома эдилар. Тўрт жилддан иборат “Алишер Навоий асарлари тилининг изоҳли луғати” китобининг биринчи жилди тақдимида у зотнинг шаънида “Қ.Муҳитдинов – “Хамса” асарининг луғатини тузган, форсий, арабий сўз, ибора ва байтларнинг изоҳи ва талқинини берган, “Мажолисун-нафоис”, “Лисонут-тайр” асарларининг луғатларини тузишда иштирок этган”, деган сўзлар ёзилган. Шунингдек, у киши тарихий силсилаи шарифдан ўрин олган Нақшбандия шайхи, мумтоз шеърият донишманди, Қуръон ва ҳадис билимдони, Навоий ижодидаги маърифий нуқталарни англаш ва англатишда, луғатлар учун таржима қилиб беришда беназир бўлган шахс эдилар. Шўро даврида, мустамлака истибдоди ичида соқолли, чакмонли, дўппили бир шахснинг фан арбоби бўлиши, илмий анжуманларда иштирок этиши, Фанлар академиясида хизмат қилиши осон гап эмас эди! Бу деярли бўлиши мумкин бўлмаган бир иш эди. Ўз истеъдоди ва маърифатини баҳоли қудрат халққа етказишга йўл топган ана шундай зотнинг назарига тушиш, муҳаббатига эришиш, ташқи ҳовлисида яшаш, суҳбатидан тўйиб-тўйиб баҳраманд бўлиш Нажмиддин Комиловдек тафаккур соҳибига насиб этди. Бу маънавий баҳралари, эришган илмлари натижаси ўлароқ, олим мумтоз шеъриятнинг тасаввуфий маъноларини кашф этди, ҳазрат Навоий ижодини теран тимсоллари билан таҳлил қилди, яхши шогирдлар етиштирди, ўзидан яхши китобларни ёдгор қолдирди.
Биз у киши билан турли анжуманларда, давраларда, кўпчилик ичида кўришиб турар эдик, лекин, афсус, алоҳида суҳбатларда бўлмас эдик.
Ўша даврда халқ ичида машҳур бўлган “Алишер Навоий” спектаклида эсда қолгулик сатрлар бор эди, Нажмиддин Комиловни сўнгги йўлга кузатиб, қабрга қўяётганларида шу сатрлар хаёлимдан ўтди:
Етишгунча яна ул сингари зот,
Қуёш юз йилча нур сочмоғи лозим,
Баҳор юз карра гул очмоғи лозим…
Нажмиддин Комилов етук асарлари билан ўз номини боқийликка хатлаб кетди.
Манба: «Китоб дунёси» газетаси
5-oktyabr — Ustoz Najmiddin Komilov tug‘ilgan kun!
Bir voqeani doim eslab turaman. Bu voqea rahmatli Ozod Sharafiddinov u kishini qanday yuksak ehtirom bilan e’tirof qilganiga dalil bo‘ladi. Olimning “Tasavvuf” degan kitobi e’lon qilinib, xalq ichida keng tarqalgan vaqt edi. Ozod Sharafiddinov domlaning ham bir kitobi nashrdan chiqib, bir kuni shu kitobning taqdimoti bo‘ldi. Shu sabab bilan bir qancha olim va ijodkorlar u kishining uyiga borgan edik. Ozod aka nogiron edilar, ba’zan oromkursida amallab o‘tirardilar. Najmiddin Komilov kirib kelganida, ustoz Ozod akada u kishiga nisbatan hurmat alomatlari va munosib qarshilab olish ishtiyoqi paydo bo‘ldi. Ko‘rishgan vaqtlarida darhol Najmiddin Komilovning qo‘llarini tutib, ko‘zlariga surdilar va: “Shu “Tasavvuf” kitobini yozgan qo‘llaringizni bir ko‘zlarimga suray”, dedilar.
Erkin Vohidov
TЕRAN DARYO SOKIN OQAR…
Bir suhbatda Alixonto‘ra Sog‘uniy hazratlaridan Alisher Navoiyning bir baytini sharhlab berishlarini so‘ragan edim:
Ashraqat min aksi shamsil-ka’si anvorul-hudo,
“Yor aksin mayda ko‘r”, deb jomdin chiqdi sado.
May nima? Jom nima? Yor nima? Vahdat nima? U zot shu istilohlarni bir soat sharhlagan edilar. O‘shanda Navoiyning naqadar buyukligiga va Sog‘uniyning ulug‘ olim ekanliklariga tan berganman. Endi o‘ylasam, o‘sha majlisda tasavvuf haqida bir ma’ruza bo‘lgan ekan.
U kishi suhbatda “tasavvuf” so‘zini ishlatib: “Tasavvufni bilmagan kishi, unga teran kirmagan kishi Navoiyni bila olmaydi”, degan edilar. Men bu so‘zning ma’nosini yana ko‘p yillar o‘tgandan keyin, “Yoshlik” jurnalida Najmiddin Komilovning “Timsollar timsoli” maqolasi e’lon etilgach, teranroq angladim.
U davrda odamlar tasavvufni yaxshi bilmagan, Qur’on va hadislarni yaxshi bilmagan. Bu ma’naviy xazinalarning bilimdoni bo‘lgan Alixonto‘ra Sog‘uniy esa bizga yondosh qo‘shni mahallada turardilar, o‘sha sharh va suhbatlarni u kishidan yozib olmaganimga, yana borib, takror-takror murojaat etmaganimga ko‘p afsuslanaman.
Sho‘ro davrida, u kishining siyosiy mavqei jihatidan, uylariga borish, u kishi bilan suhbatda bo‘lish hisob-kitobda bo‘lar edi. Ya’ni, hayotlari sho‘ro siyosatchilari tomonidan nazoratda tutilar edi.
Biz o‘sha mahalda tasavvufni garchi aqlimiz, ilmimiz bilan tushunib yetmagan bo‘lsak-da, lekin tasavvuf olamini ko‘nglimiz bilan his qilib, qalbimiz bilan uni anglaganmiz.
Holbuki, biz “din af’yundir”, degan davrda yashaganmiz. U zamonda hazrat Navoiy ijodini haqqoniy talqin qilishning iloji bo‘lgan emas. Go‘yo Navoiy dinga zarba bergan, ruhoniylarga qarshi kurashgan, deb tushuntirilar edi. Vaholanki, Navoiyning butun hayoti ijtimoiy hayot bilan qanchalik bog‘liq bo‘lsa, din bilan, Qur’on va hadis bilan ham shunchalik bog‘liq bo‘lgan ekan. Navoiy barcha g‘azal va dostonlarida majoziy ishqni vosita qilib, ilohiy ishqni kuylagan ekan!
Ana shu boradagi ma’rifiy ishlarni birinchi bo‘lib boshlagan, avval maqolalar yozib, jiddiy ishlar olib borgan, keyin esa ikki jildlik “Tasavvuf” kitobini yozib, so‘ng hazrat Navoiy asarlari sharhiga kirishib, ma’nolar olamiga jiddiy safar qilgan olim Najmiddin Komilov bo‘ldi.
Najmiddin Komilovning mumtoz she’riyatning irfoniy ma’nolari haqidagi ilk maqolalarini o‘qiganimizda biz uchun yangi bir olam ochilgandek bo‘lgan edi.
Najmiddin Komilovni Toshkent ilmiy, adabiy muhitidagi har bir ijodkor yoki olim chin dildan hurmat qilar, u kishining ilmiy-ma’naviy salohiyatiga, fazilatiga tan berar edi.
Bir voqeani doim eslab turaman. Bu voqea rahmatli Ozod Sharafiddinov u kishini qanday yuksak ehtirom bilan e’tirof qilganiga dalil bo‘ladi. Olimning “Tasavvuf” degan kitobi e’lon qilinib, xalq ichida keng tarqalgan vaqt edi. Ozod Sharafiddinov domlaning ham bir kitobi nashrdan chiqib, bir kuni shu kitobning taqdimoti bo‘ldi. Shu sabab bilan bir qancha olim va ijodkorlar u kishining uyiga borgan edik. Ozod aka nogiron edilar, ba’zan oromkursida amallab o‘tirardilar. Najmiddin Komilov kirib kelganida, ustoz Ozod akada u kishiga nisbatan hurmat alomatlari va munosib qarshilab olish ishtiyoqi paydo bo‘ldi. Ko‘rishgan vaqtlarida darhol Najmiddin Komilovning qo‘llarini tutib, ko‘zlariga surdilar va: “Shu “Tasavvuf” kitobini yozgan qo‘llaringizni bir ko‘zlarimga suray”, dedilar.
Najmiddin Komilov shunchalik ulug‘ olim bo‘lishiga qaramay, nihoyatda kamtarin inson edi, u kishi bu holdan juda xijolat bo‘lib: “Sizdan o‘rganganmiz, sizdan o‘rganganmiz”, deya oldi, xolos. Kamtarlikdan u kishining ana shunday xijolat bo‘lganini ko‘rganmiz.
U kishi nihoyatda kamgap, sokin, zaruriyatsiz gapga aralashavermas, ko‘proq eshitishga moyil edi. Zotan, “Chuqur daryo sokin oqadi”, degan gap bor. Najmiddin Komilovning kamtarinligini o‘ylasam, bir forsiy bayt esimga keladi:
Nokase gar az kase bolo nishinad ayb nest,
Chunki xas dar ro‘yi ob-u, zeri daryo gavhar ast.
Ya’ni: “Agar nokas kasdan yuqorida o‘tirsa, ayb emas. Chunki xas suvning yuzida-yu, gavhar daryoning tagida bo‘ladi”.
Najmiddin Komilov chinakam gavhar edi, qalbi gavhar, ilmi, tafakkuri gavhar edi. Xalqqa gavhar ulashib yashagan inson edi.
Yana muhim bir tarixiy voqeani eslayman. 2000 yil boshida Oliy Majlis ikkinchi chaqiriq xalq deputatlarining tashkiliy yig‘ini bo‘ldi. O‘sha majlisga belgilangan rasmiy tartibga ko‘ra, Respublika Saylov komissiyasining raisi sifatida Najmiddin Komilov raislik qildilar.
Shunda muhtaram Prezidentimiz nutq so‘zlab, nutqning ma’naviyat haqidagi qismida hazrat Alisher Navoiydan so‘z ochdilar va ijodkor deputatlarga yuzlanib, hozirgi insonlar nima uchun Navoiy ijodini teran anglamasligini, hazrat Navoiyni xalqqa anglatish uchun nimalar qilish kerakligini aytib, o‘rtaga fikr tashladilar, deputatlarni shu haqda fikrlashga chaqirdilar. O‘shanda eng bilimdon zot Najmiddin Komilov edi. Hazrat Navoiyni xalqqa anglatish yo‘lida eng ko‘p xizmat qilayotgan kishi ham shu kishi edi. Bu dard – mumtoz adabiyotni, Alisher Navoiy ijodini xalqqa anglatish, yetkazish dardi hammamizning dardimiz va eng avval Najmiddin Komilovning dardi edi. Lekin u kishi bir og‘iz ham so‘z aytgani yo‘q. Sukut saqlab, tafakkur qilib o‘tirdi. Biz o‘shanda Najmiddin Komilovning aytmagan so‘zlarini, qalbidan kechirayotgan tuyg‘ularini yurakdan his etib turganmiz. O‘shanda eng aqlli gapni ham, eng to‘g‘ri javobni ham u kishi aytishi mumkin edi. Lekin azbaroyi kamtarligi va odobi jihatidan sukutni ravo ko‘rdi.
O‘z o‘rnida aytmog‘imiz lozimki, Navoiy ijodini odamlarga anglatish, Navoiy ma’rifatini xalqqa yetkazish ko‘p yillarni talab qilishi turgan gap edi. Chunki ko‘p yillar davomida xalqimizda Navoiydan uzoqlashish holati paydo bo‘lgan edi.
* * *
Najmiddin Komilov o‘z davrida juda kam qolgan ulamolarning, ya’ni madrasa ko‘rgan katta shayx va allomalarning suhbatini olgan, ulardan ilm, odob va ma’rifat o‘rgangan kishi edi; mustamlaka zamonida qadri bo‘lmasa ham, lekin komil insonlar ichida juda ulug‘ hurmatga ega bo‘lgan chinakam buyuk ulamolar bilan birga bo‘lib, ulardan dars eshitgan shaxs edi. Masalan, u kishining marhum Qutbiddin Eshon Muhitdinov bilan bo‘lgan munosabatlari, ilmiy-ma’rifiy hamkorliklari ilm ahli uchun ibratdir. Qutbiddin Eshon Muhitdinov bilan yaqindan tanish bo‘lmagan esam-da, ul zotni yaxshi bilganman. U kishi – filologiya fanlari nomzodi, O‘zbekiston Fanlar akademiyasi Til va adabiyot institutining ma’naviy ilmiy xodimi, hazrati Alisher Navoiy asarlari tilining izohli lug‘atini tuzishda faol ishtirok etgan, ayniqsa, “Xamsa” kabi muhtasham asar lug‘atini tuzishda jonbozlik ko‘rsatgan asl alloma edilar. To‘rt jilddan iborat “Alisher Navoiy asarlari tilining izohli lug‘ati” kitobining birinchi jildi taqdimida u zotning sha’nida “Q.Muhitdinov – “Xamsa” asarining lug‘atini tuzgan, forsiy, arabiy so‘z, ibora va baytlarning izohi va talqinini bergan, “Majolisun-nafois”, “Lisonut-tayr” asarlarining lug‘atlarini tuzishda ishtirok etgan”, degan so‘zlar yozilgan. Shuningdek, u kishi tarixiy silsilai sharifdan o‘rin olgan Naqshbandiya shayxi, mumtoz she’riyat donishmandi, Qur’on va hadis bilimdoni, Navoiy ijodidagi ma’rifiy nuqtalarni anglash va anglatishda, lug‘atlar uchun tarjima qilib berishda benazir bo‘lgan shaxs edilar. Sho‘ro davrida, mustamlaka istibdodi ichida soqolli, chakmonli, do‘ppili bir shaxsning fan arbobi bo‘lishi, ilmiy anjumanlarda ishtirok etishi, Fanlar akademiyasida xizmat qilishi oson gap emas edi! Bu deyarli bo‘lishi mumkin bo‘lmagan bir ish edi. O‘z iste’dodi va ma’rifatini baholi qudrat xalqqa yetkazishga yo‘l topgan ana shunday zotning nazariga tushish, muhabbatiga erishish, tashqi hovlisida yashash, suhbatidan to‘yib-to‘yib bahramand bo‘lish Najmiddin Komilovdek tafakkur sohibiga nasib etdi. Bu ma’naviy bahralari, erishgan ilmlari natijasi o‘laroq, olim mumtoz she’riyatning tasavvufiy ma’nolarini kashf etdi, hazrat Navoiy ijodini teran timsollari bilan tahlil qildi, yaxshi shogirdlar yetishtirdi, o‘zidan yaxshi kitoblarni yodgor qoldirdi.
Biz u kishi bilan turli anjumanlarda, davralarda, ko‘pchilik ichida ko‘rishib turar edik, lekin, afsus, alohida suhbatlarda bo‘lmas edik.
O‘sha davrda xalq ichida mashhur bo‘lgan “Alisher Navoiy” spektaklida esda qolgulik satrlar bor edi, Najmiddin Komilovni so‘nggi yo‘lga kuzatib, qabrga qo‘yayotganlarida shu satrlar xayolimdan o‘tdi:
Yetishguncha yana ul singari zot,
Quyosh yuz yilcha nur sochmog‘i lozim,
Bahor yuz karra gul ochmog‘i lozim…
Najmiddin Komilov yetuk asarlari bilan o‘z nomini boqiylikka xatlab ketdi.
Manba: «Kitob dunyosi» gazetasi
